Hebrews 7

Jesús apto malha sacerdote Melquisedec

1Koka Melquisedec nak nanek apto apiav’akha apveske akieto m’a Salem, aptemo lhnak nanek na sacerdote apkasennaikama Eniapom Neten apto apnema netne kanke nak. Apteiapmo apkellanielhaiangko lhnak Abraham kakpota emok takha m’a, apkaiangko lhnak na lhema apaivoma aktaqmanma apkeltemo nkotiepok apkaniemhaikama Abraham ngkanek apkeltemeskesekho koneng apkennapommap apkeliav’akha apkelveskaie’. 2Apkaiangko lhnak na Abraham Melquisedec lhema nekha atkok akvesai’a diezmo aniem’o m’a apkel·hatsoskasekha qaselha apanko’ok apkennapommakpelha.

Melquisedec koka nhan nema altema apiav’akha apveske apeivomo. Apiav’akha apveske nhan Salem nema altema koka apveske metka akmaska niapom. 3Mang nak nanek na akiamo apiapom ma’a, kanhan ngken, mang na akiamo apkelieihengka’a. Mang na akiamo akieto akietemelha apteiaianlha m’a, mang na akiamo apketsepmek kelhaha nlho ka la mma’. Ka nkeniemai’ak aptemo sacerdote mangkotnengvaiam annelha malha niekhe aptonak Eniapom Neten apketka.

4Have niapak ankek Melquisedec aptemo lhnak nanek neten apankek apiaspommap ma’a, ka nkeniemai’ak apkellaiangko lhnak nanek na nengelieihengka Abraham nekha atko’ok akvesai’a diezmo apkel·hatsoskaseikokhak apanko’ok apkeliav’akha apkelveskai’e apkennapommakpelha. 5Koka ley Moises nlheianmek akietemo nkek ntasek enmok takha mota lhema nekha 10 anak aptangko la sacerdotes aptavana’ak neptamen Levi apieseksek lhnak nanek apkennemolhema apanko ie’, aplhamakho nhan aptangko la aptavana’ak neptamen Abraham, nkaqhok koka apkellaiangkek lhema nekha 10 anak. 6Koka Melquisedec have aptaven neptamen Levi, nkaqhok koka apkenmalhnekama lhema nekha 10 anak qaselha Abraham. Apto niekhe nhan neten apankek apiaspommap Abraham aniem’o nhan Eniapom Neten apkeltennaskamo lhnak nanek na lhema apaivoma ngkotnek hata m’a, nkaqhok koka apkaiangkek akvesai’a diezmo m’a Melquisedec. Netamen nak na m’a apkaiangko lhnak nanek lhema apaivoma nkotiepok hata aktaqmanma apkaniemhaikama Abraham ma’a. 7Nengeliavek na ennengko’o m’a apto la apkaikamok apaivoma aktaqmanma po’ok, apto nhan neten apankek ma’a, melhnok ma’a apto la aplhevai’a nema akpaivoma aktaqmanma. 8Apkellelto nak sacerdotes aptavana’ak neptamen Levi nenvanlha nak, apkenmaikamo mota lhema nekha 10 anak qaselha apanko’ok enenlhet, eletsepok hato ka m’a. Koka aplhenammakpek mota m’a aptema mokhom aphalhnankok ma’a Melquisedec. 9– 10Ka sacerdotes nenvanlha nak malha nha ntemak apkellaikamok la lhema nekha 10 anak qaselha m’a Melquisedec annenga ngkanek nkellempai’ak ema apankok apkeliatav’a annenga Abraham neksa apkaikamok nak nanek lhema nekha 10 anak qaselha m’a Melquisedec, neksa apkelanielhaikamok nak nanek ma’a.

11Apkellelto israelitas apketlhevaiangkek nak nanek ley, apkellelto sacerdotes apkelleniem’o m’a Levi apkeleltemo lhnoka elieplavkesek ley anak, mang noka nkomovanak nkotneskesangkok apkeliamolhma apankavek enenlhet’avok ma’a. Ka nkeniemai’ak aimommalhko apvai’a po’ok aptemakha sacerdote, have aptemo lhnak nanek Aarón annenga, koka m’a aptemo lhnak nanek malha Melquisedec. 12Apkaimekpo la apiaqmoiekha po’ok sacerdote, nkaimelhkek na nkoiaqmekhak mo’ok ley. 13Koka sacerdote alheno nak apto m’a Apveske engankok anak, have apkeniem’o m’a apasmekha apketkak neptamen Levi annenga, koka apteiaiakmok ma’a apieseksek po’ok apasmekha apkennemolhema, mamma nkek lhema aphapak la apmakmekama m’a akieto nak alvanlhemmalhkelha qaselha. 14Hai, nenlhamakho nengeliavek Apveske engankok apkeniem’o m’a apasmekha apketkak neptamen Juda annenga, mang nak nanek elheianmak Moises annenga etiepok hata m’a lhema sacerdote apkeniem’o m’a Juda.

15Kolhva koka nelpeivesekhek ma’a nietemavek ma’a apvai’o nak aphalhnankok sacerdote malha aptemo lhnak nanek ma’a Melquisedec. 16Ka sacerdote aphalhnankok anak have apkeniem’akha m’a nema atavana’ak anak aklheianmo na mota ley, koka aptemengvai’ak sacerdote aniem’o akietnema apmopvana, mammopvana nhan antevasekha. 17Lhna nnema ktemo aplhenammakpo m’a:

«Lheiap apto sacerdote mangkotnengvaiam annelha apnemo nhan ma’a Melquisedec» ▼

▼Salmos 110:4

, lhna nnema aktemo.

18Koka anemakha henganemakha nnek akmaskesakho m’a ngkanek mangasennek ma’a, 19ley Moises mankavankek nkoltemeskesek apkeliamolhma apankavek enenlhet’avok. Koka neliavek kolhvavek nak nietnek qaselha nengel·halhnekama aktaqmanma nkek ka ngkanek na m’a envanka’ak angelteteskakhak Eniapom Neten metka altaikama engvalho’ok.

20– 21Apkellelto nak sacerdotes lhennenga nema aliekieskama la’a metka nema aktema lhema apaivoma have niapak ankek la aplheianma, koka Apveske nak nnengkek aliekieskamo akieplomo nhan nema aktema lhema apaivoma have niapak ankek aplheianma m’a, ka aktemo nak na aktalhesammalhka Eniapom Neten apaivoma hengke’e:

«Aptemengkek nak lhema apaivoma have niapak ankek elanak hata Apveske m’a, metka apiaqmongkasekha mo’ok apaivoma, lhna aptemak: “Lheiap apto sacerdote mangkotnengvaiam annelha”» lhna aptemak ma’a.

22Hai, koka alhnankok annemo mo’ok engelvalho’ok anak nemmahai’akha antangkok akto neten ankek aktaqmanma aniem’o m’a Jesús, mangkolhnok ma’a amanie lhnak nanek annemo mo’ok apvalho’ok lhna nanek. 23Nema akiaqmongkasekha mota po’ok sacerdotes aniem’o apkeletsepaiam, 24koka Jesús mankaimommalhka nema akiaqmongkasekha po’ok la’a ngkanek menietsepma, apto nhan sacerdote mangkotnengvaiam annelha. 25Ka ngkanek apvankek na elvongkesek tep lhema aktema metka mokhom taiep apkellelto la apkelketansema m’a kakpota nhan elaqlakhak ma’a napaqtek Eniapom Neten apto mangkotnengvaiam annelha apkaniemhaikama m’a, vanlha mota apkeltennaskekha apkelvesai’a enenlhet napaqtek Eniapom Neten.

26Nietavek ankek ma’a Jesús apto apiav’akha sacerdote apkaimommakpo mota ennengko’o. Apto nhan apokkenammap, metka aptemengveiakmo lhma, apkalhnai’o nhan napaqtek Eniapom Neten, mevhanekho apkellanekamok ngkollatsekama enenlhet’avok, nemo akneskekho m’a netne kankoie neten. 27Ka aplhamakho apkeliav’akha sacerdotes nak nkaimelhkek eniaqhek nentoskama lhamakho aknem kakpota eniangkongvakhak Eniapom Neten akiaqmoiekha ngkollatsekama aptaiangkelha. Netamen ma’a apvanka’ak ellangkok na akiaqmoiekha ngkollatsekama aptaiangkolha apkennemolhema. Koka mo’ok aktemakha m’a Jesús, mankaimommalhkak eniangko mota nentoskama nengaqhema lhamakho aknem, ngkanek apkaiangkave lhta apmatnamo m’a malha nentoskama apmatnama la, lhema aktema koka m’a mankaimelhkak enietsepok mokhom. 28Ka ley anak vanlha mota aliekieskama enenlhet meliennaktema kakpota etnek apiav’akha sacerdote, koka netamen ley anak akvai’o nhan lhema apaivoma lhnak nanek akto have niapak ankek aplheianma Eniapom Neten, aptemeskeskamo apiav’akha sacerdote Apketka apankek ma’a, aptemeskeskamo nhan apiamolhma apanke metka nnelha.