Rom 16 | TmfSC | STEP | Asmak’ak aleltennaksek lhema aspaioma, enmamok hata takha enialheng Febe akto diaconisa iglesia akieto natemma Cencreas.

Romans 16

Aklheianma apvalhok Pablo apketlhelhma’ak

1 Asmak’ak aleltennaksek lhema aspaioma, enmamok hata takha enialheng Febe akto diaconisa iglesia akieto natemma Cencreas. 2 Eltaqmelkaso ta apkellanei’o aptaiangkolha na mota apieseksek apkelpokkenammap anak, ellamok hata aimelhkelha la’a qaselha m’a ngkanek aplhanie mota alpasmoma enenlhet’avok ma’a akvakho lhta nhan ko lha’.

3 Askapaskek na aklheianma evalhok Priscila kakpota nhan Aquila, helpasmoma lhta neksa askeltennaikama ania’a aktaqmanma aplhenammap Cristo Jesús. 4 Niekhe alletlhengkeskama nkotekio’ok aniem’o lhta anmahai’a helvongkesek tep ma’a, gracias na ko skeltemak ma’a, gracias na aptaiangkok aplhamakho iglesias metnangko nak judios. 5 Kakpota nhan askapaskek aklheianma evalhok iglesia apkaqnekhelha na mota akieto akhaiangkolha nkek ma’a. Ka nhan nlhenkek evalhok stema emo’ok askamelaianlha apvesai’a Epeneto, apto lhta apmanie apankek mei’askeiam ania’a aktaqmanma aplhenammap Jesús apieseksek enenlhet akieto m’a iokhalhma Asia. 6 Nlhenkek na evalhok María, avanhe lhta akmakmekama kakpota nkoltaqmelek apkellangiemhaikama ketlhengkap ham. 7 Nlhenkek na evalhok aspaivoma lhema Andronico kakpota nhan Junias, allelto lhta amaniaie nkavek nkoliaskeiam Jesús, alhaiek koka ko’o, asnaktemommalhko lhta nhan lhemek ko m’a, avanhek anke lhta nhan apkelleliehekho mota nema allapaskamo m’a.

8 Nlhenkek na evalhok astema eialheng aniem’o Eniapom Neten, Ampliato apvesai’a. 9 Nlhenkek na evalhok Urbano, apto nhan netlhelhma’ak nenmakmesaikama Cristo, kakpota nhan nlhenkek evalhok askamelaianlha Estaquis. 10 Nlhenkek na evalhok Apeles, aplhenammakpo lhta mota apto have niapak ankek mei’askeiam Cristo. Nlhenkek na evalhok apkennemolhema apankek Aristobulo. 11 Nlhenkek na evalhok aspaioma lheme’ Herodion kakpota nhan apkennemolhema apankek Narciso, apkellelto nak meliaskeiam Apveske. 12 Nlhenkek na evalhok Trifena kakpota nhan Trifosa, avanhe kanke lhta anmakmesaikama Apveske. Nlhenkek na evalhok eialheng Perside, avanhek anke lhta akmakmesaikama Apveske m’a. 13 Nlhenkek na evalhok Rufo, apto lhta apkeliekieskama Apveske, ka nhan ngken akto m’a malha meme ehenkok. 14 Nlhenkek na evalhok Asincrito, Flegonte, Hermes, Patrobas, Hermas kakpota nhan engelialheng’a apkakhangko lhemek ham. 15 Asmak’ak na nkolhenek evalhok Filologo, Julia, Nereo kakpota nhan apialheng ngkelvana. Nlhenkek na evalhok Olimpas kakpota nhan aplhamakho apkelpokkenammap apkakhangko lhemek ham.

16 Elpaivesakpo ta apankavek apieseksek ketlhengkap ham akieplomo apkelpetsesammap apkelialheng’a, ka apkellapasak na atlheianma apvalho’ok ham aplhamakho iglesias apankok Cristo.

17 Ketlhengkap elialheng’a, ellaho ta mota enenlhet’avok anak apkenmahai’a la elhpankesek, apkenmahai’o nak na eliepkonek ham, apkenmahai’a nhan ellammelhek nema atlhekmoskama lhta apketlhevai’a ketlhengkap. ¡Melpalhkama nkoie’! 18 Nkanek have apkellasennaikama Apveske engankok Cristo m’a enenlhet’avok anak, vanlha aptengiaikamo mota anmahai’elha la apvalho’ok apanko’ok apankavek. Apkeltakmelkasave mota apkelpaqmetkesaikama apkellelto nak meliangveiakmo kakpota eliennengkesek ma’a.

19 Koka aplhamakho enenlhet apkelvet’ak ketlhengkap apkellelto apkelleliehekho apveske engankok, avanhek ankek apkelpaiesekha evalhok. ¡Etnamok hata mota nema apkeliamo elieplavkesek qaselha altaqmelo nak, meltamok koka m’a nema apkeliamo elieplavkesek qaselha ngkolatsekama nak! 20 Ketse nkaimelhka Eniapom Neten apto aktaqmelaikama engvalho’ok aniapom apteiokmek apaieskamo Satanas, epekkanvetak hata nhan koneng apmangkok ketlhengkap ham.

Hai’, askeltavek ko’o Apveske engankok Jesucristo eltaqmelkeskesek apkellaniemhaikama ketlhengkap ham.

21 Nlhenkek na apvalhok ketlhengkap alhelhma nak apvesai’a Timoteo. Nketlhenkek na apvalho’ok hengke’e aspaiomo lhema nak apkelvesai’a Lucio, Jason kakpota nhan Sosipatro.

22 Ko’o nhan Tercio, asto astalheskeskama vakkahak anak aptakha la aplheianma Pablo, nlhenkek na evalhok ketlhengkap ham apkellelto nak hengellasennaikama lhemek Apveske engankok.

23 Nlhenkek apvalhok ketlhengkap hengke’e Gayo apto apnemakha asnema, apkaqnekhelha nha mota iglesia hengke’e. Nlhenkek na apvalhok ketlhengkap apto apkeltakmelkeskama patakkom apkellavakha nak hengke’e apvesai’a Erasto. Ka nhan apkapasak aklheianma apvalhok hengke’e enialheng anak apvesai’a Cuarto. ^{▼▼Mo’ok vakkahak nietnek versiculo 24, ntemak hengke’e: Apveske Jesucristo eltaqmelkeskesek apkellaniemhaikama ketlhengkap ham. Amen.}

Apkeliatekho Pablo eltakneskasangkok Eniapom Neten

24 – 25 Angeltakneskasangkok hata ennengko’o Eniapom Neten apto apmopvana hengeliennakteksek engvalho’ok, ka aktemakha nak asketlhekmoskama ania’a aktaqmanma aplhenammap Jesucristo.

Lhennenga tep nak na nek apeneskamo lhema qaselha Eniapom Neten apmak’akha ta etnek, malha aposkama koka ntemak ma’a. 26 Kolhva koka aplekvakhe’, hengelvetaskaskek nahan, nlheianmek nak nane mota Vakkahak apkeleltennasemmap ania’a annenga apanko’ok ma’a.

¡Hai! Eniapom Neten apto menietsepmak aplekvakhek kolhva hengelvetaskaske alhnakho nkoie apmahai’akha lhta etnehek kakpota eleliehekhok, meliaskamek nahan enenlhet’avok lhmankek ham.

27 ¡Ntasek angeltakneskasangkok hata mota metka nnelha apvesai’a Eniapom Neten apto aknema apiamo, vanlha nhan apto lhema aphapak Apveske engankok aniem’o Jesucristo. Amen!