Luk 10 | TmfSC | STEP | Netamen nak ma’a apkeliekieskamo lhnak Apveske 72 enenlhet apieseksek ma’a, ka apkellapaskamo lhnak apmaniaie mok apkanet akieto apnakha la temma kakpota nhan emhangkok alhaiek ma’a.

Luke 10

Jesús apkellapaskama 72 enenlhet elpaiaksek ania’a aktaqmanma

1 Netamen nak ma’a apkeliekieskamo lhnak Apveske 72 enenlhet apieseksek ma’a, ka apkellapaskamo lhnak apmaniaie mok apkanet akieto apnakha la temma kakpota nhan emhangkok alhaiek ma’a. 2 Lhna aptemak apkellanemo:

—Have niapak, avanhek ankek apaktek nennaklhema ta, koka apkanet apankek ma’a apkenmakmekama nak. Elelmalhnama ta apto apankok apaktek aknaklhemmalhka ta kakpota ellapaksek apkenmakmesaikama ellankesokhak na m’a. 3 Enmeiakha’ ketlhengkap ma’a, ¡koka ellaho ta! Ngkanek malha nepkesek ketlhengkap aiseksek la vavo. 4 Melletsav ankek patakkom, aptekamok, mo’ok apnakteto apmankok. Melvenakteso nkek na apkelpaqmetkesammap apkelvetakpo la nalhet amai. 5 Hata apkelvakmo la natemma, elpaives hata etnangkok hengke’e:

“Altaqmelaikama apvalho’ok hata hengke’e”, hata etnangkok ma’a.

6 Apkakhangko la m’a enenlhet meltemengveiakmo la lhma, nkovak hata altaqmelaikama apvalho’ok ma’a. Koka apkakhangko la enenlhet apkellanekamok ngkollatsekama, mankovhek hata altaqmelaikama apvalho’ok ma’a. 7 Eniakhamok hata m’a lhema pa’at apkelvanlha la’a, melakta pankek nahan. Etavok hata nhan ma’a, einamok nahan lhamakho aktemakha la’a apketlhevai’a m’a. Nkelietavek etlhevangkok ketlhengkap ma’a ngkanek akianmoma apkenmakmekama.

8 Hata apkelentalhno ta apiav’akha temma akno la anmo takha ketlhengkap ma’a, etavamok hata akno la allangko aptekamok ma’a. 9 Eltaqmelkeskam hata nhan anmaska apiempeiok ma’a, eleltennes hata nhan ketse nkaimelhkak nkovak aknem aptaiekha ta apveske Eniapom Neten. 10 Koka menmakpo ta takha ketlhengkap apiav’akha la temma, enmeiak hata amai apieseksek temma, hata eltehek hengke’e: 11 “Nelpalesakmek lhepop aktek enmanko’ok hengke’e natemma nak aniem’o nengeleltemo nkovak akiaqmoienta ¡Ellaho ta ketlhengkap nkanketva’ak aknem etnekha apveske Eniapom Neten!” hata etnangkok ellanak apkellelto apkeltaknongkoma ketlhengkap ma’a.

12 Hata akvo’o ta aknem neliekpelkammalhkelha, avanhek hata ngkotnek akientalhnema apkellengaiangko enenlhet’avok anak ma’a, aselhtek ma’a ko Sodoma lhnak nanek.

Apkellaskama Jesús na temma mankoliaqmongkasekha mo’ok av‘alho’ok

13 —¡Ketlhengka la ie’ na temma Corazin kanhan Betsaida! Nlhanie niekhe ntak qaselha hempelapkeskama nema alanai’a hengke’e, koka mankoliaqmongkasekhak mo’ok av‘alho’ok. Nlho lhta kno la alanengvakmo qaselha hempelapkeskama aiseksek anak ma’a na temma Tiro kakpota nhan Sidón, kolhvavek anke nlho lhta nkoliaqmongkasekhak mo’ok av‘alho’ok ma’a. Kolentalhnekha nlho lhta nhan alentalhnema altavkeskama nak aiempeiok anmaiosak’a nak av‘alho’ok anko’ok, kakpota nhan nkolelhpakhalhka takhalhet’ok tahap aniem’o anmaiosak’a av‘alho’ok. 14 Hata akvo’o ta aknem nema aliekpelkemo enenlhet’avok apkellanekamok altaqmelo qaselha, nlho ka la nhan ngkolatsekama la’a, avanhek hata ngkotnek atlhevai’a akmaska ketlhengka hengke’e, aselhtek hata m’a na temma Tiro ka nhan Sidón, have niapak ankek ma’a. 15 ¡Lheia laie na temma Capernaum! Nlheianme nkek ngkolhek hata akmo takha m’a neten, koka mangkotnek hata m’a, nkolhek hato ka akienievo m’a ngkolatsenkolha apkeletsepmakha —lhna aptemak Jesús ma’a.

16 Netamen ma’a, lhna aptemak Jesús apkellanemo apkeltamesaikamok:

—Koka apkellailho la enenlhet apketlhekmosekamok ketlhengkap, hellailhavek na ko lha m’a. Koka enenlhet apkeltaknevo la ketlhengkap, heltaknevakkek na ko lha, kakpota nhan apto lhta heiapaskama —lhna aptemak Jesús apkellanemo m’a.

Apkelvekta 72 enenlhet’avok nema alapaskama

17 Ka apkelvektamo lhnak mokhom 72 apkellapasammap netamen apkelpaieskama ania’a aktaqmanma m’a, nkelpaihekhek nak apvalho’ok ma’a, lhnak aptaiangkok apkellanemo Jesús:

—¡Apveske, mantek ankek qaselha mongvetai’o nellanekamok ennengko’o m’a, akvakho kasekapok av‘alho’ok hengellasekhai’o nelentepkeskama aniem’o akmovana apvesai’a lheiap! —lhna aptaiangkok ma’a.

18 Lhnak aptemak Jesús apkellatemmoiangka:

—Hai, asvet’ak lhek Satanas akteiakmo neten malha apkelienmoma lhke ntak ma’a. 19 Askellangke lhta ko’o apkelmopvanka’a ketlhengkap kakpota elteianmangkok menasma kakpota nhan iettaha’, kakpota apvanka’ak eltemeskasekhak koneng apkellammelhma, mangkolhek hata aktakha ketlhengkap. 20 Molpaihekhankek apvalho’ok aniem’o apkelentepkeskama kasekapok av’alhok ma’a, koka ntase’ nkolpaihekhak apvalho’ok ngkanek nnankek apkelvesai’a ketlhengkap vakkahak ma’a neten —lhna aptemak Jesús.

Vanlha Apketka apto apiekpelkemo Apiapom

21 Avanhek ankek nak akpaihekha apvalhok Jesús ma’a aniem’o Espíritu Santo, ka apkenmalhnongkomo lhnak ma’a, lhna aptemak:

—Eniapom apto Apveske neten kanhan nalhepop, avanhek ankek asiavenkeskamo apvesai’a lheiap ngkanek nlekavek apvalhok eliekiaqsek enenlhet apkellomakha nak apankavek kakpota eliangveskeskamho’ aktemakha asketlhekmoskama aplhenammap lheiap, man koka eliekieskamak enenlhet apkellelto neten apankavek apkeliaspommap —lhna aptemak Jesús apkenmalhnongkomo Eniapom Neten.

22 Netamen nak ma’a lhna aptemak apkellanemo Jesús aplhamakho enenlhet’avok ma’a:

—Hellaiangkek lhamakho qaselha ko’o Tata, mamma enenlhet apiekpelkemo Apketka nak, vanlha koka Eniapom apiekpelkemo m’a. Mamma nhan enenlhet apiekpelkemo Eniapom anak ma’a, vanlha koka apto Apketka apankek apto apiekpelkemo m’a kanhan apkeliekpelkemo m’a apkellelto la enenlhet’avok apkeliekieskama Apketka —lhna aptemak Jesús.

23 Netamen nak ma’a lhnak aptemak na apkellanemo apkeltamesaikamok:

—Aktaqmelakho nkek ketlhengkap apkelvetai’o qaselha akvetammalhka nenvanlha nak, 24 mang nak nane nte niekhe apkeleltennasemmap ania’a annenga kakpota nhan apkelveskai’e apkenmahai’a elveta niekhe kanhan ellengak qaselha akvetammalhko nenvanlha nak, mang nak na noka enmongkangveiakmok ma’a —lhna aptemak Jesús.

Apietkeskama Jesús enenlhet apiamolhma ko Samaria

25 Lhema hengetlhekmoskama ley Moises apkenmalhnengvai’o lhnak Jesús apmahai’a eiepkonek, lhna aptemak:

—Hengetlhekmoskama, ¿ko la atnek ko’o kakpota ngkoitek akiennaktema eneniek nkotnengvaianlha nnelha? —lhna aptemak.

26 Ka apkatemmoiangka lhnak Jesús ma’a, lhna aptemak:

—¿Ko la aktemakha aktalhesammalhka ley kakpota elpeivesekhak lheiap, he? —lhna aptemak.

27 Ka apkatemmoiangka lhnak ma’a, lhna aptemak:

—Ka ntemak hengke’e: «Eniasekho ta mota Apveske Eniapom Neten akvakho konne kankek apvalhok, akietnaikama apaqtek kanhan apiennaktema apanke’ ^{▼▼Deuteronomio 6:5}». Ka ntemak na mo’ok hengke’e: «Eniasekho ta nhan po’ok ka akto nak apkasekhammakpo nak apanke lheiap ^{▼▼Levitico 19:18}» —lhna aptemak ma’a.

28 Koka lhna aptemak mokhom Jesús:

—Tokha’, apietave, etne’ ta ham kakpota ngkoitek lheiap akiennaktema apneniek nkotnengvaianlha nnelha —lhna aptemak Jesús.

29 Koka hengetlhekmoskama lhnak henganemakha m’a apmahai’o lhnak enmalhnekhok mokhom kakpota nkopeivekhok ma’a amanie lhkek apkenmalhnekama, lhna aptemak:

—¿Se lha ko’o astema emo’ok ^{▼▼Apkellelto israelitas atlheianmo lhnak apvalho’ok po’ok vanlha apnemo lhema apankavek ma’a.} ke, he? —lhna aptemak.

30 Ka apkempai’o lhnak Jesús apkeltennaikama apietkeskama m’a, lhna aptemak:

—Lhema enenlhet nak apteiapmak natemma Jerusalen, apmeiekho m’a amai akmaiangko m’a Jerico. Ka apkelpathetmo lhnak enenlhet meliamolhma m’a nalhet amai, melleskamo lhnak na apkeltekpoiangka apiempek ma’a. Apkelelmenielhkeskamo lhnak na qaselha apankok ma’a, apietnemo apkalhnai’o m’a, iama apketsepma apkeltemeskeskamak ma’a. 31 Ietemavek nak na apmeiekho sacerdote m’a, apvetai’o lhnak apietnakha mokhe, ka aptaqheskaiakmo lhnak aplhengama m’a, apiekai’o nhan ma’a. 32 Netamen apmeiekho nhan lhema levita m’a, apvetai’o lhnak na apietnakha mokhe, ka aptaqheskaiakmo lhnak na mokhom aplhengama m’a, apiekai’o nhan. 33 Ka apmeiekho lhnak na mokhom lhema enenlhet mankotno nempaivoma lhema apkeniem’o Samaria, apvetai’o nhan apietnakha enenlhet, apiosek noka apkellanei’o m’a. 34 Ka aptetesaiangko lhnak ma’a, apkeltelhnaskesaiangko lhnak ponha aceite kanhan vino akieto apiensema. Apelhketkeskamo lhnak na m’a, apkanetkeskamo lhnak na apkanantema, apiantemekho akietelha apkakhengvekhelha amaika’a, aptaqmelkeskamo nhan ma’a.

35 Lhema aknem na ntemak akiekai’a m’a, apmahai’o lhnak eniempekhok mokhom aplhengama enenlhet apiamolhma nak, ka apkaiangko lhnak patakkom hanet denarios apto apankok pa’at nak ma’a, ka aptemo lhnak apkanemo:

“Etaqmelkes hata enenlhet anak apiensema, mang hata nkek nkovakhak patakkom lhek askaikamok, mo’ok asvekta ta allangkongva ta mokhom alaimommalhka”, lhna aptemak.

36 Ka apeneskamo lhnak apkeltennaikama Jesús ma’a, apkelmalhneiangka lhnak hengetlhekmoskama henganemakha nak, lhna aptemak:

—¡Ngva’, elhennoho! ¿Se lha po’ok maie enenlhet lhek apnaqtevaskama lhkek apkenmenielhma, he? —lhna aptemak.

37 Ka apkatemmoiangka lhnak hengetlhekmoskama henganemakha, lhna aptemak:

—Ka apasmoma lhkek po’ok, apietnai’o lhkek na napa’at po’ok —lhna aptemak.

Koka lhna aptemak mokhom Jesús apkanemo m’a:

—Hai’, etne ta nhan lheiap ma’a —lhna aptemak Jesús ma’a.

Jesús aptema amaika’a Marta kakpota nhan María

38 Ka apkempekho lhnak mokhom Jesús aplhengama, apvekho lhnak lhema natemma m’a, akmamo lhnak takha lhema ngkelvana akvesai’a Marta. 39 Nengkek nak na nialheng ma’a akvesai’a María, aknaiakmo lhnak napokha Jesús ma’a kakpota nkotaqmelkaso ailhekamok apkeltennaikama m’a. 40 Marta lhnoka nkelaneskeskamak alpeneskeskamo aptekamok aknemakha m’a, nietnengkek nak na akiavai’a akmakmekama aknemakha m’a, ka akteteskaiakmo lhnak na apnakha Jesús ma’a, lhnak ntemak anemo:

—¡Apveske, eiennaho ta apkelanei’o eialheng, manghepasmak asmakmekama ham. Eniana no hepasmok! —lhna ntemak.

41 Ka apkatemmoiangka lhnak Jesús ma’a:

—Marta, mantek aktaikama av’alhok lheia’ aktemakha aknema aknemakha, 42 kolhva koka María nkelan’ak qaselha neten ankek akiaspommalhka, momak’ak aliaqselhma ko’o —lhna aptemak Jesús ma’a.