Romans 8

Kolhva hengenmaikama Espíritu Santo

1Ka ngkeniemai’ak ma’a kolhva mamma hengetlhenek netselhnanemmalhka nengelelto nak nempasmekha Cristo Jesús, 2ngkanek ley Espíritu nak hengelpaqnengkasekha akmovana ley ankok ngkollatsekama ka nhan nengetsepma nak, hengellaiangko nhan neliennaktema aniem’o m’a Cristo Jesús. 3Ley anak Moises mmahai’a lhta niekhe hengelvongkesek tep, ma lhtoka nkomovanak ma’a aniem’o ennengko’o mangeleliehekho m’a, aniem’o mongeliennaktema. Ka nkeniemai’ak Eniapom Neten eniapaksek apketka aptemeskasekho enenlhet apanke. Aptemengvai’o nhan meiennaktema m’a kakpota enietsepok hengeliaqmoiekha ennengko’o, niekhe aptemongvai’a enenlhet apanke, meiennaktema nhan, nkaqhok koka ntevaskangkek ngkollatsekama nak. 4Hengellaiangko lhta nhan nenmopvanka’a kakpota angelieplavkesek akpeivomo nkek aktemakha aklheianma ley, kolhva koka envanka’ak ngkanek mmaskek hengenmangka m’a aliaspongkomakha nak engelvalho’ok, kolhva koka hengenmama m’a Espíritu.

5Apkellelto nak anmaikama aliaspongkomakha apkelvalho’ok, vanlha mota atlheianma apvalho’ok ellanangkok qaselha ngkolatsekama. Koka apkellelto nak apkenmaikama Espíritu Santo, vanlha mota atlheianma apvalho’ok ellanangkok apkeltemelha la ellanangkok ma’a. 6Apkellelto nak apkellanekamok qaselha ngkollatsekama, nnek aliaqmongkasakho apkeletsepma, koka apkellelto la apkellanekamok qaselha akleklemelha nak apvalhok Espíritu Santo, nnek akiaqmongkasakho aliennaktema apnenio’ok kakpota nhan altaqmelaikama apvalho’ok. 7– 8Apkellelto nak apkelieplavkeskama aliaspongkomakha nak apvalho’ok, koka apkelvesai’a apkellammelhma Eniapom Neten, mankonmak’ak na eleliehekhok ley apankok ma’a, mankollapvanka’ak nahan, mankonmak’ak na ellekkaskesama apvalhok Eniapom Neten.

9Ketlhengkap koka melieplavkasak aliaspongkomakha nak apvalho’ok, apkelieplavkaskek koka m’a aptemakha Espíritu apankok Eniapom Neten. Koka metko la apvalho’ok Espíritu apankok Cristo, have nhan apkennemolhema m’a. 10Apno la Cristo apvalho’ok ketlhengkap, nietnek na apvalho’ok alhnankok aniem’o Eniapom Neten apkeltemeskeskama apkelpeivomo, koka apkeliokha nak malha aletsepma aniem’o qaselha ngkollatsekama apkellanekamok. 11Apno la apvalho’ok ketlhengkap Espíritu apankok Eniapom Neten apto lhta nhan aptemeskasekha aphalhnankok Cristo Jesús, ellangkok hata m’a alhnankok apkeliokha aniem’o m’a Espíritu apankok Eniapom Neten apno apvalho’ok ketlhengkap, koka apkeliokha nak akmovana nkomaskengvomok. 12– 13Mankolatsama ta nengeleliahakho la aliaspongkomakha nak engelvalho’ok ngkanek avankek hengaqhek ma’a, koka nelvatesangko la nellanekamok qaselha ngkollatsekama aniem’o nhan hengelpasmoma Espíritu Santo, angelloka ta nkotnengvaianlha nnelha.

14Aplhamakho apkellelto la apkenmaikama Espíritu apankok Eniapom Neten, koka apkelvesai’a Eniapom Neten apketkak ma’a. 15Metlhevangkok ketlhengkap apvalhok anmahai’a nak nkoltemeskesek malha allasennaikama nema apkelianmoma, ka nhan altemeskeskama nak apkellai’a mokhom, apketlhevangkek koka Apvalhok apkeltemeskeskama Eniapom Neten apketkak. Kolhva koka apvanka’ak elteteskakhak Eniapom Neten, apvanka’ak na elpaqmetkesek nalhepe’ apkelpaqmeiasma ellanhoho’, etnangkok ellana hengke’e: —Ta.

16– 17Ka Espíritu nak apaqmetkesangkek engelvalho’ok engankave, have niapak ankek ennengko’o nak nengelelto Eniapom Neten apketkak, angetlhevangkok hata lhemek Cristo aptemakha lhta apeneskamo apaivoma Eniapom Neten. Nengelelto la angetlhevangkok hata altakmanma m’a, nnavek na Cristo m’a elhkak hata, nkaimelhkek koka sekhek angenmangkok takha akvo’o la akientalhnema nak ma’a, aptemo lhta nhan Cristo.

Qaselha aktaqmelo nkovak hata

18Niekhe nellengaiangko ketsek akientalhnema kolhvave nak, mangkolhnok avanhek hato ka m’a aktaqmanma angelloka m’a. 19Avanhek na alel·halhanma qaselha apkelentepkeskama lhnak na nek, Eniapom Neten eltemeskasekhak ma’a alientalhnemo apkellelto apketkak. 20Ka nema nak aliennaiangkoho nkonaqtevasalhka lhamakho qaselha nema alentepkeskama, have aniem’o anko’ok ankavek, koka aniem’o m’a Eniapom Neten. Koka nietnengke mota nhan alel·halhanma m’a 21ngkolhek hata alvongkaso tep neksa anmaikama aknaktevaskama. Allakhaikama av‘alho’ok nahan, ka aktemo nak ma’a Eniapom Neten apketkak nemo nak alpaqnengkasekho anmama maniamolhma. 22Ampai’o lhnak tep nak nanek allengaiangko qaselha nema alentepkeskama nak, akvakmo nenvanlha nak allengaiangko, allapenteikamok malha ngkelvana akmahai’a nak nkotengkesek atka’. 23Nellapentengkek na ennengko’o, niekhe akietnema Espíritu apkelientemongkeskamo lhta amanie hengellaikamok, nkaqhok koka avanhek nellengaiangko nengelel·halhanma ngkolhek hata hengeltemeskesakho Eniapom Neten apketkak akiokho nkoie, ngkolhek hata nhan akiaqmongkasakho mo’ok neniokha alhnankok nkanek neniokha nak anmaikama mota maniamolhma. 24Nengelvonkasemmalhkek tep neksa hengenmaikama nengetsepma ngkanek nengelelehalhanme lhta m’a, kolhva mankaimommalhkak mokhom angelel·halhnama ngvai’ak ma’a. 25Koka nkaimommalhkak ma’a angelel·halhnama ngkolhek akiaqmongkasakho mo’ok neniokha alhnankok nkanek neniokha nak anmaikama mota maniamolhma, ntasek angellailhek nkovak ma’a akieplomo nelvaskapma m’a.

26Mongeliennaktema ennengko’o, mangeliohok na aktemakha akpeivomo nengenmalhnongkoma Eniapom Neten, koka Espíritu Santo hengelpasmak ma’a, apkelmalhnema apmalengioikama Eniapom Neten kakpota hengeltaqmelkese mota m’a, mangeliohok ennengko’o aptakha mota. 27Apiavek koka Eniapom Neten alketansema engelvalho’ok, apiavek na apto apkenmalhnekama Espíritu Santo ngkanek apkenmalhnema mota apmahai’akha la etnek Eniapom Neten apkellelto la apkelpokkanma m’a.

Mamma qaselha akmovana hengellammelhek

28Neliavek ennengko’o Eniapom Neten apkelpeneskasavek lhamakho qaselha kakpota nkoltaqmelkesek apkellangiemhaikama apkellelto nak apkellasekhai’o, Eniapom Neten apkellavekama nhan kakpota elieplavkesek na apkellanemakha la etnangkok ma’a. 29Lhennenga koka apiamo Eniapom Neten apto ta apkavekama, apkeliekieskama nhan kakpota ngkovomok hata malha aptema m’a apketka apanke. Koka apketka apanke nak ma’a apto metno pketkok apieseksek apentalhnakha apkelialheng’a. 30Hai’, lhennenga apkeliekieskama Eniapom Neten ma’a, netamen apkellaveiangka nhan, apkeltemeskeskamo nhan apkelpeivomo, apkeltemeskeso nhan neten apankavek apkeliaspommap ma’a.

31¡Ntasek ankek aktemakha qaselha nak ma’a! Apno la nengekha Eniapom Neten, mamma nhan enenlhet apmopvana la hengellammelhek. 32Apkeltave lhta Eniapom Neten eniangkok apketka kakpota enietsepok hengeliaqmoiekha ennengko’o, have niapak anke hengellangkok hata nhan alaimommalhkelha la qaselha ennengko’o. 33Mamma apketlhenammap la apkellelto nak Eniapom Neten apkeliekieskama, ngkanek Eniapom Neten apto apkeltemeskeskama apkelpeivomo m’a. 34Mamma nhan nkotlhenek apketselhnanemmap ma’a, ngkanek apketsepme Cristo Jesús apkeliaqmekha m’a. Netamen aptaiekho lhta nhan mokhom aphalhnankok, kolhva koka apnek ma’a napokha akiennakha Eniapom Neten, apkeltennaske mota apkeltemo elpasmok ma’a. 35Mamma qaselha akmovana hengiengiavkesek nengasekhai’o Cristo, niekhe nellengaiangko akientalhnema, niekhe akmaska, nema henmenlhenaikama, mek, metka netsekama, qaselha nengai’a, neletsepma aniem’o pelettav akvenaktema, mamma qaselha nak ma’a akmovana hengiengievkesek nengasekhai’o Cristo. 36Ka ntak na Vakkahak aktalhesammalhka Eniapom Neten apaivoma:

«Aniem’o lheiap nelieplekama, nentekievke mota, hengeltemeskaskek malha nepkesek nema akiantemekha ta aptekiomakha» ntemak ma’a.

37Koka nengeliephongvakmek ma’a aniem’o hengelpasmoma Eniapom Neten apto nhan hengamelaiam. 38Nengeliavek na ennengko’o akto have niapak ankek mamma qaselha akmovana hengelieniavkesek hengamelaiam Eniapom Neten, niekhe nengetsepma, nengeliennaktema, ángeles, kasekapo av‘alho’ok, aktakha nenvetai’a kolhvave nak, aktakha ta nhan emmanie nak. 39Mamma akmovana aniem’o neten anak kakpota nhan konne ankek nalhepop anak, mamma qaselha apkelentepkeskama lhta Eniapom Neten, mankollavankek na hengelienievkesek hengamelaiam Eniapom Neten aniem’o Apveske engankok Cristo Jesús.