Jam 2 | TmfSC | STEP | Ketlhengkap elialheng’a, meliaskeiam Jesucristo apveske engankok aknema apmopvana, ka ngkanek mangkolatsema aptangko la melhneskamo mo’ok apkellanei’o po’ok.

James 2

Nema allaskama melhneskamo mo’ok apkellanei’o po’ok

1 Ketlhengkap elialheng’a, meliaskeiam Jesucristo apveske engankok aknema apmopvana, ka ngkanek mangkolatsema aptangko la melhneskamo mo’ok apkellanei’o po’ok. 2 – 3 Malha akto nak ma’a apkaqnekhelha la ketlhengkap apvo’o la aknema apketsekama enenlhet, akietnema la nengatkeskama engaphek alienmomo oro, kakpota nhan apketsekama apkeltakmanma apanke apmennave nhan, eltaqmelkasok apkenmaikamok takha ketlhengkap ma’a, ka etnangkok ellanak heng: “Elhna ta nke’e aktakmelakha nak nentanema”.

Netamen apvo’o la nhan enenlhet metka nak apketsekama, aphapavok na apkelentalhnema, ka etnangkok na ellanak heng: “Etnengvakho m’a mokhe nak, nlho ka la nhan elhnakha m’a nalhepop anak”.

4 Koka mangkolatsema etnangkok ketlhengkap ma’a, koka akvesai’a manneskamo mo’ok nelanei’o emmo’ok ma’a, malha aptaiangkelha nak hengiekpelkemo niapma’ak ngkolatsekama nak atlhenaikama apvalho’ok.

5 Eltaqmelkaso no apkellailhemo elialheng’a askellamelaiam, apkeliekieskek Eniapom Neten enenlhet’avok anak metka apkelletsekama kakpota ngkoitek akiavai’a meliaskeiam, etnangkok na apkennemolhema aptemakha lhnak nanek apeneskamo aplheianma ellangkok hata m’a apkellelto la apkellasekhai’o m’a. 6 Ketlhengkap koka apkeltemeskesantek koneng ma’a enenlhet’avok anak metka apkeletsekama.

¿Have nlho nema apketsekama nak apkellaiangkok akientalhnema apkenmakmekama, ketsek koka apkelianmongkeskama m’a, he? ¿Have nlho nhan nema apketsekama nak elieniosokha ketlhengkap napaqtavek apkelientalhnemo nak, he? 7 ¿Have nlho nhan nema apketsekama nak apkeltaknongkoma mota aktaqmanma apvesai’a Apveske ^{▼▼Koka aktaqmanma nke nak apvesai’a Cristo m’a.} apanko’ok ketlhengkap, he?

8 Ntasek apkelleliahakho la’a ketlhengkap ley akto neten anke akiaspommalhka akietno nak ma’a vakkahak Eniapom Neten apaivoma, ka ntemak hengke’e:

«Eniasekho po’ok ka kto nak apkasekhammakpo panke nak lheiap ^{▼▼Levitico 19:18}».

9 Koka mangkolatsekama melhneso la mo’ok apkellanei’o po’ok ketlhengkap, nkolhenek hata nhan ley apkellelto ketlhengkap apketselhnanemmap aniem’o apkeliekai’a aklheianma m’a. 10 Apno la enenlhet apkeliehekho ley atlhenkeskama nhan esavhoho’, vanlha koka lhema alkama nkek ley meliehekho, ley hata nhan nkolhenek ma’a apto apselhnanemmap aniem’o apiekai’a m’a aklheianma. 11 Ka aptemak na Eniapom Neten hengke’e:

«Menaqtevaso apnaqteiangka’a».

Ka aptemak mokhom ma’a:

«Mellaqha po’ok».

Lhema enenlhet metvaskamo la aptava, apkaqhak koka po’ok, apieka’ak na ley ma’a. 12 Ka ngkanek ntasek ellangko mota aktaqmanma apaivoma po’ok ketlhengkap, kanhan eltaqmelkasakpoho ngkanek ngkolhek hata aliekpelkok ketlhengkap ma’a aniem’o ley akmovana hengel·hatsoskasangkok ngkollatsekama. 13 Enenlhet la meietnai’o napa’at po’ok, mangkolhek hata nhan akietno napa’at ma’a, koka apietno la napa’at po’ok, eiephongvomhok hata nhan ma’a akvo’o la aknem nema akiekpelkemelha apkeltemakha enenlhet.

Aqhemo mok apatno’ok apketlhenaikama meliaskeiam

14 Ketlhengkap elialheng’a, aqhemo m’a vanlha apatong anak enenlhet aplheianma akietnema mei’askeiam koka mepasmak na po’ok, aptaikama pankek mei’askeiam anak, mevongkasakpek hata nhan tep ma’a.

15 Malha aktonak apkelvetai’a la ketlhengkap lhema enialheng apkenno la’a nlho ka la enialheng ngkelvana la’a, metka aletsekama kanhan metka aktekamok, 16 hatelha etnangkok elpaqmetek ketlhengkap ma’a: “Askeltavek ko ngkotnek aktaqmanma apkaniemhaikama lheiap, etak aptalhnema apmokhetma apankok kanhan aptoma akvakmo apiapqanakmo”, kelha etnangkok ketlhengkap.

Aqhemo koka apkelpakmetekama, nkaimelhkek koka ellangkok qaselha alaimommalhkelha la po’ok.

17 Koka akto nak mongiaskeiam anak ma’a mok engatong anak malha atsepma nhan ma’a.

18 Kelha etnek la lhema enenlhet hengke’e: “Nietnek ko’o moi’askeiam”.

Kelha etnek na po’ok heng: “Ko’o koka askelan’ak qaselha altaqmelo”.

Ko’o koka stak askellano: “Mangellanengko la qaselha altaqmelo, man na nkoietnak mongeliaskeiam ma’a ngkanek ngvetalhkek mangiaskeiam anak neksa nellanai’a la qaselha altaqmelo”.

19 Ntasek meliaskame vanlha lhema aphapak Eniapom Neten kanhan apto Apveske, koka kasekapok av‘alho’ok mangkoliaskakmok na m’a, nkolpelhiennemok na allai’a m’a. 20 ¡Metnamo nkek ketlhengkap malha metka apqatko’ok, nkaimelhkek nkolketmok apvalho’ok! Malha aqhemo ngkotnek ma’a meliaskeiam anak mangkotepkeso la apkelanai’a qaselha altaqmelo. 21 Ngkanek apkeltaiangko lhnak nanek Eniapom Neten Abraham apto apeivomo aniem’o apekkanveiakmo lhnak nanek apketka Isaak neten alvanlhemmalhkelha qaselha kakpota eniangko niekhe Eniapom Neten.

22 Apvanka’ak ketlhengkap ellanhok ma’a aptemakha lhnak nanek Abraham, apsavhekho aktemakha mongiaskeiam aniem’o qaselha aktaqmanma apkelanai’a. 23 Ngvai’ak aknem ma’a aklheianmo lhnak nanek vakkahak Eniapom Neten apaivoma, lhnak nane ntemak hengke’e:

«Mang nak ei’askeiakmok Abraham aptemakha apaivoma Eniapom Neten, ka apkeltaiangko nhan apeivomo m’a».

Apkeleltaiangko lhnak nanek enenlhet’avok Abraham apto aptema po’ok nengaqte Eniapom Neten.

24 Apvanka’ak ketlhengkap elvetak kolhvave nak Eniapom Neten apkeltaikamok la enenlhet apeivomo aniem’o akietnema mei’askeiam kakpota nhan apkelanai’a qaselha.

25 Ka aktemo lhnak nanek na m’a ngkelvana alanaktema akvesai’a Rahab, apkeltaiangko lhnak nanek na Eniapom Neten akpeivomo m’a ngkanek alentalhneskamo lhnak nanek aknemakha apketsekama ania’a aniem’o nema akmenlhenaikama, kakpota nkolpasmok enieniangkok mo’ok amai.

26 Askeltavek mokhom aleltennaksek ketlhengkap, malha atsepma m’a mongiaskeiam anak metko la qaselha aktaqmanma nelanai’a, malha akto nak neniokha nak atsepma metka aklhelhma mokhom enghangok.