Eph 3 | TmfSC | STEP | Ka nkeniemai’ak ma’a nemo nak heiaqlhengkeskamo nemmammalhkelha aniem’o askasennaikama Cristo Jesús kakpota altakmelkeskesek apkellangiemhaikama ketlhengkap metnangko nak judios.

Ephesians 3

Pablo apaieskama ania’a aktaqmanma apieseksek metnangko judios

1 Ka nkeniemai’ak ma’a nemo nak heiaqlhengkeskamo nemmammalhkelha aniem’o askasennaikama Cristo Jesús kakpota altakmelkeskesek apkellangiemhaikama ketlhengkap metnangko nak judios. 2 Have niapak apkeliavek ketlhengkap Eniapom Neten heiapaskama kakpota alhenek ania’a apeneskamo lhta akietnaikama apaqtek etnek ma’a kakpota nkoltaqmelekha’ apkakhaikamok ketlhengkap ham aniem’o apkellamelaiakmo m’a. 3 Heteskaske lhta nhan ma’a qaselha akielhammalhka akietnaikama apaqtek etnek hata, ketse lhta astalheskasak ko’o vakkahak ketlhengkap ma’a aktemakha ania’a nak. 4 Ka apkelietsatengko ta ketlhengkap elvetak hata have niapak ankek aktakha nak alheianma, asiamo ko’o aktakha lhta akietnaikama apaqtek etnek hata Eniapom Neten aniem’o nhan Cristo. 5 Enenlhet lhennenga meliamok ma’a, kolhva koka Eniapom Neten apkapaskangkek Espíritu kakpota eliangveskeskamhok ania’a nak akielhammalhka aplhamakho apkellelto apkelpokkanma nema allapaskamo kakpota nhan apkeleltennasemmap ania’a. 6 Lhennenga akpeneskama aklhenaikama apvalhok elanak ma’a, eniankesekhak metnangko nak judios kanhan judios nkotnekhak malha lhema apkeliokha m’a aniem’o aptaikamok apkelpasmekha Cristo Jesús aniem’o nhan apkellengai’a ania’a aktaqmanma. Etlhevangkok hata nhan ma’a metnangko nak judios lhamakho aktemakha qaselha altaqmanma apeneskamo lhta apaivoma Eniapom Neten ellangkok hata m’a qaselha apkennemolhema apanke ko Israel. 7 Hetneskaskek ko’o heiasennaikama Eniapom Neten kakpota apaiaksek ania’a aktaqmanma nak aniem’o apietnai’avek neha’at kanhan akiavai’a apmopvana. 8 Hai, nalhepek anke niekhe ko’o, moientalhnemo nhan apieseksek anak apkelpokkenammap, nkaqhok koka heiaiangkek aktaqmanma nkek asmakmekama apieseksek anak metnangko nak judios, askeltennaikama ania’a aktaqmanma aktemakha akiavai’a nkek qaselha altaqmelo apmahai’a hengellangkok ma’a Cristo. 9 Heiapaskangkek na kakpota aliangveskeskamhok enenlhet’avok qaselha akposemmalhka nak aptaqmelkeskama lhnak nanek Eniapom Neten apto apkelentepkeskama lhamakho qaselha lhmankek ham, tep nak nane mota aptaqmelkeskamo m’a ania’a akielhammalhka nak. 10 Kolhva aniem’o iglesia alanai’a qaselha, nkolvetak hata kasekapo av‘alho’ok alientalhnemo nke nak, aknema nak anmovanka’a, kanhan alveskaie, nkolvetak hata nema apiamo Eniapom Neten. 11 Ka lhamakho qaselha nak tep nak nane mota apeneskamo aklheianma apvalhok Eniapom Neten elanak hata, koka apeneskangkek kolhvave nak aniem’o Cristo Jesús Apveske engankok. 12 Kolhva koka nhan envanka’ak angelteteskamok Eniapom Neten metka altaikama engvalho’ok aniem’o mongeliaskeiam Cristo. 13 Ka nkanek ntasek mankollaiosek apvalho’ok ketlhengkap aniem’o apkellengai’a aslengaiangko akientalhnema henke’e, aslengangkek ko aniem’o asmahai’a alpasmok ketlhengkap, koka ntasek malha alammalhko apvalho’ok hellanghok ketlhengkap ham.

Nengamelaiam Cristo apto neten ankek

14 Ka nkeniemai’ak ma’a askelteklheklhemo ko’o etapno’ok nalhepop napaqtek Eniapom, 15 apto apkelteniaskama apkelvesai’a aplhamakho aknema apkennemolhema apketkak Apkakhangko m’a neten kanhan nalhepop. 16 Askelelmalhneskaskek askeltemo ellangkok aliennaktema nkek apvalho’ok ketlhengkap aniem’o Espíritu apankek ma’a, aniem’o nhan apto apiavai’a apankek ma’a. 17 Askenmalhneskaskek na eltehek meliaskeiam ketlhengkap Cristo kakpota elhek apvalho’ok ketlhengkap ma’a, kakpota eltemeskesek apkeliennaktema aniem’o apkellasekhammakpo. 18 Netamen nkovak hata apkeliangveiakmo ketlhengkap kakpota nhan lhamakho apkellelto nak apkelpokkenammap akiavai’a nkek hengamelaiam Cristo, akiavai’a akpaihema, akvanlha akvenaktema nkoie, kanhan konne kankoie, netne kankoie. 19 Hai, askeltavek ko’o eliohok ketlhengkap aktemakha hengamelaiam akiavai’a nkek Eniapom Neten, tep ankek ma’a apkellanemakha nak nkolhok alietnaikama apaqto’ok ketlhengkap qaselhaha. Askeltavek na allaneiangko nke’ apvalho’ok aptemakha Eniapom Neten.

20 Kolhva koka ntasek angeltakneskasangkok Eniapom neten apto apmopvana hengeltaqmelkeskesek nellaniemhaikama akiavai’a nkek, tep ankek ma’a nengellanemakha nkolhok alietnaikama engaqto’ok anak, tep ankek na m’a nengelelmalhnengka la’a aniem’o apmopvana nak aknema engvalho’ok anak. 21 Hai, lhamakho iglesia apkellelto apkelpasmekha Cristo Jesús, ntasek etlhene mota akiavai’a nkek apvesai’a Eniapom Neten metka akvaiam annelha aliekaikamok iantelhkapa. Amen.