Acts 4

Pedro kanhan Juan napaqtavek apkelveskaie

1Nheklhek nak apkelpaqmetkesaiangka Pedro kakpota nhan Juan enenlhet’avok ma’a, ka apkelvai’o lhnak sacerdotes, saduceos kakpota nhan apkemhama apmanie apkellanekama Eniapom Neten apnemakha. 2Nkennatheskangkek nak ma’a lhna songke apketlhekmoseiangko enenlhet aktemakha nennaklhatekhangveianlha ta apieseksek apkenmaskengvaiakmo, ka aktemo lhnak ma’a Jesús. 3Ka apkelpathetmo lhnak ma’a, aplhatamo nhan nengaqlhengkasemmalhkelha, apkelieniekhek nak sekhek ma’a ngkanek apienaqteskangkek na songke kakpota elelmalhnekhok mokhom atsak’o m’a. 4Mang nantek enenlhet’avok apkellailhemo apaivoma Pedro kakpota nhan Juan, mang nak na eliaskeiakmok ma’a, malha lhnak 5.000 apkelennava’ak ma’a.

5Nketsai’ak nak ma’a, apkaqnekho lhnak apkelemhama apmaniaie judios, metno apketko’ok kakpota nhan escribas akieto Jerusalen. 6Apnengkek nak na m’a apiav’akha sacerdote apvesai’a Anas, apketlhelhma’ak noka Caifas, Juan, Alejandro kakpota nhan moklhem’a apkennemolhema apiav’akha sacerdote m’a. 7Apkeleltemo lhnak ngkolhek aliantemantamo Pedro kakpota nhan Juan napaqtavek m’a, ka apkelelmalhneiangka lhnak ma’a, lhnak aptaiangkok:

—¿Se lha allaikamok apkelientalhnemo ketlhengkap kakpota ellanak qaselha hempelapkeskama nak, he? —lhna aptaiangkok ma’a.

8Aplanei’avek nak apvalhok Espíritu Santo Pedro m’a, ka apkatemmoiangka lhnak ma’a, lhnak aptemak:

—Ketlhengkap apkelemhama apmaniaie, kakpota nhan metno apketko’ok, 9apkeleltave nlho eliohok aktemakha qaselha altaqmelo aktaqmelkeskakmo lhta enenlhet akmaska apiempek alhta. 10Aleltennasangko ta ketlhengkap kakpota nhan aplhamakho enenlhet’avok ko Israel, ka enenlhet alhta aptaqmalveiam aniem’o koka m’a apvesai’a Jesús ko Nazaret, apkellaqhema lhta ketlhengkap neten iamet aktenneskama, Eniapom Neten alhta nhan aplhatekhaskakmok ma’a. 11Ka Jesús alhta malha metaimong apkeltaknongvekha lhta ketlhengkap apkellanekamok pa’at, koka ntakhek neten ankek akiaspommalhka m’a kolhvave nak metaimong anak. 12Vanlha koka apvankek hengelvongkesek tep ma’a ngkanek apvesai’a nak akto neten ankek ma’a, mangkolhnok po’ok enenlhet takhalhet lhepop anak —lhna aptemak Pedro apkellanemo m’a.

13Nkelpelapkeskangkek nak apkelemhama apmaniaie apkellengai’o m’a apkeleltennaikama apkelteniai’o apiempeiok Pedro kakpota nhan Juan, ngkanek apkeliamavek nak metsavhongvaiakmo apnaqtalhesaikamok ma’a kanhan enenlhet apkellomakha apankavek ma’a. Ka atlheianvekho lhnak na apvalho’ok apkellelto apkeltamesaikamok Jesús ma’a. 14Mang nak na nkonmopvanka’ak etlhenek meliamolhma m’a ngkanek apkelaqnaikama lhnak na lhemek enenlhet aptaqmalveiam ma’a Pedro kanhan Juan. 15Ka apkeleltemo lhnak elentepok konne apkaqnekhelha mota apkelientalhnakha apkelveskai’e m’a, apkelpaqmetkesammakpo lhnak mok apankavek ma’a neptamna’ak, lhna aptaiangkok:

16—¿Ko la anteskesangkok enenlhet’avok anak, he? Apkeliavek aplhamakho enenlhet ko Jerusalen apkellanengko lhta qaselha mongenatkeskama, mongellapvankek angeleltangkok apkenmopvanka ania’a m’a. 17Vanlha toka angeleltennaksek nemmahai’a angeltemeskesama apkellaniemhaikama apketlheno ta mokhom apvesai’a m’a enenlhet anak —lhna aptaiangkok ma’a.

18Ka apkelentalhnesekho lhnak mokhom ma’a Pedro kakpota nhan Juan konne pa’at, apkeliamenaiangka lhnak aliennaktema nkek apatno’ok ma’a kakpota metlhekmosangkek, metlhenekhek na mokhom apvesai’a Jesús. 19Koka apkellatemmoiangka lhnak Pedro kakpota nhan Juan, lhna aptaiangkok:

—¿Se lha atlheno apvalho’ok ketlhengkap aktaqmanma angelanak napaqtek Eniapom Neten? ¿Ntase ie angeleliehekho ketlhengkap, nlho ka la Eniapom Neten, he? 20Mongellapvankek ennengko’o angelvanma angetlhenek lhamakho aktakha alhta nenlengai’a kakpota nhan nelvetai’a —lhna aptemak Pedro.

21– 22Koka apkelemhama apmaniaie mang nak nkonmopvanka’ak enaqtevaksek ngkanek aplhaniek nak enenlhet’avok apkeliavenkaseiangka apvesai’a Eniapom Neten aniem’o qaselha hempelapkeskama apkelanai’a, aptaqmelkeskaiam enenlhet nak ma’a, tep 40 iantelhkapa apankok nak ma’a enenlhet aptaqmalveiam. Apkellaskangkek nak eltemeskesama apkellaniemhaikama aptangkokho la mokhom ma’a, ka apkelpaqnemekho lhnak na m’a.

Meliaskeiam apkelelmalhnongkoma apkeleltemo elienna’

23Apkelpaqnemekhek nak apkelemhama apmaniaie judios Pedro kakpota nhan Juan, ka apkenmeiekho lhnak apkankeskekho apketlhelhma’ak. Apkeleltennaseiangka lhnak ania’a aktemakha apkelpaqmetkeskama apkelemhama apmaniaie sacerdotes kakpota nhan metno apketko’ok ma’a. 24Apkellailhemavek nak ma’a apkeltemo lheme, netamen ma’a apkelpaqmetkeskamo lhnak Eniapom Neten aplhamakho apkelpasmekha m’a, lhna aptaiangkok apkelelmalhnongkomo m’a:

—Apveske aknema apmopvana apanke, lheiap apkelanai’a neten kakpota nhan nalhepop, alvata kakpota nhan lhamakho qaselha aknaiangko nhan m’a. ▼

▼Exodo 20:11; Salmos 146:6

25Aplheianmek nak nanek lheiap aniem’o Espíritu Santo apmaikama apkasennaikama apankok apveske David, lhna aptemak ma’a:

«¿Se lha ntak apkaknangka nak enenlhet kakpota ellammelhek ma’a, he? ¿Se lha aktemo apkellanekho ania’a lhamakho apkellavakha aqhemo i’e, he? 26Apkaknekho nhan ma’a apkeliav’akha apkelveskaie lhma nkek ham kakpota nhan gobernadores, apkelmaleniosemmakpo apkenmahai’a elammelhek Apveske kakpota nhan apto apkeliekieskama Cristo» ▼

▼Salmos 2:1-2

.

27Hai, nelvetai’ak alhta ennengko’o m’a Herodes, Poncio Pilato, metnangko nak judios kakpota nhan israelitas apkakhaiangko nak hengke’e temma nak apkellammelhma m’a apkasennaikama lheiap apvesai’a Jesús, apto apokkanma lheiap, apto lhta nhan apkeliekieskama lheiap. 28Koka lheiap alhta apneskamo m’a aktemakha lhta apkaniemhaikama Jesús. 29Apveske, elanhono lheiap enenlhet’avok anak, apkeleltavek hennaqtevaksek. Hengelpasem hata lheiap kakpota anteniangko mota eniempeiok neksa nenmahai’a angetlhenek apaivoma lheiap. 30Elvetaskes hata apmopvana eltaqmelkeskamok anmaska apiempeiok enenlhet’avok, elanak qaselha mongenatkeskama kanhan qaselha hempelapkeskama akieplomo apvesai’a Jesús apto apokkanma apkasennaikama lheiap —lhna aptaiangkok apkelelmalhnongkomo m’a meliaskeiam.

31Ka akvaiakmo lhnak nnelha apkelelmalhnongkoma m’a, akievheiangka lhnak akietemelha apkaqnekhelha m’a, apkellapvai’o lhnak Espíritu Santo aplhamakho m’a, apkelteniaiavek nak na apiempeiok apketlheianma Eniapom Neten apaivoma m’a.

Meliaskeiam apkelpasmekha qaselha apanko’ok

32Apkelpasmekhek nak lhamakho qaselha apanko’ok apkellelto meliaskeiam, mamma lhnak na atlheianma la apvalho’ok qaselha apanko’ok apankavek la’a, aknemo mo’ok nak na apvalho’ok ma’a. 33Koka nema allapaskama apkenmopvanka lhnak apketlhekmosekamok aktemakha aplhatekhangveiam alhta Apveske Jesús apieseksek apkenmaskengvaiakmo. Avanhek ankek nak na apkeltakmelkeskeskama apkellaniemhaikama Eniapom Neten ma’a. 34Mamma lhnak enenlhet la mankoietnema qaselha apanko’ok apieseksek anak ma’a, ngkanek apkellelto nema apkelletsekama apkelhaikamok lhepop apanko’ok kakpota nhan apnemakha, apkellangkongvektamo lhnak patakkom 35nema allapaskama, kakpota ennaskekhak moklhem’a alietemelha la alaimommalhkelha m’a. 36Apnengkek nak na lhema enenlhet apvesai’a José apkeniem’o Chipre, aptaven neptamen noka m’a Levi. Koka nema allapaskama m’a apkeliaqmongkaskesekho lhnak mo’ok apvesai’a, Bernabe lhnak apteskaseikokhak apvesai’a m’a, nema ltema apaiesekha engvalhok aniapom. 37Apiamasmek nak lhepop apankok José, ka apkellangkongvekho lhnak patakkom nema allapaskama m’a.