Act 24 | TmfSC | STEP | 5 knem na lhta ntemak akiekai’a m’a, apkelvaiakmo lhna lhta akieto m’a Cesarea apiav’akha sacerdote Ananias ka nhan apketlhelhma’ak metno apketko’ok kakpota nhan lhema abogado apvesai’a Tertulo. Apkelketansengkek na lhta apnemakha gobernador Felix kakpota etlhenek apvesai’a meihamolhma Pablo.

Acts 24

Apkasennammakpo panke Pablo napaqtek apveske Felix

1 5 knem na lhta ntemak akiekai’a m’a, apkelvaiakmo lhna lhta akieto m’a Cesarea apiav’akha sacerdote Ananias ka nhan apketlhelhma’ak metno apketko’ok kakpota nhan lhema abogado apvesai’a Tertulo. Apkelketansengkek na lhta apnemakha gobernador Felix kakpota etlhenek apvesai’a meihamolhma Pablo. 2 – 3 Nkolhek na lhta nhan akiantemantamo Pablo m’a, ka apkempai’akha lhna lhta Tertulo aplheianma Pablo meihamolhma napaqtek Felix ma’a, lhna lhta aptemak:

—Felix, mantek qaselha apkellanai’a lheiap nellavakha nak ennengko’o judios kakpota nkoltaqmelek nengakhaikamok, metka akmaska nhan ennengko’o aniem’o lheiap hengelpasmoma, nkelpaihekhek na engelvalho’ok. 4 Nenmak’ak ennengko’o angelleltennaksek akiakvatema ania’a, mankonmak’ak angeliakse lhma’, ntase ie’ eniailhok sekhe. 5 Ka enenlhet anak meiholhma pankek ham, lhamakho iempehek aptepkeskama akmaska mota apkeliaiesekho nhan judios. Apto nhan apkemhama apmanie lhema apasmekama enenlhet’avok hengetlhekmoskama ngkolatsekama apkelvesai’a Nazarenos. 6 Apmahai’a lhta etnengvakho lhma apkammelhma Eniapom Neten apnemakha ham, ka nkanemak nelpathetmo lhta ham. ^{▼▼Mo’ok vakkahak nietnek versiculo 7, ka ntemak hengke’e: Koka apvo’o lhta apveske Lisias, apteniave lhta apiempek apkel·hatsosko’o lhta enmeio’ok ma’a Pablo neksa nelpathetma.} 7 – 8 Elmalhnamano lheiap kakpota epeivesekhoho akto have niapak ankek netlheno nak —lhna lhta aptema apkanemo.

9 Apkeltemeskeskangkek na lhta nhan iokhalhmek napokha judios apkellelto apkelvaiam ma’a. 10 Netamen ma’a gobernador Felix apkeltemo lhna lhta eliatak Pablo m’a, lhna lhta aptemak apkanemo:

—Asiave ko’o lhennenga ntak aptema hengiekpelkemo niapom lheiap ka hengke’e apkellavakha nak, ka ngkanek ko’o aielhanmalhkok ehenkek altennama napaqtek lheiap akieplomo akleklemo evalhok. 11 Ntasek hata epeivesekho apankek lheiap ania’a astemakha have kelha niapak asmak’o nak alhenek kolhvave nak. 12 aknem antak akiekai’a asvekha lhta Jerusalen kakpota alteklheiok etapno’ok angvalhentamok napaqtek Eniapom Neten ma’a kakpota angvaho. 12 Mollatemmommalhkak ko’o nhan ma’a, motepkeskamak na akmaska konne Eniapom Neten apnemakha kakpota nhan apkaqnekhelha nak judios kakpota nhan apvalhok temma. 13 Ka enenlhet’avok anak mankollapvankek hetlhenek elvetaskesek na lheiap askelanai’a la qaselha ngkolatsekama ko’o m’a. 14 Vanlha ko’o askeliehekho Eniapom Neten apanko’ok nelieihengka, kakpota nhan asieplekama Alhnankok Amai. Koka enenlhet’avok anak apketlhengke mota Amai Alhnankok akto lhnak apasmekama enenlhet’avok ngkolatsekama hengetlhekmoskama. Ko’o koka askeliehekho nhan aklheianma vakkahak ley kakpota nhan vakkahak apanko’ok apkeleltennasemmap ania’a annenga. 15 Al·halhnekama evalhok atak hata Eniapom Neten enaklhatekhaskamok enenlhet’avok apieseksek apkenmaskengvaiakmo, apkellelto nak apkelpeivomo kanha melpeivomo. Ka enenlhet’avok anak fariseos meliaskeiakmok na alheno nak. 16 Vanlha ko mota askelienlhaneiakmo alanak qaselha altaqmelo napaqtek Eniapom Neten, napaqtavek na enenlhet’avok kakpota mangkoitek malha henavesaikama evalhok alketamekama helhenkeskekha askelanai’a la ngkolatsekama.

17 Nlhamakmek iantelhkapa asmaikamo mota mo’ok apkellavakha, netamen astaqhemo lhta mokhom askavakha’ ehenke, asketsekho lhta nhan patakkom askellangkongvekho metka nak apkelletsekama, asketsekho lhta nhan qaselha nengaikamok anak Eniapom Neten. 18 – 19 Askalhnasekho lhta nhan ko evalhok ma’a napaqtek Eniapom Neten akieto apnemakha. Ma lhta nhan angvankesekhak enenlhet ma’a, ma lhta nhan atepkeskamak akmaska m’a. Helvet’a lhta nhan moklhem’a judios apkelleniem’o Asia, koka apvanka’a niekhe nhan elelhiemok hengke’e kakpota eleltennasama lheiap askelanai’a la ngkolatsekama ko’o. 20 Koka enenlhet’avok anak hengke’e vanlha lhta helvet’o m’a askenmangka napaqtavek apkelientalhnakha apkelveskaie judios ma’a. ¡Ngva’ etlhennoho helvetai’o la askelanai’a qaselha ngkollatsekama m’a! 21 Vanlha asiennakteso lhta aspaioma napaqtavek ma’a ngkanek apkenmak’o lhta hetselhnanak ma’a aniem’o moi’askeiam nennaklhatekhangveianlha ta apieseksek apkenmaskengvaiakmo —lhna lhta aptemak Pablo m’a.

22 Apiamavek na lhta Felix aktemakha meliaskeiam apkelelto apkelieplavkeskama Alhnankok Amai, man na lhta nhan nkomahai’ak elhenek apkelanai’a ngkolatsekama Pablo, lhna lhta aptemak:

—Hato ka apvaktamo ta Lisias apto apkemhama apmaniaie soldados, apakmetkese ta kakpota elhenek ania’a nak —lhna lhta aptemak Felix.

23 Netamen na lhta m’a apkaveiangka lhna lhta Felix capitan soldados kakpota etalhneksek Pablo konne nenmammalhkelha m’a. Apkaiangkavek noka nhan ngkolhek aktokho amaika’a apnakha kakpota ngkolhek na aktakmelkaso m’a.

24 Netamen na lhta m’a aliekai’o moklhem’a aknem, anmahai’o lhna lhta nkotnangko amaika’a Pablo Felix kakpota nhan aptava akvesai’a Drusila, judia lhna lhta m’a, alvekho lhna lhta m’a, allaveiangka Pablo kakpota eleltennasama ania’a aktemakha mei’askeiam Jesucristo. 25 Apkeleltennaseiangka lhna lhta nentemakha antek nempeivomo, aktemakha nhan metka nellanai’a nenmak’akha antehek, ka aplheno nhan nkovak hata aknem apkeliekpelkemo Eniapom Neten apkeltemakha enenlhet’avok lhmankek ham. Ka aknelhtengkeskamo lhna lhta neten apvalhok Felix neksa aplengai’a m’a, lhna lhta aptemak apkanemo Pablo:

—Vanlha, mo’ok aknem hata angvavama mokhom lheiap kakpota apaqmetkeskata —lhna lhta aptemak Felix.

26 Nlhameiangkek na lhta apkavekama Felix Pablo apkeltemo elhiemok kakpota eltennama, koka patakkom na lhta apteniai’ak niekhe Felix kakpota epaqnemekhak ma’a.

27 Hanet iantelhkapa lhna lhta niekai’ak ma’a, ka apteiapmo lhna lhta Felix aptema gobernador, apiaqmongkeskamo lhna lhta Porcio Festo. Man noka epaqnemekha Felix Pablo m’a ngkanek apkeltemo lhna lhta nkollekkasama apvalho’ok judios aptemakha apmakmekama m’a.