Act 13 | TmfSC | STEP | Apkakhaiangkek nak apkeleltennasemmap ania’a m’a kakpota nhan hengetlhekmoskama apieseksek apkellelto iglesia akieto iokhalhma Antioquia. Apkelvesai’a Bernabe, Simon mo’ok nema ltema Apaiseiam, Lucio apkeniem’o natemma Cirene, Menahem kakpota nhan Saulo. Menahem noka knema akvanengkeskamo lhemek ma’a apveske Herodes Antipas.

Acts 13

Bernabe kanhan Saulo apkelempaiangkolha sekha apkelpaieskama ania’a aktaqmanma

1 Apkakhaiangkek nak apkeleltennasemmap ania’a m’a kakpota nhan hengetlhekmoskama apieseksek apkellelto iglesia akieto iokhalhma Antioquia. Apkelvesai’a Bernabe, Simon mo’ok nema ltema Apaiseiam, Lucio apkeniem’o natemma Cirene, Menahem kakpota nhan Saulo. Menahem noka knema akvanengkeskamo lhemek ma’a apveske Herodes Antipas.

2 Lhema knem na ntemak ma’a apkeliavenkaskesaiangka lhnak apvesai’a Apveske kakpota nhan apkellakhaskesammakpok mek, koka lhna aptemak apkellanemo Espíritu Santo m’a:

—Heliekieskasamo ta Bernabe kakpota nhan Saulo, allangko ta apkenmakmekama —lhna aptemak.

3 Ka apkelelmalhneiangko lhnak mokhom ma’a, apkellaqhaskesammakpo nhan mokhom mek. Netamen nak ma’a apnengkenaiangko lhnak na apmeio’ok takhaplhet’ok ma’a, apkellapaskamo nhan elhpankesek ania’a aktaqmanma.

Nema alapaskamo apkeleltennaikama ania’a aktaqmanma akieto Chipre

4 Netamen nak apketlhengamo apkenmaiangko Seleucia aniem’o Espíritu Santo apkeleltennaskama. Apkelkanetvaiakmo nhan loma nemmen akiavai’a m’a, apkenmaiangko m’a apkel·halhtepelhketmo iemmen akvakmo akiakiengveiam lhepop akhalhiengkaiam iemmen akvesai’a Chipre. 5 Ka apkelvaiakmo m’a nekha iemmen aknaktetemmalhkelha loma nemmen akieto Salamina, apketlheianveiakmo m’a ania’a aplhenammap Eniapom Neten akieto lhamakho apkaqnekhelha judios ma’a. Juan nak na apketlhelhma’ak ma’a apkelpasmoma mota.

6 Apkeliaihekama lhnak lhamakho iokhalhma m’a, ka apkelvaiakmo nhan na temma Pafos, apkelvetangveiakmo lhema judio apkeltennasemmap ania’a apmopvana ania’a, aknema apkeltongkoma meihamolhma apvesai’a Barjesus. 7 Ka aptemo lhnak na mota aplhelhma gobernador apvesai’a Sergio Paulo, apto nhan neten apankek apiangveiakmo m’a. Ka apkeltemo lhnak gobernador ngkolhek akiantemantamo Bernabe kakpota nhan Saulo, apmahai’avek nak eniailhok ania’a aplhenammap Eniapom Neten. 8 Koka mang noka eniasekhai’ak apiolhma melatsekama Barjesus, mo’ok nemaltema griego apaivoma Elimas, aniem’o nhan meltemo mei’askamek gobernador.

9 Ka apvai’o lhnak Saulo m’a, mo’ok nema altema koka nhan Pablo, aplanei’avek nak apvalhok Espíritu Santo, apkeltameskamavek nak Pablo m’a apiolhma Barjesus ma’a, 10 lhnak aptemak apkanemo:

—Meihamolhma nak lheiap apmopvana ania’a, aveske keliaqhameio’ atka. Mankonmahai’ak ellana qaselha aktaqmanma, apkelaptengkasekama qaselha akpeivomo aniem’o m’a Apveske. 11 Metka apaqto’ok hata etnek kolhvave nak lheiap aniem’o apiaqmongkasekha Apveske aptemakha, iakvatakho toka ngkotnek metai’a lhma —lhnak aptemak Pablo apkanemo m’a.

Kolhvavek ankek na ntemak metka apaqto’ok apiolhma Elimas ma’a, avanhek na ntemak apvetai’a ienaqteskama lhma. Ka apkelpaqnemaiangka lhnak apmahai’a emangvomok enenlhet kakpota epasmok aplhengama. 12 Niemaskangkek nak apvalhok gobernador apvetai’o m’a, mei’askeiakmo lhnak na nema atlhekmoskama aniem’o Apveske.

Pablo kanhan Bernabe apkeleltennaikama ania’a aktaqmanma akieto Antioquia

13 Apnaiakmek nak Pablo kakpota nhan apketlhelhma’ak na temma Pafos, apkelkanantemo lhnak loma nemmen ma’a apkenmeiekho Perge akieto konne iokhalhma Panfilia, koka Juan aptaqhemavek nak neptamen akieto Jerusalen. 14 Koka Pablo kakpota nhan Bernabe apkeliekai’ak nak na temma Perge, ka apkelvaiakmo lhnak natemma Antioquia akieto konne iokhalhma Pisidia.

Aknem nennekhelha sabado lhnak ntemak ma’a, apkelentalhnengvaiakmo lhnak apkaqnekhelha judios, apkakhengveiakmo nhan konne m’a. 15 Ka aknemo lhnak alietsatemo vakkahak ley Moises kakpota nhan vakkahak apanko’ok apkeleltennasemmap ania’a annenga. Ka netamen ma’a apkelemhama apmaniaie nemaknekhelha nak lhna aptaiangkok apkellanemo Pablo kakpota nhan Bernabe:

—Ketlhengkap elialheng’a ¿nietne ie ania’a la hengellaikamok apaivoma hengeliatekho la’a ennengko’o, he? —lhna aptaiangkok.

16 Ka apkenmekho lhnak neten Pablo napaqtave enenlhet’avok, apiasekho lhnak neten apmek apkeltemo elvanmak enenlhet’avok ma’a, lhnak aptemak:

—Ellailhonoho ko Israel kakpota nhan ketlhengkap metnangko nak judios apkellelto apkellai’o Eniapom Neten. 17 Eniapom Neten apveske engankok ko Israel apkeliekieskamo lhnak nanek nelieihengka, aplhamaseiangko nhan ma’a akieto nkotnakha apkellavakha iokhalhma Egipto, netamen ma’a aplaqlosengvekho lhnak nanek akieplomo apmopvana apanke. 18 Malha 40 iantelhkapa lhna ntemak apkelaktemmap ma’a iokhalhma metkelha temma, apkeltakmelkeskangkek nak nanek na Eniapom Neten ma’a. 19 7 apkellavakha lhnak nanek na apnaqtevaskamak Eniapom Neten konne iokhalhma Canaán ma’a, apkellaikokho lhnak nanek kakpota etnokhak apkellavakha enenlhet’avok Israelitas ma’a. 20 Koka netamen nak ma’a malha 450 iantelhkapa lhnak nanek ngvaiakmok ma’a apkelvetai’a qaselha nak ma’a. Netamen Eniapom Neten nak nanek na apkellaiangko hengiekpelkemo niapma’ak takhaplhet’ok ko Israel akvakmo aknem apvo’o apkeltennasemmap ania’a apvesai’a lhnak nanek Samuel. 21 Netamen enenlhet’avok ko Israel apkelteniai’o lhnak nanek na apiav’akha apveske apanko’ok apankavek, ka apkeliekieskamo lhnak nanek Eniapom Neten lhema enenlhet apvesai’a Saul. 40 iantelhkapa lhnak ngvaiakmok aptema apiav’akha apveske m’a, Quis apketka apkeniem’o apasmekha apketkak neptamen Benjamin annenga. 22 Netamen Eniapom Neten lhnak nanek aptepkesekhak mokhom Saul ma’a, ka aptemeskasekho lhnak nanek apiav’akha apveske m’a apvesai’a David, Jesé lhnak nanek apketka m’a, lhna aptemak Eniapom Neten aplheianmo m’a:

«Nlekavek ko evalhok David Jesé apketka, etnek hata askeltakha la etnehek» ^{▼▼1 Samuel 13:13-14; 16:12; Salmos 89:20}, lhna nanek aptemak Eniapom Neten.

23 Apkeleltennaskangkek nak nanek Eniapom Neten lhema apaivoma, aptaven neptamen David evak hata kakpota elvongkesek tep ko Israel, ka enenlhet nak ma’a Jesús alhta. 24 Amanie apmahai’a evak nak Jesús ma’a, aplomaka lhnak Juan ma’a, aplheianmek nak apkeltemo eliaqmongkasekhak mo’ok apvalho’ok ko Israel kakpota ngkolhek na allavkesangko konne iemmen. 25 Netamen ketsek nak nkaimommalhka apketsepmakha Juan, lhnak aptemak:

“Have ko’o asto m’a enenlhet anak aklheianmo na mota apvalho’ok ketlhengkap, evak hato ka netamen ko’o m’a, mangheietok na niekhe al·hatsoskesek hata alhato’ok apnakteto apmanko’ok ma’a”, lhnak aptemak Juan.

26 Ellailho ketlhengkap elialheng’a Abraham aptavana’ak neptamen kakpota nhan ketlhengkap metnangko nak judios apkellelto apkellai’o nak Eniapom Neten, ka ania’a nak akto hengvongkeskama tep nenlhamakho. 27 Apkellelto lhta apkelemhama apmaniaie kakpota nhan enenlhet’avok apkellavakha nak ma’a Jerusalen, ma lhta nkotlheianveiakmok apvalho’ok apto m’a Jesús. Lhamakho aknem nennekhelha sabado lhta nha niekhe apkaknekhak ma’a akieto apkaqnekhelha apkelietsateiangko lhta nhan apnaktalheskama apkeleltennasemmap ania’a, koka nkaqhemavek apnaqtevaskangkek Jesús. Aptaiangkek ma’a aktemakha apketlheianma apkeleltennasemmap ania’a annenga ngkotnek hata m’a. 28 Ma lhta elvetai’a niekhe aptemakha ngkolatsekama Jesús ma’a, koka nheklhek lhta apkelelmalhnengvekha Pilato kakpota eniaqhek ma’a. 29 Ka apkellaqhemo lhta nhan ma’a, ngvai’ak aknem aktemakha lhnak nanek apnaktalheskama apkeleltennasemmap ania’a. Netamen ma’a nemo nhan aklekvekho aphapak neten iamet aktenneskama, nemo nhan aklhengkeskaiakmo aphapak nemakha aklhengkeskaianlha enghapak. 30 Koka Eniapom Neten alhta aplhatekhaskakmok mokhom apieseksek apkenmaskengvaiakmo m’a. 31 Nlhamakmek nak na knem apvetaskesammakpo lhnak na napaqtavek apkellelto apketlhelhma’ak apkenmeiekho apkelempai’o Galilea akvakho Jerusalen, koka kolhvave nak ma’a apkelpaieskek ania’a aktemakha aplhenammap Jesús napaqtavek enenlhet’avok.

32 – 33 Apkeleltennaskangkek nak nanek Eniapom Neten lhema apaivoma nelieihengka ngkotnek hata, koka melvetaiangkok ma’a. Ennengko’o koka nelvetai’ak, nenmak’ak na angelleltennaksek napaqtavek ketlhengkap ania’a aktaqmanma nak Eniapom Neten aktemakha aplhatekhaskeiam apieseksek apkenmaskengvaiakmo Jesús, aktemakha lhnak nanek na aktalhesammalhka vakkahak Salmos 2, ntemak hengke’e:

«Lheiap apto eietka, ko’o heieniemai’a astepkeskama kolhvave nak» ^{▼▼Salmos 2:7}.

34 Lhennenga lhnak nanek aplheianma Eniapom Neten elhatekhaskamok hata Jesús, meltemo nhan ekpelkakpok aphapak konne metaimong alhva, lhnak nanek aptemak Eniapom Neten hengke’e:

«Allangkok hata qaselha altakmanma askeltennaskama lhta akto have niapak ankek allangkok David».

35 Ka ntak na aktalhesammalhka mo’ok Salmos:

«Meniangko nkek nkokpelkalhkak apiempek aphapak apto apokkanma lheiap» ^{▼▼Salmos 16:10}, lhna nnemak aktemo.

36 Apiav’akha apveske David apkelpasmongkek nak nane mota apkennemolhema aniem’o Eniapom Neten apkeltema etnek ma’a, netamen apketsepmek nak ma’a, aknemo aklhengkeskaiakmo nhan konne metaimong alhva aphapak ma’a akieto apnaiangkolha nhan apkelieihengka apkeletsepma, koka ntepelkammalhkek nak nanek aphapak ma’a. 37 Mok aktema koka apiokha aphapak Jesús, Eniapom Neten noka aplhatekhaskeiakmo mokhom apieseksek apkenmaskengvaiakmo m’a, mannoka nkokpelkammalhkak apiokha aphapak ma’a.

38 – 39 Ellailho no ko israelitas ania’a netlhekmoskama nak, apkellelto la meliaskeiam Jesús ngkolhek hata aktemeskesangkankek meleliehekho apkellaskamakha Eniapom Neten, ngkolhek hata nhan altemeskeso apkelpeivomo. Koka ley anak Moises mankavankek nkotneskesama nkek meleliehekho nak apkellaskamakha Eniapom Neten, mankavankek na nkoltemeskesek apkelpeivomo. 40 Ellaho ketlhengkap kakpota mankovhek akientalhnema apketlheianmo lhnak nanek apkeleltennasemmap ania’a, lhnak nanek aptaiangkok:

41 «Ellaho ketlhengkap apkellelto apkelvannaikama, enmenamok enieniamok hata nhan, aveskak hata ko’o qaselha melvetai’o, eliaskamok hata akno ta aleltennasengka ketlhengkap aktakha akvetammalhka m’a» ^{▼▼Habacuc 1:5}, lhnak nanek aptaiangkok ma’a.

42 Ka apkelenteiapmo lhnak Pablo kakpota nhan apketlhelhma’ak akieto apkaqnekhelha judios ma’a, koka apkeleltemo lhnak mokhom enenlhet’avok elvatamok mo’ok sabado nennekhelha kakpota ellengaskesek mokhom ania’a nak. 43 Man nantek judios kakpota nhan metnangko judios apkellelto apalhakvaiam apkelvanekamok aptaiangkelha judios, apkelieplekho lhnak Pablo m’a kanhan Bernabe. Koka apkelleltemo lhnak melieniekhek aptaikamok meliaskeiam Eniapom Neten kanhan apkellamelaiam ma’a.

44 Ka akvaiakmo lhnak mokhom aknem nennekhelha sabado m’a, lhamakho enenlhet nak apkaknekhak ma’a apkenmahai’a ellailhok Eniapom Neten apaivoma. 45 Apkeliasepkeskangkek noka judios apkelvetai’o enenlhet’avok apentalhnema apkankesekha Pablo m’a, ka apkelempai’akha lhnak apkeliaskama apatno’ok kakpota nhan apkeltaknongkomo neksa apkeltennaikama Pablo m’a. 46 Koka Pablo kakpota nhan Bernabe apkeleltennaskamo lhnak metka apkellai’a, lhna aptaiangkok:

—Hengelietave niekhe angetlhenek Eniapom Neten apaivoma apmaniaie ketlhengkap apkellelto judios, koka menmaiangkok takha m’a, meleltemok ngkolhnankok aliennaktema apnenio’ok mangkotnengvaiam annelha. Koka ntasek angelletsavkesek ania’a nak apieseksek anak metnangko nak judios. 47 Apveske lhnak nanek apkeltemo antehek ma’a, lhna aptemak:

«Askapaskek lheiap kakpota etnek malha apkapommatema lhmankek ham, etso’ok hata ania’a m’a askelvongkeskama ta tep aplhamakho enenlhet’avok akvakmo nnelha lhepop lhma nkek ham» ^{▼▼Isaias 42:6; 49:6}, lhnak nanek aptemak.

48 Nkelpaihekhek nak apvalho’ok metnangko judios apkellengai’o m’a, apketlheianmo lhnak na aktaqmanma Eniapom Neten apaivoma, meliaskeiakmo nhan apkellelto apkeliekieskama Eniapom Neten kakpota ngkoitek aliennaktema apnenio’ok mankotnengvaianlha nnelha. 49 Apkelpaieskangkek nak apaivoma Apveske lhamakho iokhalhma nak ma’a. 50 Koka apkellelto judios apkelentennaskekho lhnak meliamolhma Pablo kakpota nhan Bernabe naqtavek ngkelvana’ak aliamolhma, ngkeskama alletsekama nhan ma’a. Napaqtavek na apkelemhama apmaniaie’ neten apankavek akieto apiav’akha temma nak, knemo nhan alentepkeskamo iokhalhma nak ma’a. 51 Ka apkelenteiapmo lhnak Pablo m’a kanhan Bernabe, apalesaiakmo lhnak apmanko’ok lhepop aktek aniem’o apkeltaknongkoma enenlhet’avok anak ma’a, ka apkenmeiakho lhnak iokhalhma Iconio. 52 Koka neptamna’ak nema altamesaikamok ma’a akieto Antioquia nkelpaihekhek nak apvalho’ok kakpota nhan apkellaneiangkek nak apvalhok Espíritu Santo m’a.