John 14

Jesús apto malha amai akmaikamok apnakha Eniapom

1Lhta aptak Jesús apkellano apkeltamesaikamok:

—Moltama nkek apvalho’ok, meliaskem na Eniapom Neten kakpota nhan ko’o. 2– 3Avanhe lhma apnakha Tata, aniakhak hata ko’o m’a alpeneskasok hata apkakhaiangkelha ketlhengkap ma’a, have niapak ankek ma’a. Netamen avatamok hato ka mokhom kakpota alaqlosengvatak ketlhengkap ham, hata angaqhengvakhak ma’a. 4Apkeliavek ketlhengkap amai asmak’akha nak aniakha’ —lhta aptak Jesús

5Koka lhta aptak Tomas:

—Apveske, mangeliohok apmak’akha emhangkok, mangeliohok na amai —lhta aptak.

6Ka apkatemmongka lhta Jesús ma’a, lhta aptak apkano:

—Ko’o asto nak vanlha malha lhema amai akmaiangko akieto apnakha Eniapom, ko’o asto nhan have niapak anke niapom, askellaikamok na aliennaktema apnenio’ok enenlhet’avok lhma nkek ham. 7Koka heliekpelko la apankavek ketlhengkap, eliekpelkok hata nhan ko’o Tata. Apkeliekpelkek koka kolhvave nak ngkanek apkelvet’a ie —lhta aptak Jesús.

8Lhta aptak Felipe:

—Apveske, hengelvetaskes no Eniapom, hato ka vanlha ngkotnek ma’a —lhta aptak.

9Koka lhta aptak mokhom Jesús apkatemmongka:

—Felipe, lhennenga ntak asnema apieseksek anak ketlhengkap, ¿mokhom anlho menheiekpelkema lheiap, he? Enenlhet apto la hetai’a ko’o, apvet’ak na Eniapom. ¿Se lha akto apkelto lhkek alvetaskesek Eniapom, he? 10¿Apiaskakmek nlho lheiap Eniapom kakpota nhan ko’o nengelelto enlhema? Lhamakho aktakha nak alheianma aniem’o m’a Eniapom, have ehenkok ehenkek alheianma nak, Eniapom ko’o alhelhma, hemama ko’o m’a kakpota allanak lhamakho qaselha.

11Meliaskem koka ko’o ka nhan Eniapom nengelelto enlhema, koka apkeliaskakmo la aspaioma nak, meliaskamek koka nhan aniem’o lhamakho qaselha askelanai’a nak. 12Aniakhak hata ko’o akieto apnakha Eniapom, ka ngkanek apkellelto la mangheliaskeiam etnangkok hata aktemakha nak askelanai’a ko’o. Tep anke hata ngkotnek apkellanai’a qaselha m’a, have niapak ankek hata ngkotnek ma’a. 13– 14Elelmalhnama ta akieplomo asvesai’a nak apkeleltakha la qaselha, allangkok hata ko’o, netamen enenlhet’avok anak eliavenkaskesama ta nhan apvesai’a Eniapom aniem’o aptakha apkelanai’a Apketka.

Aplheianma Jesús eniapaksek hata Espíritu Santo

15—Lhta hellasekho la niekhe ketlhengkap, eleliehekho lhta nhan henganemakha ehenkok anak. 16– 17Ko’o ta anmalhnama Eniapom eniapaksek po’ok Hengiatekho niapom, Espíritu m’a kakpota elloka lhemo ie, apto have niapak anke niapom. Koka apkellelto la apkeliaskeiam metlhokiek hata ngkanek melvet’ak ma’a, meliekpelkak nahan. Ketlhengkap koka apkeliekpelkek ma’a, apnek na lhemek ketlhengkap ma’a, elhek hata nhan metka nnelha. 18Molienievhek hata ketlhengkap have malha akto nak apkelieihekama nak, avatamok hato ka mokhom kakpota alhohok lheme ketlhengkap. 19Ketsek nkaimelhkak manghelvetekhek hata enenlhet’avok nalhepop anak, ketlhengkap hato ka helvetekhak hata, elloka ta mokhom ma’a tep ngkanek ko’o aloka ta nhan ma’a. 20Netamen akvakmo ta aknem asvaktamo mokhom hengke’e, eliangvakhok hata ketlhengkap ko’o kakpota nhan Tata nelelto enlhema, ko’o kakpota nhan ketlhengkap nelpasmommalhko m’a. 21Enenlhet apto apmama takha henganemakha ehenkok anak, apkeliehekho nhan, koka hengka apto have niapak ankek heiasekhai’o. Ko’o kakpota nhan Tata angellamelemmok hata enenlhet anak, aiekpelkaskesalhkok hata nhan ehenkek ko’o m’a —lhta aptak apkellano Jesús apkeltamesaikamok.

22Koka lhta aptak Judas, have Judas Iscariote:

—Apveske, ¿se lha ntak apkelto nak hengelvetaskesek lheiap vanlha ennengko’o, have nak lhamakho enenlhet, he? —lhta aptak.

23Ka apkatemmongka lhta mokhom Jesús:

—Enenlhet apto la heiasekhai’o, apkeliahakhek na aspaioma, ko’o Tata apkamelakmek na enenlhet anak ma’a. Tata ka nhan ko’o angelloka ta lhemek ma’a. 24Koka enenlhet apto la mangheiasekhai’o, meliahakhok na aspaioma. Have aspaioma ehenkek ko’o, Eniapom koka apto lhta heiapaskama apaivoma m’a. 25Asketlhekmoske mota neksa asnema mokhom apieseksek anak ketlhengkap, 26koka eniapaksek hata Eniapom apto Hengiatekho niapom apvesai’a Espíritu Santo. Heiaqmongkesek hata asnemakha, etlhekmosangkok hata lhamakho qaselha, etlhenkeskeskakhok hata nhan apvalho’ok lhamakho aktemakha asketlhekmoseiangko lhta.

27Askellangkek altaqmelaikama apvalho’ok ketlhengkap, mankapvankek enenlhet elanak ma’a, vanlha koka ko’o evanke’. Moltama nkek apvalho’ok ketlhengkap, mellaga nkek nahan akmak’o ta nkova. 28Apkelleng’a lhta alheianma ko’o asmahai’a alhong, koka avatamok hata mokhom hengke’e. Nkellaioseskaske lhta apvalho’ok ketlhengkap astakha lhta sekhek askellano, koka hellasekho la’a, nkolpaihekha nlho lhta apvalho’ok alheno lhta aniakhak apnakha Eniapom aknema nak apmopvana, molhnok ko’o. 29Askelientemongkasavek ko’o alheianma amanie akvai’a akmak’akha ta ngkotnek kakpota meliaskamek akvo’o ta m’a. 30Ketse nkaimelhkak aknem akmaskemakha askelpaqmetkeskama ketlhengkap, ngkanek nkanketva’ak aveske lhma nkek ham, koka mamma akmovana hetneskasentak koneng ma’a. 31Evankek ko’o alanak apkeltakha la alanak Eniapom kakpota elvetak enenlhet’avok halhma nkek ham asto askasekhai’o Eniapom.

¡Elaqnekha neten, nok! —lhta aptak Jesús.