Revelation of John 3

Ania’a apasammalhka iglesia akieto Sardis

1—Etalhes no mokhom lheiap ania’a kakpota eniapaskesek ma’a ángel apno m’a iglesia akieto Sardis, ka ntak ania’a hengke’e: Apto akietnema 7 espíritus aniem’o m’a Eniapom Neten kanhan 7 iav’a, ka aptak na m’a:

“Asiave ko’o lhamakho aktemakha apkelanai’a lheiap, apketlheianme mota enenlhet’avok aphalhnankok mokhom lheiap, koka have m’a, apketsepma niekhe lheiap. 2¡Elhatakha, atlhenkeskamo nkomaskengvomok apkelanai’a qaselha altaqmelo, eiennekho mokhom. Kolhva melan’ak akto akpeivomo napaqtek Eniapom Neten! 3¡Eiaqmongkasekha mo’ok apvalhok, kolheianvakho no apvalhok nema atlhekmoskama alhta aplhevai’a lheiap, eliehekho ta mokhom, el·halhnama ta mota! Ka metno la m’a, kotlapkesek hata avatak ham malha akto nak enenlhet la apmenielhma maniamo nak aknem evak ma’a. 4Koka asiavek na ko ham Sardis apkakhangkek enenlhet mellanekamok qaselha ngkolatsekama, malha nhan melpaisengkeskama la apkelentalhnema. Koka enenlhet’avok anak nkelietemavek ankek hetnangko ta apketlhelhma’ak ma’a, apkenmopai’a apankek hata nhan apkelentalhnema m’a. 5Apkellelto ta apkeliephongveiakmo, ngkolhek hata alentalhneskasakho apkelentalhnema apkenmopai’a apanke. Monmaskesekhek hata nhan apkelvesai’a vakkahak akiennaktema nak enneniek ankok, atlhenek hata nhan apkelvesai’a apkeliamolhma napaqtek Tata m’a kakpota nhan ángeles apanko’ok ma’a”.

6—¡Eltaqmelkaso no apkellailhemo apaiko’ok anak aktakha aplheianma Espíritu aplhamakho panke nak iglesias! —lhta aptak ma’a.

Ania’a apasammalhka iglesia akieto Filadelfia

7—Etalhes no mokhom ania’a kakpota eniapaskesek ángel apno m’a iglesia akieto Filadelfia, ka ntak ania’a hengke’e: Apto nak Apokkenammap memangveiam ngkolatsekama, apto nhan have niapak anko ie’, apto nhan akietnema llave apankok apveske David annenga. Apto nhan apmaieskama atong, mamma enenlhet apmopvana la eniapekhak ma’a, apkapekha apankek na atong ma’a, mamma nhan enenlhet apmopvana la emaiesekhak mokhom ma’a, ka aptak na m’a:

8“Asiave ko’o lhamakho aptemakha apkelanai’a lheiap, asiavek na heliehekho lheiap niekhe ketsek meiennaktema, asiavek na metka apmangkaktema elhenek asvesai’a ko’o. Ka ngkanek amaieskese mota atong napaqtek lheiap, mamma ta enenlhet apmopvana la eniapekhak atong anak ma’a. 9Koka apkakhangkek ma’a moklhem’a apketlhenammakpo apankavek apkellelto judios, koka have m’a, apkellelto koka niekhe ankesekhelha Satanas ma’a. Alelteklhekkeskakhak hata ehenkek ko’o aptapno’ok napaqtek lheiap ma’a ngkanek askamelaiam na lheiap, lhamakho enenlhet hata nhan elvetak ma’a. 10Aptaqmelkaskek na aspaioma askanemakha etnek lheiap metka apkelvateskaiam heieplekama, ka ngkanek ataqmelkesek hata akvo’o ta aplengaiangko akientalhnema takhalhet lhmankek ham. 11¡Avatak hata kolhvavek ham! Elhengkes hata mangheiaskeiam ko’o kakpota mangkolhek aklekkeskaktamo qaselha apnaksepma apkelhnekha apqatek, nema akpeneskeskamo aplhevai’a ta lheiap. 12Apkellelto ta apkeliephongveiakmo, altemeskesangko ta malha poste apkeliennaktema nema alankeskama nak ma’a apnemakha Eniapom Neten ehenkok, elloka ta mota metka nnelha m’a. Ka poste nak atalhaksek hata nhan apvesai’a Eniapom Neten ehenkok, atalhaksek hata nhan ma’a akvesai’a apiav’akha temma apankok Eniapom Neten ehenkok. Aphalhnankok Jerusalen apvaiventa ta m’a neten apkeniem’o Eniapom Neten, atalhaksek hata nhan alhnankok asvesai’a m’a”.

13—¡Eltaqmelkaso no apkellailhemo apaiko’ok anak aktakha aplheianma Espíritu aplhamakho panke nak iglesias! —lhta aptak Espíritu.

Ania’a apasammalhka iglesia akieto Laodicea

14—Etalhes no mokhom lheiap ania’a nak kakpota eniapaskesek ángel apno m’a iglesia akieto Laodicea, ka ntak ania’a hengke’e: Apto nak amen, Apto nhan apvetaiangko aplhenekho mota nhan iokhalhmek ankek ma’a, meietnekho nhan, Apto nhan apkeniemai’a m’a lhamakho qaselha apkelentepkeskamo lhnak nanek Eniapom Neten ma’a tep nak nanek, ka aptak na m’a:

15“Asiave ko’o lhamakho aptemakha apkelanai’a lheiap, have apmalhaklhemo lheiap, have nhan apmokhetma. ¡Ntase niekhe etnek apmalhaklhemo nlho la nhan apmokhetma! 16Koka iama apmokhetma lheiap, ka ngkanek malha asieklhek hata atnek ko ehetong anak lheiap. 17Nlhenke mota apvalhok nkeskama apketsekama lheiap aniem’o aptemeskesammakpo apanke. Apkanek lheiap mankaimelhkak qaselha apanko’ok, koka malha niekhe metka la apketsekama lheiap napaqtek Eniapom Neten. Apiose mota, metka akpaihekha apvalhok, malha nhan apkalhnai’o, metka apaqto’ok nahan. 18Askangkek ko’o lhema aspaioma lheiap, ¡elheng hengke’e asnakha nak! Ema ta oro nema akiamasma natelh nema alalhnasekha kakpota etnek nkeskama apketsekama lheiap. Ema ta nhan apkelentalhnekha apkenmopei’o apankek kakpota memangkama lheiap aniem’o apkalhnai’o, eltelhnamok hata nhan apaqto’ok ponha kakpota etekhak na lhma lheiap ma’a.

19Hai, nkoihek ehetong askellan’o kanhan askennaveske’ aplhamakho apkellelto la askellamelaiam. ¡Eiaqmongkasekha ta mo’ok apvalhok, etenio ta apiempek heieplekama! 20Asvenema ko akieto atong, heiailho la lhema enenlhet, emaiaksek na atong, aklhek hata m’a antavokhak hata lhemek ma’a.

21Apkellelto ta apkeliephongveiakmo, altok hata eniakhangkok lheme astanema nak, ko lhta nhan asto asiephongveiakmo, asnek na aptanema nak Tata”.

22—¡Eltaqmelkaso no apkellailhemo apaiko’ok anak aktakha aplheianma Espíritu aplhamakho apanke nak iglesias!