Acts 25

Pablo napaqtek gobernador Festo

1Aptemo lhnak aphalhnankok gobernador apvesai’a Festo akieto m’a natemma Cesarea, hanetolhem’a aknem na ntemak ma’a apmeiekho lhnak Jerusalen. 2Ka apkelteteskai’o lhnak ma’a apkelemhama apmaniaie sacerdotes kakpota nhan judios apkellelto neten apankavek ma’a apkenmahai’a etselhnanak mokhom Pablo. 3Ka apkellapiosemmakpo lhnak apkeleltemo ngkolhek akiantemantamo Pablo akieto Jerusalen, koka apkenmahai’ak na niekhe ellaqhek nalhet amai ma’a. 4Koka lhna aptemak Festo apkellanemo:

—Apnek Pablo ma’a nenmammalhkelha akieto Cesarea, ketse nkaimelhkak ataqhok hata ko’o mokhom ma’a. 5Ntasek hata nhan atnangkok asketlhelhma’ak ketlhengkap ma’a kakpota etlhenek ngkolatsekama la apkelanai’a m’a —lhna aptemak Festo.

6Malha lhnak 8 nlho ka la 10 aknem apnema Festo m’a akieto Jerusalen, ka aptaqhemo lhnak mokhom neptamen akieto Cesarea. Mo’ok aknem na ntemak ma’a, apnekho akieto apkeliekpelkemelha aptaiangkolha enenlhet’avok ma’a, ka apkeltemo lhnak ngkolhek akiantemantamo Pablo napaqtek ma’a. 7Apkelvekhek nak na m’a judios apkelleniem’o Jerusalen, apketlheianmo lhnak meihamolhma Pablo m’a, apkelanei’o nhan ngkolatsekama nkek, mannoka niekhe elvetaskeskamak iokhalhmek ankek apkelanai’a qaselha ngkolatsekama Pablo m’a. 8Koka lhna aptemak Pablo apkellatemmoiangka apkasennammakpo m’a:

—Motvaskama ko’o ley apanko’ok anak judios, motvaskamak na Eniapom Neten apnemakha nak kakpota nhan apiav’akha apveske Romano —lhna aptemak Pablo.

9Lhna aptemak na Festo:

—¿Apmak’a nlho eniakha Jerusalen lheiap kakpota aiekpelkok ko’o m’a aktemakha aplhenammap lheiap, he? —lhna aptemak.

Koka Festo aptemengkek na apankek apaivoma m’a apkeltemo lhnak nkollekkasama apvalho’ok judios. 10Ka apkatemmoiangka lhnak Pablo m’a, lhna aptemak:

—Ka nietavek ankek ko’o ngkolhek heiekpelkok astemakha hengke’e akieto neniekpelkammalhkelha napaqte apiav’akha apveske romanos, ngkanek apiave lheiap mamma askelammelhma judios. 11Lhta sto la askelanai’a ngkolatsekama, nietavek angvetsepok, koka aptangko la apkenmopvanka ania’a hetlheianma enenlhet’avok anak, mankoieto lheiap hellangkongvomok ma’a. Askeltave ko’o hellapaksek napaqtek apiav’akha apveske romano kakpota heiekpelkok ma’a —lhna aptemak Pablo.

12Aplengai’ak nak Festo aptemakha apaivoma Pablo ka apkankesekho lhnak enenlhet’avok apanko’ok nema apkeliamo kakpota eliohok aktakha aklhenakha apvalho’ok. Ka netamen ma’a lhna aptemak Festo apkanemo Pablo:

—Henmalhnema lhkek lheiap apmahai’a eniakhak apnakha apiav’akha apveske romano kakpota eiekpelkok ma’a, angvapaksek hata m’a —lhna aptemak.

Pablo napaqtek apiav’akha apveske Agripa

13Moklhem’a aknem nak niekai’ak ma’a, alvekho lhnak ma’a apiav’akha apveske Agripa kakpota nhan ngkelvana akvesai’a Berenice akieto natemma Cesarea kakpota nkotnangkok amaika’a gobernador Festo. 14Nlhamakmek nak aknem akhengveiam ma’a, koka Festo apkeltennaseiangka lhnak ania’a Agripa aptemakha Pablo, lhna aptemak:

—Ka nke’e nenmammalhkelha nak apnek lhema enenlhet apvesai’a Pablo apkaklhengkeskama lhta gobernador Felix. 15Mangkolatsekama apketlheianma apvesai’a aniem’o apkelemhama apmaniaie sacerdotes kakpota nhan metno apketko’ok judios neksa astema amaika’a lhta ko’o akieto m’a Jerusalen, apkeleltave lhta niekhe altok ematong ma’a. 16Koka ennengko’o nengelelto apkelveskai’e romanos have nentaiangkolha angaqhek emmo’ok metka amanie apkasennammakpo pankek la aplheianma napaqtavek apkellelto la apkelpaieskama apvesai’a meihamolhma. 17Netamen apkelvaktamo lhta nhan hengke’e, asmeiakho lhta kolhvavek ankek akieto neniekpelkammalhkelha ka askelto lhta ngkolhek akiantemantamo Pablo. 18– 19Vanlha noka niekhe apkellatemommakpo aptemakha lhema enenlhet apketsepma lhta apvesai’a Jesús. Pablo koka nhan aplheianmak aplhatekhangveiakmo m’a apieseksek apkenmaskengvaiakmo, have lhta niekhe qaselha akiav’o ngkolatsekama m’a askanemo nhan ko’o m’a. 20Ma lhta ko aihamo astemakha askelanei’o m’a, ka askenmalhnengka lhta Pablo aktaqmanma aiantemok Jerusalen kakpota nkolhek akiekpelko aptemakha m’a. 21Apkeltave lhtoka Pablo eiekpelkok hata m’a aptemakha apto apiav’akha apveske Romano, ka askelto lhta elhek mokhom hengke’e nenmammalhkelha nak akvakmo aknem askapaso ta akieto Roma —lhna aptemak Festo.

22Netamen lhna aptemak Agripa apkanemo Festo:

—Askeltavek ko lha angvailhok enenlhet anak —lhna aptemak.

Koka lhna aptemak Festo apkatemmoiangka:

—Hai, sosekha ta —lhna aptemak.

23Mo’ok aknem na ntemak ma’a, Agripa kakpota nhan Berenice alentalhnengvaiakmo lhnak konne pa’at neniekpelkammalhkelha, nkelammalhkavek nak ma’a, altemo lhnak atlhelhma’ak apkelemhama apmaniaie kempokhakme, kakpota nhan moklhem’a apkelemhama apmaniaie apkellavakha apankavek ma’a. Ka apkeltemo lhnak Festo ngkolhek akiantemantamo Pablo m’a, 24lhnak aptemak Festo:

—Apveske Agripa, kakpota nhan aplhamakho enenlhet’avok anak hengke’e, ¡ellailhono! Ka nke’e enenlhet anak askeleltennaso lhta, aplhanie lhta judios apketselhnanongkoma nehaqtek akieto m’a Jerusalen, kakpota nhan hengke’e na temma nak Cesarea, ma lhta ellasak apiapqalhengka apkeleltemo angvakhek. 25Koka motai’ak ko’o aptemengveiakmo la lhma enenlhet anak kakpota nkoietok askaqhema la’a. Angvapaksek hata apnakha m’a apiav’akha apveske romano kakpota eiekpelkakpok ma’a ngkanek aptema apanke lhta nhan angvapaksek ma’a. 26Koka nkaimelhkek angvapaksek astalheskeskama la lhema vakkahak apiav’akha apveske ehenkok kakpota altennasama qaselha ngkolatsekama kelhaha apkelanai’a enenlhet anak. Koka mamma aptemakha niekhe enenlhet anak, ka ngkanek aiantementak hengke’e napaqtek lheiap Agripa, kakpota nhan napaqtavek ketlhengkap apkelemhama apmaniaie kakpota elelpeivesekhok apkelanai’a qaselha ngkolatsekama kelhaha, kakpota atalhaksek vakkahak, angvapaksek na apnakha apiav’akha apveske Romano. 27Koka aqhemo ta ngkotnek askapaso la enenlhet anak metka asvetai’a ko’o qaselha ngkolatsekama la apkelanai’a —lhna aptemak Festo.