Luk 6 | TmfSC | STEP | Aknem sabado nennekhelha lhna ntemak ma’a, Jesús kakpota nhan apkeltamesaikamok apkeliekai’o lhnak aiseksek aniep. Apkelapteiangko lhnak na trigo apaktek apkeltamesaikamok ma’a, apkellaktelheiangko lhnak na apmeio’ok ma’a kakpota etavangkok.

Luke 6

Apkeltamesaikamok Jesús apkelaptema trigo apoktengok aknem nennekhelha

1 Aknem sabado nennekhelha lhna ntemak ma’a, Jesús kakpota nhan apkeltamesaikamok apkeliekai’o lhnak aiseksek aniep. Apkelapteiangko lhnak na trigo apaktek apkeltamesaikamok ma’a, apkellaktelheiangko lhnak na apmeio’ok ma’a kakpota etavangkok. 2 Apkelvetaiangkek nak fariseos ma’a, lhnak aptaiangkok:

—¡Mankoltemak antek ley ma’a aknem sabado nennekhelha la’a! —lhna aptaiangkok.

3 Ka apkatemmoiangka lhnak Jesús ma’a, lhna aptemak:

—Apkelietsateiangke niekhe ketlhengkap vakkahak aptemo lhnak na nek David annenga, mek nak ngkaqhemak kakpota nhan apketlhelhma’ak ma’a. 4 Aptalhnengvaiakmo lhnak David ma’a konne Eniapom Neten apnemakha, ka aptaseiakmo lhnak pan Eniapom Neten nema akpekkenkasekama, apkellaiangko lhnak na apketlhelhma’ak ma’a. Vanlha lhna niekhe sacerdotes aptekamok ma’a aklheianma ley.

5 Ka ngkanek ko atnek allanak kolhvave nak hengke’e, ka Enenlhet apketka nak nietnek apmopvana kakpota elanak apmak’akha la elanak aknem sabado nennekhelha la’a —lhna aptemak Jesús.

Aptaqmelkasekha Jesús lhema enenlhet akiaqsekha apmek

6 Ngvaiakmek nak mokhom aknem sabado nennekhelha m’a, apmeiekho lhnak Jesús apkaqnekhelha mota judios kakpota etlhekmoksek ma’a, apnengkek nak lhema enenlhet akiaqsekha iennakha apmek ma’a. 7 Apkelemhaseiangka lhnak apaqto’ok Fariseos kakpota nhan escribas Jesús, apkenmahai’a elvetangkok aptaqmelkasekha enenlhet anak neksa aknem sabado nennekhelha, elentepkesek na apvesai’a Jesús ma’a napaqtavek apkelveskaie’. 8 Apiamavek noka Jesús ma’a, lhna aptemak apkanemo enenlhet akiaqsekha apmek:

—Etnemekha no neten, etnengvom no apieseksek enenlhet anak —lhna aptemak.

Ka apkenmekho lhnak neten ma’a, apkenengvekho lhnak apieseksek enenlhet. 9 Ka apkellanei’o lhnak na Jesús enenlhet’avok ma’a, lhna aptemak:

—¿Ngkeltemengke nlho ley Moises angellanak qaselha altaqmelo aknem sabado nennekhelha, nlho ka la qaselha ngkolatsekama, he? ¿Ngkeltemengke nlho nhan ley Moises angvongkesek tep, nlho ka la antevaksek ma’a, he? —lhna aptemak.

10 Apkellanei’avek nak Jesús aplhamakho enenlhet’avok, lhna aptemak apkanemo enenlhet nak ma’a:

—¡Epeivesekha no apmek! —lhna aptemak.

Ka apeivesekho lhnak apmek ma’a, kolhvavek ankek nak ntaqmelekhak. 11 Mang na ngkeskamak annatheskamo apkelemhama apmaniaie’ m’a, apkelempai’avek nak apkellanekha apkeltakha apkenmahai’a etselhnanak Jesús ma’a.

Apkeliekieskama Jesús 12 apkellapaskamo mota

12 Mo’ok aknem na ntemak ma’a, apkanetvekho lhnak Jesús neten metaimong akhaiam, apnaiakmek nak pelhaso pvanko m’a apkenmalhnonkoma Eniapom Neten ma’a. 13 Ka atsai’o lhnak ma’a, apkellaveiangka lhnak lhamakho apkeltamesaikamok, koka apkeliekieskamo lhnak vanlha 12 enenlhet kakpota etnangkok apkelapasekama. Netamen nak ma’a, apkelapaskamo lhnak kakpota elpaiaksek ania’a aktaqmanma m’a. 14 Lhnak apkelvesai’a heng, Simon aptemeskasekho apvesai’a Pedro, kakpota nhan apialheng Andres. Jacobo, Juan, Felipe, Bartolome. 15 Mateo, Tomas, Jacobo Alfeo apketka, Simon apto celote ^{▼▼Mo’ok apvesai’a koka Cananeo, apto lhta nhan mankoleklemo apvalhok elpalhqakpok mangkotno apkennemolhema.}. 16 Judas Jacobo apketka, kakpota nhan Judas Iscariote, apto lhnak apselhnanekha aptaiangkolha aplhelhma apanke niekhe Jesús.

Apketlhekmoskama Jesús apentalhnema enenlhet

17 Ka apkelentepekho lhnak neten akhaiam metaimong ma’a, apkanvektamo lhnak akieto akvaiventa lhepop ma’a. Ka apkanvei’o lhnak na apentalhnema apkeltamesaikamok kakpota nhan po’ok enenlhet apkelleniem’o iokhalhma Judea, Jerusalen, apiav’akha temma Tiro, kakpota nhan Sidón. Apkenmahai’a ellailhok Jesús kakpota nhan eltaqmelkasekha anmaska apiempeiok ma’a. 18 Ka apkeltaqmelkeskaiakmo lhnak ma’a apkellelto anmaikama kasekapo’ av’alhok alpaiseiam. 19 Lhamakho lhnak na apkenmahai’a enmangvomok Jesús ma’a, apkeltaqmelekhek nak na aniem’o apmopvana alenteiapma Jesús ma’a.

Qaselha akto aktaqmanma nkek antehek

20 Apkellanei’avek nak Jesús apkeltamesaikamok, lhna aptemak apkellanemo:

—Aktaqmelakho nkek ketlhengkap metka Qaselha apanko’ok, ngkanek apanko’ok ma’a aptemakha nak apveske Eniapom Neten.

21 Aktaqmelakho nkek ketlhengkap allaqhemo mek, ngkanek eliapqanmekhak hata.

Aktaqmelakho nkek ketlhengkap apkeliapqalhema nak, ngkanek ellaktemmekhak hata.

22 Aktaqmelakho nkek ketlhengkap apkeltaknommap anak, nema alvannaikama kakpota nhan nema alentepkeskama apkelvesai’a ketlhengkap aniem’o apkelieplekama m’a Enenlhet Apketka nak. 23 Kolpaihekha no apvalho’ok ketlhengkap ngkanek etlhevangkok hata akiavai’a akianmoma m’a neten. Lhnak nanek aptaiangkok enenlhet’avok apkelieihengka meliamolhma nak, apnaqtevaskamo lhnak nanek apkeleltennasemmap ania’a annenga.

24 ¡Aii, ketlhengkap laie nema nak apkelletsekama, vanlha mota alletsantengkeskama alpaihekha apvalho’ok ma’a!

25 ¡Aii, ketlhengkap laie’ apkeliapqaneiakmo nak, ngkanek nkovak hata mek annapma!

¡Aii, ketlhengkap laie’ apkellaktemmaikama mota, ngkanek eliapqalhek hata aniem’o aliepvamekamok!

26 ¡Aii, ketlhengkap laie’ nema aleltaikamok anak neten pankavek, lhnak nanek na aptaiangkok apkelieihengka apkeltemeskeskamo nhan neten apankavek ma’a apkeleltennasemmap ania’a apkenmopvanka’a ania’a!

Aktaqmanma angamelemma apkellelto nak hengellammelhmakha

27 Aplhengkeskangkek nak apkeltennaikama Jesús ma’a, lhna aptemak mokhom:

—Askeltavek aleltennasangkok ketlhengkap apkellelto nak apkeltaqmelkeskamo hellailhemo: Ellasekho ta apkellammelhmakha la’a, eltaqmelkaso ta nhan apkellanei’o m’a apkellelto apkeltaknongkoma nak.

28 Ellamok hata aktaqmanma apaivoma apkellelto apkeliematkesaikama nak ketlhengkap. Elelmalhneskes hata kakpota nkoltaqmelek apkellangiemhaikama apkellelto nak apketlheianveiam amota apkelvesai’a ketlhengkap, apkenmopvanka ania’a koka.

29 Nnek hata nkek aktekpongo apmalhempenek lheiap, eniangkok hata nhan nekha apmalhempenek ma’a. Nnek hata nkek aklekkaso apkaqlammap lheiap, apvannangko la nhan ma’a elekkasekhak mokhom aptalhnema apvenaktema, eniangko ta nhan lheiap ma’a.

30 Nnek hata nkek anmalhnengka qaselha apankok lheiap, eniamok hata. Nnek hata ankek annaktengkaso qaselha apanko’ok, nkotnama ta nkek ma’a.

31 Eltaqmelkes hata po’ok ka apkeleltemakha nak na ketlhengkap apkelleltemo ngkolhek altaqmelkaso mota. 32 Koka ellasekhekho ketlhengkap vanlha apkellelto nak apkellasekhai’elha la’a, mellasekhek koka m’a apkellammelhmakha la’a, ¡koka mankoietok etnangkok ma’a! Aptaiangkolha nhan ma’a enenlhet anak apkellanekamok anak ngkollatsekama. 33 Koka apkellelto la ketlhengkap eltaqmelkesek apketlhelhma’ak apankavek, have m’a apkellammelhmakha la’a, ¡koka mankoietok ma’a! Aptaiangkelha nhan ma’a enenlhet anak apkellanekamok ngkollatsekama.

34 Koka ketlhengkap vanlha apkellelto la ellangkok apkeliaqmoma apkenmopvanka’a nak eltaqheso, koka mankovakmok mokhom nentemakha m’a, ngkanek aptaiangkolha nhan enenlhet’avok anak apkellanekamok ngkollatsekama. 35 Nkaimelhkek na ketlhengkap ellasekhok apkellammelhmakha la’a, eleltaqmelkes kakpota nhan ellangkok apkeliaqmoma metka apkellailhema apkeltakheskamo qaselha apkeliaqmoikamok la’a. Netamen ngkolhek hata allangko akiavai’a nkek akianmoma m’a, etnangkok hata nhan apketkak ma’a Apto Apnema m’a netne kankoie. Apkeltaqmelkeskamo nhan apkellangiemhaikama apkellelto nak metnaikamok gracias ma’a kanhan apkellanekamo qaselha ngkollatsekama. 36 Elietnaho ta nhan napaqta’a m’a po’ok la’a, ngkanek Apiapma’ak anak ketlhengkap apkelietnavek na napaqta’a m’a aplhamakho enenlhet.

Metka nenlheianma ngkolatsekama aptemakha emmo’ok

37 Lhna aptemak mokhom Jesús apketlhekmoskama:

—Meliekpelko nkek aptemakha la po’ok, kakpota nhan mangkolhek hata aliekpelko aptaiangkolha ketlhengkap. Metlhen na apselhnanemmap po’ok kakpota nhan mangkolhek atlheno apketselhnanemmap ketlhengkap. Eltemeskesama ta apankavek ketlhengkap apnaqtevasko la po’ok, kakpota nha ngkolhek aktemeskesangkankek ngkollatsekama apkellanekamok ketlhengkap. 38 Ellamok hata nhan qaselha po’ok aimelhkelha la’a kakpota ngkolhek allangko nhan ketlhengkap akietemo nkek konne iamalhengahak, ngkolhek hata nhan allangko qaselha nema akiaqhapekamok, kanhan nema aliettakkesaikamok iamalhengahak, kanhan alanei’o nkoie. Apkellangkek hata nkek ketsek qaselha po’ok, netamen ngkolhek hata nhan akneso nema akiaqmongkasekha ketsek qaselha m’a. Koka apkellangkek hata nkek akiavai’a qaselha apanko’ok po’ok, netamen hata nhan ma’a ngkolhek akneso nema akiaqmongkasekha akiavai’a qaselha.

39 ¿Apvanke nlho metka apaqto’ok eiantemok lhemek po’ok metka apaqto’ok, he? ¿Epalemmo nlho lhemek malhek po’ok ma’a, he?

40 Ka apkeltameskama nak have apto neten apankek napaqtek apketlhekmoskama apankok ma’a. Koka apenesakpo la nema akiangveskeskaiakmo m’a, elhnekhok hata apketlhekmoskama apankok ma’a.

41 Mangkolatsema lheiap elanhok apialheng akielhaklhema la ketsek apaqtek, ngkanek na lheiap nietnek akiavai’a akielhaklhema apaqtek anak. 42 Mankapvankek epasmok lheiap apialheng elekkesek ketsek la akielhaklhema apaqtek ngkanek na nietnek lheiap akiavai’a akielhaklhema apaqtek. ¡Hengiennengkeskama niapom lheiap! Nkaimelhkek elkok sekhek apanke akiavai’a akielhaklhema kakpota m’a apvankek elekkesek ketsek akielhaklhema la apialheng.

Iamet aktaqmanma kanhan ngkolatsekama

43 Lhnak aptemak mokhom Jesús apietkeskama:

—Iamet aktaqmanma la mankavanke nkoilhek akielhna ngkolatsekama la’a, iamet ngkolatsekama mankavankek na nkoilhek aktaqmanma akielhna. 44 Iamet aknema la am’ok mankavankek ngkotnekhak akielhna nak higo, palva mankapvankek etnekhak apielhna uva nak akielhna. Aniekpelkok na iamet nenvet’o la akielhna. 45 Nnavek na m’a, enenlhet la apiamolhma apkeliatakke mota aktaqmanma aniem’o nhan aktaqmanma apvalhok. Koka enenlhet meihamolhma nak, apkeliatakke mota ngkolatsekama aniem’o ngkolatsekama nhan apvalhok. Aklanei’o la apvalhok enenlhet, nkotiepok apaivoma m’a.

Akiennaktema pa’at alanemmalhka, kanhan nkoiennaktema pa’at

46 Lhnak aptemak mokhom Jesús:

—Ketlhengkap heleltangko mota, “¡Apveske, Apveske!” Koka aqhemo m’a, mangheleliehekhoho. 47 Koka apto la apkailhemo enenlhet asketlhekmoskama nak, apkeliehekho nhan, etnek hata malha 48 lhema enenlhet la apkelanai’a apnemakha m’a. Emetmok sekhek ma’a akvakmo apvetangvakmo konne metaimong kakpota elanak avhok takhalhet apnemakha m’a. Netamen akvo’o la iemmen akiengeiam ma’a nkotiengvomok akiennaktema m’a pa’at lhek, koka mangkoiaqnenek ma’a aniem’o nietnek akiennakteskama avhok takhalhet metaimong ma’a. 49 Koka apto la nhan enenlhet apkailhemo asketlhekmoskama, meliahakhok nahan, malha aptak ma’a enenlhet la apkelanai’a apnemakha takhalhet lhepop aktek metka akiennakteskama nhan. Akvo’o la nhan iemmen akiengeiam ma’a nkotiengvomok akiennaktema m’a pa’at lhek, nkoiaqnengkesek lhamakho nkek ma’a —lhna aptemak apietkeskama Jesús.