John 19

1Ka apkeltemo lhna lhta apveske Pilato ngkolhek aliaqpelhketangka Jesús ma’a. 2Apkellaneiangko lhna lhta nhan apkelpelhiangkamekamok iamet aktengok atko’ok aknema am’ok soldados romanos ma’a, apkelatkeskasekho lhnak apqatek Jesús ma’a. Apkellaklasekho lhna lhta nhan apkaqlammap apvenaktema apaiseiam apielhvasema m’a, 3ka apkelvannaiangka lhna lhta nhan ma’a, lhna lhta aptaiangkok:

—¡Aptasek noka niekhe apiav’akha apveske apanko’ok judios! —lhna lhta aptaiangkok.

Apkeltekpoiangka lhna lhta nhan apmalhempenek ma’a.

4Ka aptepakho lhta mokhom Pilato konne pa’at akiavai’a m’a, lhta aptak apkellano apkellelto apkeliantemaiam Jesús:

—Mota’ak ko’o apkelanai’a ngkolatsekama enenlhet lhek ha’e —lhta aptak Pilato.

5Ka apkelto lhta ngkolhek akiantemantamo Jesús napaqtavek ma’a, nheklhe lhta akielhno apqatek nema am’ok alanemmalhka kakpota nhan apielhvasema apkaqlammap, lhta aptak Pilato apkellano enenlhet:

—Ka enenlhet lhek hengke’e —lhta aptak.

6Neksa apkelvetai’a lhta Jesús ma’a apkelemhama apmaniaie sacerdotes kakpota nhan apkellanekama Eniapom Neten apnemakha, kolhvavek anke lhta apkelelpalhnema m’a apkelvenengka nhan, lhta aptangkok:

—¡Eliaqlha apmeiok apmankok neten iamet aktenneskama! —lhta aptangkok.

Koka lhta aptak Pilato apkellano:

—Ma’, mamma apselhnanemmap hengke’e enenlhet anak. Ia’, eliaqlhamo ta apankave apmeiok apmanko’ok ketlhengkap —lhta aptak Pilato.

7Koka apkellatemmoma lhta apkelemhama apmaniaie judios, lhta aptangkok:

—Nietnek ennengko’o lhema ley aklheianma ntasek ematong ngkanek aplhenakpe lhta apanke apto Eniapom Neten apketka ham —lhta aptangkok.

8Avanhek anke lhta apkai’a Pilato apleng’o m’a, 9ka apkelto lhta ngkolhek aktalhnesakho mokhom konne pa’at Jesús ma’a, ka apkenmalhneiangka lhna lhta mokhom ma’a, lhna lhta aptemak apkanemo Jesús:

—¿Ko la apkeniem’akha lheiap, he?

Mang na lhtoka eniatemmoikama Jesús ma’a. 10Lhna lhta aptemak mokhom Pilato apkanemo Jesús:

—¡Heiatemmoma noho! Nietnek ko asientalhnemo apaknemekhak lheiap, nlho ka la nhan ngkolhek aliaqlho apmeiok apmankok neten iamet aktenneskama —lhna lhta aptemak.

11Ka apkatemmoiangka lhna lhta Jesús ma’a, lhna lhta aptemak:

—Mamma apientalhnemo lheiap elana aktakha aplheianma, koka aklhamakho akmak’akha nak ngkotnek Eniapom Neten apkeltemo. Koka apto lhta heiangkongvai’a lheiap, koka apto neten apankek meihamolhma m’a, melhnok lheiap —lhna lhta aptemak.

12Netamen apkeliaikama lhna lhta Pilato kakpota epaqnemekhak Jesús ma’a, koka niangvakmek alhta apkeliaskama apatno’ok enenlhet’avok ma’a, lhta aptangkok:

—Ka apaknemakho la lheiap ham, eniammelhekhak kelhaha apiav’akha apveske Roma, ngkanek Jesús elekkasekhak hata aptema apiav’akha apveske m’a kakpota eniammelhekhak ma’a —lhta aptangkok.

13Apleng’a lhta Pilato m’a, ka apkelto ngkolhek aktepkeso konne pa’at akiavai’a Jesús, apkananto lhta akieto akiekpelkammalhkelha nentaiangkolha, apnakmo lhta nhan m’a. 14Malha lhta nha ntak katelho m’a, lhema aknem alhta nhan nkaimelhkak akvaianlha Pascua, lhta aptak apkellano judios:

—¡Ka apiav’akha apveske apanko’ok anak ketlhengkap hengke’e! —lhta aptak.

15Koka apkelelpalhnema lhta enenlhet’avok ma’a, lhta aptangkok:

—¡Etepkes, etepkes ham, eliaqlha ta apmeio’ok apmankok neten iamet aktenneskama ham! —lhta aptangkok.

Koka lhta aptak mokhom Pilato:

—¿Apkeleltave nlho aliaqlhak apmeiok apmankok neten iamet aktenneskama apiav’akha apveske apanko’ok anak ketlhengkap, he?

Koka lhta aptangkok apkelemhama apmaniaie sacerdotes ma’a apkellatemmongka:

—Have apiav’akha apveske engankok enenlhet anak ham, vanlha lhema aphapak apiav’akha apveske engankok anak ko Roma —lhta aptangkok ma’a.

16Ka apkellangko lhta Pilato m’a kakpota ellaqhek neten iamet aktenneskama, apkeliantemakho lhta nhan Jesús ma’a.

Nema aliaqlhaklhema apmeio’ok apmankok Jesús neten iamet aktenneskama

17Aplhengke lhta Jesús ma’a akieplomo iamet aktenneskama apatama akvakho iokhalhma akvesai’a Golgota, hebreo apkeltema koka aknaiangkolha ientepak nema apqatkok. 18Ka apkeliaqlhangko lhta apmeio’ok apmankok ma’a, apkelelhno neten iamet aktenneskama m’a, kakpota nhan apqanet enenlhet aiseksek alhta apielhnak Jesús ma’a. 19– 20Apkeltave lhta Pilato ngkolhek alkaso lhema iamet akpaihema alkasemmalhka neten iamet aktenneskama akieto takhaplhet Jesús. Hanetolhem’a aktemakha nempaivoma, hebreo, latin, kakpota nhan griego, lhta ntak heng: Jesús ko Nazaret apiav’akha apveske apanko’ok judios, lhta ntemak aktalhesammalhka m’a.

Ma lhta ntek enenlhet judios apkelietsatengke lhta nhan alqama m’a neksa apketlhengama m’a ngkanek nengaqte lhta apiav’akha temma.

21Neksa apeneskama lhta aptalheskama Pilato iamet nekha akpaihema, lhta aptangkok apkelemhama apmaniaie sacerdotes:

—Metalhes lheiap apiav’akha apveske apanko’ok judios, koka elkes apkeltammakpo apankek lhek apveske apiav’akha judios —lhta aptangkok.

22Koka lhta aptak Pilato:

—Mma’, astalheske’, momak’ak aiaqmongkasekhak mo’ok —lhta aptak.

23Apkelpeneske lhta soldados romanos apkeliaqlhaklhema apmeio’ok apmankok Jesús ma’a, ka apkenmangko lhta aptalhnema, apkennaskesakpo 4 napokha’a, apkennemalhekpe lhta m’a. Ka apkenmangko lhta nhan apkaqlammap, ma lhtoka ennaskesakpok ma’a ngkanek lhema apaihekamok neten ampai’a apkotemmap akvakho koneng. 24Lhta aptangkok apkelpaqmetkesakpo mok apankavek ma’a:

—Mongeliaptanke ta hengke’e, ntase ta annaktevasangkok nennaqtevaskama nemmapseive’ kakpota apto apnaqsepma, esakhak ma’a —lhta aptangkok ma’a.

Ngvakme lhta aknem aktemakha lhnak na nek aklheianma Eniapom Neten apaivoma vakkahak, lhnak nane ntemak:

«Apkennaskesakpek askelentalhnema, apnaqtevasengkek na nennaqtevaskama nemmapseive’ askaqlammalhka» ▼

▼Salmos 22:18

lhna ntemak.

25Nekha iamet aktenneskama lhta nkenmama Jesús angken, kakpota nhan nialheng akvesai’a María aptava lhtoka m’a Cleofas, kakpota nhan María Magdalena. 26Ka apvet’o lhta ngken Jesús ma’a aklhelhma lhema apkeltameskama apkamelaianlha, lhta aptak apkano:

—Lheia, kotne ta atka ham —lhta aptak.

27Netamen alhta aptak na mokhom apkano apkeltameskama m’a:

—Lheiap hata etnekha ngken ham —lhta aptak.

Netamen ma’a, apiantemakho lhta apnemakha m’a.

Apketsepma Jesús

28Apiave lhta Jesús apeneskama lhamakho aktemakha apmakmekama, lhta aptak:

—Knem heiaqhak —lhta aptak ma’a.

Koka ngvai’ak ma’a aktemakha lhnak nanek aklheianma Eniapom Neten apaivoma aktalhesammalhka.

29– 30Ka apkellanengko lhta ieteiepa akmok iamet nav’a akvenaktema m’a, apiaskeso lhta konne nahaikok vino akmaska, apkeltelhnaskeso lhta nhan apatong Jesús apielhnakha neten. Ka apetseso lhta Jesús ma’a, lhta aptak:

—Aspeneske asmakmekama —lhta aptak.

Ka akiaqneno lhta nhan apqatek ma’a, apketsepo.

Akiephongveiakmo napokha Jesús nepketama heva

31Lhema aknem alhta nkaimelhkak kakpota nkovak aknem sabado nennekhelha, aktaqmelaikama lhma Pascua m’a, apkenmeiakhe lhta apnakha Pilato apkelemhama apmaniaie judios apkeleltemo lhna lhta ngkolhek alentaso apelhkapko’ok apkellelto nema aliaqlhaklhema apmeio’ok apmankok kakpota eletsepok kolhvavek ankek ma’a, elel·hatsoskakhak na aphapavok kakpota melvetiep enenlhet neksa aktaqmelaikama lhma m’a. 32Ka apkenmeiakho lhta soldados ma’a, apkelentaskakho apelhkapko’ok apqanet enenlhet nema aleklhanma lhemek neten iamet aktenneskama Jesús, 33koka ma lhta alentaso apelhkapkok Jesús ngkanek apketsepke lhta kolhvavek ma’a. 34Koka lhema soldado lhta apkelieplhak heva akiavai’a napokha Jesús ma’a akteiapvakmo lhta nepketama mo’ok napokha, kolhvave lhta ntepak ema apankok kakpota nhan iemmen akiepetkai’a.

35Apto lhta apvetai’a m’a aktemakha akvetammalhka m’a have niapak ankek na aptemak aplheianma, metka apmopvana ania’a, aplheianmak ma’a kakpota nhan meliaskamek ketlhengkap. 36Koka aktemakha lhta akvetammalhka qaselha m’a ntemengkek aklheianmo lhnak nanek Eniapom Neten apaivoma ngkotnek hata m’a, lhnak nane ntemak:

«Mankolhe ta alentaso apelhkapkok ma’a» ▼

▼Salmos 34:20; Exodo 12:46; Numeros 9:12

lhna ntemak.

37Ka ntemak na Eniapom Neten apaivoma:

«Nkolhek hata allanengka enenlhet akiaqlhammalhka lhta napokha akvakmo apteiapvakmo mo’ok napokha nepketama» ▼

▼Zacarias 12:10

lhna ntemak.

Nema aklhengkeskaiam Jesús aphapak metaimong alhva

38Ka apmeiekho lhna lhta José ko Arimatea apnakha Pilato m’a, apkenmalhnengvekho lhna lhta Jesús aphapak kakpota esakhak ma’a. Apkasekhai’avek na lhta Pilato m’a. Apielhammakpek na lhta José aptemo apkeltameskama Jesús ngkanek apkelemhama apmaniaie’ judio lhna lhta apkellai’ak ma’a. 39Aplhelhma lhna lhta nhan Nicodemo m’a, apsoiakmo lhnak na treinta kilos akmases aimes aimenek anammalhka akvesai’a aloe kakpota nhan mirra. Koka Nicodemo apmaiangko lhna lhta pelhasep apnakha Jesús apkelpaqmetkesammakpo. 40Apkenmaiangke lhna lhta nhan Jesús aphapak ma’a, apkelpelhketmo ietamopai’a napokha apmennave. Ka apkellelhpakhaiangka lhna lhta nhan akmases aimes ma’a, apkeltemakha mota judios ellanhok kenmaskoia m’a. 41Akietemelha lhta apketsepmakha Jesús ma’a nietnengke lhta nhan aniep atkok kanhan alanmakha iamet nentoma akielhna, kakpota nhan lhema nemakha akpekkanveianlha enghapak alhnankok metka nema akmaikama. 42Ka apkellaklhengkeskekho lhna lhta Jesús aphapak ma’a, ngkanek nengaqtek ma’a, ketse lhta nhan nkaimelhkak aknem sabado neniamposammalhkelha apkeltemakha lhta mota judios ma’a.