Acts 22

1—Ellailhonoho elialheng’a kakpota nhan eniapma’ak asmak’ak angvasennalhko ehenkek alhenek napaqtavek ketlhengkap —lhta aptak Pablo.

2Apkeltakmelkasave panke lhta apkellailhemo enenlhet’avok ma’a neksa apkellengai’a hebreo apaivoma apkeliatekama Pablo, lhta aptak mokhom Pablo:

3—Ko’o nak asto judio apanke, asteiaianlha na temma Tarso akieto konne iokhalhma Cilicia. Asvanekanlha nke’e Jerusalen anak, ka heltameskama nentalheskama hengetlhekmoskama apvesai’a Gamaliel, ka heltameskama ko’o m’a askeliehekho ley apanko’ok nelieihengka. Vanlha mota askelienlhaneiakmo aliehekhok Eniapom Neten, ka aptaiangkolha nak ketlhengkap. 4Asmenlhenaikama lhta mota lhennenga aklhamakho apkellavakha apkellelto apkelvesai’a Alhnankok Amai kakpota annapok ma’a. Askelpathetmo lhta nhan ngkelvana’ak kakpota nhan apkelennava’ak askellaklhengkeskekho nhan nenmammalhkelha. 5Apkeliavek apiav’akha sacerdote kakpota nhan metno apketko’ok have niapak anke astakha lhkek alheianma ngkanek hellaikamo lhta mota vakkahak kakpota asakhak ma’a apkakhangkelha’ apkelemhama apmaniaie’ judios ko Damasco kakpota hellangkoho’ alpathetek apkellelto Jesucristo apkennemolhema kakpota nhan alaqlantak hengke’e Jerusalen kakpota alleltekpoma apiempeiok.

6Koka neksa alhengama lhta amai akmaiangko Damasco, malha las 12 katelho, mpelapkaske lhta akteiapvo’o apkelienmoma akiennaktema aniem’o neten, heialhiengkakme lhta m’a. 7Ka asteiakmo lhta nalhepop, asleng’o lhta nhan nema aliatekama, lhta ntak heiano:

“Saulo, Saulo ¿se lha kto heiaqmasengka nak ke, he?”, lhta ntak ma’a.

8Ka askatemmongka lhta m’a, lhta stak askano:

“¿Se lha lheiap ke, Apveske?”, lhta stak.

Ka heiatemmongka lhta nema aliatekama m’a, lhta ntak:

“Jesús ko Nazaret ko’o, heiaqmaseiangka nak lheiap”, lhta ntak.

9Koka asketlhelhma’ak alhta apkelvetai’ak na apommatma’, ma lhtoka ellengak nema aliatekama m’a. 10Ka askenmalhnengka lhta mokhom nema aliatekama, lhta stak:

“¿Se lha apkelto alanak ke, Apveske, he?”, lhta stak.

Ka heiatemmongka lhta mokhom nema aliatekama m’a, lhta ntak:

“Etnemekha neten, eniakha ta natemma Damasco, hata nhan ngkolhek altennaso apkeltakpelha ta etnek ma’a”, lhta ntak nema aliatekama heiano m’a.

11Ma lhta ko’o angvapvana niekhe aniakhak ma’a, mamma lhta songkek ehaqto’ok aniem’o lhta m’a annapma ehaqto’ok apommatma akiennaktema lhta tekhelhet ko’o m’a. Ka apmo lhta emek alhelhma, heiantemakho akvakho natemma Damasco.

12Apne lhta m’a lhema enenlhet apvesai’a Ananias, apiave panke lhta lhma, apkeliehekho lhta mota ley Moises, apketlheianme lhta mota enenlhet ko Damasco apiamolhma m’a. 13Ka apvo’o lhta asnakha m’a Ananias lhta aptak heiano:

“Eialheng Saulo, etek hata lhma lheiap kolhvave nak”, lhta aptak.

Kolhvavek anke lhta asvetakha lhma ko’o m’a, asvet’o lhta nehaqtek ankek apiokho Ananias. 14Lhta aptak mokhom heiano:

“Eniapom Neten apto apveske apanko’ok nelieihengka apkeliekiesak lheiap kakpota etneskesek apmak’akha ta etnek ma’a, kakpota etak ma’a apto apeivomo, eniailhok hata nhan aptakha la apaivoma. 15Emhangko ta nhan lheiap alhma nkek ham kakpota elhenek aktemakha qaselha apvetai’a kanhan aplengai’a. 16Hai, eniaqheta mota apteniai’a nema aklavkeskama konne iemmen, nkalhnakse ta ngkollatsekama apvalhok, evenama ta apvesai’a Apveske m’a”, lhta aptak heiano m’a Ananias.

17Netamen alhta m’a astaqho mokhom Jerusalen, asmeiakho nhan Eniapom Neten apnemakha. Ka askenmalhno lhta nhan ma’a, akvet’o lhta nhan ehaqtek 18Apveske lhta aptak heiano:

“Eniakhetamo ta etiepok na temma Jerusalen anak ngkanek mellailhek hata enenlhet’avok hengke’e aktemakha hengetlhekmoskama aniem’o ko’o alhenammalhka”, lhta aptak heiano.

19Ka askatemmongka lhta m’a, lhta stak:

“Apveske, apkeliavek aplhamakho enenlhet’avok asmeiekho lhta mota askeliaikama apkellelto meliaskeiam lheiap akieto apkaqnekhelha la judios. Ka askelpathetmo lhta nhan ma’a, askeltekpoiangka nhan, allaqlhengkesek na nengaqlhengkasemmalhkelha. 20Apkeliavek na enenlhet asne lhta nhan ko lha m’a akieto lhta apkennapakha enenlhet Esteban, apto lhta apkasennaikama lheiap, aplhenaikama lhta nhan apvesai’a lheiap ma’a. Nlekave lhta nhan evalhok apkennapo Esteban ma’a, askeltaqmelkaskaske lhta nhan apkelaqlammap apkellelto lhta apkennapma m’a hellangkongvai’a”, lhta stak askano m’a.

21Koka lhta aptak heiano mokhom Apveske:

“Eniakha panke’, askeltave ko’o emhangkok lheiap mokhek ankek mo’ok apkellavakha apkakhaiangkolha nak metnangko nak judios”, lhta aptak heiano.

Apkemhama apmanie soldados apathetma Pablo

22Ma lhta nkomak’ak ellailho mokhom enenlhet’avok ma’a apkeltennaikama Pablo, ka alpaihengka lhta apatno’ok ma’a, lhta aptangkok:

—Ellaqha, mangelelto angelvetak mokhom enenlhet anak ham —lhta aptangkok ma’a.

23Nheklhe lhta apiapqalhekama enenlhet’avok ma’a, apkelelpalhnelhkangka lhta nhan apkelentalhnema lhepop aktek, ka apkelhakho lhta nhan neten lhepop anek aniem’o annatheskama m’a. 24Kolhvavek ankek lhta apveske soldados apkelto ngkolhek aktalhneso Pablo konne apkakhaiangkelha kempokhakme kakpota ngkolhek aliaqpelhketangka elheianvomok na aktakha akvetammalhka akmaska m’a. 25Apkelpeneskangkek nak apnaktetema Pablo m’a, ka apkenmahai’o lhnak eleliaqpelhketama etekpong Pablo m’a, koka lhna aptemak Pablo:

—¡Ellaielh sekhe! Romano ko’o, mangkoltemok ley heltekpoma metka nema heiekpelkema ko’o —lhna lhta aptemak Pablo.

26Aplengai’ak na lhta capitan, apmeiekho lhna lhta apnakha apveske apankek ma’a, lhna lhta aptemak apkanemo:

“¡Eniaho ta apmak’akha nak etnek apkelanei’o enenlhet anak, romano lhnak lhek ham!”

27Kolhvavek ankek nak apmeiekha apveske apanke apnakha Pablo, ka apkelmalhneiangka lhna lhta m’a, lhna lhta aptemak:

—¿Have i’e niapak romano lheiap, he? —lhna lhta aptemak.

—Hai, have niapak —lhna lhta aptemak apkatemmoiangka Pablo.

28Koka lhna lhta aptemak mokhom apveske:

—Avanhek asietiapma patakkom ehenkok astemo romano.

Koka lhna lhta aptema Pablo apkatemmoiangka m’a:

—Ko’o koka romano aniem’o asteiaianlha lhema natemma ankok Roma —lhna lhta aptemak.

29Apkellengai’ak nak ania’a apkellelto lhna lhta apkenmahai’a eltekpoma Pablo, ka apkelieniekho nhan ma’a. Apkenmenai’ak na lhta nhan apveske ngkanek apkeltemo lhna lhta ngkolhek aknakteto apmeiok nonemaie cadenas Pablo m’a, ngkanek apto romano m’a.

Pablo napaqtavek apkelveskai’e neten apankavek judios

30Mo’ok aknem na ntemak ma’a, apveske apanke apkeltemo lhna lhta eniankesekhak apkelemhama apmaniaie sacerdotes kakpota nhan apkelientalhnakha apkelveskaie apankave judios, apmahai’avek na lhta epeivesekhok ngkolatsekama la apkelanai’a Pablo m’a aptepkeskamo nhan akmaska m’a. Netamen na lhta m’a apkeltemo lhna lhta ngkolhek aklekkaso knonemaie cadenas Pablo m’a, ngkolhek na akiantemakho napaqtavek aplhamakho apkelveskai’e m’a.