Luke 1

Nema altennasekama ania’a Teofilo

1Askeltavek altennaksek ania’a lheiap aktemakha lhta hengellanei’o Eniapom Neten nenieseksa ennengko’o. Mantek na enenlhet apnaktalhesaikamok aktemakha ania’a nak ma’a, 2apkellengai’a lhta aniem’o apatno’ok apkellelto lhta apkelvetaiangko ampai’akhasekha lhta akvetammalhka m’a qaselha nak. Netamen nemo lhta nhan allapaskamo m’a elpaiaksek ania’a nak halhmankek ham. 3Teofilo, ko’o lhta nhan astaqmelkasavek asteniaikama ania’a nak ampai’osekha akvetammalhka m’a qaselha nak. Askeltavek kolhva atalhaksek angvempak hata alhenkesek akvakmo aktakha nnelha akvetammalhka lhnak ma’a kakpota elietsetek lheiap, 4eihangvomhok nahan akto have niapak anke lhamakho nemo nak na aklhekmoskamo lheiap.

Aklhenammalhka etiemok hata Juan

5Koka m’a lhennenga aptemo lhnak Herodes apiav’akha apveske iokhalhma Judea, apnengkek nak na m’a lhema sacerdote apvesai’a Zacarias, aptava lhnoka akvesai’a Isabel, Aarón aptaven neptamen nak ma’a. Zacarias apto lhnak apmakmekama lhemek apkelpasmekha apveske sacerdote Abías. 6Alpeivomo lhnak napaqtek Eniapom Neten, alleliehekho lhnak na lhamakho apkellanemakha nkotnangkok kanhan henganemakha Apveske. 7Mamma lhnak atka Isabel, akiennaktema naie’ lhnoka m’a, alvaneiam ankek na ntaiangkok ma’a.

8Lhema knem na ntemak akietekho apkenmakmekamo lhemek apkelpasmekama Zacarias ma’a kakpota enmakmama Eniapom Neten apnemakha. 9Ka apnaqtevaseiangko lhnak lhema nennaqtevaskama aptaiangkelha apankavek na mota m’a, apnaksepmek nak Zacarias kakpota eklhek Eniapom Neten apnemakha, apvanlhemo lhnak panaktema ava’ akmases aimes akvesai’a incienso m’a. 10Neksa apvanlhemo lhnak ma’a, lhamakho enenlhet nak na apkelanmak avhak pa’at ma’a apkelelmalhnongkomo. 11Mpelapkeskankek nak apteiapvei’o lhema ángel apkapaskama Apveske akieto konne akiennakha alvanlhemmalhkelha panaktema ava’ akmases aimes akvesai’a incienso. 12Apkenmenai’ak nak Zacarias apvetai’o m’a, avanhek nak na apkai’a m’a. 13Koka ángel lhna aptemak apkanemo m’a:

—¡Meniaga Zacarias! Aplengai’a mota Eniapom Neten apkenmalhnonkoma lheiap. Nkotak hata atka Isabel aptava nak lheiap, etneskes hata apvesai’a Juan. 14Epaieskasekhak hata apvalhok lheiap kakpota nhan aplhamakho enenlhet’avok nematka ta m’a. 15Neten ankek hata ngkotnek apiaspommap napaqtek Eniapom Neten, meinek hata vino m’a kakpota nhan iavhan anmen. Elanok hato ka apvalhok Espíritu Santo neksa apietnema konne av’alhok angken ma’a. 16Eltok hata nhan enenlhet’avok ko israel elpengkamok apvalho’ok akieto apnakha Eniapom Neten Apveske apanko’ok ma’a. 17Ka nematka nak evak hata apmanie m’a Apveske ta, nkolhok hata nhan ma’a apvalhok aktemo lhnak na nek apvalhok Elias kakpota nhan aknema apmopvana. Ellasekhaskesekhok hata apiapma’ak apketkak, etlhekmosangkok hata apkellelto meleliehekho nak kakpota eleliehekhok ma’a. Elpeneskasok hata nhan enenlhet’avok kakpota enmankok takha m’a Apveske ta —lhna aptemak apkanemo ángel Zacarias.

18Ka apkatemmoiangka lhnak Zacarias ángel, lhna aptemak:

—Motneskasak ko’o iokhalhmek akmak’akha nak nkotnehek, asvaneiam astahak, etava nhan. Nkaimelhke nak heteskesek lhema qaselha mongenatkeskama la’a kakpota atneskesek iokhalhmek ma’a —lhna aptemak.

19Ka apkatemmoiangka lhnak mokhom ángel ma’a, lhna aptemak:

—¡Se lha kto hei’askakmo nak lheiap ke! Gabriel ko’o Eniapom Neten hennenkasekama, apto nhan heiapaskama kakpota altennaskatak ania’a aktaqmanma nak. 20Koka kolhvave nak lheiap etnek hata metka apaivoma akvakmo akvetalhko qaselha nak askeltennaskama, ngkanek hei’askakmek lheiap —lhna aptemak ma’a.

21Apkellailhengkek nak avhak pa’at enenlhet’avok Zacarias kakpota etiapvetak iokhalhma m’a. Apkelpaqmetkesammakpek nak mok apankavek ma’a apketlheianmo lhnak metiapma kolhvavek konne Eniapom Neten apnemakha. 22Lhennenga lhna ntemak apiephongvektamo Zacarias ma’a, mamma lhna ntemak apaivoma, mok apophek nak aptemak ma’a. Ka atlheianmo lhnak apvalho’ok enenlhet’avok apvetai’a lhema qaselha m’a konne Eniapom Neten apnemakha. 23Ka akvaiakmo lhna nnelha apmakmekama Zacarias ma’a, aptaqhekho lhnak apnemakha.

24Ngvenaktenkek nak aknem ma’a, aktemo lhna nlosek aptava Zacarias. Ngvaiakmek nak 5 pelten aknema konne aknemakha metka akteiapma m’a, nlhenaikama lhnoka av’alhok ma’a, lhna ntemak:

25—Apveske hetaqmelkeskeskakmok askaniemhaikama kakpota mangheltaknevkek mokhom enenlhet’avok —lhna ntemak Isabel.

Aklhenammalhka etiemok hata Jesús

26Ngvaiakmek nak 6 pelten ma’a, apkapaskamo lhnak Eniapom Neten ángel Gabriel natemma Nazaret akieto Galilea. 27Apsakheskamo lhnak ania’a lhema ngkelvana atkok metka ngkolhek akmangvakmo akvesai’a María, akpokkanma lhnak lhema enenlhet apvesai’a José kakpota ngkotnek atava m’a, apveske David aptaven neptamen nak ma’a José. 28Aptalhnengvaiakmek nak ángel aknakha María, lhna aptemak apkanemo:

—¡Lheia nak María, apnengkek lhemek lheia’ Apveske, apkeltavek na engkesek ngkeskama aktaqmanma aniemhaikama lheia’! —lhna aptemak ma’a.

29Niemaskangkek nak av’alhok aklengai’o apaivoma apaiveskama ángel María, mannoka nkoihamok ma’a aptemakha apkanemo m’a. 30Lhna aptemak mokhom apkanemo ángel:

—Mongvaga’ María, Eniapom Neten apkeltavek engkesek ngkeskama aktaqmanma aniemhaikama. 31Nlosek hata ngkotnek lheia’, nkotak hata atka, kotneskes hata nhan apvesai’a Jesús ma’a. 32Nkovak hata aknem aptema neten apankek apiaspommap ma’a nematka nak, eleltangkok hata enenlhet’avok Apketka apto Apveske netne kanke nak. Apveske Eniapom Neten hata nhan eniangkok aptanema apveske aptanmo lhnak nanek na apiata nnenga David. 33Etnek hata nhan apveske apanko’ok ko Israel mankotnengveianlha nnelha, have niapak ankek ma’a —lhna aptemak ángel.

34Ka atemmoiangka lhnak María ángel ma’a:

—¿Niehe ngkotnek atak eietka, mamma etava ko’o? —lhna ntemak.

35Koka lhna aptemak mokhom ángel:

—Evaiventak hata takhalhet Espíritu Santo lheia’, nkapvetak hata nhan apmopvana Apto m’a apnema netne kanke nak. Ka ngkanek nematka nak apiamolhma ta kakpota nhan ngkolhek altangko Eniapom Neten apketka. 36Ka aktema mo’ok anak lheia Isabel aktakho akvaneiam, nkotak hata nhan atka m’a. Apketlheianme mota enenlhet’avok akiennaktema naie’ m’a, koka ngvakmek ma’a 6 pelten aktema nlose’. 37Ngkanek Eniapom Neten apvankek elanak lhamakho qaselha apmak’akha la etnehek —lhna aptemak ma’a.

38Ka atemmoiangka lhnak mokhom María m’a, lhna ntemak:

—Hai’, ntase nak, hata ngkotnek aptakha nak lheiap, ko’o nak heiasennama Apveske —lhna ntemak.

Netamen nak ma’a, aptaqhemo lhnak ángel.

Aktema amaika’a María, Isabel

39Netamen nak mo’ok aknem ma’a, akhetaiangka lhnak akmeiekho María natemma Judea akieto metaimong akhaiam. 40Ka aktalhnengvekho lhnak Zacarias apnemakha m’a, akpaiveskekho aptava Isabel. 41Apkaktemmakpek nak atka av’alhok Isabel neksa aklengai’a lhnak akpaiveskama María, aplanei’avek nak na av’alhok Espíritu Santo m’a, 42lhna ntemak akiennakteskamo akpaivoma:

—¡María, Eniapom Neten apvetaskasak akiavai’a aktaqmanma aniemhaikama lheia’ kakpota nhan atka nak, mangkolhnok altemo lhemek ngkelvana’ak! 43Have ko’o asto neten ankek asiaspommalhka hetno nak amaika’a lheia’, lheia ta etnek ngken Apveske ehenkok. 44Neksa aslengai’a lhkek hepaivaskama lheia, apkaktekpek lhek eietka evalhok aniem’o apketsevaskamo. 45Aktaqmelakho nke ntak lheia ngkanek mankoi’askeiakmok nkopeneskaksek hata aktemakha apkanemo Apveske lheia —lhna ntemak.

46Koka lhna ntemak María:

—Hai, altangko ta apiavai’a panke Apveske ngkanek nietnek apmopvana. 47Mpaihakhek evalhok aniem’o Eniapom Neten apto hevongkeskama tep. 48Heiangkek na akiavai’a aktaqmanma askaniemhaikama, niekhe astema koneng ankek hennenkasekama. Kolhva hetlhenama ta aplhamakho enenlhet’avok heleltangkok hata mota aktaqmelakho nkek askaniemhaikama. 49Ngkanek Eniapom Neten aknema apmopvana apanke heiangkek na akiavai’a aktaqmanma askaniemhaikama, apvesai’a nhan Apokkenammap memangveiam ngkolatsekama. 50Nietnek apkelietnai’o napaqta’ak apkellelto nak apkellai’o m’a, 51apnaqtevaskek na m’a apkellelto nak apkellammakpoho akieplomo apoktong aknema akmovana nkoie. 52Apkeliengke’ apkeliav’akha apkelveskai’e akieplomo apkeltanema, neten koka apkeliasakhak ma’a nalhep’ave nak apvalho’ok. 53Mek ato’ok anak apkellangkokhek qaselha aktaqmanma, mok apmeiok koka apteskasokhak ma’a nema nak apkeletsekama. 54Apkelpasmek apkellanemmakpo israelitas apkellelto nak apkellennengkasekama, apkelietnave mota napaqta’ak ma’a. 55Apeneskamavek nak na nek apkeltennaskama Eniapom Neten elpasmok nengelieihengka’a Abraham, kakpota nhan aplhamakho aptavana’ak neptamen —lhna ntemak María m’a.

56Nnaiakmek nak lheme María m’a malha apqanetolhem’a pelten Isabel aknemakha, netamen aktaqhemo lhnak mokhom netamen ma’a.

Apteiam Juan apkellavkeskama iemmen aniapom

57Ngvaiakmek nak aknem akmahai’a etiemok atka Isabel ma’a, 58apkelvaiakmek nak annemolhema kakpota nhan aktema aklhamakha la’a ngkanek apkellengai’ak nak ania’a apkaikamok Eniapom Neten akiavai’a aktaqmanma aniemhaikama m’a. 59Netamen ma’a, apvaiakmek nak 8 aknem apteiam nematka nak, akiantemekho lhnak kakpota ngkolhek akiaqtemenkaso nekhatkok apkammelhakha. Koka enenlhet apkellelto apkelvetaiangko m’a, lhna aptaiangkok:

—Koltemeskes hata apvesai’a Zacarias ham, ka kto nak apvesai’a apiapom anak —lhna aptaiangkok ma’a

60Koka lhna ntema ngken allatemmoiangka m’a:

—¡Mma’! Juan hata apvesai’a hengke’e —lhna ntemak Isabel.

61Koka enenlhet lhna aptaiangkok mokhom:

—Mamma aknemolhema la apvesai’a Juan lheia —lhnak aptaiangkok ma’a.

62Mok apopheio’ok noka aptaiangkok enenlhet’avok apkelelmalhneiangka Zacarias aktemakha apmahai’a etneskesek apvesai’a apketka m’a. 63Koka Zacarias apkeltemavek nak ngkolhek akmeso iamet akpaihema kakpota etalhaksek apvesai’a Juan ma’a. Nkeliemaskangkek nak apvalho’ok apkelvetai’a enenlhet’avok ma’a. 64Ka akpelapkeskamo lhnak na mokhom aktepekho apaivoma Zacarias, apiavenkaskesaiangka lhnak na apvesai’a Eniapom Neten ma’a.

65Nkelpelapkeskangkek nak aplhamakho enenlhet’avok ma’a, nketkaikama lhnak ania’a aklhamakho akhaiam metaimong akieto iokhalhma Judea. 66Koka apkellelto lhnak apkellengai’a ania’a nak ma’a, apkelvetai’o lhnak Apveske apto aptaqmelkeskama nematka nak, ka apkelpaqmetkesammakpo lhnak mok apankavek ma’a, lhna aptaiangkok:

—¿Ko la ta etnek apvanemo ta nematka nak, he? —lhna aptaiangkok ma’a.

Aplheianma Zacarias nkotnek hata qaselha apmanie

67Aplanei’avek nak apvalhok Zacarias Espíritu Santo, ka apkelientemongkeskamo lhnak aplheianma qaselha akmak’akha ta ngkotnek ma’a, lhna aptemak ma’a:

68—Ntasek eliavenkaskesama apvesai’a nak Eniapom Neten Apveske ko Israel, ngkanek aptek amaika’a, el·hatsoskakhak na apkennemolhema neksa nema anmaikama. 69Apkapaskangkek na hengvongkeskama tep aknema apmopvana apanke. Apveske David aptaven neptamen, apto lhnak nanek na apkasennaikama Eniapom Neten ma’a. 70Aplheianmek nak nanek na aniem’o apkenmaikama apkeleltennasemmap ania’a apankok apkelpokkanma, 71hengelvongkesek na lhta tep napaqtavek apkellelto hengellammelhmakha la’a kakpota nhan hengeltaknongkomakha nak. 72Apkelietnai’avek nak nanek na napaqta’a m’a nelieihengka, mang nak nanek na nkomahai’ak elvangkamok annemo mo’ok apvalho’ok apkenmahai’akha etnangkok ma’a. 73Aptemo nhan juramento napaqtek Abraham, 74hengel·hatsoskakhak na lhta nhan neksa nema hengellammelhma kakpota envanka’ak hata hengellasennama metka nengellai’a m’a. 75Angellanangkok na lhta nhan qaselha altaqmelo, akpeivomo nhan lhamakho aknem.

76Lheiap eietka ngkolhek hata aktemeskaso apkeltennaskama ania’a apankok apto apnema netne kanke nak. Lheiap hata evomok apmanie m’a Apveske, epeneskasok hata nhan amai apankok ma’a. 77Eleltennasama ta enenlhet’avok ko Israel Eniapom Neten hata etneskesama apankek meleliehekho apkellaskamakha m’a, elvongkesek hata nhan tep ma’a. 78Avanhek ankek apkelietnai’o nengaqta’a Eniapom Neten, hengellangkek sekha akteiapma aknem 79kakpota nkapommetek apkellelto apkelloma akiavai’a ienaqtesakha lhma kanhan nengetsepma peskeska nkok. Apmahai’a nhan hengelvetaskesek amai akvesai’a aktaqmelaikama engvalho’ok —lhna aptemak Zacarias.

80Apvanekaniek nak nematka nak, niennaqtenkek nak apvalhok ma’a. Aplomaka lhnak na m’a iokhalhma metkelha temma akvakmo aknem apvetaskesakpo enenlhet’avok ko Israel.