Rev 17 | TmfSC | STEP | Hetetes ko’o lhta lhema aphapak ángel apkeniem’o apieseksek alhta m’a 7 ángeles apketsoiangka lhta nhan nohaikok 7, lhta aptak heiano m’a: —Nok, ateskese ta lheiap nema akiaqmongkasekha aktemakha ngkelvana akto neten ankek alanaktema aknema takhalhet’ok iemmen.

Revelation of John 17

Aktaknommalhka ngkelvana alanaktema

1 Hetetes ko’o lhta lhema aphapak ángel apkeniem’o apieseksek alhta m’a 7 ángeles apketsoiangka lhta nhan nohaikok 7, lhta aptak heiano m’a:

—Nok, ateskese ta lheiap nema akiaqmongkasekha aktemakha ngkelvana akto neten ankek alanaktema aknema takhalhet’ok iemmen. 2 Malha apkenmensekamo mota aptaiangkok aplhamakho apkelveskai’e m’a lhmankek ham, nkelieieskangkek na lhma m’a aniem’o allaikamok vino anmensoma ankok —lhta aptak heiano ángel.

3 Ka akvet’o lhta ehaqtek aniem’o Espíritu, heiantemakho lhta nhan lhema ángel akieto m’a metkelha temma. Asvet’o lhta nhan ma’a lhema ngkelvana anantema kaselha nevhak nengai’o akielhvasema, 7 lhta apqatko’ok ma’a, 10 alhta nhan nkapet’ok. Ma lhta ntek alqasemmalhka akvesai’a aiempehek akto ammelhaikama Eniapom Neten. 4 Apielhvasema purpura alhta aktalhnema ngkelvana lhta m’a, annatanma lhtoka oro kakpota nhan metaimong aktek altakmanma nke anmennave nkoie kanhan perlas. Aksekama lhta nhan amek nohaikok oro aklanei’o qaselha ngkollatsekama nkek kakpota nhan qaselha alpaiseiam aniem’o m’a anmensangveiam alhma ankok. 5 Nietne lhta nhan aktalhesammalhka akpaihakha na’at akvesai’a mammopvana anioho, lhta ntak alqama hengke’e: “Akiavai’a nkek Babilonia ngkana’ak nan ma’a ngkelvana’ak allanaktema kakpota nhan qaselha ngkollatsekama nkek”, lhta ntak aktalhesammalhka akpaihakha na’at ma’a.

6 Malha anmen ato nke lhta ntak ngkelvana alhta m’a aniem’o akiama ema apanko’ok apkellelto apkelpokkenammap, aptekioma lhta neksa apkelpaieskama apvesai’a Jesús. ¡Ntenkaske lhta ko evalhok asvet’o m’a! 7 Koka lhta aptak heiano ángel:

—¿Se lha ntak akteiakmo nak apvalhok lheiap ke, he? Kolhva koka asmak’ak alpeiveskasekhak lheiap aktemakha akietkesammalhka ngkelvana nak kakpota nhan kaselha nevhak lhek nengai’o anantema, 7 apqatko’ok kakpota nhan 10 nkapet’ok. 8 Ka kaselha nevhak lhek nengai’o, lhennenga lhnak nanek akienaqtemakha m’a, mmaskengvakmek koka nenvetai’a m’a. Koka nkotiepok hata mokhom ma’a konne malhek konne kankek, nkoiaihama ta takhalhet lhepop anak lhmankek ham, koka nkotvasalhkak hata mokhom ma’a. Nkopalesemmak hata apvalho’ok apkelvet’o ta apkellelto nak nkolhnaikamok apkelvesai’a vakkahak akiennaktema enneniek, lhennenga lhnak na nek na akietnemakha m’a vakkahak anak, amanie alanemmalhka lhnak na ne lhma nkek ham.

9 Nkaimelhkek ngkoitek nema apkeliamo enenlhet kakpota eliohok akietkesammalhka lhamakho aktemakha nak ma’a, ka 7 lhkek apqatko’ok ma’a akietkesammalhka 7 nalhma alakhaiam akieto aktemakha aveske ngkelvana nak, 10 akietkesammalhka nhan 7 apkeliav’akha apkelveskaie’. Apkeletsepke lhtoka m’a 5, kolhva koka lhema aphapak apankek apveske nenvanlha nak. Netamen hata m’a evak po’ok, akiakvatakho nkek hato ka etnek apveske m’a. 11 Nnek koka mokhom ma’a akto octavo aveske, koka niekhe m’a kaselha nevhak nengai’o akienaqtemo lhnak nanek tep nak nanek ma’a, akmaskengvaiakmo lhta nhan nenvetai’a m’a. Koka nnek mokhom ma’a, nietnek na akmovana nnavek apkenmopvanka m’a 7 lhta apkelveskaie’, koka ngkolhek hata nhan aktevaskesakho m’a.

12 Ka 10 lhek nkapet’ok apvetai’a lhkek lheiap ma’a, akietkesammalhka 10 metnangko mokhom apkelveskaie’, etlhevangkok hata aptaikamok apkelveskaie’ akvakmo lhema alanei’o knem, elpasmekhak hata nhan ma’a kaselha nevhak lhek nengai’o. 13 Ka 10 anak apkelveskaie’ annemo mo’ok apvalho’ok ma’a akmak’akha nha nkotnek, nkollangkok hata apkelientalhnemo kanhan apkenmopvanka’a kaselha nevhak nengai’o lhkek. 14 Nkonnapalhkak hata akieplomo atlhelhma’ak ma’a Nepkesek Apketkok, koka koneng hata etneskasentak ma’a ngkanek apto Apveske neten apankek melhnok po’ok apveske la’a, Apiav’akha Apveske nhan neten apankek melhnok po’ok apiav’akha apveske. Etnangkok hata nhan apketlhelhma’ak apkellelto lhta apkellavommap anak, apkeliekiesammap nahan kanhan apkelleliehekho mota m’a —lhta aptak heiano ángel ma’a.

15 Netamen ma’a lhta aptak mokhom heiano ángel:

—Koka iemmen apvet’o lhkek aknema takhalhet ngkelvana alanaktema m’a, akietkesammalhka koka m’a enenlhet’avok lhmankek ham, lhamakho apkellavakha, apkelpakmeiasma nhan. 16 Ka 10 lhek nkapet’ok kanhan kaselha nevhak lhek nengai’o eltaknongvakhak hata ngkelvana lhkek alanaktema, elieniekhak hata nhan alhnai’o m’a, etavokhak hata nhan apetek ankok ma’a, elvanlhekhak hata nhan akieplomo talha apak ma’a. 17 Eniapom Neten alhtoka apkeltemeskasak nkotlhenek apvalho’ok 10 lhek apkelveskaie kakpota ellangkok akientalhnemo kaselha nevhak lhek nengai’o, akvakmo toka nhan aknem aklheianmakha apvalhok ma’a. 18 Koka ngkelvana apvet’o lhkek lheiap akietkesammalhka m’a apiav’akha temma, akto nhan aveske takhaplhet’ok apkelveskai’e nko’ok lhmankek ham —lhta aptak heiano ángel ma’a.