Rom 7 | TmfSC | STEP | Ketlhengkap elialheng’a, apkeliavek ley anak nietnek akmovana takhaplhet’ok apkellelto nak mokhom aphalhnanko’ok, koka apkeletsepo la’a, mmaskek na akmovana ley.

Romans 7

Cristo hengel·hatsoskekha neksa hengenmaikamok ley

1 Ketlhengkap elialheng’a, apkeliavek ley anak nietnek akmovana takhaplhet’ok apkellelto nak mokhom aphalhnanko’ok, koka apkeletsepo la’a, mmaskek na akmovana ley. 2 Ka aktonak lhema ngkelvana la apnema la atava’, malha nha ntak aknaqtetemmalhko lhemek atava’ la’a aniem’o ley, koka apketsepo la atava m’a, mmaskek na m’a malha aktetema lhemek atava aniem’o ley. 3 Koka apno la mokhom atava, nkomekhak po’ok, nkotvaksek hata nhan aliemhapma. Koka apketsepo la atava, mmaskek na akmovana takhalhet ley ma’a, avankek nkoteniekhak po’ok atava, have nhan akvesai’a m’a aktevaskama la aliemhapma.

4 Nnavek na ketlhengkap ma’a elialheng’a, mamma akmovana ley takhaplhet’ok ngkanek malha apkeletsepmo lheme lhta Cristo, apto nhan nema aklhatekhaskeiam apieseksek apkenmaskengvaiakmo. Kolhva koka aptangkokhak apkelpasmekhak Cristo, apvanka’ak na ellanangkok qaselha akleklemelha la apvalhok Eniapom Neten. 5 Lhennenga lhta ennengko’o nengellaneiangke mota qaselha ngkollatsekama, hengenmaikama lhta aliaspongkomakha nak engelvalho’ok, hengeliateiangke lhta angeliekak ley, ka nkanek akvai’o nak ma’a nengetsepma. 6 Kolhva koka mmaskek hennakteto m’a ley ennengko’o, ngkanek malha neletsepmo lhemek Cristo. Envanka’ak angellasennama Eniapom Neten alhnankok nentemakha, aniem’o nhan hengelleltennasekamok Espíritu m’a, have m’a nentaiangkolha lhta lhennenga hengelleltennasekamok alhta ley.

Akietnema mongeliamolhma ennengko’o

7 Nketlheianmek kelha apvalho’ok ketlhengkap akto ngkollatsekama ley anak, koka have niekhe m’a, vanlha koka niekhe hengaskama qaselha ngkolatsekama m’a. Ma lhta angeliamok sekhe lhta ennengko’o mangkolatsekama atsepaikama nak enneniek, koka akvai’o henganemakha, lhta ntak hengellano’:

«Mellanamo nke mota qaselha nak alletsepaikamo mota apnenio’ok», ka ntema mota m’a.

8 Nelleng’a ennengko’o henganemakha nak, kolhvavek ankek na hengeliatengkok aliaspongkomakha nak engelvalho’ok kakpota nkoletsepok ennenio’ok qaselha kakpota nhan angeliekak ley. Koka mankoietno la hengellaskama ley anak, manghengeliatangke na engelvalho’ok aliaspongkomakha nak kakpota nhan mangeliekek na ley anak. 9 Lhennenga tep nak nanek mamma ennengko’o ley anak, netamen akvai’o m’a hengeskamakha, ka aktepo nhan hengiatekamok angeliekak ma’a aliaspongkomakha nak engelvalho’ok, 10 malha lhta neletsepma ntemak ma’a.

Ka henganemakha nak mmahai’a lhta niekhe hengellangkok nengeliennaktema, koka nsoiakmek ma’a nengetsepma nak, 11 ngkanek nellengai’a mota hengellaskamakha nak, ka aliaspongkomakha nak engelvalho’ok hengeliatengkek angeliekak ma’a, netamen ma’a nlhenalhkek antekievekhak ma’a.

12 Hai, have niapak ankek ley anak akto akpokkenammalhka, kanhan nellanemmalhkelha nak antangkok akpokkenammalhka, akpeivomo kanhan aktaqmanma nkek. 13 Kelha ngkotnek atlheianma apvalho’ok ketlhengkap have aktaqmelo henganemakha nak ngkanek nlhenkek anmatnekha nelan’o la ngkollatsekama, kelha ngkotnek atlheianma apvalho’ok ma’a.

Koka mankoietok etnangkok ma’a, koka akto hengeliantemekha nengetsepmakha akvesai’a nak ngkollatsekama, akto nhan hengeliatekamok kakpota angellanangkok qaselha ngkolatsekama, hengeliekaskama nhan henganemakha akto niekhe nhan aktaqmelo. Atlhenkeskekho nhan engelvalho’ok mangkolatsekama nkek ma’a ngkolatsekama nak nelanai’a.

14 Nengeliavek ennengko’o ley akto aktaqmelo, aniem’o nhan Eniapom Neten. Ennengko’o koka nellanekamok anak ngkollatsekama, malha aktonak nema asennaikama nema apianmoma nak emekhak po’ok apveske akvesai’a koka ngkollatsekama kakpota hengellasennama m’a. 15 Nemmahai’avek niekhe angellanangkok qaselha aktaqmelo, koka netamen ma’a nellanengkek qaselha ngkolatsekama, mongeliohok ennengko’o m’a selha aktemo ie’. Mankolleko niekhe nhan engelvalho’ok angellanangkok ngkolatsekama, koka nkaqhok nellaneiangkek ma’a. 16 Nketlheianvakhek ennengko’o engelvalho’ok ley akto aktaqmanma, nkeltavek angellanangkok akpeivomo, koka ennengko’o mongapvankek angelleliehekhok ma’a. 17 Malha niekhe have aniem’o ennengko’o nellanekamok ngkollatsekama, aniem’o koka hengeliatekamok ngkollatsekama nak. 18 Aliaspongkomakha nak engelvalho’ok hengeliatengkek angellanangkok qaselha ngkolatsekama, niekhe mangeleltemo angellanangkok ma’a, koka nellanengkek ma’a. 19 – 20 Nenmak’ave niekhe angellanangkok qaselha altaqmelo, koka mongellanenkok. Mang koka nhan niekhe nkonmak’ak angellanangkok ngkollatsekama, nkaqhok koka nellanengkek ma’a. Ka atlheianvakho ennengko’o engelvalhok ma’a have ennengko’o nelleniemai’a, koka aniem’o m’a ngkollatsekama nak akietnema ennengko’o engelvalho’ok.

21 Hai’, nenmak’ave niekhe angellanangkok qaselha altaqmelo, nnankek koka nhan malha ley akiennaktema nkek hengiatekamok engelvalho’ok anak angelanangkok qaselha ngkolatsekama. 22 Avanhe niekhe nellamelaiam ley apankok anak Eniapom Neten, 23 koka engelvalho’ok anak ennengko’o nnankek ley ankok ngkollatsekama nak, nkennapelhkek na ley apankok anak Eniapom Neten, hengeliatengkek angellanangkok qaselha ngkollatsekama. 24 ¡Ennengko’o la ie, se lha hengelpaqnengkaskesekha ngkollatsekama nak malha akiennaktema nkek hengenmaikamok la’a! 25 Vanlha koka niekhe Eniapom Neten apvankek ma’a aniem’o nhan Apveske engankok Jesucristo, hai’, ntase kankek ma’a, gracias Eniapom Neten.

Ngvakmek aktakha nnelha hengke’e, have niapak anke nenmak’ak angeleliehekhok ley apankok Eniapom Neten, koka engelvalho’ok anak akmaikama ley ankok ngkollatsekama nak.