Ephesians 5

1Ntasek elvanangkok ketlhengkap aptemakha nak Eniapom Neten aniem’o apketkak apkellamelaiakmo m’a. 2Ellasekho nhan po’ok ka aptemakha nak Cristo hengellasekhai’avek ennengko’o, apkaiangkave panke lhta nhan kakpota hengeltaqmelkeskesek nellaniemhaikama m’a, malha aptemak ma’a qaselha nengaikamok anak Eniapom Neten, kanhan malha nentoskama nak akvanlhemmalhka aktapeiam anak aimes akleklemelha apvalhok Eniapom Neten.

3Aptaiangkek ketlhengkap Eniapom Neten apkennemolhema apkelpokkanma, ka nkeniemai’ak ntasek metlhenek aktemakha nenmensangveiam alhma, nelanaktema, nenmeiavkesammalhka engankek qaselha. 4Melpaqmetama nhan apkelpakmeiasma henmankaskama nak, melpaqmetama nke na malha aktaikama nke nak kakpota nhan qaselha ngkolatsekama, akhemo m’a, koka ntasek ma’a etnangkok gracias Eniapom Neten. 5Koka apkellelto nak apkenmensangveiam alhma, apkelanai’a qaselha malha akpaiseiam, apvannaikamok na qaselha apanko’ok apteniai’a, apkeltakneskasekamok na qaselha akiokha allanemmalhka’, metnangkek hata m’a apkennemolhema akieto nak aptaiangkelha apkelveskai’e Cristo kakpota nhan Eniapom Neten, have niapak anek astakha nak alheianma.

Aktaqmanma anloka malha atsak’elha lhma

6Mellanko nkek eliennengkeskak enenlhet’avok anak aktaikama nkek ania’a apketsoiam, nkanek Eniapom Neten hata eliaqmongkaskesekhak apkeltemakha meleliehekho m’a. 7Melvanamonkek aptaiangkolha nak ma’a, mollekkasama nkek na apvalho’ok aptangkolha la m’a. 8Lhennenga lhta nhan ketlhengkap apkellomaka ienaqtesakha lhma, kolhva koka apkelloka malha atsak’elha lhma aniem’o apkelpasmekha Apveske. ¡Etnamok hata malha atkak apommatema nak! 9Nkanek apommatema nak ntepkaskek ma’a neniamolhma, akpeivomo kanhan have niapak. 10Ellanama ta sekhek aptangkolha la enenlhet, qaselha akleklemelha apvalhok Eniapom Neten kelhaha, nlho ka la mma’. 11Melvanekho nkek na aptaiangkolha ngkollatsekama enenlhet’avok anak apkellelto nak apkelloma malha ienaqtesakha lhma, ntasek koka etlhenek ma’a aptangkolha la apkellanekamok ma’a. 12Apkellaneiangkek ma’a qaselha apkelielhammakpo, avanhek henmankaskama m’a nenlheno la m’a. 13Koka apommatema nak avankek nkolvetaskesek iokhalhmek ankek qaselha ienaqtesakha lhma alposemmalhka. 14Ka nkanek nemo nak aktemo henke’e:

«Elhatakha lheiap apto apteianma, etnemekha neten apieseksek apkenmaskengvaiakmo kakpota eniapommetek hata takhaplhet Cristo», lhna nnema aktema m’a.

15Ka nkeniemai’ak na m’a eltaqmelkasakpok neksa apkellangiemhaikama ketlhengkap ma’a, metnamo nkek aptaiangkelha enenlhet anak metka apqatko’ok, etnamok koka nema apkeliamoho. 16Elelientemap apkellanekamok qaselha altaqmelo nenvanlha nak ngkanek nenvet’a ngkolatsekama neksa nellaniemhaikama. 17Metnamo nkek na ketlhengkap malha metka apqatko’ok, elienlhanmamok koka eliangvomhok apkanemakha etnangkok Apveske. 18Metnamo nkek na akvakmo alieiesolhma vino ngkanek nkoltemeskesek hata malha metka apkelielhnengvaiam ma’a, ntasek koka elleltok ellanangkok apvalho’ok Espíritu. 19Ennekmasamok hato ka mota salmos, nennekmaskama kakpota nhan apkellennekmasekama apvalho’ok aniem’o apieseksek ketlhengkap. Hai, ntasek eltakneskasangkok Apveske akvakho konne apvalho’ok. 20Etnamok hata mota gracias Eniapom Neten apto Eniapom aniem’o nhan apvesai’a Apveske engankok Jesucristo, aniem’o nhan ma’a apkelvetaskeskama lhamakho qaselha altaqmelo.

Nenganemmalhkelha antangkok nema ennakteiangka’a

21Elhneso ta mo’ok apvalho’ok apkeleliehekho po’ok apieseksek la’a aniem’o apkellai’o Cristo. 22Ketlhengka’ ngkelvana’ak ntasek nkoleliehekho ta mota anakteiangka’a, akno aliehekho Apveske, 23ngkanek atava’ malha apto apqatek lheia’ m’a, nnavek na Jesucristo apto nhan malha apqatek iglesia, iglesia nak malha apioha nak Cristo, apto nhan apkelvongkeskama tep ma’a.

24Ka iglesia nak nkoleliehekho mota Cristo, nnavek na ngkelvana’ak ntasek nkoleliehekho mota anakteiangka’a.

25Ketlhengkap aknema nak apnaqteiangka’a ntasek ellamelemma mota apnaqteiangka’a, nnavek na Cristo apkamelaiakmek na m’a iglesia nak, apkaiangkave panke lhta m’a kakpota nkotaqmelek ma’a. 26Kakpota etnek apokkanma apankek ma’a. Malha nhan apkalhnaskama aniem’o apaivoma malha aktonak iemmen akmovana nak nkalhnaksek ma’a. 27Netamen hata nhan ma’a nkolhek hata akiantengkasakho napaqtek ma’a, alhnai’o nkek ma’a, apommatma nhan, metka ngkolatsekama, aktaqmanma nkoie, metka akpaiseiam.

28Nnavek na ketlhengkap aknema nak apnaqteiangka’a, ntasek ellamelemmak apnaqteiangka’a ka kto nak apkamelammakpo apanke apiokhoho, enenlhet apto la apkamelaiam aptava, malha ntakhak na apkamelammakpo apanke nak apiokha. 29Nkanek mamma nhan enenlhet etaknevekhak apiokha apanke nak, apvankek koka etaqmelkesek kakpota nhan eniangkok aktoma. Malha akto nak Cristo apkelanei’o iglesia aptaqmelkeskamo nhan m’a, 30ngkanek iglesia malha apiokha m’a, ennengko’o koka nentangkok malha nekhatko’ok apiokha nak ma’a Cristo. 31Ka nkeniemai’ak ntasek eieniekhak apiapom kanha ngken kakpota eipetkok aptava, ngkotnekhak na malha lhema apiokha nak.

32Koka hengke’e asietkeskama lhkek nientelhek aniangvomho, koka alhenak ko’o m’a ania’a aplhenammap Cristo kakpota nhan iglesia.

33Hai, ka m’a, ntase anke mota ketlhengkap ellamelemma mota apnaqteiangka’a, ka kto nak apkellamelammakpo apankave’. Ketlhengka’ nhan apnema nak anakteiangka’a ntasek na nkollaho mota anakteiangka’a.