Heb 4 | TmfSC | STEP | Nheklhek mokhom aklhengama Eniapom Neten apeneskamo lhnak nanek apaivoma angelentelhek hata akieto iokhalhma m’a neniamposammalhkelha. ¡Koka ellaho ta m’a eltemengvakho lhma ngkanek melentelhek hatelha ketlhengkap m’a!

Hebrews 4

1 Nheklhek mokhom aklhengama Eniapom Neten apeneskamo lhnak nanek apaivoma angelentelhek hata akieto iokhalhma m’a neniamposammalhkelha. ¡Koka ellaho ta m’a eltemengvakho lhma ngkanek melentelhek hatelha ketlhengkap m’a! 2 Nnengke lhta hengeleltennaskamo ennengko’o ania’a aktaqmanma nak, ka ntemak na nelieihengka’a m’a apkellengai’ak nahan, aqhemo koka ntemak ngkanek apkeliaskeiakme lhta m’a ania’a nak. 3 – 4 Ennengko’o lhtoka mongeliaskeiakmok ania’a aktaqmanma nak, angelentelhek hata nhan iokhalhma neniamposammalhkelha apankok Eniapom Neten.

Koka lhnak nane aptemak Eniapom Neten apkellanemo m’a apkeliaskeiam anak, lhna aptemak:

«Lhta stak aspaioma aslavo have niapak ankek ko’o m’a, melentelhek hata iokhalhma neniamposammalhkelha ehenkok anak» ^{▼▼Salmos 95:11}, lhna aptemak.

Ka iokhalhma nak ma’a apeneskamo lhnak nanek Eniapom Neten apkelanei’o sekhek ankek lhamakho qaselha lhmankek ham, ka aktemo nak na aktalhesammalhka Eniapom Neten apaivoma hengke’e:

«Apiamposammakpek nak nanek Eniapom Neten apmakmekama akvaiakmo aknem 7 m’a» ^{▼▼Genesis 2:2}.

5 Hai, ka ntemak na mokhom aktalhesammalhka Eniapom Neten apaivoma hengke’e:

«Melentelhek hata akieto iokhalhma neniamposammalhkelha ehenkok anak», lhnak nane ntemak.

6 Moklhem’a enenlhet apkelaimekpok elentelhek hata mokhom ma’a iokhalhma neniamposammalhkelha, kanhan ma’a mang nak nanek elentalhnema apmaniaie apkellengai’a ania’a aktaqmanma ngkanek mang nak nanek eleliehekhok ma’a. 7 Lhnak nane nkeniemai’ak elhenek mo’ok aknem Eniapom Neten elentelhek iokhalhma neniamposammalhkelha, koka niekhe nhan aknem nenvanlha nak.

Ngvenaktenkek nak nanek aknem meleliehekhok Eniapom Neten apaivoma enenlhet’avok ma’a akvakmo aknem apnemo David, lhnak nanek aptemak:

«Apkelleng’o la ketlhengkap aknem anak Eniapom Neten apaivoma, meliennaktesankek apvalho’ok» ^{▼▼Salmos 95:7-8}, lhna aptemak.

8 Mang nak nane nkomopvanak Josue elentalhneksek enenlhet’avok ko israelitas iokhalhma neniamposammalhkelha alheno lhkek, ka nkeniemai’ak aplheianmo mokhom Eniapom Neten mo’ok aknem hata kakpota elentelhek ma’a, mankolhok ma’a aknem aplheianmo lhnak nanek sekhe lhta. 9 – 10 Kolhva koka ennengko’o nenvanlha nak nengelelto Eniapom Neten apkennemolhema akto iokhalhmek nengelel·halhanma’ angelentelhek hata iokhalhma neniamposammalhkelha nak ma’a. Koka m’a hata angeliamposalhkak ma’a aniem’o nenmakmekama, ka aptemo lhnak nanek Eniapom Neten apiamposammakpo apeneskamo aktakha nnelha apmakmekama. 11 Hai, ntasek koka mota anteniangkok eniempeiok kakpota angelentalhnengvomok ma’a neniamposammalhkelha, montangkek ma’a aptaiangkolha lhnak nanek enenlhet’avok apkeliaskeiakmek nak nanek ma’a.

12 Ka Eniapom Neten anak apaivoma nietnek akmovana, hengaikamok na akiennaktema ennenio’ok, malha aktonak pelettav akvenaktema akmovana nkoiaqtemenek neten ankek koka m’a, aselhtek ma’a pelettav anak hanet nekha’ak la anmalhnemmalhka. Nkoklhek akvakmo konne kankek engvalhok kanhan akvakho eniempehek. Akvakmo konne kankek apvalho’ok la enenlhet, kanhan akiekpelkemo alketamekama apvalho’ok kanhan apkenmak’akha la ellanangkok. 13 Lhamakho qaselha apkelentepkeskama lhta Eniapom Neten mankollavankek nkolielhanenkesek napaqtek ma’a, apvankek etak lhamakho qaselha iokhalhmek ankek, angetlhene mota angelleltennaksek na nentaiangkolha napaqtek ma’a.

Jesús apto apiav’akha sacerdote

14 Apnek ennengko’o apiav’akha sacerdote engankok apiekai’o lhta m’a neten, apvesai’a Jesús apto nhan Eniapom Neten apketka. Ka ngkanek ma’a ntasek angetlhengkesek nentaikamok mongeliaskeiam akieplomo nenteniaikamok eniempeiok. 15 Ka apiav’akha sacerdote nak ma’a apvankek elietnahok nengaqta’a ennengko’o neksa mongeliennaktema la’a, ngkanek apvetai’a lhta apmanie akiepkonma m’a, nnavek ennengko’o kolhvave nak, koka m’a melanai’ak qaselha ngkolatsekama la m’a. 16 Ka ngkanek ntasek angelteteskakho mota ennengko’o m’a metka nengai’a napokha aptanema Eniapom Neten apto niapom hengamelaiam. Apiosek hata nhan hengellanhok ennengko’o m’a, hengelpasmok hata nhan akvo’o la aknem akientalhnema ngkanek apto apiamolhma apanko ie’.