Acts 12

Apmatnama Jacobo kanhan apkaklhengkasemmap Pedro

1Koka m’a, apkelpathetmo lhnak apiav’akha apveske Herodes moklhem’a enenlhet apkellelto iglesia kakpota enaqtevaksek ma’a, 2apmatnamo lhnak pelettav akvenaktema Jacobo, Juan apialheng. 3Nkelleklemavek nak apvalho’ok judios apkellengai’o ania’a, ka apkeltemo lhnak na Herodes elpathetek Pedro m’a neksa aktaqmelaikama lhma lhnak ma’a akvesai’a pan metka apkeliepheskama. 4Netamen ma’a apathetammakpek nak na Pedro m’a nemo aklhengkeskaiakmo nengaqlhengkasemmalhkelha m’a, mok 4 apkelpasmekha soldado lhnak apkellanekama nekhav’ak ma’a. Ka apmahai’o lhnak na Herodes eiantemekhak Pedro napaqtavek enenlhet akmasko la aktaqmelaikama lhma Pascua. 5Apnengkek nak Pedro nengaqlhengkasemmalhkelha m’a, avanhek nak apkellanekama soldados ma’a. Koka avanhek nak na apkelelmalhneskeskama iglesia m’a Eniapom Neten kakpota epasmok Pedro m’a.

Nema aktepkasekha Pedro nengaqlhengkasemmalhkelha

6Lhema knem nak nkaimommalhka Herodes eiantemok hata m’a Pedro napaqtavek enenlhet’avok. Ka aptemo lhnak pelhasep ma’a, apteianmek nak Pedro akieplomo aknaktetemmalhka apmeiok cadena, apkelanmek noka apqanet soldados napokha apietnakha m’a, po’ok soldados lhnoka apkelanmek nak akieto atong. 7Mpelapkeskankek nak apiephongvei’o lhema ángel apkapaskama Apveske m’a, nkapommatmek nak konne nengaqlhengkasemmalhkelha, apmangveiakmek nak napokha Pedro, lhna aptemak apkanemo:

—¡Elhatakha, etnemekha neten, eniakhetamok! —lhna aptemak.

Apkenmekhek nak neten Pedro m’a, kolhvavek ankek nak mpalleiakmo knonemaie cadena apmeiok ma’a. 8Lhnak aptemak mokhom ángel apkanemo Pedro:

—Eiapnekha apiapnama, enaktetekha apnakteto apmankok —lhna aptemak.

Apkeliehekhavek nak Pedro m’a, lhna aptemak mokhom ángel:

—Eniaqlap apkaqlammap anak, nok, heieplanta —lhna aptemak.

9Apieplekhek nak Pedro m’a ángel, mang noka eihamok ma’a iokhalhmek la’a nlho ka la akvetai’a apaqtek la’a. 10Ka apkeliekai’o lhnak lhema apkelemhamakha guardia, apkeliekekho nhan mokhom mo’ok apkelemhamakha guardia, apkelvekho atong tavapak ma’a, mmaihekhek noka nkek atong ma’a. Ka apkelenteiapmo lhnak ma’a, apketlhengamo lhnak ketsek tep ma’a, apsepanengvekho lhnak ángel ma’a.

11Ka aklheianvekho lhnak apvalhok Pedro m’a, lhna ntemak aklhenaikama apvalhok:

—Have na niapak Apveske heiapaskasak ángel apankok kakpota hetepkeskatak neksa hemama Herodes, hevongkaskes na tep apkenmak’akha etnangkok hellanei’o judios —lhna ntemak aklhenaikama apvalhok Pedro m’a.

12Netamen nak ma’a aklhenaikokho lhnak apvalho’ok qaselha aktemakha apvetai’a m’a neksa aplhengama amai, apmeiekho lhnak aknemakha María Juan angken, mo’ok apvesai’a Marcos, man na ntek enenlhet apkelelmalhneiangko m’a. 13Ka apvekho nak Pedro m’a akieto atong, apveneiangka lhnak aptekpoiangka nhan atong. Netamen nak ma’a ngkelvana tkok nema annengkasekama akvesai’a Rode aktenengvekho lhnak atong aknakha akvenengka kakpota nkolanhok enenlhet apto aptekpoikama atong. 14Niekpelkengkek nak apaivoma Pedro m’a, akpaihekho lhnak na av’alhok ma’a, kolhvavek ankek nak nketkekhak apkakhangkelha konne aleltennaskakho ania’a, alvangkaiakmo lhnak mankolekkeskamo atong Pedro m’a. 15Koka lhnak aptaiangkok ma’a:

—Have Pedro m’a, mankoihek lheia.

—Tokha, Pedro lhka iek —lhna ntemak atemmoiangka m’a.

Koka lhna aptaiangkok mokhom:

—Have Pedro m’a, ángel apankok kelhaha —lhnak aptaiangkok ma’a.

16Koka nheklhek nak apveneiangka Pedro m’a akieto atong, ka aknemo lhnak akmaieskeskekho m’a, nkeliemaskangkek nak apvalho’ok apkelvetai’o Pedro m’a. 17Mok apophek nak aptemak Pedro apkeltemo elvanmak ma’a, ka apkeltennaiangka lhnak aktemakha aptepekha nengaqlhengkasemmalhkelha aniem’o apasmoma Apveske. Netamen lhnak aptemak apkellanemo:

—Enmeiakha ta ha’e, eleltennaskakha ta ania’a Jacobo kakpota nhan po’ok apkelialheng’a —lhna aptemak.

Ka apteiapmo lhnak konne pa’at Pedro m’a, aplhengamo. 18Atsai’o lhnak ma’a, koka apkeliamenammakpo lhnak mok apankave soldados apkellanekama nengaqlhengkasemmalhkelha, man nak eliamok apmaiangkolha Pedro m’a. 19Netamen nak ma’a apveske Herodes apkeltemo lhnak eltaqmelkaso eleliama Pedro, koka man nak elvetekhak ma’a. Ka apkelpeskeiakmo lhnak Herodes apkellanekama atong, apkeltemo lhnak na ngkolhek annapakho. Netamen Herodes apteiapmo lhnak Judea m’a apmeiekho Cesarea, apnaiakmo lhnak na m’a.

Apketsepma apveske Herodes

20Nnatheskangkek nak apveske Herodes apkellanei’o enenlhet iokhalhma Tiro kakpota nhan Sidón, ka apkenmeiekho lhnak apnakha apkemhama apmanie apmakmesaikama Herodes apvesai’a Blasto, apkellaiangko lhnak patakkom ma’a kakpota eltennaskakhak Herodes ania’a meltaqnevek mokhom, lhna songkek apkellaikamo mota aptekamok ma’a. 21Netamen Herodes apkeltemo lhnak eniaqnekhok lhemek ma’a enenlhet’avok ko Tiro kakpota nhan Sidón. Ka apnemo lhnak akieto akiekpelkammalhkelha nentemakha, ieplomo nhan aptalhnekha aptalhnema apmennave m’a, ka apkeliateiangka lhnak akientalhnemo apaivoma. 22Nkelleklemavek nak apvalho’ok enenlhet’avok ma’a, apiapqalheiangka nhan lhna aptaiangkok:

—Nientelhek ankek apaivoma lheiap, melhnok enenlhet, malha Eniapom Neten lheiap —lhnak aptaiangkok enenlhet ma’a.

23Kolhvavek ankek nak lhema ángel apkapaskama Apveske apiensaskamak Herodes ma’a, lhna nkeniemai’ak meniai’o Eniapom Neten. Netamen nak ma’a apketsepmo lhnak Herodes aniem’o aptekamok aphapetek iapa apketko’ok.

24Ka akpaihekho lhnak apaivoma Apveske aklhamakho apkellavakha. 25Koka apkelpeneskangkek nak apkelpaieskama ania’a Bernabe kakpota nhan Saulo akieto Jerusalen, apkeltaqhemo lhnak ma’a apkeliantemekho nhan Juan mo’ok nema altema Marcos.