Rom 5 | TmfSC | STEP | Hengeltemeskeskangke lhta panke nengelpeivomo Eniapom Neten aniem’o mongeliaskeiam, kolhva koka nentangkokhak nellasekhekho Eniapom Neten aniem’o m’a Apveske engankok Jesucristo.

Romans 5

Mongiaskeiam aktaqmelkeskama nengellaniemhaikama

1 Hengeltemeskeskangke lhta panke nengelpeivomo Eniapom Neten aniem’o mongeliaskeiam, kolhva koka nentangkokhak nellasekhekho Eniapom Neten aniem’o m’a Apveske engankok Jesucristo. 2 Kolhva envanka’ak angelteteskakhak na apnakha m’a, angelletsevasama nhan aniem’o m’a. Nkelpaihakhek engelvalho’ok kolhvave nak ngkanek alel·halhnekama engvalho’ok angelvakhak hata apnakha m’a kakpota nhan ma’a ampasmekhak hata qaselha altaqmanma Eniapom Neten apanko’ok.

3 Nkelpaihakhek na engelvalho’ok ngkanek ntepkaskek na nenvaskapekho neksa akvai’a la akientalhnema. 4 – 5 Ka akietno la ennengko’o nenvaskapekho nak, ntepkaskek na akiennaktema nenieplavkeskama, ka akietno la akiennaktema nenieplavkeskama, nkotiepok hata nhan al·halhnekama engvalho’ok angvetak hata aptemakha apeneskamo aplheianma Eniapom Neten, ngkanek apkellanengke lhta engelvalho’ok nengasekhai’o nak aniem’o Espíritu Santo.

6 Mongeliennaktema lhta sekhe lhta ennengko’o, nkaqhok koka apketsepme lhta apankek Cristo henianmoma m’a. 7 Nientelhek ankek enietsepok lhema enenlhet kakpota eniavakpok enenlhet la apeivomo, enietsepok kelha nhan lhema enenlhet kakpota eniavakpok enenlhet apkamelaianlha la’a. 8 Koka Eniapom Neten hengelvetaskaskek akiavai’a nkek hengellamelaiam ngkanek apkapaskangkek Cristo kakpota enietsepok hengiaqmoiekha ennengko’o neksa nellanekamok ngkollatsekama. 9 Kolhva koka hengeltemeskeskamak nengelpeivomo Eniapom Neten aniem’o apketsepma Cristo, have ta nha niapak ngkotnek hengelvongkesek tep ma’a akvo’o ta aknem nengeliekpelkammalhkelha. 10 Nelammelhmakha lhta ennengko’o Eniapom Neten, nkaqhok koka hengellasekhekhave lhta apankek aniem’o lhta apketsepma Apketka. Kolhva koka hengellamelekhavek mokhom ma’a, have niapak ankek hata nha ngkotnek hengelvongkeskama tep ma’a aniem’o aktaiekha mokhom aphalhnankok Apketka. 11 Nkelpaihekhavek koka engelvalho’ok kolhvave nak ngkanek hengenmekho mokhom takha Eniapom Neten aniem’o Apveske engankok Jesucristo.

Apietkesammap Adan Jesucristo

12 Ka akvai’o lhnak nanek mongeleliehekho hengaskamakha Eniapom Neten aniem’o lhema aphapak enenlhet apvesai’a Adan. Meliehekho lhnak nanek apkaskamakha m’a Eniapom Neten. Netamen akpaihekho lhmankek ham nengetsepma nak ngkanek aplhamakho nhan enenlhet’avok meleliehekho m’a. 13 Amanie lhnak nanek akmahai’a nkovak ley Moises, lhennenga lhnak na noka akietnemakha meleliehekhok apkellaskamakha Eniapom Neten enenlhet ma’a. Metkelha lhtoka ley ma’a atlhenkeskekho la apkellanekamok ngkollatsekama m’a, 14 koka nkaqhok apkeletsepme lhta mota enenlhet’avok ampai’o lhta Adan akvakmo Moises aniem’o apkellanekamok qaselha ngkollatsekama. Koka mok aktema lhnak nanek Adan meliehekho m’a lhema apaivoma apkaskamakha Eniapom Neten.

Adan koka apietkesammap ma’a malha niekhe enenlhet aplhenammakpo lhta evak ^{▼▼Cristo koka niekhe m’a.}. 15 Akvai’o akientalhnema nak aniemai’o Adan, koka mo’ok aktema Eniapom Neten hengellaiangko metka akianmoma.

Akvai’o nak apkeletsepma lhamakho enenlhet lhmankek ham aniem’o meliehekho lhema aphapak enenlhet, Adan apvesai’a m’a. Koka Eniapom Neten na hengellaiangko qaselha metka akianmoma altakmelkeskamo nak nengellaniemhaikama nenlhamakho aniem’o koka nhan lhema enenlhet apvesai’a Jesucristo.

16 Hai’, akvai’o nak nengetsepma lhmankek ham aniem’o lhema enenlhet meliehekho apkaskamakha Eniapom Neten, koka akvai’o nhan netlhevai’a metka akianmoma aniem’o apentalhnema enenlhet meleliehekho m’a, nkaqhok koka apkeltemavek Eniapom Neten etneskesangkok apkelpeivomo. 17 Aveske lhta ntemak nengetsepma nak apieseksek enenlhet’avok aniem’o lhta lhema enenlhet meliehekho apkaskamakha Eniapom Neten. Kolhva koka nkoltemeskesek hata apkelientalhnemo apkellelto apketlhevaikamok alhnankok apkellangiemhaikama, nema altemeskeskama nhan apkelpeivomo metka akianmoma aniem’o lhema enenlhet apvesai’a Jesucristo.

18 Lhennenga lhta aplhamakho enenlhet’avok apketselhnanemmap aniem’o Adan meliehekho apkaskamakha Eniapom Neten, kolhva koka neltemeskaso apkelpeivomo, apketlhevai’o nhan alhnankok apkeliennaktema aniem’o apketsepma Jesucristo akietemo nkoie’. 19 Lhema enenlhet alhta apmanie panke meliehekho apkaskamakha Eniapom Neten, hengeltemeskeskamo nhan ennengko’o mangeleliehekhok. Netamen na lhema aphapak apanke lhta nhan enenlhet apkeliehekho apkaskamakha Eniapom Neten, hengeltemeskeskamo nhan ennengko’o nengelpeivomo m’a.

20 Ka aktemakha lhnak nanek akvai’o ley Moises ma’a atlhenkeskekho apvalho’ok enenlhet meleliehekho apkellaskamakha Eniapom Neten, niaveiangkek nak nanoka meleliehekho m’a, koka neten ankek nak nanek na ntemak akiavekamok aktaqmanma apkellanei’o Eniapom Neten. 21 Mang nantek na meleliehekho apkellaskamakha Eniapom Neten, lhna songkek akvai’o nengetsepma m’a. Kolhva koka nhan ngvai’ak aktaqmanma hengellanei’o Eniapom Neten, hengeltemeskeskamo nhan nengelpeivomo metka akianmoma, kakpota nhan hengellaiangko akiennaktema enneniek mankotnengvaianlha nnelha aniem’o Apveske engankok Jesucristo.