Joh 10 | TmfSC | STEP | Lhta aptak mokhom Jesús: —Apkeliavek ketlhengkap apto la apmahai’a emenielhek nepkesek elietokhak nepkesek aplhankok anak.

John 10

Apietkeskama apkelanekama nepkesek

1 Lhta aptak mokhom Jesús:

—Apkeliavek ketlhengkap apto la apmahai’a emenielhek nepkesek elietokhak nepkesek aplhankok anak. 2 – 3 Koka apto la apkelanekama nepkesek apkelailhe mota apkelanekama atong emaiaksek ma’a. Netamen ma’a ellavama moklhem’a nepkesek apnaqtoskama kakpota elentepok aplhankok ma’a, apkeliekpelkek na nepkesek aktakha apaivoma m’a apkelanekama. 4 Kakpota elailhek ma’a akvakmo apsavhekpo apkelenteiapma nepkesek apnaqtoskama, apkenmakhek na apmanie m’a, apkelieplakhek na nepkesek ngkanek apkeliekpelkavek apaivoma m’a. 5 Koka nkotno la apkelanekama, melieplakhek na nepkesek ma’a, enieniangko mota ngkanek meliekpelkak apaivoma m’a —lhta aptak Jesús ma’a.

6 Koka enenlhet’avok ma’a ma lhta eliohok aptakha apietkeskama Jesús ma’a.

Jesús apto apkelanekama nepkesek apiamolhma

7 Lhta aptak mokhom Jesús:

—Have niapak ankek ko’o asto atong apkelentalhnengvektanlha mota nepkesek. 8 Koka apkelvai’a lhta emanie ko’o, apkenmenielhma m’a, meliamolhma nhan ma’a ka ngkanek melieplakhek nepkesek ma’a. 9 Ko’o asto malha atong aptalhnengvo la enenlhet, evongkasakpok hata tep. Elhok hata aptonak nepkesek aptalhnengvekha nak aplhankok, etepekhak na kakpota etengvomo mota altaqmelakha la pa’at. 10 Apkeliavek ketlhengkap apmenielhma nak vanlha mota apmahai’a emenielhek, kakpota nhan hengaqhek, hentevaksek nahan. Koka ko’o asva’ak kakpota allangkok aplhamakho aliennaktema apnenio’ok, lhamakho qaselha alaimommalhkelha la’a. 11 Ko’o asto nhan apvetep asiamolhma’ apanke’, ntasek ko’o angvetsepok neksa askellanekama. 12 – 13 Koka apkellanekama nepkesek la meihamolhma, mellanhe’, ka akvo’o la vavo akmahai’a nkotvok, enieniek enenlhet anak ma’a, enielhpaknek na nepkesek lhek neptamen. Mellanama nepkesek ngkanek have apnaqtoskama m’a, vanlha apteniai’a akianmoma apmakmekama patakkom.

14 – 15 Ko’o asto apvetep asiamolhma apanke’, heiekpelkavek ko’o Eniapom, ko’o nhan asiekpelkavek ma’a, askeliekpelkavek na nepkesek asnaqtoskama la’a, heliekpelkavek na m’a, ntasek na angvetsepok neksa askellanekama m’a. 16 Apiangkek na aplhamakha nepkesek apkelloka mo’ok nekha, alaqlosengvakhak hata nhan ma’a, heleliehekhok hata nhan ma’a, netamen angvankesekhak hata aplhamakho atnekhak lhema apienaktemakha, lhema aphapak na apto apkellanekama m’a.

17 Heiamelaiam Eniapom ngkanek aieniok hata asiennaktema kakpota netamen amekhok mokhom ma’a. 18 Astema ehenkek askaikamok asiennaktema, mamma enenlhet helekkesek ma’a, nietnek asientalhnemo kakpota allangkok, amekhok mokhom takha m’a, ngkanek Tata aptema m’a —lhta aptak Jesús ma’a.

19 Apkelleng’a lhta apkelemhama apmaniaie’ judios ma’a, kolhvave lhta apkeliamenakpok mok apankavek, lhta aptangkok:

20 —Mellailho nkek mokhom ketlhengkap ham enenlhet anak, malha anema, kasekapo av’alhok na akmaikama —lhta aptangkok ma’a.

21 Koka napokha enenlhet’avok alhta m’a, lhta aptangkok:

—Ma’, mamma akmaikama kasekapok av’alhok ham, ntase eltennamaha, aptaqmelkasekhek metka apaqto’ok alhta. Mankapvankek enenlhet akmaikama la’a kasekapok av’alhok etaqmelkasekhak ma’a —lhta aptangkok.

Apkelemhama pmaniaie judios apkeltaknongvekha Jesús

22 Pieiam apvalhok alhta ntak ma’a, ka apmeiakho lhta Jesús natemma Jerusalen kakpota epasengvakha aktaqmelaikama lhma atlheianvekho lhta mota apvalho’ok apkelpeneskamakha apkellalhnasekha av’alhok Eniapom Neten apnemakha m’a, Dedicacion akvesai’a m’a. 23 Apiaihema lhta Jesús Eniapom Neten apnemakha, akieto malamong avhak pa’at akvesai’a Salomón. 24 Ka apkelvakhengvo’o lhta apkelemhama apmaniaie judios ma’a, lhta aptangkok apkellano:

—¿Se lha aknem angeliangvomhok se lha enenlhet lheiap ke, he? Apto la lheiap Cristo, hengeleltennes kolhvave nak, meilhakpo koka —lhta aptangkok.

25 – 26 Ka apkatemmongka lhta Jesús ma’a, lhta aptak:

—Askeleltennaske lhta niekhe ko’o m’a. Ka askelanai’a lhta lhamakho qaselha hempelapkeskama napaqtavek ketlhengkap aniem’o apmopvana Tata, apkelvetai’a niekhe iokhalhmek ankek ketlhengkap kakpota eliohok niekhe askeniem’akha m’a. Ketlhengkap heliaskakmek koka ngkanek na have nepkesek ehenko’ok. 27 Nepkesek ehenko’ok la’a apkeliekpelkavek aspaioma, helieplakhek nahan, askeliekpelkavek na ko lha m’a. 28 Askellangkek na apkeliennaktema mankotnengvaianlha nnelha, meletsepek hata, mangkolhek na heleiveskesko’o m’a, 29 ngkanek Tata hellaikamok ma’a asnaqtoskama nak. Neten na apmopvana m’a Eniapom melhok po’ok la enenlhet, mamma enenlhet eleiveskeskamok apnaqtoskama m’a. 30 Ko’o kanhan Eniapom anak enlhema ennengko’o m’a —lhta aptak Jesús.

31 Apkellavke lhta apkelemhama apmaniaie judios apkelleng’o m’a, nketlhengkaske lhta elienhek metaimong Jesús ma’a. 32 Koka lhta aptak Jesús apkellano:

—Apkelvetai’ak ketlhengkap askellanai’a qaselha aktaqmanma aniem’o apmopvana Tata, ¿se lha ntak apkenmak’o nak hellaqhek, he? —lhta aptak.

33 Ka apkellatemmongka lhta enenlhet’avok ma’a, lhta aptangkok:

—Mongellelto ennengko’o angennapok aniem’o altaqmelo la qaselha sekhe lhta apkelanai’a, nengeltavek angellaqhek lheiap ngkanek aplhenakpe mota apankek apnemo Eniapom Neten, enenlhet apankek lheiap, aptevaskek na apvesai’a Eniapom Neten —lhta aptangkok.

34 Koka lhta aptak Jesús apkellano:

—Koka nietnek aktalhesammalhka ley apanko’ok aplheianmo lhnak nanek Eniapom Neten moklhem’a apkelemhama apmaniaie annenga, lhnak nane ntemak:

«Ketlhengkap dioses» ^{▼▼Salmos 82:6} ka ntemak ma’a.

35 Apkeliave niekhe ketlhengkap akto have niapak aktemakha aktalhesammalhka Vakkahak Eniapom Neten Apaivoma, apketlheianmo lhnak nanek Eniapom Neten apkellelto dioses apkellelto lhnak nanek apketlhevaikamok apaivoma m’a.

36 ¿Se lha ntak hetlheno nak astevaskama apvesai’a Eniapom Neten aniem’o lhkek askeltammalhko nhan apketka apankek ma’a, he? Have niapak anke Eniapom apto hepokkanma, heiapaskama nhan ma’a. 37 – 38 Ellailho no, koka ntase niekhe heliaskamok ma’a molan’o la lhamakho qaselha askelanai’a ko’o. Koka nlhamakmek qaselha altakmanma askelanai’a aniem’o Tata, alhnakho nkek na nengelvetaskeskama Eniapom kakpota nhan ko’o enlhema ennengko’o m’a —lhta aptak.

39 Apkellempave lhta mokhom apkenmahai’a ellaqlhengkesek Jesús nengaqlhengkasemmalhkelha m’a, koka apkenie lhta Jesús apieseksek enenlhet ma’a. 40 Netamen na m’a apmeiakho lhta tep alvata Jordán, apkellavkeskamakha lhta Juan konne iemmen enenlhet’avok lhennenga m’a, apnakhe lhta m’a. 41 Ma lhta ntek enenlhet apkelioiam apmahai’a elvetak Jesús ma’a, alhta aptangkok apkelpaqmetkesakpo mok apankavek ma’a:

—Ma lhta ellanai’ak Juan qaselha mongenatkeskama, koka aplheianme lhta mota apvesai’a Jesús ma’a have nha niapa ntemak ma’ —lhta aptangkok enenlhet.

42 Ma lhta ntek enenlhet meliaskeiam Jesús ma’a.