Revelation of John 22

1Heteskaske lhta mokhom ángel alvata alhnai’o nkek iemmen akto lhta nhan akiennakteskama enneniek ma’a, malha lhta akto nak ieiam appok nenvetangveiakmo taiep. Ntepke lhta alvata akieto naqtek aptanema Eniapom Neten kakpota nhan Nepkesek Apketkok. 2Apvalhok temma amai alhto ka alvata m’a, nekhav’ak alhta nhan nkemhamak iamet akiennaktema enneniek, moklhem’a pelten alhto ka alielhnemakha mota akielhna, 12 lhta mota akielhna. Ava lhtoka mota apkenmaikama etnangkok ponha apanko’ok kakpota nkoltaqmelkeskamok enenlhet’avok lhmankek ham. 3Mangkolhek hata nhan knema hengiemetkeskama natemma nak ma’a, ngkoitek hata nhan aptanema apveske Eniapom Neten kakpota nhan Nepkesek Apketkok ma’a. Elteklhengkok hata nhan aptapno’ok napaqtek ma’a aniem’o mota apkellai’o apkellelto apkellasennaikama m’a. 4Elvetak hata nhan napa’at ma’a, alqasemmalhka nhan alpaihakha napaqta’a Apvesai’a apankek ma’a. 5Melhek hata pelhasep ma’a, mankaimalhkek hata nhan talha alhankok ma’a kakpota nhan aknem apommatema la’a, ngkanek Eniapom Neten apto apveske hata eniapommetek ma’a. Etnangkok hata nhan apkelveskai’e metka akvaiam annelha aliekaikamok iantelhkapa.

Ketsek aimommalhka apvektanlha ta Jesucristo

6Koka lhta aptak heiano ángel ma’a:

—Koka iokhalhmek ankek ma’a astakha lhkek alheianma, nietavek ankek na mei’askamek lheiap ma’a. Eniapom Neten apkamnoma alenteiapvekta apatno’ok apkeleltennaskamo ania’a apankok ma’a, apkapaskek na ángel apankok kakpota elvetaskesek apkellasennaikama akmak’akha ta ngkotnek kolhvave nak —lhta aptak heiano ángel.

7—¡Kolhvavek hata avatamok ham! Aktaqmelakho nkek apkellelto apkenmama takha ania’a nak aktemakha akmak’akha ta ngkotnek akietno nak aktalhesammalhka vakkahak anak —lhta nna akto m’a.

8Hai’, ko’o Juan asvet’a lhta, asleng’a lhta nhan lhamakho qaselha nak heteskeskama lhta ángel. Netamen alhta asvetai’a, aslengai’a nhan, askelteklheio etapno’ok napaqtek kakpota angvahok ma’a, 9koka lhta aptak heiano ángel:

—¡Metne ham, melteklhek aptapno’ok nehaqtek lheiap, koka ntasek elteklheiok aptapno’ok napaqtek ma’a Eniapom Neten! Ko’o nhan asto heiasennaikama Eniapom Neten, asnavek ko lheiap kakpota nhan apkelialheng’a nak apkeleltennasemmap ania’a, kakpota nhan apkellelto apkenmaikamok ania’a aktakha aktalhesammalhka vakkahak anak —lhta aptak heiano m’a.

10Lhta aptak mokhom heiano ángel:

—Meilhaskeso nkek ania’a nak akmak’akha ta ngkotnek akietno nak aktalhesammalhka vakkahak anak, nkanketva’ak aknem nkovak hata m’a. 11Eniangko ta enenlhet meihamolhma la’a elhengkese pankek aptemakha m’a, eniangko ta nhan enenlhet akpaiseiam la apvalhok elhengkese pankek na m’a. Eniangko ta nhan enenlhet apto la apeivomo elhengkese apankek aptema apeivomo m’a, kanhan enenlhet apto la apokkenammap eniangko nhan elhengkese pankek aptema apokkenammap ma’a —lhta aptak heiano m’a ángel.

12—¡Hai, kolhvavek hata avatamok ham! Atsantengkesek hata alianmoma kakpota allangkongvatak moklhem’a enenlhet aptangkolha la apkellanekamok. 13Ko’o asto nak alfa kakpota nhan omega, apmaniaie kanhan neptamna’ak, ampakhasekha kakpota nhan aktakha nnelha. 14Aktaqmelakho nkek enenlhet apkellelto malha apkelieniesekamok la apkelentalhnema. Nkelietavek ankek hata nhan elentalhnengvomok atno’ok anak ma’a apiav’akha temma kakpota etavangkok akielhna iamet akiennaktema enneniek ma’a. 15Koka melentelhek hata m’a malha aptangko nak semheng, apkellelto nak na apkeliatmekama la apkeliolhma mellatsekama, apkenmensangveiam alhma, ntekioma niapma’ak, kanhan apkellelto nak apkelteklheikamok aptapno’ok naqtek qaselha akiokha alanemmalhka, alleklemo mota nhan apvalho’ok eliennengkesek po’ok.

16Ko’o Jesús askapaskek ángel ehenkok kakpota eleltennaksek ania’a nak aplhamakho iglesias. Ko’o asto aptaven neptamen apveske David annenga, asto nhan malha iav’a apiavai’a apkapommatema nak atsai’a —lhta aptak Jesús.

17Espíritu ka nhan ngkelvana nema akmahai’akha, lhta ntangkok ma’a:

—¡Elheng! —lhta ntangkok ma’a.

Koka aplhamakho apkellelto apkellengai’a ania’a nak ntasek etnangkok na hengke’e:

—¡Elheng!

Koka enenlhet apkellelto la aliemai’a apiaspo’ok ntase eliangvetak iemmen hengke’e akto akiennaktema enneniek metka akianmoma.

18Koka askellaskek lhema qaselha apkellelto ta apkellengai’a ania’a nak aktalhesammalhka vakkahak anak aklhenammalhka qaselha nkovak hata. Enenlhet apto la apiangveskaiakmo aptalheskama ania’a nak, Eniapom Neten hata eniapaskesek takhaplhet ma’a qaselha akmovana hentevaksek akietno nak aktalhesammalhka hengke’e vakkahak anak. 19Kakpota nhan enenlhet apto la apleklema ania’a konne vakkahak anak aklhenammalhka nkovak hata, Eniapom Neten hata nhan meltehek eklhek natemma akpokkenammalhka nak ma’a. Mankapvankek hata nhan etasemok iamet akielhna akiennaktema enneniek ma’a aktemakha nak na aklheianma vakkahak anak.

20Apto lhkek hepaqmetkeskama, lhke aptak:

—¡Kolhvavek hata avatak ham, have niapak ankek!

—¡Amen, ntase’, elheng apveske Jesús!

21Hai’, ka m’a, askeltavek ko’o Apveske Jesús eltaqmelkeskesek apkellaniemhaikama aplhamakho ketlhengkap ham.
Copyright information for TmfSC