Luke 21

Lhentampe metka atsekama akpekkanma patakkom

1Apnengkek nak Jesús konne Eniapom Neten apnemakha, apvetai’o lhnak nema apkelletsekama apnengkenaiangkok patakkom apanko’ok nemakha akheskamakha patakkom iamet aiseksek. 2Akvai’o lhnak na lhema ngkelvana lhentampe metka atsekama m’a, allaiangko lhnak ketsek hanet patakkom aliaqiema m’a akvesai’a blancas. 3Ka apvetai’o lhnak Jesús ma’a, lhna aptemak:

—Have niapak lhentampe nak metka atsekama malha tep ankek aikamok patakkom, mangkolhnok po’ok enenlhet. 4Nsavhavek ankek niekhe akteniai’a la aktoma, koka ngkeskama lhkek apkelletsekama nkelaimommalhkek nak patakkom apanko’ok ma’a —lhna aptemak Jesús.

Aplheianma Jesús etvasakpok hata Eniapom Neten apnemakha

5Apkelpaqmeiasmek nak moklhem’a enenlhet ma’a apketlheianmo lhnak aktaqmanma metaimong alanemmalhka Eniapom Neten apnemakha, kakpota nhan alienmoma altakmanma, koka lhna aptemak Jesús:

6—Nkotvasalhkak hata lhamakho nke nak, mankaimalhkek hata takhalhet mo’ok metaimong —lhna aptemak.

Akmak’akha ta nkotnek amanie aktemongvanlha ta nnelha aknem

7Ka apkelelmalhneiangka lhnak apkeltamesaikamok:

—¿Se lha aknem nkova, niehek hata ngkotnek qaselha mongenatkeskama kakpota angeliohok ennengko’o akmak’akha ta nkotnehek, he? —lhna aptaiangkok.

8Koka lhna aptemak Jesús apkellatemmoiangka m’a:

—Aplhaniek hata enenlhet apkelvai’a, hata etnangkok hengke’e: ¡Ko’o nak Cristo! Etlhenek hata nhan akvai’a aknem aktema nnelha’ alhma nkek ham. ¡Koka melieplav ankek ketlhengkap ma’a, mellanko nkek na ngkolhek aliennengkasengka! 9Elleng’ak hata ania’a apkennapekpelha’, apkennapommap nahan, koka mellaga nkoie’ ngkanek mankovakmok mokhom aknem annelha. Lhamakho akientalhnema nak ngkotnek hata amanie aktema nnelha’ aknem alhma nkek ham. 10Ellammelhakpok hata moklhem’a apkellavakha la’a, 11ngkotnek hata akiavai’a akievhekama lhepop, mek, nemmaskema lhamakho apkellavakha. Elvetak hata nhan neten qaselha nengai’o kanhan akiavai’a qaselha mongenatkeskama. 12Amanie apmak’akha ngkotnek akientalhnema nak, ngkolhek hata anmenlhenangka ketlhengkap, elpathetakpok hata. Ngkolhek hata allangkongvakmo apkelemhama apmaniaie’ apkaqnekhelha judios kakpota ngkolhek aknaktemo’ nemmammalhkelha’ aniem’o asvesai’a ko’o. 13Hata hetlhenek na asvesai’a napaqtavek apkelemhama apmaniaie m’a. 14Moltama nkek apvalho’ok elteniangkok amanie nkek apkellasennekha la’a. 15Ko’o ta allangkok ngkeskama apkeliangveiakmo apkellasennammap la ankok kakpota nkollapvanak apkellatemmoikama, mangkolhek hata alieko’o ketlhengkap ma’a. 16Koka etselhnanakpok hata ketlhengkap aniem’o apnemolhema apankek apnemakha, ngkana’ak, apkelialheng’a, kakpota nhan apkeltema po’ok nengaqte, ematong hata nhan. 17Eltaknevakpok hata ketlhengkap aniem’o helieplekama, 18koka mangkolhek hata aktakha ketlhengkap ma’a, ko’o ta altakmelkesek aplhamakho nak apkeliokha. 19¡Apkeliennakkek hata nkek ketlhengkap neksa akvai’a akientalhnema kakpota etlhevangkok apkelvaiam tep ma’a! 20Hata apkelvet’o ta kempokhakme’ apkel·halhiengkangvai’a natemma Jerusalen, eliohok hata nkanketva’ak aknem aktevasemmalhka m’a. 21Apkakhangkek hata nkek ketlhengkap iokhalhma Judea, ¡enieniamok hata akieto akhaiam metaimong! Apkakhangkek hata nkek natemma Jerusalen, ¡elentep hata m’a! Apkellava la iokhalhma apankok, ¡meltaqho nkek natemma! 22Nkovak hata akientalhnema aklheianmo lhnak nanek Eniapom Neten apaivoma, hata eiaqmongkasekhak apkeltemakha meliamolhma enenlhet’avok ma’a. 23Aiosak’ak hata nkotnangkok ngkelvana la nlosave’ kakpota nhan nlaklava’ak. Avanhek hata apkellengaiangko enenlhet’avok ma’a, nema akiaqmongkasekha akiavai’a apkeltemakha meliamolhma enenlhet’avok ma’a. 24Moklhem’a ta etekio’ok pelettav akvenaktema, po’ok hata ngkolhek aliantemo apkenmammap mo’ok apkellavakha. Netamen apkellelto metnangko nak judios elientalhneskasangkok hata apkelvetai’a akientalhnema m’a natemma Jerusalen, koka nkomaskengvomok hata akientalhnema nak akvo’o ta aknem ma’a aktemakha nema aklheianma av’alhok.

Apvektanlha ta Enenlhet Apketka

25—Nkolvetalhkak hata qaselha mongenatkeskama aknem neten anak, pelten, kakpota nhan piav’a, nkolievhama ta m’a. Meliehek hata aptangkolha enenlhet’avok, enmenangkok hata m’a aniem’o apkellengai’a alhtengioma aiempek iemmen alakhaiam alvata. 26Nkopalesemma ta apvalho’ok aniem’o apkellai’a m’a nkanek meliehek hata aptangkelha’ aniem’o alievhai’a qaselha aliennaktema nkek neten anak. 27– 28Koka moltama nkek apvalho’ok ketlhengkap apkelvet’o ta akientalhnema nak ma’a, eleliennekho toka ngkanek nengaqte nkaimelhkak nemakha al·hatsoskektanlha ketlhengkap ma’a. Elvetak hata apkelhiaiam Enenlhet Apketka nak lhema iephopai’a takhalhet akieplomo apmopvana kakpota nhan apkapommatma’.

29Ellailhono asietkeskama nak, ka apkelvet’o la ketlhengkap iamet higuera kakpota nhan aplhamakho iamet anak 30aktaiekha alhnanko’ok ava’, nkotlhenek hata apvalho’ok kanketva’ak aknem aliepvoi’akha m’a. 31Nnavek hata apkelvet’o ta aktakha apkelvetai’a akientalhnema, nkotlhenek apvalho’ok kanketva’ak aptema Apveske Eniapom Neten. 32Have niapak ankek ngkotnek hata amanie apsavhommap apkeletsepma apkaktengama nak kolhvave nak enenlhet. 33Nkomaskok hata neten kakpota nhan nalhepop, koka aspaioma nak mankomaskengvomek hata, have niapak anke.

34– 35Ellaho ta ketlhengkap nkoliennak apvalho’ok aniem’o apkellanekamok ngkollatsekama, apienaikamok anmen kakpota nhan aleltaikama apvalho’ok, ngkanek nkoplapkesek hata akvai’a nnelha aknem alhma nkek ham takhaplhet’ok ketlhengkap. Ka kto nak nel·hanma nak, nkoplapkesek akmama qaselha nevhak. 36Ntasek elel·halhnama ketlhengkap, vanlha elelmalhnamo mota Eniapom Neten kakpota apvanka’ak enieniangkok aiseksek akientalhnema nak, kakpota elvakhak ma’a napaqtek Enenlhet Apketka nak —lhna aptemak Jesús apkellanemo apkeltamesaikamok.

37Apketlhekmoskangkek na mota aknem anke Jesús ma’a akieto Eniapom Neten apnemakha, pelhasep noka apmaiangkok akieto metaimong akhaiam Olivos. 38Lhamakho sosekhek nak apkenmeiekha mota enenlhet’avok Eniapom Neten apnemakha kakpota ellailhok apkeltennaikama m’a.