Rev 10 | TmfSC | STEP | Asvet’a lhta mokhom lhema ángel aknema apmopvana apiavai’a apanke apvenaktema nhan, apvaivantamo akieplomo aiseksek iephopai’a. Malha lhta nha pemhet ntak takhaplhet ma’a, malha nhan aknem napa’at kanhan malha lhta poste apio’ok akieplomo talha.

Revelation of John 10

Lhema ángel vakkahak atkok apmaikama apmek

1 Asvet’a lhta mokhom lhema ángel aknema apmopvana apiavai’a apanke apvenaktema nhan, apvaivantamo akieplomo aiseksek iephopai’a. Malha lhta nha pemhet ntak takhaplhet ma’a, malha nhan aknem napa’at kanhan malha lhta poste apio’ok akieplomo talha. 2 Apmaikama lhtoka apmek lhema vakkahak atkok nema akmaieskama, apmenek akiennakha apteiokme lhta takhalhet alvata, mo’ok apmenek apsangkalvelha lhtoka apteiokmok ma’a takhalhet lhepop. 3 Akiennaktema nke lhta apielhaivoma m’a ángel anak malha akto nak iama kmeiva. Ka allatemmongka lhta nhan 7 apkelelhtenioma m’a. 4 Asmak’a lhta niekhe atalhaksek ma’a aktakha lhta aslengai’a 7 apkelelhtenioiam, koka lhta ntak nema aliatekama heiano m’a aniem’o neten:

—Metalhes ankek aktakha aplengai’a 7 apkelelhtenioiam anak, eilhaskeso toka —lhta ntak heiano nema aliatekama m’a.

5 Netamen apkenengkasakho lhta akiennakha apmek neten ángel apkemhama lhkek alvata kakpota nhan takhalhet lhepop. 6 Lhta aptak apto aptema juramento m’a akieplomo apvesai’a apto apkaniemhaikama metka akvaiam annelha aliekaikamok iantelhkapa, apto nhan apkelanai’a neten kanhan lhamakho aknaiangko m’a neten, apto nhan apkelanai’a nalhepop kanhan lhamakho qaselha aknaiangko nak nalhepop anak, apto nhan apkelanai’a alvata kanhan lhamakho kaselha aknaiangko m’a konne iemmen, lhta aptak:

—Kolhva mmaskek nelailho, 7 apaivasakho ta trompeta septimo ángel ngkovomok hata aknem aktemakha akielhammalhka apeneskamo apmak’akha etnek Eniapom Neten, aptemakha lhnak nanek na apkellanema apkellasennaikama apkeleltennaskamo ania’a apankok —lhta aptak heiano ángel ma’a.

8 Netamen ma’a, lhta ntak mokhom heiano nema aliatekama lhkek aniem’o lhta m’a neten, lhta ntak:

—Eniakha apkenmangkolha nak ángel apkenmangka nak ma’a takhalhet alvata kakpota nhan takhalhet lhepop, evom vakkahak atkok anak akmaihema apmek —lhta ntak heiano nema aliatekama m’a.

9 Ka asmangko lhta m’a askenmalhnengvakmo ángel vakkahak atkok, lhta aptak heiano m’a:

—¡Ema, etav hengke’e! Hata aptavo ta nkatsek hata apatong, malha ta nkotne kto nak ietaievhene la apiemmenek, hato ka akvakmo ta apvakmo, nkaskama ta apvalhok —lhta aptak ángel.

10 Ka asmo lhta vakkahak atkok ma’a apmaikama lhta ángel, astavo lhta m’a. Have lhta nta niapak ma’a, atse lhta ntak ehetong anak, koka evakmo nkaske lhta. 11 Netamen alhta aptak heiano mokhom:

—Eltennes hata mokhom ania’a apmak’akha etnek Eniapom neten napaqtavek enenlhet’avok apnakha la temma, apiav’akha temma, lhamakho aktemakha la apkelpakmeiasma apkellavakha, kakpota nhan napaqtavek apkeliav’akha apkelveskai’e —lhta ntak heiano nema aliatekama.