John 21

Jesús apteiapvai’a napaqtavek 7 apkeltamesaikamok

1Netamen alhta mokhom ma’a, apvetaskesakpo mokhom Jesús apkeltamesaikamok akieto nekha alvata Tiberias, aleltennasama ta nhan ania’a aktemakha lhta akvetammalhka m’a. 2Aploka lhta Pedro, kakpota nhan Tomas nema altema apqanet apalleiam, Natanael ko Cana akieto iokhalhma Galilea kakpota nhan apketkak Zebedeo, apqanet alhta nhan mokhom ma’a apkeltamesaikamok. 3Lhta aptak Simon Pedro:

—Kelasma asmak’ak atenia’ —lhta aptak ma’a.

—Ennengko ta nhan angelieplakha’ —lhta aptangkok ma’a.

Apkelkanetvakhe lhta lhema loma nemmen ma’a, pelhasep alhto ka m’a, ma lhta nhan ennapengkok kelasma m’a. 4Mmopakme lhta lhma’ atsai’a m’a, ka apkenengvo’o lhta Jesús nekha sanga, koka ma lhta eliekpelkak apkeltamesaikamok ma’a. 5Lhta aptak:

—¿Apkennapengke i’e kelasma, he? —lhta aptak ma’a.

—Mamma’ —lhta aptangkok apkellatemmongka.

6Koka lhta aptak Jesús:

—Elieniav no iama tetekko akiennakha nak loma nemmen, hata ennapangkok kelasma m’a —lhta aptak apkellano.

Apkellasekhave lhta apkeltamesaikamok ma’a, nlan’ave lhta kelasma, ma lhta nkollapvanka’ak el·hatsosangkok iama tetekko apankok ma’a. 7Netamen apkeltameskama apkamelaianlha Jesús, lhta aptak apkano Pedro:

—¡Apveske ha’e! —lhta aptak.

Apleng’a lhta Simon Pedro m’a, kolhvavek anke lhta aptalhnakhak aptalhnema, apnelhtakho nhan nemmen. 8Aplhamakha lhtoka apkeltamesaikamok apkakhangkokha konne loma nemmen ma’a, apkelieniosokhe lhta nhan iama tetekko apanko’ok aklanei’o nkek kelasma, apkenmeiakho nekha alvata, malha 100 metro lhta neiava m’a. 9Neksa apkelvekha lhta neiava alvata, apkelvet’o lhta lhema kelasma takhalhet talha kakpota nhan pan. 10Lhta aptak Jesús:

—Hetsantengkes aklhamakha kelasma kolhva lhkek apkennapekamok —lhta aptak.

11Apkanetvakhe lhta Simon Pedro loma nemmen ma’a, apienioskakho lhta iama tetekko apanko’ok apveskaktamo lhta neiava alvata. Nlan’ave lhta kelasma m’a, 153 kelasma aliavai’a lhta m’a, ma lhtoka nkolietepak iama tetekko m’a. 12Netamen ma’a, lhta aptak apkellano Jesús:

—Mokhetke hengke’e, etlheng eltavokha’ —lhta aptak.

Nkelennavengke lhta apkeltamesaikamok elelmalhnama sekla enenlhet ke’, apkeliave lhta niekhe apto Apveske m’a.

13Apme lhta Jesús pan kakpota nhan kelasma, ka apkellangko lhta nhan apkeltamesaikamok ma’a. 14Koka hengka hanetolhem’a lhta ntak aktaiekho apteiapvai’a napaqtavek apkeltamesaikamok Jesús netamen aplhatekhangveiam apieseksek apkenmaskengvaiakmo m’a.

Apkeltemo Jesús Pedro eltaqmelkesek meliaskeiam

15Netamen apkelpeneskama lhta aptaveikokha, lhta aptak Jesús apkenmalhnengka Pedro:

—Simon, Juan apketka ¿Tep anke nlho heiasekhai’o lheiap melhnok apketlhelhma’ak anak, he? —lhta aptak.

—Hai’ apveske, apiavek lheiap askasekhai’o —lhta aptak apkatemmongka Pedro.

Lhta aptak Jesús:

—Eltaqmelkes hata nepkesek apketko’ok ehenko’ok —lhta aptak.

16Apkenmalhnakhave lhta mokhom Jesús:

—Simon Juan apketka ¿Heiasekhai’o nlho lheiap? —lhta aptak.

—Hai’ apveske, apiavek lheiap askasekhai’o —lhta aptak Pedro.

Lhta aptak mokhom Jesús:

—Eltaqmelkes hata helieplekama nak, malha nepkesek ehenko’ok —lhta aptak.

17Hanetolhem’a lhta ntak apkenmalhnekho mokhom ma’a, lhta aptak:

—Simon, Juan apketka, ¿heiasekhai’o nlho lheiap?

Aiose lhta ntak apvalhok Pedro ngkanek hanetolhem’a lhta ntak apkenmalhnekama Jesús, lhta aptak mokhom apkatemmongka:

—Apveske, apiavek lhamakho qaselha lheiap, apiavek na avanhek askasekhai’o lheiap —lhta aptak.

Ka apkatemmongka lhta Jesús ma’a, lhta aptak:

—Eltaqmelkes hata nepkesek ehenko’ok anak. 18Asmak’ak altennaksek lheiap, apmeihe panke lhta aptemakha apketkok, emhangkok apmangkelha la’a, aptalhnekha apanke lhta nhan aptalhnema. Koka have niapak anke’ astakha nak, hata apto ta apvaneiam lheiap, nkomaskok hata apiennaktema, elielhnesekhak hata apoktengok neten kakpota ngkolhek aktalhneskasakho aptalhnema, ngkolhek hata nhan akiantemo mankoleklemelha la apvalhok lheiap —lhta aptak.

19Apenesave lhta apaivoma Jesús akmak’akha ta ngkotnek apketsepma Pedro kakpota elvetaskesek enenlhet’avok aptemakha apieplekama metka apiamasangveiam Eniapom Neten ma’a.

Netamen alhta m’a, lhta aptak mokhom Jesús apkano Pedro:

—Heieplomaha —lhta aptak.

Apkeltameskama apkamelaianlha Jesús

20– 21Apieplakhe lhta Simon Pedro m’a, neptamen alhta nhan apkeltameskama apkamelaianlha lhta Jesús, apnemo lhta nhan lheme apkelanei’o lhta nentoma aktaqmanma Pascua ankok ma’a, apkenmalhneiangka lhta nhan Jesús apto enenlhet apmahai’a eselhnana.

Apvet’a lhta Pedro aplhekmo neptamen apkeltameskama lhta apkamelaianlha Jesús, lhta aptak apkenmalhnengka:

—Apveske ¿Ko la ta ngkotnek apiaihekama enenlhet anak? —lhta aptak.

22Ka apkatemmongka lhta Jesús ma’a, lhta aptak:

—Askelto la niekhe eloka mokhom enenlhet anak akvakmo asvaktamo ta, mankoietok lheiap eihok ma’a, lheiap koka heieplomaha —lhta aptak Jesús.

23Lhta ngkanek nkopaihek ania’a apieseksek apkelieplekama Jesús menietsepek hata m’a apkeltameskama nak. Ma lhtoka nkotnemak niekhe aplheianma Jesús ma’a, lhtoka aptema niekhe apkanemo Jesús hengke’e: “Askelto la niekhe eloka mokhom enenlhet anak akvakmo asvaktamo ta, mankoietok lheiap eihok ma’a”, lhtoka niekhe aptemak Jesús ma’a.

24Ka apkeltameskama nak aptalheskama nhan lhamakho aktemakha ania’a nak, neliavek ennengko’o akto have niapak ankek ma’a. 25Mantek mokhom mo’ok qaselha apkelanai’a Jesús, mansavhek koka niekhe antalhaksek aklhamakma la vakkahak aktemakha apkelanai’a lhta Jesús ma’a.