Acts 20

Pablo aplhengama akieto Macedonia kanhan Grecia

1Netamen nak ma’a akmaskemo akiennoma lhma’ m’a, ka apkellaveiangka lhnak Pablo aplhamakho nema altamesaikamok kakpota eleltennasangkok apkeleltakha ta etnangkok. Netamen nak ma’a apkelpaivesaiangko nhan, aplhengamo lhnak apmeiekho iokhalhma Macedonia. 2Aptaiangka lhnak amaika’a m’a lhamakho apkellavakha akietelha la apmeiekhelha, apkeliatekho lhnak apkelialheng’a m’a, netamen nak ma’a apvakho lhnak Grecia. 3Ka apnekho lhnak m’a akvakmo apkanetolhem’a pelten, nkaikama lhnak aplhengama mokhom Pablo enianetvomok loma nemmen ma’a kakpota elhong akieto iokhalhma Siria. Ka aplengai’o lhnak ania’a apkellanekha aptangkolha judios apkenmahai’a ennaktevaksek ma’a, aklheianmo lhnak apvalhok etaqhok neptamen nalhepop apmenek eiekangvakhak Macedonia. 4Apketlhelhma’ak nak Sopatro apketka Pirro apkeniem’o natemma Berea, Aristarco kakpota nhan Segundo apkelleniem’o Tesalonica. Gayo apkeniem’o Derbe, Timoteo, Tiquico ka nhan apialheng apvesai’a Trofimo apkelleniem’o koka m’a Asia. 5Apmaniaie lhnak aptaiangkok apkelvekha m’a akieto natemma Troade, hengellelhvekho lhna lhta nhan ennengko’o m’a.

6Ngvakme lhta nnelha aktaqmelaikama lhma m’a pan metka apiepheskama, ka neltokho netlhelhma’ak Pablo m’a nenmeiakho loma nemmen nellempo’o Filipos akvakho natemma Troade. 5 aknem alhta netlhengama m’a, ka neltaniengvakho lhta netlhelhma’ak alhta m’a, nengakhangko nhan ma’a akvakmo 7 knem.

7– 8Ampakhasekha nke knem semana alhta ntak nengaqnakho m’a akieto mo’ok av’alhok neten pa’at kakpota angellanangkok nentoma aktaqmanma m’a. Nlhanie lhta nhan talha alhankok nema alapommatkeskama m’a, aholhe lhta apketlhekmoskama Pablo m’a meliaskeiam ma’a akvakmo neplhet pelhasep alhta m’a, lhta ngkanek apmak’o elhong mokhom sosekhek ankek ma’a.

9Apkailhengke lhta m’a lhema apketkok apvesai’a Eutico, neten alhta pnak atong atkok, tenn alhta nkaqhak ma’a aniem’o akvenaktema apkeltennaikama songke Pablo. Ka apteiakmo lhta m’a apkempo’o lhta akieto apteiam 3 av‘alho’ok neten, ka apkelentepo lhta koneng enenlhet’avok apkenmahai’a elankesekhak neten, koka apkelvetangvakhe lhta apketsepma m’a. 10Ka aptepo lhta nhan neten Pablo m’a apatheto lhta apietnakha apketkok alhta m’a, apmo lhta nhan apietnakha, lhta aptak apkellano meliaskeiam ma’a:

—Moltama apvalho’ok, menietsepak —lhta aptak.

11Ka apkanantakho lhta mokhom Pablo neten pa’at, aptavengko nentoma aktaqmanma m’a. Apkempakho lhta mokhom apketlhekmoskama akvakmo atsak’o m’a, netamen aptaqhakho nhan ma’a. 12Apkeltaqhakhek lhta nhan enenlhet’avok, apkeletsevasave lhta m’a ngkanek ma lhta enietsepak apketkok alhta m’a.

Pablo aplhengama aptema amaika’a natemma Mileto

13Nalhepop alhta aplhengak Pablo m’a akvakho natemma Aso, ennengko’o lhtoka nelkanantak loma nemmen, nelelhvakho m’a. 14Ka apvakho lhta Pablo m’a, nelkananto lhta loma nemmen netlhengo na temma Mitilene. 15Lhema aknem lhta ntak netlhengama m’a nelieko’o na temma Quio, mokhom alhta lhema aknem netlhengama nelieko’o lhta natemma Samos, akieto nekha iemmen akiavai’a aknaktetemmalhkelha loma nemmen. Ka nempokho lhta mokhom netlhengama lhema aknem, nelvakho natemma Mileto. 16Pekhai’a lhta nentangkok netlhengama m’a ngkanek Pablo ma lhta emak’ak elhek akvangkakho iokhalhma Asia. Ma lhta nhan nkomak’ak etnek amaika’a na temma Efeso ngkanek apekhak’ave lhta niekhe eniakha Jerusalen kakpota epasengvakhak aktaqmelaikama lhma akvesai’a Pentecostes ma’a.

Pablo apkeltennaikama napaqtavek metno apketko’ok akieto Mileto

17Nengakhangke lhta m’a na temma Mileto, ka apkelto lhta Pablo ngkolhek aleltennaskakho metnangko apketko’ok iglesia akieto Efeso elelhiemok apnakha m’a. 18Ka apkelvakho lhta m’a, lhta aptak apkellano Pablo:

—Apkeliavek ketlhengkap asvo’o lhta ko hengke’e iokhalhma Asia, nheklhe mota astaqmelkasemmalhko. 19Askasennaikama mota Apveske metka askammalhko nhan, asvenema akpalleiam aimenek ehaqtek nahan neksa aslengaiangkok akientalhnema aniem’o judios. 20Koka nheklhek alhengkeskama asketlhekmosekamok ketlhengkap napaqtavek enenlhet’avok kakpota nhan apkakhaiangkolha apankavek, kakpota nkoltaqmelek apkellaniemhaikama ketlhengkap ma’a. 21Askeliatengke lhta judios kakpota nhan metnangko nak judios askeltemo eliaqmongkasekhak mo’ok apvalho’ok napaqtek Eniapom Neten kakpota nhan meliaskame Apveske engankok Jesús. 22Koka kolhvave nak hemama Espíritu aniakhak hata m’a Jerusalen, koka moihok mokhom akmak’akha ngkotnek emanie. 23Koka neksa alhengama alhta mota lhamakho apkellavakha lhmankek ham, heltennaskangke lhta mota Espíritu Santo nkolhe ta hetvaso m’a, kakpota nhan ngkolhek hetalhneso nenmammalhkelha. 24Koka mamma aptaikama evalhok angvetsepok kelhaha, askeltavek ko’o asavhok asmakmekama malha askelpaivasemmalhka aptakha lhta apaivoma Apveske Jesús heiano akieplomo akpaihekha evalhok, apkeltemo lhta apaiaksek ania’a aktaqmanma aplhenammap hengellamelaiam Eniapom Neten.

25Askeleltennaseiangko lhta mota apieseksek ketlhengkap ania’a aktemakha aptema Apveske Eniapom Neten, koka nkomaskok hata helvetai’ak mokhom ketlhengkap, haveniapak ankek astakha nak alheianma. 26– 27Koka mankonmak’o la eleliehekhok Eniapom Neten ketlhengkap, apanko’ok apankave, ngkanek asketlhekmoske lhta ko’o lhamakho aktemakha apkelleltemakha etnangkok Eniapom Neten. 28Pastores aptaiangkok ketlhengkap aniem’o Espíritu Santo apkeltemeskeskama apkelemhama apmaniaie, ¡elel·halhnama ta mota ketlhengkap! Eltaqmelkes hata nhan apkellelto iglesia apankok Apveske, apkellelto lhta nhan apkenmama aniem’o ema apankok. 29Asiave ko’o asketsepo ta elvak hata enenlhet hengke’e apkenmahai’a enaqtevaksek Jesucristo apkennemolhema, malha aktemo nak vavo akloma. 30Moklhem’a ta nhan etiepok apieseksek ketlhengkap etlhekmoksek hata aktemakha akmovana ania’a kakpota eleliehekhok na nema altamesaikamok anak ma’a. 31¡Elel·halhnama toka! Nkotlheianvakho ta mota apvalho’ok astemakha lhta mota asketlhekmosekamok lhamakho aknem akvakmo hanetolhema iantelhkapa neksa akientalhnema lhta niekhe m’a.

32Kolhva koka askenmalhnema Eniapom Neten eltaqmelkesek ketlhengkap elialheng’a aniem’o ania’a aktaqmanma hengamelaiam altakmelkeskeskama ta apkellaniemhaikama. Nietnek na apmopvana m’a kakpota elvanengkeskesek na apvalho’ok meliaskeiam, hata nhan ellangkok ketlhengkap ma’a aplheianmo lhta apaivoma ellangkok apkelpasmekha nhan apkelpokkanma.

33Apkeliavek ketlhengkap metka askelelmalhnekama lhta askeleltalhnema la’a kakpota nhan patakkom. 34Asmakmekama koka ehenkok ehenkek kakpota atak ko’o aimommalhkelha nak kaselha’ ko’o kakpota nhan asketlhelhma’ak. 35Vanlha mota asketlhekmoskama askeleltemo eleliephekho enmakmama kakpota elpasmok enenlhet metka nak apkelletsekama, aptemakha lhta mota aplheianma Apveske Jesús, lhna aptemak:

“Aktaqmelakho nkek apkaikamo nak po’ok qaselhaha, melhnok ma’a apto aplhevai’a qaselhaha”.

36Ka akvakmo lhta nnelha apkeltennaikama Pablo m’a, apkelteklheio lhta aptapno’ok nalhepop, apkenmalhno kanhan aplhamakho enenlhet’avok ma’a. 37Ka apkeliapqalho lhta nhan enenlhet’avok ma’a, apkelpatheto lhta Pablo m’a, apkelpetseso nhan apmalhempenek ma’a. 38Aiosak’a lhta ntak na apvalho’ok enenlhet’avok ma’a ngkanek Pablo aplheianmo metka apkelvetekha mokhom. Netamen apkellelto lhta apketlhelhma’ak Pablo akvakho akietnakha loma nemmen nekha alvata’ akiavai’a m’a, ka aptaqhakho lhta Pablo m’a.