Romans 1

Aklheianma apvalhok Pablo Romanos

1Ko’o Pablo, heiasennaikama Cristo Jesús, nketlhenkek evalhok ketlhengkap ham. Heliekieskama lhta Eniapom Neten kakpota atnek heiapaskama mota apaiaksek ania’a aktaqmanma apankok ma’a. 2Apkeleltennaskangkek nak nanek lhema apaivoma apkeleltennaskama ania’a apankok have niapak ankek nkovak hata ania’a aktaqmanma nak, nietnengkek ma’a aktalhesammalhka Vakkahak aktaqmanma nke’ Eniapom Neten Apaivoma. 3– 4Ka ania’a aktaqmanma nak aplhenammap ma’a apketka Jesucristo, apto nhan Apveske enganko’ok, aptaiekho lhnak enenlhet apankek ma’a, apto nhan aptaven neptamen apveske David annenga. Apketsepke lhta m’a Jesucristo, netamen aplhatekhaskeiakmo aniem’o apmopvana Espíritu Santo. Apkelpeivesekho lhta nhan ma’a enenlhet’avok apto have niapak anke Eniapom neten apketka m’a.

5– 6Jesucristo hetaqmelkeskeskama askaniemhaikama ngkanek hetneskeskamo heiapaskamo mota kakpota apaiaksek ania’a aklhenammalhka apvesai’a apieseksek metnangko nak judios. Ketlhengkap nahan romanos apkelpalhkammap apieseksek anak ham, kakpota meliaskamek, eleliehekhok nahan, etnangkok hata apkennemolhema apkelpokkenammap. 7Hai, nketlhenkek evalhok ketlhengkap ko romanos apkellelto apkellamelaiam kakpota nhan apkelleliekieskama Eniapom Neten etnangkok hata nhan apkelpokkanma m’a.

Hai, askeltave ko’o Eniapom Neten kakpota nhan Jesucristo apveske engankok eltaqmelkeskesek apkellaniemhaikama, ellangkok na altaqmelaikama apvalho’ok.

Apmahai’a etnek amaika’a Pablo akieto Roma

8Gracias ko stak Eniapom Neten aniem’o Jesucristo ngkanek apketlhenammakpe lhma nkek ham meliaskeiakmo ketlhengkap Jesucristo.

9Eniapom Neten apto apveske ehenkok, askasennaikama mota asteniai’o nak eiempehek aspaieskamo nak ania’a aplhenammap Apketka, apiavek na m’a atlheianmo mota evalhok ketlhengkap ham. 10Neksa askenmalhnongkoma mota Eniapom Neten, askenmalhnema m’a heiangkok aktaqmanma la astaienta amaika’a ham. 11Avanhek ankek askeltemo alvetangvetak ketlhengkap, atsakhesek askelpasmoma m’a aniem’o Eniapom Neten kakpota ngkoitek aliennaktema meliaskeiam. 12Hata asvaktamo ta ham, angeliatalhkak hata aniem’o mongeliaskeiam anak.

13Ketlhengkap elialheng’a ko Roma, avanhe lhta niekhe askeltemo atnentak amaika’a ham, koka heliasakha lhma lhta nnak ma’a. Asmak’a alhta niekhe apaiaksek ania’a aktaqmanma kakpota meliaskamek enenlhet’avok ma’a, ka stemakha lhta nhan ma’a mo’ok iokhalhma apkellomakha nak metnangko judios. 14Mongvapvanak aiekaksek ko’o aspaieskama ania’a aktaqmanma halhmankek ham, apieseksek anak ma’a griegos kanhan metnangko griegos, apieseksek neten apankavek nema apkeliangveiakmo, kakpota nhan apieseksek meliangveiakmo. 15Avanhek ankek aspekhai’o niekhe apaiaksek ania’a aktaqmanma apieseksek anak ketlhengkap ham.

Aknema akmovana ania’a aktaqmanma

16Momankek ko alhenek ania’a aktaqmanma ngkanek akto aknema akmovana aniem’o Eniapom Neten kakpota nkolvongkesek tep enenlhet’avok apkellelto la meliaskeiam, apmaniaie’ judios, kakpota nhan griegos. 17Ania’a aktaqmanma nak hengeleltennaskek vanlha Eniapom Neten apvankek henteskesangkok nelpeivomo aniem’o mongeliaskeiam Jesucristo, ka ktemo nak aktalhesammalhka nhan Vakkahak Eniapom Neten apaivoma hengke’e:

«Enenlhet apto la apeivomo, eloka ta akvanqakhoho» ▼

▼Habacuc 2:4

ka ntemak ma’a.

Aplhamakho enenlhet apkellanekamo mota nkollatsekama

18Koka Eniapom Neten evaivesenta ta apiaqmongkasekha takhalhet’ok qaselha ngkollatsekama nak apkellanekamok enenlhet, kanhan mankopeivomo nak apkellanekamo mota enenlhet’avok, akto nhan altaqheskeskamo mota akto nak have niapak ankek aniem’o koka m’a melpeivomo. 19Apvanka’ak eliohok Eniapom Neten aniem’o apkelvetai’a lhamakho qaselha apkelanai’a nak ma’a, aptema apankek na apkelvetaskeskama m’a. 20Mongapvankek koka angvetak Eniapom Neten kakpota nhan apmopvana nkotnengvaianlha nnelha, koka neksa alketamekama la apvalho’ok enenlhet aktemakha lhamakho qaselha apkelentepkeskama lhta m’a aniem’o apkelvetai’a, nkolpeivesekha apvalho’ok apnema have niapak ankek Eniapom Neten.

Mankollapvankek na etlhenek meliamo Eniapom Neten, 21apkeliave niekhe m’a, koka nkaqhok na mellai’ok apvesai’a m’a, metnaiangkok na gracias ma’a. Vanlha koka atlheianmo apvalho’ok nkoietemo nke, alpaisengkeskeskamo nhan apvalho’ok ma’a. 22Apketlhenammakpave lhta mota nema apkeliamo m’a, koka malha metka apaqto’ok ma’a, 23ngkanek apkelieniekhek Eniapom Neten apto aknema apmopvana mankotnengvaianlha nnelha. Apkeltakneskeskekho m’a qaselha apkellanekamok apankavek anata akiokha, kakpota nhan qaselha 4 ameiok anak, akiokha nhan allelto nak alpelhievaikama nalhepop.

24Apkelhakhek koka nhan Eniapom Neten ma’a enenlhet’avok anak apkellanekamo mota ngkollatsekama kakpota etlhengkesek apankavek anmahai’elha la apvalho’ok ellanangkok qaselha ngkollatsekama, qaselha henmankaskama nak manganemmalhkelha nak antehek. 25Lhamakho qaselha ngkollatsekama nak aniem’o apkelieniekha Eniapom Neten, apkelieplekho m’a akmovana ania’a nak, apkellai’o, apkellasennaiangka nhan qaselha apkelentepkeskama lhta Eniapom Neten. Koka nietave niekhe eliavenkaskesama apvesai’a m’a metka nnelha vanlha Eniapom Neten. Amen. 26Meliamolhma songkek ma’a, elieniekhak Eniapom Neten kakpota etlhengkesek apankavek anmahai’akha apvalho’ok apankavek ellanangkok qaselha henmankaskama nak, ngkelvana’ak mmaskek akteniangko anakteiangka’a apkelennava’ak apankave, ngkelvana’ak lhemek koka nkenmakhak ma’a. 27Apkelennava’ak mmaskek apteniangko ngkelvana’ak ankave, apkelennava’ak lhemek koka apkenmakhak aniem’o aliekangveiakmo apkenmokhetma, ka nkeniemai’ak apketlhevaiangkok akiaqmoiekha m’a. 28Mankonmahai’ak enmok takha Eniapom Neten, ka ngkanek etlhekhak kakpota elieplavkesek apankavek ngkollatsekama alketansema apvalho’ok, ellanangkok ngkollatsekama. 29Nkellaneiangkek apvalho’ok nkolietemo, ngkollatsekama, apkeliaspekamok qaselhaha, apkeliasepkeskama po’ok, alietnema apkeliemongke lhma’, apkennapommap po’ok, apnaqtevaskamo po’ok, apkeliaskemaikamaha. 30Apketlheianma mota po’ok meihamolhma, apkellammelhma mota Eniapom Neten, apkellammakpoho, vanlha mota atlheianveiam alhma apvalho’ok ellanangkok qaselha ngkollatsekama, meleliehekhok na ngkana’ak. 31Mankonmahai’ak na eliangvomhok akto have niapak anke’, apkenmopvanka’a ania’a mota, meliamolhma apanke’, mangkolietnema apkelietnai’o napa’at po’ok. 32Apkeliavek niekhe Eniapom Neten aptemakha aplheianma nietavek eletsepok meliamolhma nak ma’a. Aptaiangkek koka apankavek ma’a, nkelpaihakhe mota apvalho’ok apkelvet’o la apkellanekamok ngkollatsekama po’ok ma’a.