Acts 14

Pablo kanhan Bernabe apkeleltennaikama ania’a aktaqmanma akieto Iconio

1Apkelvaiakmek nak Pablo kakpota nhan Bernabe akieto Iconio, apkelentalhnengvaiakmo lhnak apkaqnekhelha judios, ka apketlhekmoseiangko lhnak ania’a aktaqmanma m’a. Man nantek judios kakpota nhan griegos man nak eliaskeiakmok ania’a m’a. 2Koka moklhem’a judios apkeliaskeiakmek nak ma’a, ka apkellavkeskamo lhnak na moklhem’a metnangko judios ma’a kakpota ellammelhekhak engelialheng’a. 3Koka nheklhek nak apkakhaikamok Pablo ka nhan Bernabe m’a akieto Iconio, apkeleltennaseiangka lhnak na ania’a hengamelaiam Apveske enenlhet’avok ma’a metka apkellai’a, ngkanek apkeliamavek nak apkeltakmelkeskamo m’a. Apkellaiangkek nak na m’a apkenmopvanka’a kakpota ellanangkok qaselha mongenatkeskama kakpota nhan qaselha hempelapkeskama. 4Koka enenlhet’avok anak ma’a apkelhpankesammakpek nak ma’a, napokha lhnak apkelieplomak apkelemhama apmaniaie judios kakpota nhan napokha nema allapaskamo. 5Ka netamen nak ma’a apiepetkekho lhnak po’ok moklhem’a judios, metnangko judios kakpota nhan apkelemhama apmaniaie apkeleltemo enaqtevaksek Pablo kakpota nhan Bernabe, eliaqnangkok na metaimong kakpota ennapok ma’a. 6Apkeliamavek noka nema alapaskamo m’a, apkeniaiangko apkenmeiekho na temma Listra kakpota nhan Derbe akieto konne iokhalhma Licaonia, lhamakho apnakha la temma m’a, 7apketlheianveiakmo lhnak na ania’a aktaqmanma apkelvaianlha la’a.

Nema aliaqnai’a metaimong Pablo akieto Listra

8Apnengkek nak nalhepop lhema enenlhet apteiaianlha sekha lhnak mankomopvana elhong m’a aniem’o ngkollatsekama apmankok akieto m’a Listra. 9Apkailheiangkavek nak apketlhekmoskama Pablo m’a, ka apkeltameskamo lhnak Pablo m’a enenlhet anak, apvetai’ak nak mei’askeiakmo m’a kakpota etaqmelekhak ma’a. 10Lhnak aptemak Pablo apkanemo apiennakteskamo apaivoma:

—Etnemekha neten lheiap, elpeivesekha ta apmanko’ok —lhna aptemak Pablo.

Apnelhtengangkek nak neten enenlhet nak ma’a, aplhengamo lhnak na m’a. 11Nkelpelapkeskangkek nak enenlhet’avok apkelvetai’o m’a, ka alpaiheiangka lhnak apatno’ok apkelpaqmeteiangka apkelpaqmeiasma apankave ko Licaonia, lhna aptaiangkok:

—Koka dioses ham aptaikokha enenlhet, apkelvaivantaniek akieto nak hengke’e —lhna aptaiangkok.

12Ka apkeleltaiangko lhnak Bernabe apto dios Zeus, Pablo koka apto dios Hermes, ngkanek apto mota apmopvana eliatak ma’a. 13Apnengkek nak ma’a lhema sacerdote apkenmakmekama apnemakha dios Zeus, akieto nekha atong nentalhnemakha na temma nak ma’a. Ka aplheiakmo lhnak ma’a kanhan enenlhet’avok apkeliantemaiakmo lhnak na toro kakpota nhan elhnemok kakpota ellankongvak ma’a. 14Neksa apkelvetai’a lhnak Pablo kakpota nhan Bernabe apketlheiakmo nengaqtek enenlhet’avok ma’a, apkeliapteiangko lhnak apkelentalhnema, apkelketameiangko m’a apalhakvaiakmo nhan apieseksek ma’a, apiapqalheiangka lhnak ma’a, lhna aptaiangkok:

15—¡Metnamok ham! Have ennengko’o dioses, enenlhet apankavek ennengko’o ka akto nak ketlhengkap. Vanlha nelva’ak lhek ennengko’o nenmak’o angetlhekmosangkok ania’a aktaqmanma ketlhengkap kakpota elvatesangkok apkeltemakha ngkolatsekama. Elpengkangvomok na apvalho’ok akieto m’a Eniapom Neten apto menietsepma, apto nhan apkelanai’a neten, nalhepop, alvata kakpota nhan qaselha aknaiangko m’a. 16Apkaiangkavek nak nanek Eniapom Neten aplhamakho enenlhet’avok apkenmahai’akha la etlhengkesek apanko’ok apankavek. 17Koka nheklhe mota nhan apkeltakmelkeskeskama apkellaniemhaikama kakpota elvetaskesek aptemakha apiamolhma. Apkellapaskaskek akmamai’a kakpota ngkoitek akiavai’a apnaklhekamok akielhna, ngkoitek na akiavai’a aptekamok kakpota nkolpaihekhak apvalho’ok ma’a —lhna aptaiangkok ma’a.

18Apkelientelh apankek na ntemak ma’a mang nak nkonmopvanka’ak ellangkok qaselha nengaikamok anak ma’a. 19Koka nietemavek nak na apkelvai’o judios apkelleniem’o Iconio kakpota nhan Antioquia, ka apkelpengkangvekho lhnak apvalho’ok enenlhet ma’a kakpota ellammelhkasekha Pablo. Ka apkeliaqneiangko lhnak metaimong ma’a, atlheianmo lhnak apvalho’ok enietsepmak ma’a, apkelienioseikokho lhnak na akieto nepiava temma. 20Ka apkelvai’o lhnak ma’a nema altamesaikamok, apkel·halhiengkangvei’o lhnak apietnakha Pablo, ka apkenmekho lhnak apankek neten, aptalhnekho mokhom natemma m’a.

Mo’ok aknem na ntemak ma’a apkenmeiekho Pablo kakpota nhan Bernabe na temma Derbe, 21apketlheianveiakmo nhan ania’a aktaqmanma m’a, man nak nantek enenlhet aptaiangko apkeltamesaikamok ma’a. Netamen apkeltaqhemo lhnak akieto Listra, Iconio kakpota nhan Antioquia. 22Ka apkeleltemo lhnak amaika’a apkellelto nema altamesaikamok ma’a, apkeliateikokho lhnak na etlhengkesek meliaskeiam Jesús ma’a, lhnak aptaiangkok ma’a:

—Annengangkok hata akiavai’a akientalhnema nenmak’o la antalhnengvomok akieto nak ma’a aptemakha apveske Eniapom Neten —lhna aptaiangkok ma’a.

23Apkelteskesaiangko lhnak na metno apketko’ok takhaplhet’ok moklhem’a apkaqnekhelha iglesia m’a, apkelelmalhneiangko lhnak nahan, apkellaqhaskesammakpo lhnak na mek kakpota elpokkenek ellasennama Apveske aniem’o meliaskeiam ma’a.

Pablo kanhan Bernabe apkeltaqhemo neptamna’ak Antioquia konne iokhalhma Siria

24Netamen apkelempaikokho lhnak mokhom apketlhengama m’a, apkeliekangveiakmo m’a iokhalhma Pisidia, apkelvaiakmo konne iokhalhma Panfilia. 25Ka apkeleltennaiangka lhnak ma’a Eniapom Neten apaivoma na temma Perge. Netamen ma’a apkenmeiekho lhnak Atalia, 26ka apkelkanetvaiakmo loma nemmen kakpota eltaqhok mokhom neptamna’ak akieto Antioquia. Apkelempaiakhasekha lhnak na m’a nema allapaskama ka nhan nemo alelmalhneskeskamo m’a Eniapom Neten kakpota elpasmok neksa apketlhengama kakpota eleltennasangkok ania’a aktaqmanma m’a, apkelpeneskangkek nak apkenmakmekama. 27Ka apkelvekho lhnak Antioquia m’a, apkellankesekho lhnak apkellelto iglesia m’a, ka apkeleltennaseiangka lhnak ania’a aktemakha Eniapom Neten apkelanai’a qaselha neksa apketlhengama m’a. Apketlheianmo nhan aktemakha apkelpasmoma mota Apveske kakpota eleltennasangkok na ania’a aktaqmanma metnangko nak judios kakpota meliaskamek na m’a. 28Ka apkakhengvekho lhnak kvanqakho m’a apieseksek nema altamesaikamok.