Heb 9 | TmfSC | STEP | Amhama amanie nkek lhnak nanek apkelpeneskama annemo mo’ok apvalho’ok apkenmahai’akha etnangkok Eniapom Neten kanhan ko israelitas, apkellaiangko lhnak nanek na henganemakha apankok kakpota etnangkok apkellasennangka la m’a akieto m’a konne akpokkenammalhka nalhepop anak

Hebrews 9

Metka nentema mokhom nennapma nennaqtoskama kakpota angankok Eniapom Neten

1 Amhama amanie nkek lhnak nanek apkelpeneskama annemo mo’ok apvalho’ok apkenmahai’akha etnangkok Eniapom Neten kanhan ko israelitas, apkellaiangko lhnak nanek na henganemakha apankok kakpota etnangkok apkellasennangka la m’a akieto m’a konne akpokkenammalhka nalhepop anak 2 akvesai’a m’a akpaklhenammalhka kaselha aiempek. Amanie nkek amhama av’alhok konne akvesai’a lhnak nanek akpokkenammalhka, nkemhankek nak ma’a alhva apommatkeskama kanhan asota akieplomo pan nema alpokkenkeskama Eniapom Neten. 3 Netamen nak ma’a aptakha nnelha apkanet ietamopai’a aphalhtemommap konne m’a akvesai’a lhnak akpokkenammalhka nkoie. 4 Nnaiangkek nak ma’a lhema asota oro aiempehek, nemakha alvanlhemakha panaktema ava akmases aimes ma’a. Nnaiangkek nak nanek na m’a iamet aiseksek akiavai’a oro aiempehek, aknaiangkelha lhnak nanek na konne metaimong nekha’ak, aknaqtalhesammalhka annemo mo’ok apvalho’ok lhnak nanek apkenmahai’akha etnangkok Eniapom Neten kanhan apkennemolhema. Nietnengkek nak na lhema nahaikok oro, konne lhnoka apietnemak nentoma mana aniem’o neten. Nietnengkek na apkenenaikamok apmanie Aarón annenga akteiapmo lhnak na elhnemok ma’a. 5 Apkelapkeskangkek nak nanek na aplhempankok enenlhet apkeliokha apkelietkesammap ma’a takhalhet apmatakha iamet aiseksek ma’a, akvesai’a lhnoka m’a nema apkasekhelha maniamolhma. Hai, vanlha alheianma aktemakha qaselha lhkek, mankaimelhkak alhenekhok mokhom aklhamakho qaselha aknaiangko lhnak nanek ma’a.

6 Lhnak na ne ntemak qaselha nema akheskama konne akpaklhenammalhka kaselha aiempek ma’a. Apkelentalhnengvekhelha lhnak nane mota sacerdote m’a akieto amhama amanie nkek av’alhok pa’at kakpota ellasennama Eniapom Neten ma’a. 7 Koka mo’ok av’alhok pa’at lhnak nanek ma’a vanlha lhna mota aptalhnengvekhelha apiav’akha sacerdote lhema aptalhnengvekha lhnak lhema iantelhkapa nhan, metka apiekaskama lhnak apsekha ema m’a kakpota engkesek aniem’o meihamolhma apankek ma’a. Netamen na engkesek aniem’o meliamolhma apkennemolhema neksa meliamo koka apkellanekamok ngkollatsekama. 8 Kolhva koka neliangvakmek nenvanlha nak aniem’o Espíritu Santo amosek nak elentelhek aplhamakho m’a konne av’alhok akpokkenammalhka nke nak neksa apietnema mokhom akpaklhenammalhka kaselha aiempek anak. 9 Nkaimelhkek ennengko’o angeliangvomhok qaselha nengaikamok anak kanhan nema annapma nak nentoskama mankavanke nkalhnaskesek akiokho nkek alietnaikamok apaqto’ok enenlhet’avok ma’a. Koka kaselha nak nennapma nentoskama akietkesammalhka qaselha akvetammalhko lhta nengvanlha nak. ^{▼▼Koka qaselha akvetammalhko lhta nengvanlha nak apvesai’a Cristo m’a, apketsepmo lhta aniem’o ngkollatsekama nellanekamok ennengko’o, ka hengeltemeskeskamo nengelpeivomo napaqtek Eniapom Neten ma’a.}

10 Hai, koka lhamakho henganemakha ankok anak ma’a aktemakha hengaskama anto’ok lhema qaselha la’a, kanhan neniama, nelienieskama qaselha la’a, akteniai’a lhna lhtoka niekhe alalhnasekha la engvalho’ok ma’a, koka akietkesammalhka niekhe m’a. Nkovak hato ka aktemongvaiam annelha m’a, ngkolhek hata akiaqmongkasakho mo’ok akto aktaqmanma nkoie.

Cristo apiaqmongkeskama nennapma nentoskama nengaikamo mota Eniapom Neten

11 Ngvai’ak koka aktema nnelha m’a nenvanlha nak aniem’o apvai’o m’a Cristo aptemo nhan apiav’akha sacerdote kakpota lhema aktema etsantak na lhamakho qaselha altaqmanma aksavhommalhko nkek ma’a, mankaimelhkak mokhom ma’a. Ka ngkanek aptalhnengvekhek konne malha niekhe akpaklhenammalhka nak kaselha aiempek akto nhan neten ankek aktaqmanma m’a, have enenlhet apankavek apkellanai’a m’a. 12 Apsekho nhan ema apankok ma’a apkangkongvekho Eniapom Neten, have ema apankok anak ieta’ai kanhan vakka iama ngkelvana, ema apankok apankek koka apsekhak ma’a. ¡Hai, aptalhnengvekhek ma’a akieto konne akpokkenammalhka nke nak, hengel·hatsoskekho nhan metka aktaiekho mokhom neksa hengenmaikamo lhta mangeliamolhma, mankaimelhkak etalhnengvakhak mokhom ma’a!

13 Have niapak ma’a ema apanko’ok toro kanhan ieta’ai apkenno ngkolhek alelhpakhangka mota enenlhet alpaiseiam apvalho’ok la’a, kakpota nhan tahap ankok anak vakka atkok ngkolhek na alhpaqhangka m’a apietsekso’ok ma’a, akmovana nkoltemeskesek apkelpokkenammap kakpota nhan alalhnaskamo apiempeiok ma’a. 14 Koka akto neten ankek ma’a ema apankok anak Cristo, avanke nkollalhnaksek alietnaikama apaqto’ok qaselha ngkollatsekama apkellanekamok, akmahai’o lhta mota nkolaqlakhak akietemelha nengetsepmakha m’a. Hai, apmesemmakpe lhta panke Cristo aniem’o Espíritu metnenvaiam annelha, malha aktemo lhta aktekioma nennaqtoskama metka nhan apiakteikama la’a kakpota hengeltemeskesek nellasennaikama Eniapom Neten apto mangkotnengvaiam annelha apkaniemhaikama.

15 Hai, nietnek ennengko’o alhnankok annemo mo’ok engvalho’ok nemmahai’akha antangkok aniem’o Cristo. Apketsepme lhtoka m’a kakpota envanka’ak ngkolhek hengelpaqnenkasakho qaselha ngkolatsekama nellanekamo mota neksa nellaniemhaikama akietnema amanie nkek annemo mo’ok apvalho’ok lhnak nanek apkenmahai’akha etnangkok ma’a. Kolhva koka nengelelto nak nellavommalhka envanka’ak hata angetlhevangkok qaselha mankonmaskengvaiam apeneskamo lhta apaivoma hengellangkok hata m’a. 16 – 17 Nnavek na m’a vakkahak anak aptalheskama apkelanai’a apiapom aktemakha apkelhpankesek hata qaselha apanko’ok apketkak apketsepo ta m’a, koka nkaimelhkak amanie enietsepok kakpota ngkolhek aiempek ma’a vakkahak anak, koka aplava la mokhom, mankolhek na aiempek ma’a. 18 Lhnak nane ntemak ma’a apkellanekamok amhama amanie nkek annemo mo’ok apvalho’ok nak nanek apkenmahai’akha etnangkok, nkaimommalhkek nak nanek na sekhek nkoiangkenalhkak ema kakpota ngkolhek aiempek ma’a apkellanekamok apkellanemmakpelha etnangkok. 19 Lhnak nanek na aptemak Moises aplheianmo ley allanemakha etnangkok apieseksek apkennemolhema, netamen apmamo lhnak nanek na lana apielhvasema kanhan lhema iamet aktong atkok akvesai’a hisopo, aplavkeskamo konne valde ema apankok toro apketkok kanhan ieta’ai apkenno, iemmen nema angkaiekha m’a. Netamen apkelhpakhaiangka nhan vakkahak henganemakha, kanhan apkelhpaqhaiangka takhaplhet’ok aplhamakho apkennemolhema, 20 lhnak nanek na aptemak ma’a:

«Ka ema nak nkolhnekse ta aiempek annemo mo’ok anak apvalho’ok apkenmahai’akha etnangkok Eniapom Neten kanhan ketlhengkap» ^{▼▼Exodo 24:6-8}, lhna aptemak.

21 Apkelhpaqhaikama lhnak nanek na Moises ema akpaklhenammalhka kaselha aiempek kanhan lhamakho qaselha apkenmaikama aknaiangko m’a konne neksa apkellasennaikama mota Eniapom Neten. 22 Koka ley anak nketlhenkeskamavek nkolalhnaksek qaselha aniem’o m’a ema. Metko la akiangkenammalhka ema, mangkolhek na aktemeskesangkankek meliamolhma nak enenlhet’avok. 23 Ka nkeniemai’ak ma’a aimommalhko lhta mota apkennapekamok apnaqtoskama kakpota ngkotnek malha alalhnaskama ema ankok qaselha aknaiangko m’a konne, malha nhan alietkesammalhka la m’a qaselha nak ma’a neten. Koka qaselha nak aknaiangko nak neten mankavankek nkolalhnaksek ema ankok nentoskama aptekioma la’a, vanlha lhtoka aimommalhko apketsepma apto neten apankek apiaspommap anak.

Cristo apkel·hatsoskeskama ngkollatsekama aknaikamok apvalho’ok enenlhet’avok

24 Ma lhta etalhnengvekha Cristo pa’at akpokkenammalhka apto enenlhet apankek apkelanai’a, ngkanek apietkesammap ma’a pa’at anak hengke’e apietnemo m’a neten apto have niapak anke nak. Neten koka aptalhnengvekhak ma’a napaqtek Eniapom Neten kakpota enianak hengelleltaqmelkeskesek nengellaniemhaikama ennengko’o m’a. 25 Apkaiangkave lhta nhan apanke kakpota ematong ma’a lhema aktema koka m’a, mok aktema m’a apiav’akha sacerdote nalhepop anak aimommalhko mota etalhnengvakhak lhamakho anio pa’at akpokkenammalhka esakhak ema ankok apnaqtoskama, have koka ema apankok apanke. 26 Lhta apto la Cristo malha apveske sacerdote, lhamakho anio lhta nha ngkotnek aplengaiangko akientalhnema nkompa lhta m’a alanemmalhko sekha lhmankek ham nkovomo lhta nhan nenvanlha nak. Koka apkaiangkavek apmesemmakpo apankek apmatnama nenvanlha nak nkanketvakmek aktemongvanlha nnelha aknem, kakpota hengel·hatsoskesek ngkollatsekama nellanekamok. 27 Lhema apketsepma enenlhet la’a, netamen nkovak hata nema akiekpelkema ngkollatsekama apkelanai’a, nlho ka la aktaqmanma. 28 Nnavek na Cristo m’a, lhema aktema apkaiangko pankek apmatnama kakpota el·hatsoskasangkok apkellanekamok ngkollatsekama aplhamakma enenlhet’avok. Netamen ma’a evatak hata mokhom have apmahai’a elaneskasekhak apvalho’ok enenlhet’avok apkellanekamok ngkollatsekama, vanlha koka apmahai’a elvongkeskatak tep ma’a apkellelto la mota apkelel·halhanma.