Ephesians 6

Allanemmalhkelha nkotnangkok nkana’ak kanhan atkak

1Ketlhengkap aknema nak nkana’ak, eleliehekho ta mota m’a nkanek Apveske apkennemolhema ketlhengkap, nietavek etnangko mota m’a. 2Lhema henganemakha nietnek malha nenlhevai’a ta aniem’o aplheianma Eniapom Neten ellangkok hata apkellelto apkelieplavkeskama, ka ntemak hengke’e:

«Ellaho ta mota ngkana’ak 3kakpota elvetak aktaqmanma apmaniaie ta, elloka nhan akvangkakho nkek nalhepop anak», lhna ntemak.

4Ketlhengkap apiapma’ak, mellavkesangkek apketkak, ntasek koka etlhekmosangkok neksa aklhengama apvanekamok, eleltennasamok na apkeltemelha etnangkok Apveske m’a.

Apkellanemmakpelha etnangkok apkelveskai’e kanhan nema allasennaikama nema apkelianmoma

5Ketlhengkap nema allasennaikama nema apkelianmoma, eleliehekho ta mota apveske apanko’ok nalhepop anak, ellaho ta nhan. Enmakmesama ta nhan anmahai’o nkek apvalho’ok, malha aktonak ma’a apkellasennangka la Cristo. 6Metnamo nkek malha apkenmakmengka napaqtek la apveske apanko’ok kakpota nkolekkasama apvalho’ok ma’a. Koka aptaqhakho la m’a, mmaskek na apkenmakmengka. Ntasek koka mota enmakmesama anmahai’o nkek apvalho’ok ma’a, malha aktonak ma’a apkellasennangka la Cristo apkellan’a mota apkellanemakha nak etnangkok Eniapom Neten. 7Enmakmama koka alleklemo nkek apvalho’ok, malha akto nak ketlhengkap apkenmakmesangka la Apveske, have aktonak ma’a apkenmakmesangka la enenlhet apanke nak. 8Askeltavek ko’o eliangvomhok ketlhengkap nema allasennaikama nema apkelianmoma, nlho ka la nhan metka nema apkelianmoma, moklhem’a ta ellangkok akianmoma Apveske akietemo nkek aniem’o la aktaqmanma apkenmakmekama.

9Ketlhengkap apkelveskai’e, eltaqmelkaso ta nhan apkellanei’o apkenmakmesaikama, meniamo nkek ngkolatsekama apaivoma, nkotlheng apvalho’ok apkennavek po’ok apnema Apveske apanko’ok apnek ma’a neten, nennavek emmo’ok napaqtek ma’a.

Ntasek antangkok malha apkennapommakpo nak

10Hai, ka m’a elialheng’a, eteniamok hata mota Apveske kakpota ellangkok apkeliennaktema m’a, nietnek akiavai’a nkek apmopvana m’a. 11Elentalhnekha ta malha nennapommalhka nak ankok aniem’o Eniapom Neten kakpota eliennak neksa akvai’a alammelhma aveske keliaqhameio’ akmahai’a nkoliennenkesek ma’a. 12Mongennapelhkak ennengko’o enenlhet lheme nak, koka nengennapelhkak ma’a kasekapok av‘alho’ok alleniem’o neten, akietno akmovana, akientalhnemo nhan takhalhet’ok ienaqtesakha lhma neniava alhma nkek ham. 13Ka ngkanek ntasek elentalhnekhak malha nennapommalhka nak ankok aniem’o Eniapom Neten apkellaikamok kakpota elvaskapok akvo’o la aknem ngkolatsekama. Netamen apkelpeneskama la apkellanekha, ¡elienna ta m’a!

14¡Eliennakteso ta nhan apkeliapnekha apkeliapnama akvesai’a koka have niapak ankek! ¡Elentalhnekha ta nhan apkelentalhnema anmasma apnenio’ok akvesai’a nak ma’a nempeivomo! 15¡Enaktetokha ta nhan apnakteto apmanko’ok kakpota eleltennaksek ma’a ania’a aktaqmanma nak altaqmelkeskeskai’o nak apvalho’ok! 16¡Neten ankek aktaqmanma elapkesakpok hata nhan akielhnengvai’a nak ianka akvesai’a m’a mongiaskeiam! Kakpota nkonmievok ma’a akielhnengvai’a ianka akieplomo talha nepketama aniem’o keliaqhameio’. 17Eletsavekha ta nhan alapma apqatko’ok akvesai’a nak nenvongkasemmalhka tep, enmama ta nhan apmeio’ok malha pelettav akvenaktema nak akvesai’a Eniapom Neten apaivoma, aniem’o nhan Espíritu.

18Elelmalhna ta mota Eniapom Neten, ellapiosama ta nhan aniem’o Espíritu anmaikama. Elel·halhnama ta metka apkel·halhiongvaiam, ellapiosakpo ta nhan apkelelmalhneskeskama aplhamakho apkelpokkenammap anak. 19Ko’o nhan helelmalhneskes kakpota heiangkok aspaioma Eniapom Neten asmopvana apaiaksek ania’a aktaqmanma akielhammalhka apeneskamo lhta apaivoma m’a, akieplomo asteniai’o eiempek, metka askai’a nhan aspaieskama ania’a aktaqmanma. 20Eniapom Neten alhta apkeniemei’o apankek heiapaskama kakpota alhenek ania’a aktaqmanma nak, ka ngkanek askaqlhengkasemmalhko nak. Helelmalhneskes hato ka Eniapom Neten heiangkok asiennaktema kakpota alhenek metka askai’a ania’a aktaqmanma nak.

Aktakha nnelha apaivoma Pablo kanhan aklheianma apvalhok

21– 22Hai, kolhva asmak’ak angvapaksek Tiquico askamelaiam ham, apto nengaqtek astaikama alhelhma neksa nenmakmesaikama Apveske, etsakhesek hata ania’a ehenkok kakpota nhan ania’a apanko’ok asketlhelhma’ak anak hengke’e kakpota eliohok ketlhengkap aktakha nelvetai’a hengke’e kakpota elvaskapekhok mokhom ketlhengkap ham.

23Hai, ntase’, avanhek askeltemo Eniapom Neten kakpota nhan Jesucristo evaivesentak altaqmelaikama envalhok anak, nengasekhai’o kakpota nhan moniaskeiam takhaplhet’ok engelialheng’a ham. 24Askeltavek na Eniapom Neten eltaqmelkeskesek akiavai’a nkek apkellaniemhaikama apkellelto nak apkellasekhai’o metka nnelha Apveske engankok Jesucristo. Amen.