Acts 26

Apkasennammakpo panke Pablo napaqtek apiav’akha apveske Agripa

1Lhna aptemak apiav’akha apveske Agripa apkanemo Pablo:

—Eniasennap apanke lheiap, eliata noho —lhna aptemak.

Ka apiasekho lhnak neten apmek Pablo m’a apkeltema elvanmak sekhek enenlhet’avok ma’a, lhna aptemak:

2—Mpaihakhek ko evalhok ngkanek apnek lheiap hengke’e Agripa, evankek angvasennalhko ehenke lhamakho qaselha hetselhnanongkoma apkellanekamok apankavek judios. 3Apiavek lheiap neliamenammalhko lhta netlheianma m’a aniem’o nentaiangkolha engankave nak ennengko’o judios. Apiavek na lheiap nentaiangkolha nak judios ka ngkanek askeltavek ko’o eniailhok metka akpekhai’a askeltennaikama nak.

4Astemakha eietkok heliekpelkemo aplhamakho judios, apkeliavek na aktemakha askangiemhaikamaha askavakha kakpota nhan natemma Jerusalen. 5Apkeliamavek mota astemo fariseo m’a, ¡elelmalhnamano ta enenlhet, etlhenek hata m’a! Ennengko’o nengelto fariseos avanhek hengeliatekho henganemakha enganko’ok, mangkolhnok ma’a po’ok anak apasmekha. 6– 7Koka kolhvave nak heliantemantek napaqtek lheiap judios anak kakpota heiekpelkok lheiap aniem’o m’a al·halhnekama evalhok atak hata lhema apaivoma apkellaiangko lhnak nanek Eniapom Neten nelieihengka aktemakha ngkotnek hata m’a. Alel·halhneiangka nhan apvalho’ok 12 apkelpasmekha apketkak neptamen Israel elvetak hata m’a, ka nkanek apkellasennaikama mota lhamakho aknem kanhan pelhasep akvakmo akvo’o ta m’a. 8¡Ketlhengkap koka apkeliaskeiakmek Eniapom Neten apmopvana enaqlhatekhaskamok apieseksek apkenmaskengvaiakmok enenlhet’avok!

9Lhennenga alhta nlheianmek evalhok lhamakho aktemakha asmak’akha atnehek anaktevaksek apkellelto meliaskeiam Jesús ko Nazaret. 10Astemengke lhta m’a natemma Jerusalen, askellaklhengkeskangkek mota’a nengaqlhengkasemmalhkelha apentalhnema apkelpokkenammap akieplomo alhevai’a lhta ania’a hellaikamo lhta apkelemhama apmaniaie sacerdotes. Nlekave lhta nhan evalhok aslengai’o mota aptekioma m’a. 11Askeliaqpelhketaiangke mota apiempeiok akietemelha la apkaqnekhelha, askeltemo elvatesangkok aptaikamok meliaskeiam Jesús. Asmenlhenaikama akvakho mo’ok apkellavakha ngkanek avanhe lhta apkenmopaska askellanei’o m’a.

12Netamen na m’a aklheianmo lhta nhan evalhok amhangkok natemma Damasco kakpota alpathetek na m’a, nietne lhta songkek vakkahak ania’a alhevai’a aniem’o apkelemhama apmaniaie sacerdotes. 13Neksa alhengama lhta aiseksek amai ma’a, malha la 12 katelho kelhaha, mpelapkaske lhta asvetai’a akiennaktema apommatma’ aniemai’o neten, mankolhok ma’a aknem anak apommatema, henghalhiengkakme lhta apommatma m’a. 14Ka nelpallakmo m’a, asleng’o nhan nema aliatekama aniem’o neten, arameo apaivoma lhtoka m’a, lhta ntak:

“Saulo, Saulo ¿Se lha akto heiakmasengka nak ke, he? Akhemo heiammelhma lheiap, aptevasekpave panke malha aktonak buey la’a akiapelhketma nkek nak nema alteklheikamok anak”, lhta ntak nema aliatekama ma’.

15Ka askatemmongka lhta ko’o m’a, lhta stak:

“¿Se lha enenlhet lheiap ke, Apveske?”, lhta stak.

Ka heiatemmongka lhta Apveske m’a:

“Jesús ko’o, heiakmasengka nak lheiap. 16¡Etnemekha neten kolhvave nak! Asteiapva’ak ko’o napaqte lheiap kakpota atneskesek askasennaikama lheiap, askeltavek epaiaksek ania’a aktakha nak apvetai’a lhkaiek, netamen epaiaksek hata nhan ania’a aktemakha ta asvetaskeskama lheiap. 17Avongkesek hata nhan tep lheiap apkenmak’o la enaqtevaksek judios kanhan metnangko nak judios. Kolhva koka angvapaksek hata apieseksek metnangko nak judios kakpota etlhekmosangkok ma’a. 18Kakpota nkotlheianvomok apvalho’ok elvatesangkok na apkelloma ienaqtesakha lhma m’a aniem’o nak anmaikama Satanas. Kakpota ellasekhekhok Eniapom Neten, elloka nhan atsak’elha lhma elieploma nhan Eniapom Neten, meliaskamek na asvesai’a ko’o. Netamen Eniapom Neten etneskesama ta apankek meleliehekho apkellaskamakha m’a, etneskesangkok na apkelpokkanma”, lhta aptak heiano Jesús ma’a.

19Lhta ntak akvetai’a ehaqtek aniem’o neten Apveske Agripa, netamen askeliahakhave lhta nhan ma’a. 20Ka askeltennangka lhta nhan ania’a aktaqmanma amanie nkek ma’a natemma Damasco, netamen na apiav’akha temma Jerusalen kakpota nhan lhamakho aiempek iokhalhma Judea. Ka askeleltennaseiangko nhan metnangko nak judios eliaqmongkasekhak mo’ok apvalho’ok, elpengkamok na apvalho’ok ma’a akieto apnakha Eniapom Neten. 21Ka nkeniemai’ak helpathetmo m’a judios konne Eniapom Neten apnemakha, apkenmahai’a hennapok, 22koka Eniapom Neten alhta hepasmak ma’a. Ka ngkanek mokhom alhengkeskama alheianma ania’a aktaqmanma apkellelto nema apkelletsekama, metka apkelletsekamaha, aplhamakho enenlhet’avok na asketlhekmoskama mota apketlheianmo lhnak nanek apkeleltennasemmap ania’a kakpota nhan Moises. 23Enietsepok na lhta Cristo, netamen elhatekhangvomok na lhta nhan mokhom ma’a, apmanie lhna lhta ngkotnek aplhatekhangveiam ma’a, netamen na lhta nhan elpaiaksek ania’a aktemakha atsai’o lhma judios kakpota nhan metnangko nak judios —lhna aptemak Pablo apkasennammakpo pankek ma’a.

Pablo apiatekamok Agripa mei’askamek aktakha aplheianma

24Koka lhna aptemak Festo apiennakteskamo apaivoma m’a, lhna aptemak:

—Pablo, malha anema lheiap aniem’o lhamakho apiangveiakmo —lhna aptemak.

25Ka apkatemmoiangka lhnak Pablo m’a, lhna aptemak:

—Motnak ko’o malha anema, iokhalhmek ankek ko’o mota aspaioma kanhan asiangveiakmo. 26Apiavek na apiav’akha apveske nak Agripa aktemakha na mota ania’a alheianma, apkeliavek na aplhamakho enenlhet’avok ka ngkanek alheno nak metka aktaikama evalhok napaqtek Agripa.

27¿Mai’e ei’askeiakmok lheiap Agripa aktemakha apketlheianma apkeleltennasemmap ania’a annenga, he? Asiavek ko’o mei’askeiakmok lheiap —lhna aptemak Pablo.

28Ka apkatemmoiangka lhnak Agripa m’a, lhna aptemak:

—Mankovangkak heiekpelkema lheiap apmak’o nak hetneskesek moi’askeiam Jesús —lhna aptemak Agripa.

29Koka lhna aptemak Pablo apkatemmoiangka:

—Nkolkok hata evalhok iakvatakho nlho ka la nhan vangkakho lheiap kanhan aplhamakho enenlhet’avok anak hengke’e apkellelto nak hellailhemo etnangkok na astemakha nak ko’o, koka have m’a akto nak nemo nak helpelhketemo nak cadenas —lhna aptemak Pablo.

30Ka apeneskamo lhnak apkeltennaikama Pablo m’a, apkelaqnekho lhnak neten apiav’akha apveske Agripa, kanhan gobernador, kanhan ngkelvana Berenice, kanhan aplhamakho enenlhet’avok ma’a, 31apkenmeiekho lhnak mo’ok nekha kakpota elpaqmetkesakpok ma’a apkenmahai’akha eltemeskesangkok Pablo m’a, lhna aptaiangkok:

—Ka enenlhet anak mamma aptemengveiakmo lhma kakpota ellaqhek kanhan ellaqlhengkesek —lhna aptaiangkok ma’a.

32Koka lhna aptemak Agripa apkanemo Festo:

—Ntase niekhe epaqnemekhak enenlhet anak, mangapvankek koka ngkanek apkeltema apankek lhek eiekpelkok ma’a apveske Cesar —lhna aptemak ma’a.