John 6

Jesús apkellaikamok aptekamok tep cinco mil enenlhet’avok

1Netamen alhta m’a, apmeiakhe lhta Jesús mo’ok nekha alvata akvesai’a Galilea, mo’ok akvesai’a Tiberia. 2Ma lhta ntek enenlhet apkelieplekha m’a ngkanek apkelvetai’ak aklhamakma qaselha mongenatkeskama apkellanai’a m’a. Apkeltakmelkeskaiam na enenlhet anmaska apiempeiok ma’a. 3– 4Nkanketvakme lhta nhan ma’a aknem aktaqmelaikama lhma akvesai’a Pascua, ka apmeiakho lhta Jesús kakpota nhan apkeltamesaikamok metaimong akhaiam, apkakhengvakmo lhta nhan ma’a. 5Ka apkammelho lhta Jesús ma’a, ma lhta ntek enenlhet apketlheiam ma’a, apkenmalhnengka lhta Jesús Felipe, lhta aptak:

—¿Ko la angvetangvomok nenmama la nentoma m’a aptekamok la enenlhet anak ha’e he? —lhta aptak Jesús.

6Apkenmalhnema lhta apankek Jesús Felipe eniatemmoma kelhaha, koka apiave lhta niekhe Jesús apmak’akha etnehek. 7Ka apkatemmongka lhta Felipe, lhta aptak:

—Nkaqhok anmakmama 7 pelten la’a akianmoma patakkom, mankovakhek kakpota angellangkok ketsek la pan enenlhet’avok anak —lhta aptak ma’a.

8Apne lhta nhan po’ok apkeltameskama Jesús ma’a apvesai’a lhta Andres, Simon Pedro apetma, lhta aptak apkano Jesús:

9—Ka lhema apketkok hengke’e, vanlha 5 pan akiepetkai’a cebada, hanet na kelasma, mankovakhe koka nennasko la’a —lhta aptak Andres.

10Koka lhta aptak Jesús apkellano apkeltamesaikamok:

—Eleltennasamok enenlhet’avok anak eniakhangko ta takhalhet pa’at alielsellemo nak —lhta aptak Jesús.

Tep 5 mil alhta apkelennava’ak ma’a. 11Ka apkenmo lhta Jesús pan, apto lhta nhan gracias Eniapom Neten, apkellangko enenlhet’avok ma’a, nnavek alhta nhan kelasma. Aptavengke lhta lhamakho enenlhet’avok ma’a 12akvakmo apkeliaqkanakmo lhta m’a. Netamen alhta aptak apkellano Jesús apkeltamesaikamok:

—Eleliaqhekho ta apkelaimommap anak kakpota monnaqtevakse —lhta aptak Jesús.

13Ngvakme lhta 12 iama posak alaimommalhka apkeliakhekha m’a 5 lhta niekhe pan akiepetkai’a cebada m’a. 14Nkeliemaske lhta apvalho’ok enenlhet’avok apkelvet’o qaselha mongenatkeskama m’a, lhta aptangkok:

—Have na niapak enenlhet anak apto apkeltennasemmap ania’a aplhenammakpo lhnak nanek lhennenga kakpota evak hengke’e —lhta aptangkok ma’a.

15Apiempeiok apankave lhta apteniangkok enenlhet kakpota eltemeskesek apiav’akha apveske’ Jesús ma’a, koka apkanetvakhe lhta netne kanke metaimong akhaiam Jesús ma’a kakpota elhek aplhepkennenga m’a.

Jesús aplhengama takhalhet iemmen

16– 17Apkelienaktesema lhta lhma m’a, ma lhta ev’aktak Jesús mokhom ma’a. Ka apkelkanetvakho lhta loma nemmen mok apankavek apkeltamesaikamok kakpota el·halhtepelhketek alvata, enmeiakhak na temma Capernaum. 18Kolhvave lhta nkelhkakmok alhkaiam akiennaktema m’a, aliokho lhta nha ntak alakhaiam iemmen ma’a. 19Apkelvakme lhta malha 5 nlho ka la 6 kilometros apketlhengama loma nemmen, ka akpelapkeso lhta apkelvetai’a Jesús aplheiam takhalhet iemmen, apkellak’a lhta nhan ma’a. 20Koka lhta aptak Jesús:

—¡Manghellaga, ko’o hengke’e! —lhta aptak.

21Nkeltaqmelakhe lhta apvalho’ok apkeltamesaikamok ma’a, ka apkelkanetkaso lhta loma nemmen, apkelvakmo nhan kolhvavek ankek ma’a apkenmak’akha lhta elvomok ma’a.

Enenlhet apkelketansema Jesús

22Lhema aknem alhta ntak akiekai’a m’a, koka enenlhet’avok alhta apkakhaikokha tep alvata neptamna’ak ma’a, nketlheianmek nak apvalho’ok ma’a apketlhengamo mok apankavek apkeltamesaikamok Jesús loma nemmen ma’a, meltema apketlhelhma’ak Jesús. 23Ka apkelvetai’o lhna lhta nhan atlheiakmo aklhamakha loma nemmen alleniemai’o m’a na temma Tiberias, nengaqte lhta aptemakha lhta gracias Eniapom Neten Jesús ma’a, apkellaiangkelha lhta nhan aptekamok enenlhet’avok apentalhnema m’a. 24Koka mang na lhta elvetai’ak Jesús kakpota nhan apkeltamesaikamok neten loma nemmen ma’a. Ka apkelkanantemo lhna lhta loma nemmen ma’a, nlhaniek na lhta loma nemmen ma’a, apkel·halhtepelhketmo lhna lhta nhan alvata akmaiangko na temma Capernaum aniem’o apkelketansema Jesús ma’a.

Jesús apto malha nentoma hengaikamok neniennaktema

25Ka apkelvakmo lhta enenlhet’avok mo’ok nekha alvata, apkelvetakho lhta Jesús ma’a, apkelelmalhnengka lhta, lhta aptangkok:

—Hengetlhekmoskama, ¿se lha akto aknem apvai’a lheiap hengkaie, he? —lhta aptangkok ma’a.

26Koka lhta aptak Jesús apkellatemmongka m’a:

—Helketangke mota ketlhengkap ngkanek askellangke lhta aptekamok akvakmo apkeliaqkanakmo lhta, koka meliamok mokhom aktemakha aklheianma m’a qaselha mongenatkeskama askelanai’a nak ko’o. 27Moltama nkek apkelvalho’ok apteniaikamok aptekamok, nkosavhalhka mota m’a. Koka ntase eliavenkaso apkelketansema mo’ok aktemakha nentoma akto mankosavhommalhka, allaikamok na apkeliennaktema mankotnengveianlha nnelha apkellangiemhaikama. Koka Enenlhet Apketka nak apvankek ellangkok ma’a qaselha nak, ngkanek nietnek apmopvana m’a aniem’o Eniapom Neten —lhta aptak Jesús apkellano m’a.

28Koka lhta aptangkok enenlhet apkelelmalhnengka m’a:

—¿Ko la apkeltakha antangkok Eniapom neten ennengko’o m’a, he? —lhta aptangkok.

29Ka apkellatemmongka lhta Jesús ma’a, lhta aptak:

—Eniapom Neten apkeltavek meliaskamek apto apkapaskama —lhta aptak.

30Lhta aptangkok mokhom enenlhet apkellano Jesús:

—Elana no qaselha mongenatkeskama kakpota mangeliaskamek ennengko’o lheiap. 31Ka aptemo lhnak nanek nengelieihengka Moises annenga akieto iokhalhma metkelha temma, apkellaiangko lhnak nanek nengelieihengka aptekamok nentoma mana, ka ntemak aktalhesammalhka m’a Vakkahak Eniapom Neten apaivoma hengke’e: «Apkellangkek pan apkelleniemai’o neten kakpota etavangkok ma’a».

32Ka apkatemmongka lhta mokhom Jesús ma’a, lhta aptak:

—Have niapak ankek ma’a, have apto Moises apkellaikamo lhnak nanek pan apkelleniem’o m’a neten, koka kolhvave nak ko Tata apkellangkek apto haveniapak ankek pan apkeniem’o neten. 33Hai’, koka apto pan ma’a apkellaikamok Eniapom Neten apvaiventamo nhan neten, eltemeskesek na aliennaktema apkellangiemhaikama enenlhet’avok lhmankek ham —lhta aptak Jesús.

34Koka lhta aptangkok mokhom enenlhet’avok:

—Apveske, hengellamok hata mota pan aplheno lhkek —lhta aptangkok.

35Koka lhta aptak Jesús apkellano mokhom:

—Ko’o asto nak pan askellaikamok aliennaktema apnenio’ok enenlhet’avok. Apto la heieplekama, mangheiaskeiam nahan, mankaqhekhek ankek hata mek kakpota meimakiek hata nhan. 36Helvet’a niekhe ketlhengkap askelanai’a lhamakho qaselha napaqtave, mokhom koka heliaskeiam. 37Lhamakho apkellelto lhta Eniapom hellaikamok apkeltemo altakmelkesek, helioktanie lhta ko’o, moltaqhesehek hata nhan ma’a. 38Asvaivantanie lhta ko’o koneng anak have asmak’akha atnehek ehenkok ehenke, vanlha asma aliehekho Eniapom apto lhta heiapaskama. 39Apkeltemo altakmelkesek enenlhet’avok anak hellaikamo lhta, netamen akvakmo ta nnelha lhmankek ham, anaklhatekhaskamok hata apieseksek apkenmaskengvaiakmo. 40Apkeltavek apto lhta heiapaskama ellanhok aptemakha Apketka nak, meliaskamek nahan kakpota m’a etlhevangkok aliennaktema apnenio’ok nkotnengvaianlha nnelha’, anaklhatekhaskamok hata nhan ma’a akvakmo ta nnelha aknem alhma nkek ham —lhta aptak Jesús.

41Koka m’a moklhem’a apkelemhama apmaniaie judios apkelpaqmetkesakpave lhta mok apankavek ma’a apkeliemetkasengka aptakha Jesús ma’a, ngkanek aplhenakpe lhta apanke aptema pan apkeniem’o neten. 42Lhta aptangkok ma’a:

—¡Apmopvana ania’a apkeniem’o neten, neliavek ennengko’o Jesús ha’e, José apketka ham, neliavek na ngken! —lhta aptangkok.

43Ka apkellatemmongka lhta Jesús ma’a, lhta aptak:

—¡Elvatesamok apkelmaleniosemmap mok apankavek! 44Mankotlhenap apvalho’ok ketlhengkap sek la ko’o enenlhet ke’, vanlha Eniapom apto heiapaskama apvanke eliangveskeskamhok hata, netamen anaklhatekhaskamok hata akvakmo ta nnelha alhma nkek ham. 45Nietnek apnaqtalheskama vakkahak apkeleltennasemmap ania’a annenga, ka ntak hengke’e:

«Eniapom Neten hata etlhekmoksek lhamakho enenlhet’avok ▼

▼Isaias 54:13; Jeremias 31:33-34

», ka ntemak ma’a.

Ka ngkanek enenlhet’avok la apkellailhemo, apkellasekhai’o la nhan Eniapom anak, hata etnangkok helieplekama ko’o m’a.

46Mamma enenlhet apvetai’o m’a Eniapom anak, vanlha koka apto apkeniem’o m’a Eniapom Neten apvetai’o m’a. 47Have niapak anke, apto la mei’askeiam, ngkoitek hata akiennaktema apneniek mankotnengveianlha nnelha. 48Ko’o asto nak pan apkeltemeskeskama apkeliennaktema enenlhet’avok. 49Apkelieihengka ketlhengkap aptoiangkek nak nanek nentoma mana akieto m’a iokhalhma metkelha temma, koka nkaqhok apkeletsepmek ma’a. 50Koka aptavengko la asiokhoho malha pan apkeniem’o neten, meletsepek hata. 51Ko’o asto nak pan apkeliennakteskama apnenio’ok apkeniem’o neten. Aptavengko la moklhem’a, nkolhnangkok hata aliennaktema apnenio’ok mangkotnengvaiam annelha. Asiokha nak askellaikamok malha pan kakpota nkolhnangkok aliennaktema apnenio’ok aplhamakho enenlhet’avok lhmankek ham —lhta aptak Jesús.

52Apkelempave lhta mokhom apkelpaqmetkesakpo mok apankavek judios ma’a, lhta aptangkok:

—Niehe ngkotnek hengellangkok aphapetek anak kakpota antavangkok —lhta aptangkok ma’a.

53Koka lhta aptak mokhom Jesús:

—Have niapak ankek ma’a, mang hata nkek etavengkok ketlhengkap aphapetek Enenlhet Apketka nak, meinanko la nhan ema apankok ma’a, mangkoitek hata aliennaktema apnenio’ok. 54Koka aptavengko la ehepetek anak, apienangko la nhan ema ehenkok ma’a, nkoite ta aliennaktema apnenio’ok, netamen akvo’o la nnelha aknem lhmankek ham, ko’o ta anaklhatekhaskamok na m’a. 55Ko’o ehepetek anak akto have niapak ankek nentoma, ko’o ema ehenkok anak nahan, akto nhan have niapak ankek neniama. 56Aptavengko la enenlhet ehepetek anak, apienangko la nhan ema ehenkok anak, nelpasmommalhko nentangkok ma’a. 57Eniapom apto alhta heiapaskama nietnek apiennaktema, heiangkek na ko’o apiennaktema m’a, enenlhet aptavo la ehepetek anak, ngkoitek hata nhan apiennaktema. 58Ka pan anak apkeniem’o neten, have aptonak ma’a nentoma mana aptoiangko lhnak nanek apkelieihengka ketlhengkap, nkaqhok koka apkeletsepmek lhnak nanek ma’a. Koka aptavengko la pan alheno lhkek, ngkoitek hata aliennaktema apnenio’ok mankotnengveianlha nnelha —lhta aptak Jesús.

59Koka lhamakho apketlhekmoskama nak Jesús, lhta nietok ma’a konne apkaqnekhelha judios na temma Capernaum.

Apaivoma hengaikamok akiennaktema enneniek

60Ka apkelleng’o lhta apkellelto apkeltamesaikamok Jesús ma’a, lhta aptangkok:

—Nientelhek ankek ammok takha hengetlhekmoskama nak, mankapvankek enenlhet eliehekhoho —lhta aptangkok.

61Koka apiave lhta Jesús apkelmaleniongka apkeltamesaikamok, lhta aptak:

—¿Nkellavkaske nlho ketlhengkap astakha lhkek alheianma, he? 62¿Ko la ta etnangkok ketlhengkap apkelvet’o ta Enenlhet Apketka nak apmeiakho ta mokhom neten, he? 63Espíritu akto apkellaikamok aliennaktema apnenio’ok ketlhengkap, koka enhapetek anak mankolienna’ak ma’a. Ka aspaioma lhkek akto Espíritu kanhan nenganiemhaikama, 64koka moklhem’a ketlhengkap apkeliaskakmek mokhom —lhta aptak Jesús ma’a.

Apiave lhta Jesús apkellelto apkeliaskeiam ma’a, apiave lhta nhan enenlhet etnek hata apselhnanongkoma, ka nkeniemai’ak aplheianmo m’a qaselha nak.

65Netamen alhta aptak mokhom Jesús:

—Mankapvankek enenlhet heieploma melto la Eniapom anak —lhta aptak.

66Kolhvavek anke lhta apkelvatesangkok napokha apkeltamesaikamok Jesús ma’a, 67ka apkelelmalhnengka lhta Jesús 12 apkeltamesaikamok, lhta aptak apkellano:

—¿Ketlhengkap anlho nhan apkenmak’ak elvatesangkok helieplekama, he? —lhta aptak.

68Ka apkatemmongka lhta Simon Pedro m’a, lhta aptak:

—Apveske, mamma apno enenlhet lheiap, vanlha lheiap apaivoma nak avankek hengankok akiennaktema ennenio’ok nkotnengvaianlha nnelha. 69Mangeliaskeiakmok na ennengko’o lheiap, neliavek na apto apokkanma Eniapom Neten lheiap —lhta aptak Pedro.

70Koka lhta aptak Jesús:

—Ko’o lhta askeliekieskama 12 nak ketlhengkap, koka apnek lhema apieseksek malha aveske keliaqhameio —lhta aptak Jesús ma’a.

71Koka apieseksek alhta 12 apkeltamesaikamok, lhta aplhena niekhe lhema aphapak ma’a. Judas Iscariote lhta apvesai’a m’a, Simon apketka aptemo apselhnanongkoma m’a aptakho niekhe aptaiangkolha aplhelhma nengaqtek ma’a.