Phili 1 | TmfSC | STEP | Ko’o Pablo kakpota nhan Timoteo, nengelelto hengellasennaikama Jesucristo, nketlhenkek engelvalho’ok apkellelto apkelpokkenammap apkakhangko ham akieto natemma Filipos, apkellelto apkelpasmekha Cristo Jesús. Ka nhan nketlhenak na engelvalho’ok ennengko’o apkelemhama apmaniaie ham kakpota nhan diaconos.

Philippians 1

Aklheianma apvalhok Pablo ko Filipo

1 Ko’o Pablo kakpota nhan Timoteo, nengelelto hengellasennaikama Jesucristo, nketlhenkek engelvalho’ok apkellelto apkelpokkenammap apkakhangko ham akieto natemma Filipos, apkellelto apkelpasmekha Cristo Jesús. Ka nhan nketlhenak na engelvalho’ok ennengko’o apkelemhama apmaniaie ham kakpota nhan diaconos. 2 Nengeleltavek Eniapom Neten kakpota nhan Apveske Jesucristo eltaqmelkeskesek apkellaniemhaikama, ellangkok na altaqmelaikama apvalho’ok ketlhengkap ham.

Pablo aptema gracias Eniapom Neten

3 Gracias ko’o astahak Eniapom Neten neksa aklheianma mota evalhok ketlhengkap, 4 askenmalhneskaskek na m’a akieplomo akpaihekha evalhok kakpota eltaqmelkesek moklhem’a ketlhengkap ma’a, 5 ka ngkanek ampai’akhasekha lhta apkellengai’o sekhek ania’a aktaqmanma akvakmo nenvanlha nak, helpasmongke lhta mota asmakmekama nak. 6 Ampai’osekha lhta apkelanai’a Eniapom Neten qaselha altaqmanma apieseksek anak ketlhengkap, have niapak ankek ngkovomok hata aknem apeneskama m’a akvakmo apvaktamo ta Jesucristo hengke’e. 7 Nietavek atnek aklheianma evalhok ketlhengkap akieplomo akpaihekha evalhok ngkanek helpasmoma mota neska asmakmekama aniem’o Eniapom Neten aktaqmanma nkek helanei’o. Hai, niekhe asnema konne nengaqlhengkasemmalhkelha kanhan napaqtavek apkelveskai’e kakpota angvasennalhko ehenke aniem’o askanemmalhka moiekaksek aspaieskama ania’a aktaqmanma, helpasmongke mota nhan ketlhengkap ma’a. 8 Apiavek koka Eniapom Neten avanhek heliepvaiam asmahai’a alvetekhak ketlhengkap ham aniem’o akiavai’a askellamelaiam aniem’o nhan Cristo Jesús.

9 Askenmalhnema nhan Eniapom Neten elvanengkeskesek apkellasekhammakpo apieseksek anak ketlhengkap, kakpota nhan ellangko aknema apkeliamo kakpota eliangvomhok na 10 akietemo nke nak nentemakha. Netamen ma’a elloka ta metka apkellanekamok qaselha ngkolatsekama, mangkolhek hata nhan apketselhnanemmap napaqtek Cristo apvaktamo ta mokhom. 11 Hai, ellanangkok hata ngkeskama qaselha altaqmelo ketlhengkap ham aniem’o apkelpasmoma Jesucristo. Netamen hata nhan eltakneskasangkok, ellahok hata nhan Eniapom Neten apvesai’a apkellelto la apkelvetai’a enenlhet’avok ham.

Aplheianma Pablo aktaqmanma angasennama Cristo

12 Ketlhengkap elialheng’a, smak’ak aleltennaksek kolhvave nak ma lhta ngkolatsekama nkek ko’o askaniemhaikama, nkaqhok koka ngkolatsekama nak malha heihengekamok ntemak ma’a aspaieskamo ania’a aktaqmanma. 13 Apkeliavek aplhamakho enenlhet’avok kanhan apkellanekama temma aptaqmanma apnemakha apveske, asmammalhko aniem’o apvesai’a Cristo. 14 Neksa apkellengai’a lhnak lhta engelialheng’a asnema nengaqlhengkasemmalhkelha nak, avanhek na lhta apkelvaskapekho apkelpaieskama ania’a aktaqmanma metka apkellai’a akieplomo nhan meliaskeiam Apveske.

15 Moklhem’a lhta apkeleltennasema ania’a aplhenammap Cristo aniem’o heliasepkeskama ko’o apteniangke lhta nhan apkenmahai’a helammelhekha, napokha alhto ka apkeleltennasema ania’a aplhenammap Cristo altakmanma apvalho’ok 16 aniem’o akietnema apkellasekhai’o. Apkeliavek na apto Eniapom Neten heiaikamok asmakmekama nak kakpota angvasennalhko anio’ok ania’a aktaqmanma. ^{▼▼Mo’ok vakkahak aktalhesammalhka nietnak akiaqmoiekha mo’ok akietnemakha versiculos 16 kanhan 17.} 17 Koka napokha apkelpaieskek ania’a aktaqmanma aniem’o apkenmahai’a etnangkok neten apankavek napaqtavek enenlhet, have iokhalhmoie’, vanlha koka apkenmahai’a henaqtevaksek ko’o neksa asnema hengke’e nengaqlhengkasemmalhkelha nak. 18 Koka nkaqhoho, niekhe have iokhalhme, nlho ka la iokhalhme, mpaihakhek evalhok ko’o ngkanek nnek akpaieso ania’a aplhenammap Cristo.

Koka nkopaihekhak hata mokhom evalhok ma’a 19 ngkanek asiavek ko’o ngkolhek hata evongkaso tep aniem’o helelmalhneskeskama ketlhengkap, aniem’o hepasmok hata nhan Espíritu apankok Jesucristo. 20 Hai’, nkel·halhnema evalhok manghenmangkaksek hata enenlhet’avok, have niapak ankek, elvetak hata aplhamakho akietnema asmopvana aniem’o Cristo, niekhe astema ehalhnankok mokhom nlho ka la angvetsepok hatelhaha. 21 Ka asto la mokhom ehalhnankok, angvasennama ta mota mokhom Cristo, koka asketsepo la’a, ntasek ankek ngkotnek ma’a. 22 Koka asto la mokhom ehalhnankok evankek apasmok mokhom kakpota altakmelkeskesek apkellangiemhaikama aplhamakho enenlhet’avok hengke’e, moihok aktemakha hanet qaselha nak ko la aktakmelakha atnek ma’a. 23 Nientelhek ankek angeliekiaksek ma’a, askeltave niekhe angvetsepok kakpota amhangkok ma’a alhnemok napokha Cristo, koka m’a neten ankek aktaqmanma. 24 Koka ntasek na atnek ehalhnankok mokhom hengke’e kakpota alhenkesek askelpasmoma ketlhengkap. 25 Hai’, asiavek ko’o askaimelhke mota apieseksek anak ketlhengkap ham, ka ngkanek mongvetsepak mokhom, alpasmok hata mokhom kakpota nkovanamok meliaskeiam, elloka ta nhan alpaihekha apvalho’ok. 26 Aniantak hata mokhom ham apieseksek anak ketlhengkap, nkolpaihekhak hata apvalho’ok helvet’o ta aptemakha Cristo hepasmoma m’a.

Aktaqmanma anieplavkesek aktemakha aklheianma ania’a aktaqmanma

27 Vanlha askeltavek allangkok lhema aspaioma askellanemakha etnangkok ketlhengkap, ellanamo mota qaselha akpeivomo nkoie aktemakha nak hengetlhekmoskama ania’a aktaqmanma aniem’o Cristo, nkaqhok moniakhe’ nlho ka la aniakhak ham askeltavek koka aiho ehenke nheklhek kelha aliennaktema meliaskeiam, aknemo nhan mo’ok apvalho’ok apkellammelhma la nhan akientalhnema akvai’a la’a aniem’o m’a meliaskeiam ania’a aktaqmanma. 28 ¡Mellaga nkek alammelhaikama nak! Nkotlhenek hata av‘alho’ok nkonaqtevasalhkak ma’a, nkotlhenek hata nhan av‘alho’ok elvongkesek hata tep Eniapom Neten ketlhengkap ma’a. 29 Eniapom Neten apkellaikamok ketlhengkap qaselha aktaqmanma nkek akvesai’a meliaskeiam Cristo, apkellaikamok na apkellengaiangko akientalhnema aniem’o apkelleliehekho Cristo. 30 Ka ktemo lhta ko’o askaniemhaikama aslengaiangko lhta akientalhnema akvakmo nhan kolhvave nak, apkeliavek ketlhengkap ma’a.