Rev 16 | TmfSC | STEP | Asleng’o lhta nhan nema aliatekama akiennaktema nkek aktepo m’a konne pa’at akpokkenammalhka, lhta ntak allano 7 ángeles alhta m’a: —Enmeiakha ha’e, eliangkenamok hata 7 nohaikok anak allaneiangko Eniapom Neten aploma takhalhet lhepop anak ma’a

Revelation of John 16

Nema aliangkanma 7 nohaikok allaneiangko aploma Eniapom Neten

1 Asleng’o lhta nhan nema aliatekama akiennaktema nkek aktepo m’a konne pa’at akpokkenammalhka, lhta ntak allano 7 ángeles alhta m’a:

—Enmeiakha ha’e, eliangkenamok hata 7 nohaikok anak allaneiangko Eniapom Neten aploma takhalhet lhepop anak ma’a —lhta ntak nema aliatekama.

2 Ka apmeiakho lhta apmanie ángel ma’a, apiangkeno lhta nohaikok takhalhet lhepop, aktepo lhta nhan al’ok ngkolatsekama nkek, anmaska nkek nahan takhaplhet’ok apkellelto lhta aknaikamok apiempeiok alqama ankok kaselha nevhak nengai’o m’a. Apkellelto lhta nhan apkelteklheikamok aptapno’ok naqtek akiokha nema akietkeskamo lhta akiokha m’a kakpota ellahok ma’a.

3 Ka apiangkeno lhta mokhom segundo ángel nohaikok takhalhet alvata lhmankek ham, ka aktakho lhta iemmen ema m’a. Malha lhta ema apanko’ok la apkeletsepma enenlhet, aletsepo lhta nhan lhamakho nkek kaselha alloma la nemmen ma’a.

4 Apiangkenakho lhta mokhom tercer ángel nohaikok takhalhet alvata kakpota nhan takhalhet alenteiapmakha la iemmen akmases, ka altakho lhta nhan iemmen ema m’a. 5 Netamen asleng’o lhta nhan apkeliatekama ángel alhta m’a nemmen, lhta aptak:

—Apveske, lheiap apto apeivomo panke, apto apnema kolhvave nak, apto nhan apnema lhnak nanek tep nak nanek, apto nhan Apokkenammap apanke memangveiam ngkolatsekama. Apkeliekpelkek lheiap 6 aptaiangkolha enenlhet’avok apkellanekamok anak ngkollatsekama, apkeliankenkaseiangke lhta ema apanko’ok apkellelto apkelpokkenammap kakpota nhan apkeleltennasemmap ania’a. Lheiap koka nhan apkellangkokhak ema kakpota einangkok ma’a ngkanek nkelietavek einangkok ma’a —lhta aptak ángel.

7 Asleng’o lhta ko’o mokhom po’ok apkeliatekama ntepke lhta m’a akieto m’a alvanlhemmalhkelha qaselha, lhta aptak:

—Apveske Eniapom Neten apto vanlha lhema aphapak aknema apmopvana apanke, have niapak ankek lheiap apkeliekpelkemo aptaiangkolha aplhamakho enenlhet’avok, aptek na iokhalhmek ankek kanhan akietemo nkoie —lhta aptak.

8 Ka apiangkeno lhta nohaikok cuarto ángel takhalhet aknem ma’a, ka akno lhta akmovana aknem kakpota nkolvanlhek talha enenlhet’avok lhmankek ham. 9 Avanhek anke lhta apkenmeiasma aplhamakho enenlhet’avok aniem’o akmate nkoie. Nheklhe lhtoka meliaqmongkasekhak mo’ok apvalho’ok ma’a, ma lhta nhan eliavenkaskesaikama apvesai’a Eniapom Neten apto akietnema apmopvana takhalhet’ok qaselha akmovana nak hentevaksek, apkeltaqnevakke lhtoka mota apvesai’a m’a.

10 Ka apiangkeno lhta mokhom quinto ángel nohaikok takhalhet aktanema aveske qaselha nevhak nengai’o lhta m’a. Apiennakteske lhta lhma aktemakha la aveske takhaplhet’ok enenlhet’avok anko’ok ma’a, apkeltaklhengke lhta nhan apalhko’ok aniem’o akmaska apkellengaiangko. 11 Apkeltaknevakke lhta nhan apvesai’a Eniapom neten aniem’o akiavai’a apkellengaiangko akientalhnema m’a, avanhek anke lhta nhan anmaska al’ok apanko’ok. Nheklhe lhtoka meliaqmongkasekhak mo’ok apvalho’ok aniem’o qaselha ngkollatsekama apkellanekamok ma’a.

12 Ka apiangkeno lhta mokhom sexto ángel nohaikok takhalhet alvata Eufrates, akiemak’o lhta nhan iemmen ma’a, apkelpeneso lhta nhan amai apkeliav’akha apkelveskaie apkelleniem’o ko tep aknem. 13 Asvet’o lhta mokhom menasma akiavai’a lhta m’a kanhan kaselha nevhak alhta nengai’o, kanhan apkeltennasemmap ania’a apmopvana ania’a. Nkelentepke lhta atno’ok mokhelhm’a nak ma’a 3 kasekapo av‘alho’ok alpaiseiam malha napnekteng. 14 Koka napnekteng anak ma’a allelto lhta kasekapok av‘alho’ok, aknema anmovanka’a nkollanangkok qaselha mongenatkeskama. Atlhengo nhan ma’a apkenmahai’a eniankesekhak apkeliav’akha apkelveskai’e lhmankek ham kakpota ngkotnek ma’a apkennapommap Eniapom Neten apto vanlha lhema aphapak aknema apmopvana apanke akvo’o ta akiavai’a aknem apankok ma’a.

15 Koka lhta nnak akto mokhom ma’a: —¡Ellaho ta! Nkotlapkesek hata avatak ham, nnavek ma’a enenlhet la apmenielhma akpelapkeskama na mota apvai’a. Aktaqmelakho nke ta nkotnek enenlhet’avok apkellelto apkelpeneskamo helel·halhanma. Apkelpeneskamo nhan apkelentalhnekha apkelentalhnema kakpota metlhengek malha apkelalhnai’o, menmankek nahan —lhta nna akto m’a.

16 Nkellankesakhe lhta m’a apkeliav’akha apkelveskai’e lhmankek ham akieto m’a lhema iokhalhma akvesai’a Armagedon, hebreo apaivoma nema altema m’a.

17 Ka apiangkeno lhta mokhom septimo ángel nohaikok takhalhet akieto neten akmeioianlha alhkaiam. Mpelapkaske lhta mokhom aktepo nema aliatekama akiennaktema nkek akieto konne pa’at akpokkenammalhka, naqtek ma’a aptanema apveske, lhta ntak:

—¡Mpenesalhkehe! —lhta ntak nema aliatekama.

18 Mpelapkaske lhta apkellelienmakmo m’a, apkelelhteniokme lhta nhan akieplomo nema akiapqalhekama akiennaktema nkek. Avanhe lhta nhan akievhekama lhepop ma’a mankolhno sekhe ankek tep nak nanek apkelloma lhnak nanek enenlhet. 19 Nkeliapkesakhe lhta m’a 3 nekha’ak apiav’akha temma Babilonia, apkeliaqnengke lhta nhan lhamakho temma mo’ok apkellavakha. Nlheianvakhave lhta nhan apvalhok Eniapom Neten apkeltemakha ngkolatsekama ko Babilonia kakpota elienkesek hata nohaikok vino akiavai’a nkek aploma m’a. 20 Nkeniangke lhta lhamakho lhepop aliakiengveiam nemmen, nkenmaske lhta nhan nelvetai’a nalhma alakhaiam lhmankek ham. 21 Akpallakmo lhta nhan ahekho’ok alleniem’o neten takhaplhet’ok enenlhet’avok lhmankek ham. Aliavai’a nkek ma’a, malha 40 kilo lhta lhema akiaqiema. Netamen enenlhet’avok apkeltaknevangka lhta apvesai’a Eniapom Neten aniem’o akiavai’a akientalhnema qaselha akmovana hentevaksek apiaqmongkasekha apkeltemakha meliamolhma m’a.