Rev 14 | TmfSC | STEP | Netamen asvet’o lhta Nepkesek Apketkok apkenmangka takhalhet nalhma akhaiam Sion. Apketlhelhma’ak alhto ka 144.000 enenlhet’avok ma’a, nnangke lhta nhan alqasemmalhka alpaihakha napaqta’a apvesai’a Nepkesek Apketkok kakpota nhan Apiapom.

Revelation of John 14

Apkennekmasekamok 144.000 apkeliekiesammap

1 Netamen asvet’o lhta Nepkesek Apketkok apkenmangka takhalhet nalhma akhaiam Sion. Apketlhelhma’ak alhto ka 144.000 enenlhet’avok ma’a, nnangke lhta nhan alqasemmalhka alpaihakha napaqta’a apvesai’a Nepkesek Apketkok kakpota nhan Apiapom. 2 Asleng’o lhta nhan akpaivoma aiempek aniem’o neten, malha lhta ntak akiavai’a aksepkanmakha la iemmen. Malha lhta nhan apkelelhtenioma akiavai’a nkek ma’a, malha lhta nhan arpa la apentalhnema apkelpaivaskama enenlhet. 3 Apkennekmasengke lhta nhan alhnankok nennekmaskama naqtek aptanema apveske, naqtavek na 4 kaselha allaniemhaiangka m’a kakpota nhan napaqtavek metno apketko’ok. Mamma lhta enenlhet eniapvanak nennekmaskama nak ma’a, vanlha lhtoka apkellapvanko 144.000 alhta enenlhet’avok apkellelto nema alvongkeskama tep apieseksek enenlhet takhalhet lhepop. 4 Apkellelto lhta nhan metka apkelpaisengkeskama apkeliokha menmangveiam na ngkelvana, metka nhan apkellanei’o ngkelvana. Vanlha lhta mota apkelieplekama Nepkesek Apketkok apmangkolha la’a. Apkellelto lhta nhan nema alvongkeskama tep apieseksek enenlhet’avok kakpota nhan malha apkenmesemmakpo apankavek apkeliokho Eniapom Neten kakpota nhan Nepkesek Apketkok. Malha kto nak qaselha nenmeskama amanie nak nenvetai’a nentoskama kanhan akielhna. 5 Mamma nhan anmovanka ania’a apatno’ok, metka nhan alpaiseiam apvalho’ok napaqte Eniapom Neten.

Apkanet’olhema ángeles apkelletsoiam ania’a

6 Asvet’o lhta mokhom apkempangka aiseksek neten po’ok ángel, apsekama lhtoka ania’a aktaqmanma mangkotnengvaiam annelha kakpota eleltennasama takhalhet lhepop lhmankek ham. Lhamakho aktemakha apkellavakha, aknema apkelpasmekha apketkak neptamen, lhamakho aptemakha apkelpaqmeiasma kakpota nhan natemma apketkok. 7 Lhta aptak apiennakteso apaivoma:

—¡Ellaho Eniapom Neten! Eliavenkaskesama ta nhan apvesai’a ngkanek ngva’ak aknem kakpota eliekpelkok aplhamakho enenlhet’avok lhmankek ham apkellanekamok altaqmelo, ngkolatsekama nhan. Elteklhemok hata nhan aptapno’ok napaqtek ma’a aniem’o apkellai’o apto apkelanai’a neten, nalhepop, alvata akiav’akha kakpota nhan akteiapmakha iemmen aktaqmanma —lhta aptak ángel.

8 Ka apteiapvo’o lhta mokhom po’ok ángel, lhta aptak ma’a:

—Aptevasekpe apiokho apiav’akha temma Babilonia ngkanek malha alienkeskaiam antak vino nkok anmokhetkeskama enenlhet kakpota nkonmensavkesek mo’ok apkellavakha —lhta aptak ángel.

9 Ka apteiapvo’o lhta mokhom po’ok ángel, apqanet’olhema lhta apvakmok ma’a, lhta aptak mokhom apiennakteso apaivoma:

—Hata apkelteklheio ta aptapno’ok naqtavek kaselha nevhak nengai’o lhta, akiokha lhta nhan nema akietkeskamo m’a, apkaiangko la nhan alqaskama akpaihakha napa’at nlho ka la nhan apmek. 10 Koka enenlhet anak ma’a einek hata metka apiekai’a vino aniem’o aploma Eniapom Neten, ka vino nke nak apeneskamo lhta nohaikok aploma m’a, elhkak hata nhan akiaqmoiekha aptemakha akieplomo talha kanhan azufre napaqtavek ángeles apkelpokkenammap kakpota nhan Nepkesek Apketkok. 11 Mankotnengvomek hata nha nnelha anmekha neten talha eten ankok nema akiaqmongkasekha aktemakha m’a. Mankotnengvome ta nnelha apkeliampai’a apkellelto nak apkelteklheikamok aptapno’ok naqtavek kaselha nevhak nengai’o kanhan nema akietkeskamo lhta akiokha alanemmalhka m’a. Meliamposakpek hata nhan aknem, pelhasep, apkellelto nak nema alqaskama akvesai’a kaselha nevhak nengai’o apiempeiok ma’a —lhta aptak ángel.

12 Hata akvo’o ta aknem anak ma’a akientalhnema, elvetakpok hata apkelvaskapma apkellelto nak apkelpokkenammap, apkeleliehekho nhan henganemakha apankok ma’a kanhan meliaskeiam Jesús.

13 Netamen ma’a asleng’o lhta mokhom nema aliatekama neten, lhta ntak heiano:

—Etalhes hata ham, aktakmelakho nke ta nkotnek apkellelto apkeletsepma nenvanlha nak ma’a kanhan emanie ta apkelpasmekha nak ma’a Apveske engankok.

—Hai, ka aptemak na Espíritu m’a eliamposakpok hata m’a aniem’o apkenmakmekama ngkanek metka apkelvatesaikamo apkellanekamok qaselha altaqmelo neksa apkellangiemhaikama m’a nalhepop —lhta ntak ma’a.

14 Asvet’a alhta nhan lhema iephopai’a akmopai’a nke, apne lhta neten iephopai’a lhema enenlhet malha lhta Enenlhet Apketka nak ma’a. Nietne lhta apkelhanma apqatek oro alienmoma, apmaikama lhtoka apmek iama pelettav akhalhema akmahante nkoie. 15 Aptepke lhta nhan konne Eniapom Neten apnemakha lhema ángel, apiennakteske lhta apaivoma apaqmetkeso m’a apto lhta apnema neten iephopai’a, lhta aptak apkano:

—Eliaqtemen iama pelettav apvohok anak kakpota nhan enaklhek apielhna ham nalhepop anak ngkanek apataiaptak ma’a, ngvakmek aknem nennaklhemakha akielhna —lhta aptak ma’a.

16 Ka apkeliaqtemeno lhta apvohok ma’a takhalhet lhepop anak akieplomo iama pelettav akhalhema apto lhta apnema neten iephopai’a, apkankesakho nhan apielhna m’a. 17 Netamen mokhom aptepo lhta po’ok ángel konne Eniapom Neten apnemakha, apsopme lhta nhan iama pelettav akhalhema aknema ahantek. 18 Netamen ma’a aptepke lhta mokhom po’ok ángel akieto alvanlhemmalhkelha qaselha, apmopvana lhta nnak talha m’a. Apkavengka lhta nhan ma’a apiennakteso apaivoma apto lhta apmaikama iama pelettav akhalhema, lhta aptak apkano:

—¡Eliaqtemen uva akielhna avakheiok nalhepop anak ham, iama pelettav akhalhema nak nema ahantek anko ie, ataiantak ham! —lhta aptak ángel.

19 Ka apkeliaqtemeno lhta uva avakheiok akielhna akieplomo iama pelettav akhalhema, ka apkelho lhta nhan konne nemakha alietsemongamo m’a, koka akietkesammalhka m’a aploma Eniapom Neten. 20 Ka nema nak alietsemongama uva akielhna akieto m’a nepiava temma, koka ntepkek ema m’a nemakha alietsemongamo uva akielhna akvakmo m’a akietnema m’a nengatkeskamakha apatong etanlheng, akvakmo nhan 300 kilometros akietnema akpaihengvaiam ma’a.