Rom 4 | TmfSC | STEP | Kotlhen no apvalho’ok aptemakha lhnak na nek nelieiehengka Abraham.

Romans 4

Mei’askeiam Abraham

1 Kotlhen no apvalho’ok aptemakha lhnak na nek nelieiehengka Abraham. 2 Lhta kto la aktemeskeskama apeivomo aniem’o aktaqmanma apnema, apvanke nlho lhta nkotneskesek apkammakpo napaqtavek enenlhet’avok ma’a, koka have m’a napaqtek Eniapom Neten. 3 Koka nietnek aktalhesammalhka Vakkahak Eniapom neten apaivoma hengke’e, ka ntemak:

«Mei’askeiakmok Abraham Eniapom Neten, aplheianmo nhan apto apeivomo m’a» ^{▼▼Genesis 15:6} ka ntemak ania’a m’a.

4 Kolhva ellailhono lhema asietkeskama nak: Lhema apveske la’a mankapvankek eniangko pankek apmakmesaikama patakkom metko la apmakmekama, amanie koka sekhek ntasek emakmesama m’a. 5 Koka Eniapom Neten mo’ok aktema, mankaimommalhka henmakmesama sekhek kakpota hentemeskesek nempeivomo, apmaskeskek na mangeliamolhma aniem’o moniaskeiam, have aniem’o nelanai’a aktemakha aklheianma ley.

6 Lhnak nanek na aptemak David apketlheianmo aktaqmelakho nkek enenlhet nema nak altemeskeskama apkelpeivomo metka akianmoma. 7 Lhnak nanek aptemak:

«Aktaqmelakho nkek enenlhet apteskesaikama la apankek Eniapom Neten meliehekho apkaskamakha m’a, malha nhan apkapkeskeskama la qaselha ngkollatsekama apkelanai’a m’a. 8 Aktaqmelakho nkek na enenlhet melhenkeskekho Eniapom Neten meliehekho apkaskamakha m’a» ^{▼▼Salmos 32:1-2}

9 – 10 – 11 ¿Vanlha nlho apkelleniemo apkellelto nak nema aliaqtemenaikamok apkellammelhakha nekhatkok? ¿Nlho ka la nhan apkellelto nak metka apkeliaqtemenaikamok nekhatkok apkellammelhakha, he? Kotlheianvakho no apvalho’ok, metka nema akiaqtemenkeskama lhnak nanek nekhatkok apkammelhakha Abraham ma’a, mei’askeiakmo nhan Eniapom Neten, ka aptemeskeskamo lhnak nanek apeivomo m’a. Koka netamen nak ma’a nemo aktemeskeskaiakmo akiaqtemenammalhka nekhatkok apkammelhakha m’a kakpota ngkoitek mongenatkeskama apiempek ma’a, aktemeskeskama apeivomo aniem’o mei’askeiam. Netamen nemo nhan aktemeskeskamo Abraham malha apkeliapom apkellelto nak meliaskeiam Eniapom Neten, niekhe metka nak aliaqtemenammalhka nekhatko’ok apkellammelhakha, nnengkek koka nkek altemeskeskamo apkelpeivomo aniem’o meliaskeiam Eniapom Neten. 12 Abraham na apkeliapom apkellelto nak nema aliaqtemanma nekhatko’ok apkellammelhakha, meliaskeiam anak, kakpota nhan apkelleliehekho nak Eniapom Neten, ka aptemo lhnak nanek na Abraham ma’a amanie apmahai’a ngkolhek aktemeskeso akiaqtemenammalhka nekhatkok apkammelhakha m’a.

Apeneskamo apkeltennaskama lhema apaivoma Eniapom Neten Abraham

13 Apeneskamavek nak nanek lhema apaivoma Eniapom Neten apkeltennaskamo Abraham annenga, eniangkok hata m’a lhepop lhmankek ham, kakpota nhan aptavana’ak neptamen, ngkanek apeivomo Abraham aniem’o mei’askeiam, have aniem’o m’a apkeliehekho ley. 14 Ka apkellapvanko la enenlhet etlhevangkok apeneskamo lhta apaivoma Eniapom Neten ellangkok hata aniem’o apkelieplavkeskama ley Moises, malha aqhemo ngkotnek meliaskeiam anak Eniapom Neten, aqhemo nhan ngkotnek ma’a apeneskamo lhta apaivoma Eniapom Neten ellangkok hata. 15 Niaqmonkasakhek aptemakha meleliehekhok la enenlhet ley, koka metko la ley, mamma apketselhnanemmap ma’a meleliahakho la’a.

16 Aptemakha lhnak nanek apeneskamo aplheianma Eniapom Neten ellangkok hata, apketlhevangkek ma’a aplhamakho aptavana’ak neptamen Abraham aniem’o la meliaskeiam, metka akianmoma. Apkellelto nak judios akietnema ley Moises kakpota nhan aplhamakho enenlhet’avok lhma nkek ham aknangko la nhan meliaskeiam malha aptemo lhnak nanek na Abraham, apto nhan malha eniapma’ak nenlhamakho nengelelto nak mongeliaskeiam. 17 Ka ktemo nak na aktalhesammalhka Vakkahak Eniapom Neten apaivoma hengke’e:

«Astemeskaskek lheiap apiapma’ak aplhamakho apkellavakha lhmankek ham» ^{▼▼Genesis 17:5} lhnak nane ntemak ania’a.

Man nak ei’askeiakmok Abraham Eniapom Neten, apto akietnema apmopvana apanke, enaklhatekhaskamok na apkenmaskengvaiakmo, apvankek na elhenek qaselha amanie nkovak hata. 18 Mmaskenkek nak al·halhnekama apvalhok Abraham nkotak hata atka aptava, koka mei’askeiakmok Eniapom Neten apmopvana elanak aptemakha lhta apkeltennaskama ngkotnek hata apiaihekama Abraham, lhnak nanek aptemak Eniapom Neten apkanemo m’a:

«Aplhaniek hata etnek aptavana’ak neptamen lheiap» ^{▼▼Genesis 15:5} lhnak nanek aptemak apkanemo.

19 – 20 Koka mankapvanke lhta niekhe etak apketka Abraham ma’a, apvaneiam apanke lhta songkek, malha 100 anio apanko lhta m’a. Iennaktema naie’ lhta nhan aptava Sara, koka ma lhta nkoietnammalhkak napa’at ma’a aniem’o avanhe lhta mei’askeiam aktemakha apeneskamo apaivoma aplheianma Eniapom Neten eniangkok hata ma’a, netamen aptemo lhta nhan ma’a gracias Eniapom Neten. 21 Apiamave panke lhta Abraham Eniapom Neten apvankek eieplavkesek aptemakha lhnak nanek apeneskamo apaivoma aplheianma eniangkok hata. 22 Apvetai’ak Eniapom Neten mei’askeiam Abraham, ka aptemeskeskamo apeivomo m’a.

23 Ka aktemo na aklheianma Eniapom neten apaivoma m’a aptemeskesammakpo apeivomo Abraham. Koka have vanlha Abraham, 24 ennengko’o nhan ma’a nengelelto nak mongeliaskeiam Eniapom Neten aplhatekhaskeiakmo lhta apieseksek apkenmaskengvaiakmo Apveske engankok Jesús. 25 Apto lhta nhan ma’a nema ankongvaiam kakpota ematong hengiaqmoiekha ennengko’o aniem’o nellanekamo nkollatsekama. Netamen nemo nhan aklhatekhaskeiakmo kakpota hengeltemeskesek nengelpeivomo m’a.