Luke 5

Aklhamakma kelasma nema al·hatsoskama

1Aplomaka lhnak Jesús nekha alvata akieto Genesaret, apkanvei’o lhnak enenlhet’avok apnakha m’a kakpota ellailhok ania’a aniem’o Eniapom Neten. 2Ka apvetai’o lhnak aknaiangko hanet loma nemmen ma’a, apkelmopesekho lhnoka iama tetekko apanko’ok otep nekha alvata m’a. 3Ka apkanetvaiakmo lhnak Jesús ma’a, Simon nak apankok loma nemmen. Apkeltemo lhnak na eniaklhengkasangkok tep atketsek nemmen ma’a, apnemo lhnak nahan, apketlhekmoskamo nhan enenlhet’avok apkellelto apkakhengvai’a nekha alvata. 4Netamen, apsavhomo lhnak apketlhekmoskama m’a, lhna aptemak apkanemo Pedro:

—Nok, angenmangkok no ha’e, aptonnelha nak, hata elienio’ok nemmen iama tetekko m’a —lhna aptemak Jesús.

5Koka apkatemmoiangka lhnak Pedro m’a, lhna aptemak:

—Hengetlhekmoskama, pelhaso pvanko nellenlhaneiam aniekhe nenteniaikamok kelasma, mamma koka, nientelhek nenmakmekama. Koka atnek hata ehenkek aptakha nak lheiap —lhna aptemak Pedro.

6Ka apkelhaiangko lhnak iama tetekko m’a, apkel·hatsosaiangko lhna ngkeskama nkek kelasma m’a, nkaikama lhnak alietepkeskama iama tetekko m’a. 7Apkellakhetaiangka lhnak apkellaveiangka mok apmeio’ok apketlhelhma’ak mo’ok loma nemmen kakpota elpasmok ma’a. Nkellaneiangkek nak kelasma m’a, kaikama lhnak alvaivekamok hanet loma nemmen ma’a. 8Lhna songkek apvetai’o Pedro m’a, apkeltanentamo lhnak aptapno’ok napaqtek Jesús ma’a, lhna aptemak:

—¡Apveske, molatsekama ko’o, mangheipetkangva! —lhna aptemak.

9– 10Lhna aptemak Pedro m’a ngkanek nteiaiakmek nak apvalhok apvetai’o m’a, ntaiangkek nak na aplhamakho enenlhet’avok ma’a, kakpota nhan apketlhelhma’ak Jacobo kakpota nhan Juan, Zebedeo apketkak nak ma’a. Koka lhna aptemak Jesús apkanemo Pedro:

—Meniaga, atneskese ta apteniaikama enenlhet lheiap —lhna aptemak apkanemo Jesús.

11Netamen nak ma’a, apnengkanveiakmo lhnak nekha alvata loma nemmen, apkelieniekho lhnak na lhamakho apkelletsekama m’a, apkelieplekho lhnak na Jesús ma’a.

Aptaqmelkasekha Jesús lhema enenlhet lepra ato’

12Apnekhek nak natemma Jesús ma’a, apvai’o lhnak lhema enenlhet lepra ato’ m’a. Apkelteklhekvai’o lhnak aptapno’ok napaqtek Jesús akvakmo nnelha napa’at apteklheklhema lhepop, lhna aptemak apkapiosemmakpo apkelanei’o Jesús ma’a:

—Apveske, ¿apkeltave ie heialhnaskesekhak eiempek anak, he? —lhna aptemak.

13Ka apmangveiakmo lhnak Jesús ma’a, lhna aptemak:

—¡Hai, kalhnekha apiempek anak lheiap! —lhna aptemak.

Kolhvavek ankek nak aptaqmelekhak enenlhet ma’a, 14lhna aptemak Jesús apkanemo:

—Meleltennasama nkek enenlhet’avok aktakha nak apvetai’a. Ei’okha toka sacerdotes kakpota nhan esakhak lhema apkaikamok qaselha alhnekha apiempek ankok apkeltemo lhnak nanek Moises, kakpota elvetak sacerdotes apto have niapak ankek aptaqmelekha lheiap —lhna aptemak Jesús apkanemo m’a.

15Niaveiangkek nak apkeliekpelkema enenlhet’avok Jesús ma’a, apkaqnekho lhna mota apkellailhekamok apketlhekmoskama, kakpota nhan apkelvaiam apnakha apkeleltemo eltaqmelkasekhak anmaska apiempeiok ma’a. 16Koka Jesús aptengiaikama lhna mota metkelha la akiennoma lhma kakpota enmalhnak ma’a.

Aptaqmelkasekha Jesús lhema enenlhet metka aptapno’ok

17Apnengkek nak Jesús lhema pa’at apketlhekmoskamo lhnak ma’a, apkakhaiangkek nak na moklhem’a fariseos, kakpota nhan hengetlhekmoskama ley ma’a, apkeleltemo lhnak ellailhangkok aktemakha apketlhekmoskama Jesús. Apkeleniemai’ak nak apiav’akha temma Galilea, Judea, kakpota nhan Jerusalen. Ka apkeltaqmelkeskaiakmo lhnak Jesús anmaska apiempeiok aniem’o apmopvana Apveske. 18Netamen nak ma’a, apkelvai’o lhnak na enenlhet apkelletsoiam lhema metka aptapno’ok akieplomo nema aktangkeskama, apkeleltemo lhna niekhe elentalhneksek akieto apnakha Jesús ma’a. 19Mang nak elentalhnemak konne pa’at ma’a, ngkanek apentelhek nak enenlhet’avok akieto atong. Koka apkelkanantemo lhnak neten pa’at, apkelletsomavek nak enenlhet meniemhama neten. Apkel·hatsosaiangko lhnak na lhema iamet akpaihema aietseksek pa’at, apkelvaivesentamo lhnak koneng napaqtek Jesús. Mang na ntek enenlhet’avok ma’a av’alhok pa’at. 20Apvetai’o lhnak Jesús meliaskeiam apkellelto apkelletsoiam enenlhet ma’a, lhna aptemak apkanemo akmaska apiempek:

—¡Nnek aktemeskesangka nkek meliehekho apkaskamakha Eniapom Neten lheiap! —lhna aptemak apkanemo m’a.

21Nkellomavek nak apvalho’ok apkellengai’o escribas kakpota nhan fariseos, nkelpaqmetekama lhnak apvalho’ok ma’a:

—¡Aptevaske nak apvesai’a Eniapom Neten ha’e, vanlha niekhe Eniapom Neten apvankek etneskesama apankek meleliehekho apkellaskamakha m’a enenlhet! —lhna aptaiangkok ma’a.

22Apiamavek nak Jesús aktangkolha alietnaikama apaqto’ok ma’a, lhna aptemak:

—¿Se lha ntak alietnangka nak apaqto’ok ketlhengkap ke, he? 23¡Ngva, heleltennes no! ¿Se lha alhevai’a nkek antek anganak metka aptapno’ok anak ke, nnek aktemeskesangkankek meliehekho apkaskamakha Eniapom Neten lheiap, nlho ka la nhan etnemekha neten, elheng ma’a. Se lha alhievai’a nkek ke, he? 24Kolhva ta alvetaskesek akietnema apmopvana Enenlhet Apketka nak kakpota etneskesama apankek meleliehekho apkellaskamakha Eniapom Neten enenlhet’avok —lhna aptemak Jesús.

Ka aptemo lhnak na Jesús apkanemo enenlhet metka aptapno’ok:

—¡Etnemekha neten lheiap, ema nema aktangkeskama nak, etaqhekha ta apnemakha’! —lhna aptemak.

25Kolhvave kankek nak apkenmekhak neten napaqtavek enenlhet’avok ma’a, apmamo lhnak na nema aktangkeskama, aptaqhekho lhnak apnemakha akieplomo apiavenkaskesaikama apvesai’a Eniapom Neten. 26Nkeliemaskangkek nak apvalho’ok enenlhet’avok ma’a, ka apkeltemeskeskamo lhnak na apiavai’a apankek Eniapom Neten. Mang nak na ngkeskamak apkellai’a m’a, lhna aptaiangkok:

—¡Aii, qaselha mongvetai’o nak nelvet’ak aknem anak! —lhna aptaiangkok ma’a.

Aplannekama Jesús Levi

27Apteiapmek nak Jesús ma’a, apvetangveiakmo lhnak lhema enenlhet apvesai’a Levi. Apnengkek nak akieto apmakmeiangkelha apkenmamakha patakkom impuesto ankok, lhna aptemak Jesús apkanemo:

—Heieplomaha —lhnak aptemak

28Apkenmekho lhnak neten Levi m’a, apnengkenekhek nak lhamakho qaselha apmakmeiangkolha anko’ok, ka apieplekho lhnak Jesús ma’a. 29Ka apkelanei’o lhnak alhaie aktaqmelaikama lhma Levi m’a apketsevaskeskamo apvesai’a Jesús, ka apkellanemo lhnak na apkenmakmekama lhemek kakpota nhan aplhamakha enenlhet elpasengvakhak ma’a nentoma. 30Apkakhaiangkek nak ma’a moklhem’a fariseos kakpota nhan escribas, apkeliaskamo lhnak apatno’ok apkakhangkelha Jesús apkeltamesaikamok ma’a, lhnak aptaiangkok apkellanemo:

—¡Selha ntak aptavokho nak lhemek ketlhengkap apkenmaikamok anak patakkom impuesto ankok kakpota nhan enenlhet apkellanekamok anak ngkollatsekama, he! —lhnak aptaiangkok ma’a.

31Ka apkatemmoiangka lhnak Jesús ma’a, lhna aptemak:

—Enenlhet la metka akmaska apiempek, meniaimekpok na ponha niapom ma’a. Koka enenlhet la akmaska apiempek apkaimekpek ponha niapom ma’a. 32Have ko’o asmahai’a alvenama apkelpeivomo nak, vanlha koka asmahai’a allavama m’a enenlhet apkellanekamok anak ngkollatsekama kakpota eliaqmongkasekhak mo’ok apvalho’ok —lhna aptemak Jesús.

Apketlhekmoskama Jesús apkeltemakha apkellaqhaskesammakpo mek

33Lhnak aptaiangkok apkellanemo enenlhet Jesús ma’a:

—Koka apkeltamesaikamok anak Juan apkellavkeskama iemmen aniapom kakpota nhan apkeltamesaikamok anak fariseos aptaiangkelha lhna mota apkellaqhaskesammakpo apankek mek kakpota nhan melleskama elelmalhnangkok ma’a. ¿Selha ntemak apkeltamesaikamok anak lheiap metnaiangko nak na m’a, he? —lhna aptaiangkok ma’a.

34Ka apkellatemmoiangka lhnak Jesús ma’a, lhna aptemak:

—Mankaimelhkak ellaqhaskesakpok mek apkellelto apkellanemmap elpasengvomok aliemhapma apno la nhan mokhom apokkenammap apieseksek ma’a. 35Koka ngkovomok hato ka knem nema akiantemekhelha apokkenammap anak ma’a, hato ka ellaqhaskesakpok mek ma’a —lhna aptemak Jesús ma’a.

36Lhna aptemak na mokhom Jesús apietkeskama:

—Mangkolatsema aniaqtemenek napokha apketkok ietamopai’a aphalhnankok la’a, angelapama nentalhnema aphapak. Ngkanek antevaksek hata aphalhnankok lhek nentalhnema, melhehek hata po’ok ietamopai’a.

37Mangkolatsema nhan aniatmok vino alhnankok iempehek lhennenga akietnemakha la’a, ngkanek nkopaklhek hata aniem’o aliaklheiam vino alhnankok ma’a, nentevaskek na vino kakpota nhan iempehek. 38Koka ntasek aniatmok vino alhnankok iempehek alhnankok nahan. 39Koka enenlhet apiama la mota vino lhennenga akietnemakha, meltehek einek ma’a vino nak alhnankok ngkanek akto tep ankek akmases ma’a vino nak lhennenga —lhna aptemak Jesús ma’a.