Heb 6 | TmfSC | STEP | Angetlhengkesek nenvanengkeskama mongeliaskeiam akvakmo akto neltokho malha neliav’o. Envanka’a nlho lhta niekhe angelieplavkesek amanie lhta nema hengetlhekmosekamok aptemakha Cristo, nkaimelhkek mota niekhe mongeltaqhengveskakhek ampai’akhasekha lhta nema hengetlhekmoskama aktemakha nelieniekha mongeliamolhma henlaqlekho lhta m’a akieto nengetsepmakha, aktemakha nhan mongiaskeiam Eniapom Neten.

Hebrews 6

1 Angetlhengkesek nenvanengkeskama mongeliaskeiam akvakmo akto neltokho malha neliav’o. Envanka’a nlho lhta niekhe angelieplavkesek amanie lhta nema hengetlhekmosekamok aptemakha Cristo, nkaimelhkek mota niekhe mongeltaqhengveskakhek ampai’akhasekha lhta nema hengetlhekmoskama aktemakha nelieniekha mongeliamolhma henlaqlekho lhta m’a akieto nengetsepmakha, aktemakha nhan mongiaskeiam Eniapom Neten. 2 Mankaimelhkak ketlhengkap ma’a ngkolhek altaqhengveskeskakho nema atlhekmosekamo lhta ampakhasekha nke lhta aktemakha m’a nema henlavkeskama nak konne iemmen ankok, aktemakha nak apkakhesekamok apmeio’ok apietsekso’ok apkellelto Jesucristo apkennemolhema, aktemakha nhan nema apnaqlhatekhaskeiam apkenmaskengvaiakmo, aktemakha nhan nema ta aliekpelkemo emanie nak. 3 Angellanangkok hata mota qaselha nak apkeltakha la Eniapom Neten. 4 Ketlhengkap apketlhevaiangkek malha apommatema la’a, apkeliangveiakmek nahan, apkeliepkonme lhta sekhe lhta qaselha altaqmanma metka akianmoma aniemai’o Eniapom Neten, apketlhevaiangko lhta nhan Espíritu Santo. 5 Apkeliepkonme lhta nhan Eniapom Neten apaivoma aktaqmanma nak, apkeliepkonme lhta nhan akmovana nak ngkotnek hata akmakmekama emanie nak mo’ok nengavakha ta. 6 Hai, apkeliepkonme lhta ketlhengkap ma’a lhamakho qaselha altaqmanma nak, koka apkelieniakho la’a mankollapvankek mokhom eliaqmongkasekhak mo’ok apvalho’ok, ngkotnekhak kelha malha mokhom apkeliaqlhaklhema neten iamet aktenneskama Eniapom Neten apketka kakpota eliemetkasama kelha enenlhet’avok ma’a. 7 Etlhohok kelha nhan ketlhengkap ma’a malha lhepop anak akpetsesma nak iemmen akmamai’a akiavai’a la’a. Ka aktaqmelo la apnaklhekamok akielhna m’a apkellelto nak apkenaikamok, netamen Eniapom Neten etaqmelkesek hata nalhepop anak. 8 Koka aktepo la vanlha menevke kanhan iammeiak, mankolatsama ta m’a lhepop aktek anak. Ketsek hata nhan nkaimalhkak nema akiemetkeskama ta m’a, netamen ngkolhek hata nhan alvanlhakho m’a.

9 Ketlhengkap elialheng’a askellamelaiam, nkoihek ania’a asietkeskama lhkek, koka asiavek ko’o etlhevangkok hata ketlhengkap qaselha altaqmelo aniem’o m’a nengelvongkasemmalhka nak tep. 10 Ngkanek Eniapom Neten apto apeivomo panke’, melelvangkamek na ketlhengkap ma’a apkelpasmomo lhta, apkellasekhai’o lhta nhan apkelpokkanma nak akvakmo nenvanlha nak. 11 ¡Ntasek etlhengkese mota mokhom ketlhengkap ma’a metka akpensangveiam, metka nhan apkeliamasangveiam alleklemo apvalho’ok! Netamen etlhevangkok hata qaselha altaqmelo apkelel·halhanmo mota nkovak hata. 12 Moltok nkovak aknem aptaikamok mankonmahai’a enmakmama ketlhengkap, ntasek koka elvanangkok ma’a malha aptaiangkolha nak ma’a apkellelto ta apketlhevaikamok qaselha aplheianmo lhta Eniapom Neten aniem’o nhan ma’a meliaskeiam, metka nhan apkelpekheskama apkellailhema qaselha nkovak hata.

Apkaikamok Eniapom Neten lhema apaivoma nkotnek hata Abraham

13 Neksa apkaikamok lhnak nanek lhema apaivoma Eniapom Neten ellangkok hata Abraham ma’a, aptemeskesammakpo nhan apanke juramento apvesai’a apankek ma’a aptemo lhnak na have niapak, ngkanek mamma nhan apno apientalhnemo m’a, 14 lhnak nanek aptemak Eniapom Neten:

«Avanhek hata ngkotnek astaqmelkeskeskama apkaniemhaikama lheiap, apentelhek hata etnek aptavana’ak neptamen, have niapak ankek astakha nak askano lheiap» ^{▼▼Genesis 22:16-17}, lhnak nanek aptemak ma’a.

15 Mang nak nanek epekheskamak Abraham apkelailhemo apkeltennaskamo lhnak nanek apaivoma Eniapom Neten ellangkok hata, netamen lhnak nanek aplhevai’o lhamakho qaselha m’a. 16 Ka enenlhet la neksa aptema lhema apaivoma have niapak ankek apmahai’a elanak, elhenek apvesai’a po’ok apto neten apankek ma’a, iokhalhmek hata nhan ngkotnek ma’a aktemakha apaivoma. 17 Lhnak nane nkeniemai’ak Eniapom Neten aptemeskesammakpo lhema apaivoma have niapak ankek apmahai’a elanak, elhenakpok apvesai’a apankek ma’a kakpota ngkotnek iokhalhmek ankek apketlhevaikamok qaselha m’a apeneskamo lhnak nanek aplheianma m’a. Metka nhan apiaqmongkasekha mo’ok aplheianma qaselhaha. 18 Hai, meiaqmonkasekhek hata Eniapom Neten hanet qaselha nak aplheianma ngkanek mamma nkek apmopvana ania’a m’a. Nenlhamakho nengelelto nenteniaikamok hengeltaqmelkeskama Eniapom Neten ntasek nkolhnangkok alel·halhnekama engelvalho’ok angetlhevangkok hata qaselha aplheianmo Eniapom Neten hengellangkok hata. 19 Ka al·halhnekama engvalhok anak hentemeskaskek metka aktaikama engvalhok, malha aktonak tava apak akmaskeskama nak akievhekama loma nemmen la’a.

Koka al·halhnekama engvalhok anak hengelentalhneksek hata m’a Eniapom Neten apnemakha akieto neten, tep ma’a ietamopai’a aphalhtemommap. 20 Aptalhnengvekho lhta nhan Jesús ma’a kakpota hengenmaieskeskakhak ma’a, aptemengvekho lhta nhan apiav’akha sacerdote malha aptemo lhnak nanek Melquisedec.