Rom 13 | TmfSC | STEP | Eleliehekho ta m’a apkelientalhnemo nak, ngkanek Eniapom Neten apkeltemeskeskama.

Romans 13

Nema allanemakha etnangkok meliaskeiam

1 Eleliehekho ta m’a apkelientalhnemo nak, ngkanek Eniapom Neten apkeltemeskeskama. 2 Ka meleliahakho la m’a, meleliehekhek hata nhan Eniapom Neten ketlhengkap ma’a, netamen ngkolhek hata nhan aliaqmongkaskesakho m’a. 3 Ka apkelientalhnemo nak mankoieto eniagak enenlhet apkellanai’a la aktaqmelo qaselha, koka eniagak ma’a apkellanai’a nak qaselha ngkolatsekama. Ka apkelan’o la lheiap qaselha altaqmelo, mangkoitek hata nhan apkai’a apkelientalhnemo nak, etlhenama ta mota apto apiamolhma lheiap ma’a. 4 Ka apkelientalhnemo nak apkellasennaikama Eniapom Neten kakpota nkotaqmelek apkaniemhaikama lheiap ma’a. Koka metaqmelkasakpo la lheiap, netamen nkoieplevhok hata apkai’a ngkanek nnankek apkenmopvanka’a eiaqmongkasekhak hata metaqmelkasekpo la lheiap. 5 Hai, koka nietavek ankek ma’a angelleliehekhok apkelientalhnemo nak kakpota mangkolhek hengeliaqmongkaskesakho aniem’o mongeliamolhma, kakpota nhan mangkoitek atlheianvekho engelvalho’ok qaselha ngkolatsekama la nellanai’a. 6 Hai’, apkelientalhnemo nak apkellasennaikama mota Eniapom Neten ma’a, ka ngkanek na ntasek elianmongkesek ketlhengkap impuesto.

7 Ellamok hata moklhem’a akietelha la m’a impuesto ankok kakpota nhan akteniammalhkelha la mota patakkom mo’ok la nenianmongkeskamakha, elelieheho ta m’a, ellaho ta nhan.

8 Mangkoliet apkeliaqmoikamok po’ok, ellasekho mota po’ok, ka apkelanengko la mota ketlhengkap ma’a, koka akto aksavhomo nkek apkelieplavkeskama lhamakho ley. 9 Ka ntak moklhem’a henganemakha aiseksek anke nak akietnema:

«Metves ankek aliemhapma, meniaqha po’ok, memenielh, mankotsep apneniek qaselha apanko’ok po’ok» lhna ntemak.

Koka akto lhamakho aiseksek henganemakha nak angkesekhak akiephongveiakmo aktemeskasekha malha lhema, ka ntak hengke’e:

«Eniasekho po’ok malha akto nak apkasekhammakpo panke nak lheiap» lhna ntemak.

10 Enenlhet apto la apkasekhai’o po’ok, apsavhavek apieplavkeskama lhamakho ley ma’a, ngkanek mamma nkek na aptevaskamo la po’ok.

11 Kolhva koka nenvanlha nak nahan akto neten ankek akiaspommalhka, ampai’o lhta sekhek ankek mongeliaskeiam Jesús akvakmo nenvanlha nak, ketsek ankek na nkaimelhkak nengelvongkasemmalhkelha ta tep. Ketlhengkap koka malha apnaqteianma aptangkok ¡Enaqlhatekhamok koka! 12 Nkanketva’ak nkotsak hata, mmak’a nkotiepok aknem, elvatesamok apkellanekamok qaselha alleniem’o ienaqtesakha lhma. Ntasek koka ellanangkok qaselha alleniem’o nak atsak’elha lhma. 13 Koka elloka m’a malha atsak’elha lhma nak, ellanamok qaselha altaqmelo. Melpasengvom ankek melleskama etavangkok aptekamok, melleskama nak einangkok anmen, menmensangvomanke lhma, mellanamo nkek na qaselha ngkollatsekama, metka apkennapommap nahan, metka nhan apiasepkeskaiam qaselha apanko’ok la po’ok. 14 Alpeivekha koka etnamok, eleliehekhok koka mota Apveske engankok Jesucristo, mellanko nkek nkonmama altakha la apvalho’ok aliaspongkomakha nak.