Acts 10

Pedro kanhan Cornelio

1Apnengkek nak lhema enenlhet natemma Cesarea apvesai’a Cornelio, capitan nak ma’a apto nhan aplaqlekama kempokhakme apkelvesai’a Italiano. 2Apiamolhma lhnak ma’a, apkai’o lhnak na Eniapom neten ma’a akvekho apkennemolhema apketkak. Apkellaiangko nha mota patakkom apankok apkelpasmomo Judios, apkenmalhnonkoma mota nhan Eniapom Neten. 3Lhema knem na ntemak malha la 3 ienaqteso, akvetai’o lhnak apaqtek lhema ángel apkapaskama Eniapom Neten aptalhnengvai’o lhnak apnakha m’a, lhna aptemak apkanemo:

—Lheiap anak Cornelio —lhna aptemak ma’a

4Mang nak enieskamak apkelanei’o Cornelio ángel, apkai’ak nak ma’a, ka apkenmalhneiangka lhnak ma’a, lhna aptemak:

—¿Se ptenio ie Apveske? —lhna aptemak.

Koka lhna aptemak mokhom ángel:

—Apkailhave mota apkenmalhnonkoma Eniapom Neten lheiap, apketsevasavek na apkelpasmomo lheiap enenlhet anak metka apkeletsekama. 5Ellapes hata enenlhet akieto natemma Jope kakpota eliantengvakhak Simon, mo’ok apvesai’a nhan Pedro. 6Ka apnak ma’a apnemakha nak apkelvesai’o lheme apvesai’a nak na Simon, apmakmekama nak apkeltakmelkeskama kaselha aiempeiok akieto nekha alvata —lhnak aptemak ángel.

7Ka aptaqhemo lhnak ángel ma’a, apkaqhetaiangka lhnak na apkellaveiangka Cornelio apqanet apkellennengkasekama kakpota nhan lhema soldado apankok apiamolhma apanke. 8Ka apkeleltennaskamo lhnak aktemakha akvetai’a apaqtek, apkellapaskamo nhan akieto na temma Jope.

9Mo’ok aknem na ntemak ma’a, apketlhengamo m’a apkelvekho lhnak na temma Jope. Koka Pedro apnengkek ma’a Jope, apkanantemo lhnak neten pa’at kakpota enmalhnak ma’a. Katelho lhna ntemak ma’a, malha la 12, 10mek nak na ngkaqhemak ma’a, aptoma lhnak apmahai’a niekhe. Neksa knema lhnak akpeneskeskama aptoma, akvetai’o lhnak apaqtek 11akmaihekho lhnak neten akvaivantamo nalhepop lhema nengaqlammalhka apiavai’a, nema aknaktetema 4 nepva’ak. 12Nkelienaktengkek nak lhamakho aktemakha kaselha nevhak, nentoskama, ka aktonak alpelhievaikama nak nalhepop kakpota nhan anata. 13Ka aplengai’o lhnak nema aliatekama, lhna ntemak:

—Pedro, ennap ham, etav hata —lhna ntemak nema aliatekama.

14Ka apkatemmoiangka lhnak Pedro m’a, lhna aptemak:

—Have Apveske, motomak ko’o kaselha nevhak ngkolatsekama nak alpaiseiam —lhna aptemak apkatemmoiangka Pedro.

15Lhna ntemak mokhom nema aliatekama:

—Apkenmopesakhek Eniapom Neten ma’a, meltamonkek alpaiseiam lheiap ma’a —lhna nnemak ktemo.

16Hanetolhem’a aktaiekho lhna ntemak ma’a, netamen aknemo lhnak akiasekho neten mokhom nengaqlammalhka m’a. 17Ntaikama lhnak apvalhok Pedro m’a aniem’o akvetai’a apaqtek apmahai’o eihok akietkesammalhka m’a. Ka akietemo lhnak na akpelapkeskama apkelvaiam atong pa’at enenlhet apkellapaskama Cornelio, apkelelmalhneiangka lhnak enenlhet apkellelto apkellavakha m’a apkenmahai’a eliohok apnemakha Simon ma’a. 18Ka apkelveneiangka lhnak apto apnemakha m’a apkenmahai’a eliohok apnema lhema enenlhet apvesai’a Simon ma’a, mo’ok apvesai’a Pedro.

19Koka Pedro aplomaka lhnak mokhom mo’ok av’alhok pa’at neten, nheklhek nak aklhenaiangka apvalhok aktemakha akvetai’a apaqtek ma’a, ka aptemo lhnak apkanemo Espíritu:

—Apkanetolhem’a enenlhet apkelketamak lheiap, 20etiep ham, elieplakha ta, motnama nkek apvalhok, ko’o askellapaskama m’a —lhna aptemak.

21Ka apteiapmo lhnak Pedro konne pa’at mo’ok av’alhok neten, lhna aptemak apkellanemo enenlhet ma’a:

—Ko’o Pedro ¿se lha kto helketamo nak ke, he? —lhna aptemak.

22Ka apkellatemmoiangka lhnak enenlhet, lhna aptaiangkok:

—Capitan Cornelio lhta hengellapaskama ennengko’o apkeltemo angeliama lheiap kakpota etlhekmoskakhak ma’a. Apto nak enenlhet apeivomo m’a, apkeliehekho nhan Eniapom Neten, enenlhet’avok judios avanhek ankek apketlheianma mota apiamolhma apankek ma’a Cornelio. Ka nkeniemai’ak ma’a apakmetkeskamo lhna lhta lhema ángel apokkenammap kakpota hengellapaksek ennengko’o hengke’e —lhna aptaiangkok ma’a.

23Ka apkeltemo lhnak Pedro elentelhek konne pa’at enenlhet nema alapaskama kakpota enaqteiangvomok ma’a. Netamen nak ma’a atsai’o lhnak, apkeltaqhemo lhnak kakpota nhan Pedro kanhan moklhem’a apkelialheng’a apkellavakha m’a Jope.

24Mo’ok aknem na ntemak ma’a, apkelvekho natemma Cesarea, apkellailhengkek noka Cornelio m’a, apkankesekhek nak na apaivomolhema kakpota nhan apkeliekpelkemelha nengaqtek ankavek ma’a. 25Neksa apvetai’a lhnak Cornelio aplheiam Pedro m’a, apketkaiangko apkellanielhaiangko lhnak ma’a, ka apkelteklheklhemo lhnak aptapno’ok lhepop napaqtek Pedro kakpota eniahok ma’a. 26Koka Pedro apkenengkasekhek nak neten, lhna aptemak apkanemo:

—Etnemekha neten, asnavek ko’o lheiap enenlhet ko lha —lhna aptemak.

27Ka apkelpaqmetkesammakpo lhnak neksa apketlhengama m’a, apkelentalhnengvekho nhan konne pa’at, apvetangvekho nhan Pedro m’a apentalhnema enenlhet, 28lhna aptemak apkellanemo:

—Apkeliavek ketlhengkap ley enganko’ok negellelto judios hengaskangkek ampalhakvomok po’ok enenlhet mankotno la nempaivomo lhema, hengaskangkek na antelhek apkakhaiangkolha m’a, koka aniem’o lhta Eniapom Neten heteskeskama mamma enenlhet apaiseiam kanhan koneng apankavek. 29Ka ngkanek avak ko’o hengke’e metka askeliengekha heleltennasko lhta nema allennengkasekama nak. ¡Heleltennes noho! ¿Selha ntemak helketansemo nak ke, he? —lhna aptemak Pedro.

30Ka apkatemmoiangka lhnak Cornelio m’a, lhna aptemak:

—4 knem antak akiekai’a, malha la 3 ienaqteso lhta, neksa askenmalhnongkoma m’a asnemakha apteiapvo’o lhta lhema enenlhet apkelienmomo lhta aptalhnema, 31lhta aptak heiano:

“Cornelio, apneng’ak lheiap apkenmalhnonkoma Eniapom Neten, apvet’ak na apkelpasmoma metka nak apkeletsekama. 32Ellapes hata enenlhet natemma Jope kakpota eliantengvakhak Simon, mo’ok apvesai’a nhan Pedro. Ka apnak aptema amaika’a apnemakha apkelvesai’o lheme nak Simon apmakmekama apkeltakmelkeskama kaselha aiempeiok, apnek ma’a akieto nekha alvata”, lhta aptak heiano m’a.

33Ka askellapaso lhta enenlhet kakpota eliantementak lheiap hengke’e, ka apkelhiakmo hengke’e ngkanek apiave lhma lheiap, koka kolhvave nak ennengko’o nelanelhkek nengakhangko napaqtek Eniapom Neten, nemmak’ak angellailhok aplheno lhta Apveske lheiap —lhna aptemak Cornelio.

34Ka apkempai’o lhnak apkeltennaikama Pedro m’a, lhna aptemak:

—Koka kolhvave nak asiangvakmek nennavek emmo’ok nentemo lhemek enenlhet napaqtek Eniapom Neten, 35apto nhan ma’a apkellamelaiam enenlhet lhamakho apkellavakha apkellelto apkellai’o kakpota nhan apkellanai’a nak qaselha akpeivomo. 36Apkapaske lhta Jesucristo apto Apveske alhma nkek ham kakpota epaiaksek ania’a hengaikamok altaqmelaikama engvalho’ok apieseksek Israel. 37Apkeliavek ketlhengkap aktakha lhta akvetammalhka iokhalhma Judea, lhta nkempa’ak ma’a Galilea, apkeleltennaskamakha lhta Juan aimommalhko ngkolhek allavkesangko konne iemmen. 38Ka aptemo lhta malha apiangkanma Eniapom Neten takhaplhet Jesús ko Nazaret Espíritu Santo m’a kanhan apmopvana. Apto lhta nhan apkeltakmelkeskaiam apkellelto anmaikama aveske keliaqhameio’, apkelanei’o lhta nhan aktaqmanma aniem’o aplhelhma mota Eniapom Neten. 39Nelvetai’ak ennengko’o m’a aktemakha apkelanai’a lhta Jesús akieto iokhalhma Judea kakpota nhan Jerusalen, netamen nemo lhta nhan aliaqlhaklhemo apmeiok apmankok neten iamet aktenneskama, apketsepmo lhta nhan ma’a. 40Koka 3 aknem alhta ngvaiakmok apketsepma m’a, Eniapom Neten alhta nhan aplhatekhaskakmok apieseksek apkenmaskengvaiakmo m’a, nelvetai’ak na ennengko’o, 41mang koka elvetai’ak aplhamakho enenlhet natemma nak ma’a. Eniapom Neten koka nhan asongkek hengeliekieskama ennengko’o kakpota angetlhenek lhamakho aktemakha nelvetai’a apkaniemhaikama Jesús. Nentaveikokhek na kakpota nhan nenienaiangke lhta nhan lhemek ma’a netamen aplhatekhangveiam alhta m’a apieseksek apkenmaskengvaiakmo. 42Netamen hengellapaskamo ennengko’o angeleltennaksek ania’a Eniapom Neten aptemeskeskamo Jesús hengiekpelkemo niapom apkellelto aphalhnanko’ok kakpota nhan apkenmaskengvaiakmo.

43Apketlheianmek nak nanek na apkeleltennasemmap ania’a Eniapom Neten etneskesama lhna lhta apankek meleliehekho apkellaskamakha apkellelto la meliaskeiam apvesai’a Jesús ma’a —lhna aptemak apkellanemo Pedro enenlhet’avok ma’a.

Apketlhevaikamok Espíritu Santo metnangko nak judios

44Neksa apkeltennaikama lhnak Pedro m’a, akpelapkeskamo lhnak apvaiventamo Espíritu Santo takhaplhet’ok apkellelto apkellailhemo apaivoma. 45Ka alpelapkeskamo lhnak apketlhelhma’ak Pedro m’a, apkellelto nak apkelieplavkeskama aktemakha nema aliaqtemenkeskama apkellammelhakha nekhatko’ok ma’a, nkeliemaskangkek nak na apvalho’ok ma’a apkelvetai’o apvaiventamo Espíritu Santo taphaplhet’ok apkellelto metnangko nak judios. 46Apkelpaqmeteiangka nhan mo’ok apkelpaqmeiasma kakpota nhan apkeliavenkaseiangka apvesai’a Eniapom Neten. 47Netamen lhna aptemak Pedro apkellanemo apketlhelhma’ak:

—Eniapom Neten apkellapaskasak Espíritu Santo takhaplhet’ok enenlhet anak, nnavek na aktakha lhta ennengko’o m’a. Askanek ko’o mangapvankek angellaksek angellavkesangkok konne iemmen ham —lhnak aptemak Pedro m’a.

48Ka apkeltemo lhnak Pedro ngkolhek allavkesangkok konne iemmen enenlhet’avok ma’a akieplomo apvesai’a Apveske Jesucristo. Avanhek nak apkellapiosekama apkeleltemo enenlhet elhnekhak Pedro m’a moklhem’a knem mokhom.