Rev 15 | TmfSC | STEP | Asvet’a lhta mokhom mo’ok qaselha mongenatkeskama akiavai’a nkek neten, akiemaskama engvalhok alhta m’a. 7 ángeles nnangkok 7 aktakha nnelha qaselha akmovana hentevaksek. Hata aksavhelhko ta m’a, aktakha nnelha ta aploma Eniapom Neten.

Revelation of John 15

7 ángeles apkelletsoiam 7 qaselha akmovana hentevaksek

1 Asvet’a lhta mokhom mo’ok qaselha mongenatkeskama akiavai’a nkek neten, akiemaskama engvalhok alhta m’a. 7 ángeles nnangkok 7 aktakha nnelha qaselha akmovana hentevaksek. Hata aksavhelhko ta m’a, aktakha nnelha ta aploma Eniapom Neten. 2 Asvet’a lhta nhan malha alvata alhnai’o nkek iemmen malha ieiam appok la’a nenvetai’o konne, nema angkaiekha lhtoka talha. Apkelaknama lhta m’a takhalhet iemmen alvata apkellelto lhta apkeltemeskesekha koneng qaselha nevhak alhta nengai’o kanhan nema akietkeskamo lhta alanemmalhka akiokha m’a. Mellaiangko lhta nhan nkolelqaksek numero ankok akvesai’a apiempeiok ma’a. Apnangke lhta nhan arpa apankok Eniapom Neten ma’a. 3 Apkennekmasengke lhta nhan apkennekmaskamo lhnak nanek Moises apto apkasennaikama Eniapom neten, kanhan nennekmaskama apvesai’a Nepkesek Apketkok, ka ntemak hengke’e:

—Aliavai’a nkek qaselha apkelanai’a lheiap, hempelapkeskama nhan, apto apveske vanlha lhema aphapak aknema apmopvana apanke lheiap Eniapom Neten, apkelan’a mota qaselha akpeivomo kakpota nhan akto akietemo nkoie lheiap apto apveske takhaplhet’ok aplhamakho apkellavakha. 4 Ellahok hata mota enenlhet’avok lheiap Apveske, eliavenkaskesok hata nhan apvesai’a ngkanek apto Apokkenammap memangveiam ngkolatsekama, lhamakho apkellavakha lhmankek ham elelhiemok hata apnakha lheiap kakpota elteklhengkok aptapno’ok napaqtek ma’a aniem’o apkellai’o, ngkanek apkelvetai’ak akpeivomo qaselha apkelanai’a mota lheiap —lhta aptangkok apkennekmasengko m’a.

5 Netamen ma’a asvet’a lhta nhan neten, akmaihakho m’a pa’at akpokkenammalhka, kaselha aiempeiok akpaklhenammalhka. Nnankek ma’a metaimong nema alpaieskama alqasemmalhka annemo mo’ok apvalho’ok Eniapom Neten kanhan Israel. 6 Ka apkelentepo lhta 7 ángeles alhta m’a apkelletsekama lhta 7 qaselha akmovana hentevaksek. Apkelentalhnema lhtoka ietamopai’a nema altema lino, apkelalhnai’o nhan, apkellapommatke lhta nhan ma’a, kakpota nhan apkeliapnama akieto neplhet’a koneng apnenio’ok alienmomo nkoie oro. 7 Netamen alhta m’a 4 lhta kaselha allaniemhaiangka, lhema lhta m’a nkellankongvakmo moklhem’a nohaikok oro alienmomo 7 ángeles, allaneiangko lhtoka m’a aploma Eniapom Neten apto mangkotnengvaiam annelha apkaniemhaikama. 8 Nlan’ave kanke lhta nhan ma’a eten konne pa’at apokkenammap aniem’o apnek Eniapom Neten ma’a akieplomo akiavai’a apmopvana. Ma lhtoka nhan elentalhnak enenlhet’avok sekhek ma’a, hato ka aksavhelhko la m’a 7 qaselha akmovana hentevaksek apkelletsoiam lhek 7 ángeles ma’a.