Joh 17 | TmfSC | STEP | Netamen apeneskama lhta apkeltennaikama Jesús ma’a, apkammelho lhta neten, lhta aptak: —Eniapom, ngvakmek aknem kolhvave nak kakpota elvetaskesek hata lhamakho enenlhet’avok apmopvana Apketka. Etnek hata nhan Apketka apkelvetaskeskama lhamakho enenlhet’avok aktemakha apmopvana lheiap.

John 17

Apkenmalhneskeskama Jesús apkeltamesaikamok

1 Netamen apeneskama lhta apkeltennaikama Jesús ma’a, apkammelho lhta neten, lhta aptak:

—Eniapom, ngvakmek aknem kolhvave nak kakpota elvetaskesek hata lhamakho enenlhet’avok apmopvana Apketka. Etnek hata nhan Apketka apkelvetaskeskama lhamakho enenlhet’avok aktemakha apmopvana lheiap. 2 Lheiap apkaikamok apientalhnema Apketka takhaplhet’ok aplhamakho enenlhet’avok kakpota ellangkok aliennaktema apnenio’ok mankotnengvaianlha nnelha apkellelto lhta apkellaikamok lheiap kakpota eltaqmelkeskesek ma’a Apketka nak. 3 Etlhevangkok hata aliennaktema apnenio’ok aniem’o apkeliekpelkangveiam lheiap apto lhema aphapak aknema apmopvana, apkeliekpelkangveiam na Jesucristo apto lhta apkapaskama lheiap. 4 Askelvetaskaskek aknema apmopvana lheiap hengke’e nalhepop anak napaqtavek enenlhet’avok, aspeneskek na apkeltemo lhta alanak lheiap. 5 Eniapom, heiamok asmopvana akiavai’a ka akietnemo lhta ko’o tep nak na nek metkelha qaselha lhma nkek ham, asnemo lhta nhan lhemek lheiap ham.

6 Askeleltennaskek ko’o apvesai’a lheiap apkellelto hellaikamok alhta kakpota altakmelkeskesek. Lheiap enenlhet apanko’ok, apkelleliahakhavek apaivoma lheiap na m’a. 7 – 8 Apkeliavek na asketlhekmoskamo nak aniem’o lheiap, apkenmaiangkek na takha m’a, man na eliaskeiakmok apto lheiap heiapaskama. 9 Ka askelmalhneskaso nak elpasmok lheiap apkellelto lhta hellaikamok kakpota altakmelkeskesek, ngkanek lheiap enenlhet apanko’ok ma’a, molmalhneskasak ko m’a meliamolhma nak enenlhet. 10 Aplhamakho apkellelto lhta hellaikamok apkeleltemo altakmelkeskesek, enenlhet apanko’ok lheiap ma’a, apkelvetaskaskek asientalhnemo apieseksek enenlhet’avok hengke’e nalhepop anak. 11 Eniapom Apokkenammap memangveiam ngkolatsekama, molhek hata mokhom hengke’e nalhepop anak, aniantak hata ham apnakha nak lheiap. Koka eniakhangkokhak hata hengke’e helieplekama nak, askeltavek enmeivok akieplomo apmopvana nak lheiap kakpota nheklhe ngkotnek apkelpasmommakpo, ka kto nak ennengko’o. 12 Neksa asnema hengke’e apieseksek anak, askenmeiavkek mota akieplomo asiennaktema lheiap alhta heiaikamok. Mamma lhema aplheneiam la’a, vanlha koka apto atka henlhenengkeskama, ka aktemo nak nema alientemongkeskamo aklhenammalhka Eniapom Neten apaivoma. 13 Eniapom, aniakhak hata apnakha nak lheiap, neksa asnema apieseksek anak hengke’e nalhepop anak alhenke mota lhamakho aktemakha qaselha kakpota nkolpaihekhak apvalho’ok akiavai’a nkek helieplekama nak, ka akto nak na ko’o akpaihekha mota evalhok. 14 – 15 – 16 Asketlhekmoskangkek helieplekama nak apaivoma lheiap, apkeltaknevakkek koka enenlhet meliamolhma nak ngkanek po’ok aptema aptangkok hengke’e helieplekama nak, ko’o nhan mok aktema astemakha.

Have askeltemo eliantengvatak lheiap akpelapkeskama takhalhet lhepop anak hengke’e neksa akvai’a ta akientalhnema, askeltavek koka eltaqmelkesek lheiap. 17 Etneskesamok apkelpokkanma lheiap aniem’o apaivoma akto have niapak ankek. 18 Askellapaskek ko’o apkakhangkelha la enenlhet kakpota etlhenek apvesai’a lheiap ma’a, ka aptemakha nak lheiap heiapaskamo nak hengke’e. 19 Aspokkenammalhko nak kakpota atlhekmosangkok helieplekama lheiap apaivoma akto aktaqmanma nkek, kakpota etnangkok na apkelpokkanma apkellasennaikama la lheiap. 20 Askeltavek na elpasmok po’ok enenlhet anak mangheliaskamek hata apkelleng’o la ania’a apketlheianma helieplekama nak. 21 Eniapom, askeltavek na elpasmakpok ma’a ka kto nak ennengko’o malha enlhema, netamen hengelpasmekhak hata nhan ennengko’o m’a kakpota meliaskamek hata enenlhet apto lheiap heiapaskama. 22 Askellangkek ko’o helieplekama nak asiennaktema ka heiaikamo lhta lheiap kakpota elpasmekhak ma’a, ka akto nak ennengko’o. 23 Askelpasmakhek ko’o m’a, lheiap na apto hepasmekha ko’o, askeltavek na etnangkok apketsavhommakpo apankavek apkelpasmommakpo m’a kakpota elvetak enenlhet’avok akiavai’a apkellamelaiam lheiap ma’a. Nnavek na heiamelaiam ko’o, eliangvomhok hata nhan apto heiapaskama lheiap. 24 Eniapom, lheiap alhta hellaikamok kakpota altakmelkesek helieplekama nak, askeltavek na eniakhengvomok asnakhelha ta ko’o kakpota elvetak asmopvana heiaiangko lhta tep nak nanek lheiap, metkelha qaselha lhma nkek ham, heiaiangkek nak nanek lheiap ma’a aniem’o heiamelaiam. 25 Eniapom, asiavek ko’o lheiap apto apeivomo, koka enenlhet meliamolhma nak meliohok lheiap ma’a, koka helieplekama nak apkeliavek apto lheiap heiapaskama. 26 Asketlhekmoskek ko’o mota aptemakha lheiap, alhenkesek hata mokhom asketlhekmoskama kakpota etlhengkesek na helpasmekha ko’o m’a, kakpota nhan ellasekhakpok apieseksek ma’a, malha akto nak ennengko’o nellasekhammalhko mota —lhta aptak Jesús apkenmalhno Eniapom.