Joh 11 | TmfSC | STEP | Lhema enenlhet alhta apvesai’a Lazaro akmaskei’o lhta apiempek ma’a, apkavakha apanke lhtoka Betania kakpota nhan apkelialho’o María kakpota nhan Marta.

John 11

Apketsepma Lazaro

1 Lhema enenlhet alhta apvesai’a Lazaro akmaskei’o lhta apiempek ma’a, apkavakha apanke lhtoka Betania kakpota nhan apkelialho’o María kakpota nhan Marta. 2 María koka akto lhta altelhnaskesaikamok apmankok Apveske akmases aimes aimenek, ka aktaiekho lhta nhan ava’ aliemaskesekho apmankok Jesús ma’a. 3 Ka alapaskamo lhna lhta lhema enenlhet kakpota eltennaskakhak ania’a Jesús, lhta aptak apkano apkapasammap:

—Apveske, nemmaskema lhke nkaqhak aptema po’ok apanke’ nak apkasekhai’elha lheiap —lhta aptak.

4 Ka apkatemmongka lhta Jesús ma’a, lhta aptak:

—Koka akmaska eniempek anak have akmahai’a nkaqhek ma’a, elvetak hata enenlhet’avok Eniapom Neten apmopvana, kakpota nhan apmopvana Apketka —lhta aptak.

5 Avanhe lhta apkellamelaiam Jesús Marta, María kakpota nhan Lazaro. 6 Ma lhtoka epekhak’ak Jesús eniakhak ma’a apnakha Lazaro, apkeltave lhta elhek mokhom hanet aknem ma’a. 7 Netamen lhta aptak Jesús apkellano apkeltamesaikamok:

—Nok, angenmeiakha mokhom iokhalhma Judea —lhta aptak.

8 Koka ma lhta nkonmak’ak enmeiakhak ma’a, lhta aptangkok ma’a:

—Hengetlhekmoskama, apkenmak’a alhta ennapok judios lheiap ma’a, ¿apmak’a nlho eniakha apankek lheiap ma’a, he? —lhta aptangkok.

9 Ka apkellatemmongka lhta Jesús ma’a, lhta aptak:

—Mompelapmek aknem ankek la’a, 12 hora atsai’a na lhma, nketsak’ave lhma amai, 10 koka pelhasep la’a, ampelapmok ma’a mamma songkek atsai’o lhma. 11 ¡Nok apnakha nentema emmo’ok nengaqte Lazaro, aptenkek ma’a, alhatekhaskakhak hata! —lhta aptak.

12 Koka lhta aptangkok apkeltamesaikamok apkellatemmongka:

—Apveske’, ka akto la have niapak ankek apteianma m’a, etaqmelekhak hata m’a —lhta aptangkok.

13 Koka aplhengke lhta niekhe Jesús apketsepma Lazaro, nketlhenke lhtoka nhan apvalho’ok apkeltamesaikamok apteianma Lazaro. 14 Koka apkeleltennasakhe lhta mokhom alhnakho nkek Jesús ma’a, lhta aptak:

—Apketsepkek Lazaro, 15 ntase ko molhnemo m’a apketsepakha nak Lazaro kakpota meliaskamek ketlhengkap. ¡Nok apnakha Lazaro! —lhta aptak.

16 Koka Tomas, mo’ok nemaltema apqanet apalleiam, lhta aptak apkellano apkeltemo lhemek apkeltamesaikamok Jesús:

—Nok, antangkok netlhelhma’ak Jesús, angelletsepok hatelha lhemek ma’a —lhta aptak ma’a.

Apvankek Jesús henlhatekhaskamok, hengankokhak na akiennaktema enneniek

17 Apvakhe lhta Jesús na temma Betania, 4 aknem alhta ngvakmok apketsepma Lazaro m’a. Nemo lhna lhta nhan aklhengkeskaiakmo aphapak nemakha aklhengkeskaianlha enghapak ma’a. 18 – 19 Ma lhta ntek na judios apkelvaiam ma’a akhaiangkolha Marta kakpota nhan María kakpota elpaieskasekhak av‘alho’ok akientalhnema aniem’o apketsepma nialheng. Jerusalen alhta apkellengiem’ak ma’a, malha 3 kilometros lhta nietnak Betania. 20 Ka aklengai’o lhna lhta Marta apkelhiaiam Jesús ma’a, alanielhakmo lhta m’a, nnekhek noka María aknemakha m’a. 21 Lhta ntak ano Marta Jesús:

—Apveske, ko lhtema nak apnema lheiap hengke’e menietsepe nlho lhta ko eialheng, 22 koka asiavek ko’o apkenmalhnengka la Eniapom Neten lheiap, etnehek apmak’o la etnehek —lhta ntak.

23 Ka apkatemmongka lhta Jesús:

—Elhatekhangvomok hata lheia nialheng —lhta aptak.

24 Lhta ntak Marta:

—Hai’, asiavek ko’o elhatekhangvomok hata apieseksek apkenmaskengvaiakmo akvakmo ta nnelha aknem —lhta ntak.

25 Ka apkatemmongka lhta mokhom Jesús, lhta aptak:

—Ko’o asto nak asnaklhatekhaskeiam enenlhet apieseksek apkenmaskengvaiakmo, askellaikamok na aliennaktema apnenio’ok. Apkellelto la mangheliaskeiam enenlhet, nkaqhok eletsepok, elloka koka mokhom ma’a. 26 Koka meletsepo mokhom kolhvave nak mangheliaskakmo la’a, meletsepek hata. ¿Mmai’e nkoi’askakmok lheia astakha nak, he? —lhta aptak Jesús.

27 Lhta ntak Marta atemmongka:

—Hai apveske’, moi’askakmok ko’o lheiap apto Cristo Eniapom Neten apketka aplhenammakpo nak evak hata hengke’e —lhta ntak.

Jesús apvenema akieto nema akpekkanveianlha aphapak Lazaro

28 Ka aktaqho lhta mokhom netamen Marta akhaiangkolha, nielhammalhkek na lhta akmalenioskamo altennaskamo nialheng’ María:

—Lheia’ lhkek apkanek hengetlhekmoskama —lhna lhta ntemak.

29 Kolhvave lhta ntepak María alanielhangko Jesús ma’a, 30 apne lhta mokhom nalhet amai akieto lhta m’a apaqmetkesakha Marta. 31 Apkelvetai’ak na lhta nhan ma’a apkellelto apkelpaiesekha av’alhok akientalhnema akteiapmo akpekhai’a María, ka apkelieplantamo lhta nhan ma’a. Atlheianmo lhna lhta apvalho’ok nkovenvakhak akieto metaimong alhva apietnemakha aphapak nialheng. 32 Ka akvakho lhta María apnakha Jesús ma’a, nkelteklhekke lhta atapno’ok napaqte ma’a, lhta ntak:

—Apveske, kolhtema nak apnema lheiap hengke’e, menietsepe nlho lhta eialheng —lhta ntak.

33 Apvet’a lhta Jesús María akveno ka nhan judios avanhe lhta akiapqalhemmalhka m’a, ka akteiakmo lhta nhan apvalhok Jesús ma’a, 34 apkelelmalhnengka lhta, lhta aptak:

—¿Ko la akieto apkellaklhengkeskamakha aphapak Lazaro m’a, he? —lhta aptak.

Ka apkellatemmongka lhta enenlhet’avok, lhta aptangkok:

—Elheng noho apveske, elanho, ka hengke’e —lhta aptangkok.

35 Ka apveno lhta nhan Jesús ma’a. 36 Apkelvet’a lhta nhan judios, lhta aptangkok apkelpaqmetkesakpo moka pankave:

—Avanhek anke nak apkamelaiam Jesús aptema po’ok Lazaro —lhta aptangkok.

37 Lhta aptangkok na napokha enenlhet’avok heng:

—Aptaqmelkasakhe lhta metka apaqto’ok Jesús, apvankek kelha nhan kakpota menietsepekhek Lazaro —lhta aptangkok.

Aplhatekhangveiam Lazaro

38 – 39 Mokhom alhta akteiam apvalhok Jesús aniem’o akientalhnema m’a, ka apteteskakmo lhta akieto metaimong alhva apietnemakha lhta aphapak Lazaro, lhta aptak:

—El·hatsos metaimong atong anak —lhta aptak.

Koka lhta ntak Marta:

—Apveske’, 4 aknem antak apketsepma ham Lazaro, aptapke’ —lhta ntak.

40 Ka apkatemmongka lhta Jesús ma’a, lhta aptak:

—Askeltennasokha lhkek la lheia mangheiaskakmo la ko’o kakpota nkotak hata apmopvana Eniapom Neten —lhta aptak.

41 Ka apkel·hatsoso lhta metaimong atong enenlhet ma’a, apkammelho lhta nhan neten Jesús, lhta aptak:

—Eniapom, astak ko’o gracias lheiap ngkanek apkailhavek askenmalhnekama lheiap. 42 Asiave ko’o heiailhave mota lheiap, astek ko’o astakha nak askenmalhnongkoma kakpota meliaskamek aplhamakho enenlhet anak hengke’e apto lhta lheiap heiapaskama —lhta aptak Jesús.

43 Ka apiennakteso lhta apvenekama Jesús, lhta aptak:

—¡Lazaro, etiep ham! —lhta aptak.

44 Kolhvavek anke lhta aptepak Lazaro m’a, apkelhiakmo aptepo konne metaimong alhva, akieplomo alpelhketemmalhka apmeiok kanhan apmankok ietamopai’a, ka nhan ieplomo nema apma napa’at ietamopai’a napokha’a. Netamen lhta aptak apkellano Jesús apkellelto apkelvaiam ma’a:

—El·hatsoskes ietamopai’a nak kakpota nkotaqmelekha aplhengama —lhta aptak.

Akpenesammalhka ania’a kakpota ematong Jesús

45 Ma lhta eliaskakmok Jesús enenlhet’avok ma’a apkeleltema lhta apketlhelhma’ak María, aniem’o apkelvetai’a qaselha hempelapkeskama apkelanai’a m’a. 46 Koka napokha lhna lhta apkeleltennaskekhak Fariseos aktakha apkelvetai’a apkelanai’a Jesús ma’a. 47 Ka apkaknekho lhna lhta apkelemhama apmaniaie’ sacerdotes, Fariseos, kakpota nhan apkelveskaie apkelientalhnemo m’a, lhna lhta aptaiangkok:

—¿Ko la antemeskesek enenlhet anak ma’a, he? Nlhanie ntak apkellanai’a qaselha mongenatkeskama. 48 Elhamangkok hata nhan enenlhet apkelieplekama ngkanek meliaskakmok na m’a. Ka manmangvakmo la ennengko’o m’a, netamen etlhenmak hata kempokhakme romanos, enaqtevaksek hata Eniapom Neten apnemakha enganko’ok anak kakpota nhan ennengko’o nelvesai’a judios —lhna lhta aptaiangkok ma’a.

49 Ka iantelhkapa lhta m’a, apnengke lhta nhan apiav’akha sacerdote apvesai’a Caifas, lhna lhta aptemak apkellanemo:

—¡Metka apqatko’ok ketlhengkap, kolketamama no apvalho’ok! 50 Mankoieto nkotvasalhkak nellavakha nak, koka ntasek enietsepok lhema enenlhet la’a have nenlhamakho ennengko’o —lhna lhta aptemak.

51 Apkelientemongkasave lhta Caifas apkanemmakpelha elhenek akmak’akha ta ngkotnek Jesús apmatnama apiaqmoiekha enenlhet’avok judios, have lhtoka apankok apankek Caifas aplheianma m’a, vanlha koka aniem’o aptemakha apankek apiav’akha la sacerdote. 52 Have koka nhan vanlha enietsepok Jesús akiaqmoiekha apkennemolhema apankavek judios, koka nhan ma’a enietsepok kakpota eniankesekhok aplhamakho apkellelto Eniapom Neten apketkak apkakhangko lhma nkek ham.

53 Netamen ma’a, apkellelto apkelveskai’e judios apkelpeneskangkek nak apkellanekha apkeltakha kakpota ennapok Jesús ma’a, 54 lhta songkek elielhanmama Jesús ma’a kakpota melvetiek enenlhet. Ka aptepo lhta nhan iokhalhma Judea, apkenmeiakho na temma akvesai’a Efrain, nengaqte lhta iokhalhma metkelha temma. Apnakhe lhta Jesús ma’a kakpota nhan apkeltamesaikamok.

55 Nkanketvakme lhta nhan aknem aktaqmelaikama lhma akvesai’a Pascua judios apankok, ma lhta ntek enenlhet’avok apkenmeiekha apiav’akha temma Jerusalen kakpota elalhnasekhak apiempeiok ^{▼▼Aptaiangkolha lhna mota judios apkelieniesekamok apmeio’ok, ka apkellanemo lhnak eltaqmelek napaqtek Eniapom Neten ma’a.} aptaiangkolha apankave lhta mota m’a amanie la aktaqmelaikama lhma’ apanko’ok ma’a. 56 Apkelleliama lhta nhan enenlhet’avok Jesús ma’a akieto Eniapom Neten apnemakha, lhta aptangkok apkelpaqmetkesakpo mok apankavek ma’a:

—¿Se lha aklheno apvalho’ok ketlhengkap ke, he, evakha telha Jesús hengke’e aktaqmelaikama lhma nak? —lhta aptangkok.

57 Koka apkelemhama apmaniaie’ sacerdotes kakpota nhan Fariseos apkelpeneskamavek na lhta apkellaikamok ania’a enenlhet’avok ma’a, apkelvet’o la Jesús ma’a, apvanka’ak eleltennaskakhak kakpota elpathetek ma’a.