Phili 3 | TmfSC | STEP | Ketlhengkap elialheng’a, kolpaihekha apvalho’ok aniem’o apkelpasmekha Apveske. Smak’ak altakhengveskakhak mokhom asnaktalheskeskama sekhe lhta, mangheiastengak askeltakhengveskekha astalheskama nak ngkanek nkelpasmek ketlhengkap kakpota metlhenmek.

Philippians 3

Aktemakha ley kanhan akiaqtemenammalhka nekhatko’ok nengammelhakha

1 Ketlhengkap elialheng’a, kolpaihekha apvalho’ok aniem’o apkelpasmekha Apveske. Smak’ak altakhengveskakhak mokhom asnaktalheskeskama sekhe lhta, mangheiastengak askeltakhengveskekha astalheskama nak ngkanek nkelpasmek ketlhengkap kakpota metlhenmek. 2 ¡Ellaho ta enenlhet malha nak semheng! Hengetlhekmoskama meliamolhma nak, apkenmak’a mota eliaqtemenek apiempeiok ketlhengkap, koka mankaimelhka niekhe etnangkok ma’a, 3 ngkanek aplhamakho apkellelto nak apkellasennaikama Eniapom Neten aniem’o nhan Espíritu, malha nhan nema aliaqtemanma nekhatkok apkellammelhakha m’a ntak napaqtek ma’a. Koka akto nhan neten ankek akiaspommalhka m’a mangkolhnok ma’a aliaqtemenammalhka nekhatkok apkellammelhakha judios apankave’. Nkellaqhama ennengko’o engelvalho’ok aniem’o mongeliaskeiam Cristo Jesús, mongelleltemo ennengko’o ngkolhek hengelleltaqmelkeskaso aniem’o nelieplavkeskama aptaiangkolha nak judios. 4 Evanke panke niekhe moi’askamek Eniapom Neten kakpota hetaqmelkeskesek askaniemhaikama aniem’o nhan asieplavkeskama aptaiangkolha nak judios, 5 nnengkek nak hetneskeskamo nhan akiaqtemenammalhka nekhatkok askammelhakha akvaiakmo kelha 8 aknem asteiam, asto nhan ko Israelita apanke askeniem’o nhan apasmekha apketkak neptamen Benjamin annenga, asto hebreo panke’. Asto lhta nhan aspasmekha fariseos apkellelto nak apkelieplavkeskama akiennaktema nkek ley Moises, 6 ko’o lhta nhan asto neten ehenkek asieplavkeskama ley anak, asmenlhenaikama lhta nhan iglesia m’a, mankapvanke lhta lhema enenlhet la heltennaskak moieplavkeskama ley Moises anak. 7 Koka lhamakho qaselha lhkek askanemo lhta ko’o akto neten ankek akiaspommalhka m’a, koka mmaskek kolhvave nak aniem’o Cristo. 8 Koka lhamakho qaselha lhta m’a kolhva koka nlhenkek evalhok mankoliennaktema m’a, have kto nak qaselha altaqmelo nak asiekpelkangveiakmo nak Cristo Jesús apveske ehenkok, askelhakhangkek lhamakho qaselha lhta malha basura ntemak ma’a aniem’o lhta asmama takha Cristo, 9 aspasmekho nhan ma’a. Asieniekhek astema moi’askeiam askanemo lhta aspeivomo aniem’o lhta askeliehekho ley Moises, kolhva koka asiavek asto aspeivomo aniem’o moi’askeiam Cristo. Hai, hetneskaskek aspeivomo Eniapom Neten aniem’o m’a mongiaskeiam anak. 10 Asmak’ak aiavenkasangkok mokhom asiangveiakmo Cristo, asmak’ak na annangkoho nema akmovana aklhatekhaskeiakmo lhnak Cristo apieseksek apkenmaskengvaiakmo, ntasek na annangkok akientalhnema akvakmo asketsepo aptemo lhta nhan apkaniemhaikama m’a Cristo, 11 netamen hata nhan ma’a alhatekhangvomok mokhom ko’o m’a, koka moihok aktemakha ta m’a.

12 Koka movakmok mokhom aktakha nnelha asavhongvaiakmo qaselha astakha lhkek askellano, mopenesak mokhom askelanekha astakha, koka nheklhek alhengkeskama kakpota alanekhak astakha ngkanek Cristo heliekieske lhta kakpota atnek aspenesammalhka. 13 Ketlhengkap elialheng’a, malha niekhe ntak nelpaivasemmalhka nenganiemhaikama nak, mov’ak ko’o mokhom aktakha nnelha akiensasemmalhka la’a, asiaqhapkek koka mokhom mongveskama metka aklheianvekho evalhok netamen alhta, 14 kakpota avomok aktakha la nnelha malha akiensasemmalhka la’a kakpota alhkak akiavai’a akianmoma Eniapom Neten apmahai’a heiangkok, heiavema lhta m’a aniem’o nhan Cristo Jesús.

15 Hai, nengelelto la aliennaktema mongeliaskeiam ntasek hata nkotnangkok atlhenaikama engelvalho’ok ma’a astakha lhkek alheianma, koka napokha enenlhet nketlhenkek apvalho’ok mok aktemakha m’a, Eniapom Neten hato ka elvetaskesek lhema qaselha alhnakho nkek ma’a. 16 Ntasek angelloka mota aktakha la akietnema mongiaskeiam.

17 Ketlhengkap elialheng’a, elieplavkes hata astemakha nak ko’o, ellanhok na napokha aptaiangkolha apketlhengkeskama nak aktaqmanma, apkellelto nak apkelieplavkeskama nentaiangkolha nak ennengko’o. 18 Asmak’ak altakhengveskakha mota astakha lhta askeleltennaskama, askeleklhangvekama neten kolhvave nak aniem’o mantek enenlhet apkellamelhaikama ania’a aktaqmanma aktemakha apketsepma lhta Cristo neten iamet aktenneskama. 19 Koka enenlhet’avok anak enaqtevasakpok hata ngkanek vanlha mota anmahai’o nkek apvalho’ok ellanangkok qaselha ngkolatsekama apanko’ok apankavek, apkelakpek apkellanengko la qaselha henmankaskama nak, vanlha mota atlheianma apvalho’ok qaselha aknaiangko nak hengke’e nalhepop anak. 20 Ennengko’o koka nellavakha neten, avanhek ankek hata ngkotnek nelel·halhanma neltemo elhiemok apto hengelvongkeskama ta tep, apto nhan apveske engankok Jesucristo. 21 Eliaqmongkasekhak hata mo’ok aktemakha eniempeiok anak nkoliennaktema, hengellangkok hata nhan eniempeiok tep ankek aktaqmanma, ka aktemo nak apiokha m’a, apvankek na enmama lhamakho qaselha aniem’o akietnema apmopvana m’a.