Act 8 | TmfSC | STEP | Apnengkek nak ma’a Saulo apkennapmo enenlhet Esteban, nietemavek nak na aktemakha aklheianma apvalhok ma’a. Koka aknem nak ma’a ampai’o lhnak nema akmenlhenaikama iglesia akieto Jerusalen, apkelhpanmek nak aplhamakho apkenmaiangko lhnak mok iokhalhma Judea kakpota nhan Samaria, koka nema allapaskamo mang nak enieniaiangkok ma’a.

Acts 8

Apmenlhenaikama Saulo apkellelto iglesia

1 Apnengkek nak ma’a Saulo apkennapmo enenlhet Esteban, nietemavek nak na aktemakha aklheianma apvalhok ma’a. Koka aknem nak ma’a ampai’o lhnak nema akmenlhenaikama iglesia akieto Jerusalen, apkelhpanmek nak aplhamakho apkenmaiangko lhnak mok iokhalhma Judea kakpota nhan Samaria, koka nema allapaskamo mang nak enieniaiangkok ma’a. 2 Moklhem’a enenlhet nak na apkelleliehekho mota Eniapom Neten apkenmaiangko aphapak apketsepma Esteban ma’a, apkelkatonnemo nhan, avanhek ankek nak apkeliapqalhema m’a.

3 Man nak eltaqmelkeskamak Saulo apkellelto iglesia, apkelentalhnekama lhnak apkakhaiangkelha kakpota elentepkesek neksa mellasekhai’a apkelennava’ak kakpota nhan ngkelvana’ak, apkelentalhneskamo lhnak na nengaqlhengkasemmalhkelha m’a.

Nema altennaikama ania’a aktaqmanma akieto Samaria

4 Koka apkellelto lhnak nema alhpankeskama m’a, apketlheianveiakmo lhnak ania’a aktaqmanma apkelvaianlha la m’a. 5 Felipe lhnoka apmaiangkok iokhalhma Samaria, ka apkeleltennaskeiakmo lhnak ania’a aplhenammap Cristo m’a. 6 Apkeltakmelkeskamavek nak apkellailheiangko enenlhet’avok ania’a m’a ngkanek apkelvetai’o qaselha mongenatkeskama apkelanai’a Felipe. 7 Aplhaniek nak na enenlhet anmaikama kasekapok av’alhok akpaiseiam apkeltaqmalveiakmo m’a. Ngkelpaihekama lhnak atno’ok alenteiapmo kasekapok av’alhok, apkeltakmelkeskaiakmo nhan aplhamakma metka aptapno’ok kakpota nhan apkeliaqteikama. 8 Avanhek ankek nak alpaihekha apvalho’ok enenlhet’avok ma’a.

9 Koka apnengkek nak na m’a lhema enenlhet apvesai’a Simon, apiolhma melatsekama lhnak ma’a. Apkelpelapkeskeskangkek na mota enenlhet’avok ko Samaria apkelvetai’o qaselha hempelapkeskama apkelanai’a m’a, aptemeskesammakpo pankek neten apankek aknema apmopvana. 10 Apkeltakmelkeskamavek na mota apkellailheiangko aplhamakho enenlhet, apkeliav’o kakpota nhan apketkietse’, lhna aptaiangkok:

—Avanhek ankek nak akietnema apmopvana enenlhet anak aniem’o Eniapom Neten —lhna aptaiangkok ma’a.

11 Apkeltakmelkeskamavek na mota apkellailhemo, lhennenga lhna mota apkelpelapkeskeskama aniem’o qaselha hempelapkeskama apkelanai’a m’a. 12 Koka netamen ma’a akvekho lhnak meliaskeiam Felipe aplheianmo aktemakha ania’a aktaqmanma aptema apveske Eniapom Neten kakpota nhan apvesai’a Jesucristo, ka apkeleltemo lhnak ngkolhek allavkesangko konne iemmen ma’a apkelennava’ak kakpota nhan ngkelvana’ak. 13 Man nak na ei’askeiakmok Simon ma’a, ka aknemo lhnak na aklavkeskamo konne iemmen, netamen aplhelhma lhna mota aptemak Felipe m’a. Niemaskangkek nak apvalhok Simon apvetai’o qaselha mongenatkeskama, qaselha hempelapkeskama nhan apkellanai’a Felipe.

14 Apkellengai’ak nak ma’a nema allapaskamo akieto Jerusalen enenlhet ko Samaria apkenmaiangko takha ania’a Eniapom Neten apaivoma, ka knemo lhnak allapaskamo Pedro kakpota nhan Juan ma’a. 15 Ka apkelvekho lhnak ma’a, apkelelmalhneskeskamo lhnak Eniapom Neten kakpota ellangkok Espíritu Santo apkellelto Jesucristo apkennemolhema m’a. 16 Man noka elvaiventak takhaplhet’ok mokhom Espíritu Santo m’a, vanlha lhnak nemo allavkeskamo konne iemmen aniem’o apvesai’a apveske Jesús. 17 Ka apnengkenaiangko lhnak apmeio’ok Pedro kakpota nhan Juan apietsekso’ok enenlhet’avok ma’a, apketlhevaiangko lhnak na Espíritu Santo. 18 – 19 Neksa apvetai’a lhnak Simon ma’a apketlhevaiangko enenlhet Espíritu Santo aniem’o nema allapaskamo apkakhesekamok apmeio’ok takhaplhet ma’a, lhnak aptemak:

—Enmamok no patakkom anak, akiaqmoiekha apkenmopvanka’a nak ketlhengkap, kakpota nhan ko’o anengkenek emeiok takhaplhet’avok enenlhet kakpota etlhevangkok Espíritu Santo —lhnak aptemak Simon.

20 Koka lhna aptemak Pedro apkatemmoiangka:

—Enietsepo ta lhemek patakkom anak lheiap ngkanek nlhenkek apvalhok lheiap emok nema akianmoma patakkom qaselha metka akianmoma nak hengaikamok Eniapom Neten. 21 Have nelpasmekha nhan lheiap, po’ok aptema enenlhet, mankopeivok apvalhok napaqte’ Eniapom Neten. 22 – 23 Avanhek apiasepkeskama lheiap, mmaiankek qaselha ngkolatsekama lheiap, ¡eiaqmongkasekha koka mo’ok apvalhok lheiap! Elmalhnama nhan Eniapom Neten kakpota etneskesama apanke kelhaha ngkolatsekama aptemakha nak lheiap —lhnak aptemak Pedro.

24 Ka apkatemmoiangka lhnak Simon:

—Helelmalhneskes koka Apveske kakpota mankovhek ma’a akientalhnema ta tekhelhet ko’o —lhnak aptemak ma’a.

25 Apketlhengkeskangkek nak apkeleltennaiangka Pedro kakpota nhan Juan Eniapom Neten apaivoma m’a, ka apkeltaqhekho lhnak ma’a akieto Jerusalen. Neksa apketlhengama lhnak nalhet amai apnakha la temma konne iokhalhma Samaria apketlheianveiakmek na mota ma’a ania’a aktaqmanma nak.

Apaqmetkeskama Felipe lhema enenlhet ko Etiopia

26 Lhema ángel nak apkapaskama Apveske apteiapvai’ak apnakha Felipe, lhnak aptemak:

—Elanekha apketsekama kakpota enialhtepelhketek metkelha temma akieto ieiam amai ampo’o Jerusalen akvakho Gaza —lhnak aptemak ángel.

27 Ka aplhengamo lhnak Felipe m’a, nalhet amai nak apkelvetammakpok lhema enenlhet nema alhakkeskama appopok apkemhama apmanie ko Etiopia. Apkeltakmelkeskama patakkom ankok nak akiav’akha aveske ko Etiopia, Jerusalen nak na apkempai’ak ma’a kakpota elteklheiok aptapno’ok, enialhentamok na kakpota eniahok Eniapom Neten ma’a. 28 Apnengkek nak neten koleto apankok ma’a apkelietsatengkek nak vakkahak aptalheskama lhnak nanek apkeltennasemmap ania’a Isaias annenga. 29 Koka lhna aptemak apkanemo Espíritu Felipe:

—Eteteskakho no nekha koleto nak —lhna aptemak.

30 Apkasekhai’avek nak Felipe m’a, aplengai’o lhnak apkelietsatema vakkahak aptalheskama apkeltennasemmap ania’a Isaias annenga, lhnak aptemak apkenmalhneiangka:

—¿Apiave nlho aktakha nak apkelietsatema lheiap, he? —lhna aptemak Felipe.

31 —Ma, moihoho, mamma enenlhet helpeiveskasekha la’a —lhnak aptemak apkatemmoiangka m’a.

Ka apkapioseiangka lhnak apkeltemo elhnemok lhemek neten koleto Felipe m’a, 32 apvetaskeskangkek nak aktemakha apkelietsatema, lhna ntemak aktalhesammalhka:

«Nne lhta akiantemakho malha nepkesek aptekiomakha, malha nepkesek apketkok metka akpaihekama apatong akno la akieseso. 33 Nne lhta aktemeskesantamo koneng kakpota nhan nema akvannaikama, mankoietemo nke lhta nnak na akto nema alanei’o, mamma lhta nhan aptavana’ak neptamen ngkanek apmaskengvakme lhta m’a aniem’o apmatnama» ^{▼▼Isaias 53:7-8} lhna ntemak aktalhesammalhka.

34 Netamen nak apeneskama apkelietsatema vakkahak enenlhet nema alhakkeskama appopok ma’a, ka apkenmalhneiangka lhnak Felipe, lhna aptemak:

—¿Se lha enenlhet m’a ie, he? ¿Aplhenammakpo apanke nlho m’a apkeltennasemmap ania’a nak, nlho ka la nhan po’ok enenlhet, he? —lhna aptemak.

35 Ka apkelpeiveskasekho lhnak Felipe m’a aptemakha aplheianma Isaias, kakpota nhan lhamakho altalhesammalhka vakkahak Eniapom Neten apaivoma aktemakha ania’a aktaqmanma aplhenammap Jesús.

36 – 37 Apketlhengangkek nak mokhom, apkelvetangvekho lhnak akietnemakha iemmen, lhna aptemak apkanemo enenlhet nema alhakkeskama appopok Felipe:

—Ka iemmen hengke’e, ¿ntase nlho helavkesek konne iemmen, he? —lhna aptemak.

38 Kolhvavek nak apkeltemok epekkanvomok koleto Felipe enenlhet, apkelenteiapmo lhnak ma’a, aplavkeskamo lhnak konne iemmen Felipe enenlhet nema alhakkeskama appopok ma’a. 39 Ka apkellenteiapmo lhnak nemmen ma’a, mpelapkeskankek nak malha knema eiveskama Felipe aniem’o m’a Espíritu apankok Apveske m’a. Maskengkek nak na apvetai’a enenlhet nema alhakkeskama appopok Felipe m’a, koka apkempekhek nak mokhom aplhengama m’a mpaihekhek nak apvalhok. 40 Koka apvekho lhnak akpelapkeskama nkek Felipe natemma Azoto, aplhengo mokhom akvakho natemma Cesarea, lhamakho temma amai aktakha la apkeliekaikamok apaiesaiangko lhnak ania’a aktaqmanma.