Colossians 1

Aklheianma apvalhok Pablo ko Colosas

1Ko’o Pablo, asto heiapaskama Jesucristo aniem’o aptema Eniapom Neten, Timoteo nhan alhelhma hengke’e. 2Nengeleltavek angellapaskesek atlheianma engelvalho’ok aplhamakho apkelpokkenammap meliaskeiam anak Cristo akieto ham Colosas, apkelleliehekho mota nhan Eniapom Neten. Nengeleltavek na Eniapom Neten kanhan Apveske Jesucristo eltaqmelkeskesek apkellaniemhaikama, ellangkok na altaqmelaikama apvalho’ok ketlhengkap ham.

Pablo aptema gracias Eniapom Neten

3Neksa nelelmalhneskeskama mota Eniapom Neten apto nhan apiapom apveske engankok Jesucristo nentangkek na gracias 4ngkanek nelleng’a mota ania’a aknaikamok akiavai’a lhnak meliaskeiam ketlhengkap Cristo Jesús, avanhek nak na apkellasekhai’o apkellelto apkelpokkenammap ma’a. 5Nnaiangkek nak na apkelvaskapma m’a aniem’o alel·halhnekama apvalho’ok etlhevangkok hata lhema qaselha nema alpokkenkeskama m’a neten, apkellengai’a lhta ketlhengkap aklhenammalhka ania’a nak 6akvai’o sekha lhta. Ka ania’a nak mpaihakhek aklengammalhka halhmankek ham, aliaqmongkaskesekho nhan mo’ok apvalho’ok enenlhet’avok apkellelto la apkellengai’a, ka aktaiangko lhta nhan ketlhengkap ma’a aliaqmongkaskesekho mo’ok apvalho’ok neksa apkenmaikamo lhta takha aktaqmanma nke nak apkellanei’o Eniapom Neten, kakpota nhan akto have niapak anke nak. 7Epafras alhta apto apketlhekmoskama ketlhengkap qaselha nak ma’a, apto nhan nengellamelaiam netlhelhma’ak ennengko’o m’a, apto apkennengkasema apkasekhai’o Cristo apmakmekama nak apieseksek ketlhengkap ham. 8Hengeletsantengkeskamo lhta nhan ania’a aktemakha apkellangiemhaikama ketlhengkap ham, avanhek na lhta nhan apkellasekhai’o po’ok ketlhengkap aniem’o Espíritu nak nahan.

9Neksa nellengai’a lhta ania’a aktemakha apkellangiemhaikama ketlhengkap ham, lhta nkenok nelelmalhneskeskama mota metka nnelha Eniapom Neten eltemeskesek apkeliekpelkangveiakmo kiokho nkek aptemakha m’a, ellangkok na lhamakho aktemakha nema neniamo kakpota nhan neniekpelkemo aniem’o Espíritu apankok. 10Netamen hata m’a nkovak akietemo nkek aptaiangkolha apkanemakha nhan etnangkok Apveske, kakpota nhan ellanangkok metka nnelha qaselha akleklemelha la apvalhok ma’a, ngkeskama qaselha altaqmelo, akvakmo akvanemo lhamakho aknem apkeliekpelkangveiam Eniapom Neten.

11Nelelmalhneskaskek na Eniapom Neten etneskesangkok apkeliennaktema aniem’o akiavai’a apmopvana m’a, kakpota ellapvanak elvaskapok metka apkelpekheskama akvo’o la akientalhnema. Netamen hata m’a nkolpaihekhak hata apvalho’ok ma’a, 12etnangkok hata nhan gracias Eniapom Neten ngkanek apkellangkek apkenmopvanka’a elvaskapok, hata etlhevangkok na qaselha apeneskamo Eniapom Neten kakpota ellangkok ma’a apkelpokkanma apkellelto nak apkelloma atsak’elha lhma. 13Hai, Eniapom Neten hengel·hatsoskekhek ma’a neksa akmovana lhta ienaqtesakha lhma, hengeltemeskeskamo lhta nhan apkennemolhema m’a tekhenlhet’ok apveske apketka apkamelaiam ma’a, 14apto lhta nhan hengel·hatsoskekha, aptemeskesaiangka lhta nhan apankek mongeleliehekho hengaskamakha Eniapom Neten. 15Eniapom Neten apto mongvetai’a, koka apva’a lhta Cristo apnemo lhtoka nhan ma’a, apnengkek nak nanek apnakha m’a amanie apkelentepkeskama lhamakho qaselha lhmankek ham. 16Apmaiangka lhnak nanek na Eniapom Neten Cristo kakpota ellanak lhamakho qaselha aknaikamo nak ma’a neten kakpota nhan nalhepop, qaselha nelvetai’o nak kakpota nhan mangelvetai’o nak, qaselha av‘alho’ok anak aveske nko’ok, aknema na alientalhnemo kakpota nhan aknema nak anmovanka’a, ka lhamakho qaselha nak Eniapom Neten apkellanai’a aniem’o apmaikama Cristo, aptemo nhan apanko’ok ma’a. 17Apnengkek nak nanek Cristo amanie allanemmalhko sekhek ankek lhamakho qaselha lhmankek ham, mankollavankek na m’a nkolloka metka Cristo. 18Cristo nhan apto malha apqatek iglesia, koka ntaiekhek malha apiokha m’a. Cristo apto apmanie’, apto nhan apmanie aplhatekhangveiam apieseksek apkenmaskengvaiakmo, aptemo nha mota apmanie pankek ma’a. 19Apkeltave lhta Eniapom Neten ngkoitek apmopvana apankok ma’a Cristo, 20apkapaske lhta m’a kakpota eliepetkangvakhak mokhom aplhamakho apkakhangko nalhepop anak kanhan neten ma’a, apsoiakmave lhta nhan aktaqmelaikama envalhok anak aniem’o apketsepma lhta akiangkenammalhko ema apankok neten iamet aktenneskama.

Kolhva nengellasekhekho Eniapom Neten

21Apkellammelhme lhta ketlhengkap Eniapom Neten lhennenga, nketlheianme lhta apvalhok meliamolhma nak, apkellaneiangke lhta mota nhan ngkollatsekama. 22Kolhva koka apkeliepetkangvakhek mokhom ma’a Eniapom Neten aniem’o Cristo aptaiekho lhta nhan enenlhet apankek ma’a, apketsepmo lhta nhan apkeliaqmoiekha ketlhengkap, apkeltemeskeskamo nhan apkelpokkenammap ma’a, metka alpaieseiam apvalho’ok, metka apketlhenammap na meliamolhma. 23Nkaimelhkek eliennakteksek meliaskeiam anak, metka apkelieniekha m’a alel·halhnekama apvalho’ok elvetak hata aktaqmanma aniem’o ania’a aktaqmanma apkellengai’a lhta, nema aleltennaskamo mota lhmankek ham. Ko’o nhan askeleltennaskama ania’a nak aniem’o lhta heiapaskama Eniapom Neten.

24Mpaihakhek ko evalhok aklengangko akmaska asiokha nak aniem’o hellasennaikama ketlhengkap, ngkanek asavhok hata aktemakha lhta aplengaiangko Cristo aniem’o nkotaqmelekha ta iglesia, ngkanek malha Cristo apiokha ntak ma’a iglesia. 25Hetneskaskek Eniapom Neten hellasennaikama apkennemolhema apanke nak, heiangkek asmakmekama kakpota altakmelkeskesek apkellangiemhaikama aniem’o aspaieskama ania’a aktaqmanma apankok kakpota eliekpelkok aplhamakho enenlhet’avok lhmankek ham. 26Aktemo lhta nhan ma’a malha akposemmalhka lhennenga la akietnemakha, kolhva koka Eniapom Neten apkelvetaskaskek apkellelto apkelpokkanma m’a. 27Hai, apmahai’o lhta nhan elvetaskesek qaselha akielhammalhka akiavai’a nkek apeneskamo lhnak nanek apmak’akha ta etnek kakpota eltaqmelkeskesek apkellangiemhaikama aplhamakho apkellavakha lhmankek ham, Cristo apvesai’a m’a, apmahai’a lhta Eniapaksek Eniapom Neten hengke’e, apsoiakmo lhta nhan alel·halhnekama nak apvalho’ok ketlhengkap kakpota elloka mota lhemek ma’a.

28Ennengko’o nelpaieskek ania’a aplhenammap Cristo, nellaskek na qaselha, netlhekmosenke mota akieplomo akiavai’a nkek neliangveiakmo kakpota etnangkok aliennaktema nkek apvalho’ok ketlhengkap apkanemakha nhan etnangkok Cristo m’a. 29Avanhek na askeliephaiekho asmakmekama akieplomo asiennaktema, asmopvana nhan aniem’o Cristo.