Rom 9 | TmfSC | STEP | Have niapak ankek asmak’akha nak atnek alheianma, metka asmopvana ania’a ngkanek moi’askeiam Cristo, kanhan Espíritu Santo apmaikama mota aklhenaikama nak evalhok.

Romans 9

Eniapom Neten apkeliekieskama ko Israel

1 Have niapak ankek asmak’akha nak atnek alheianma, metka asmopvana ania’a ngkanek moi’askeiam Cristo, kanhan Espíritu Santo apmaikama mota aklhenaikama nak evalhok. 2 Avanhek ankek akmaiose evalhok, aslengaiangko nhan 3 aktemakha askelvetai’a aspaivomo lhema judios. Evankek niekhe annangkok akientalhnema aknemo m’a apkellengaiangko apkelhakhangveiam la Cristo, ntasek na niekhe annangkoho akientalhnema nak ma’a kakpota alpasmok elialheng’a judios. 4 Apkellelto aptavana’ak neptamen Israel ma’a, apkeliekieskangkek nak nanek Eniapom Neten ma’a kakpota etnangkok apketkak. Apketlhelhma’ak nak nanek na aptaiangkok apkenmangkolha la amai ma’a, apkelvetaskeskangkek nak nanek na qaselha mongvetai’o. Aknemo mo’ok lhnak nanek apvalho’ok aptaiangkok apkenmahai’akha la etnangkok ma’a, apkellaiangko lhta nhan ley apankok, apketlhekmoseiangko nhan etnangkok eliavenkaskesok Apvesai’a m’a, apkellaiangko lhta nhan lhema apaivoma akmak’ak hata ngkotnek apkellaniemhaikama.

5 Apkellelto nhan aptavana’ak neptamen nelieihengka’a judios aptaiangko lhnak nanek neten apankavek, Cristo nhan apto aptavana’ak neptamen ma’a, apnemo nhan Eniapom Neten, aptek apveske takhalhet’ok qaselha lhma nkek ham. Hai’, ntasek ankek aniavenkaskesama mota apvesai’a m’a. Amen.

6 Malha niekhe Eniapom Neten meieplavkeskama la aktemakha alhta apaivoma ellangkok Israel, koka aniem’o m’a have aplhamakho apkennemolhema Eniapom Neten. 7 Apkellelto aptavana’ak neptamen Abraham, have nhan aplhamakho apkennemolhema Eniapom Neten, lhnak nanek aptemak apkanemo Eniapom Neten Abraham:

«Elentepok hata aptavana’ak neptamen lheiap apkelleniem’o m’a apketka Isaak», lhna aptemak ma’a.

8 Koka akvesai’a m’a, mankollapvankek etnangkok Eniapom Neten apketkak aniem’o m’a aptaikamok judios, nlho ka la nhan po’ok enenlhet, vanlha koka aniem’o m’a apeneskamo lhnak nanek apaivoma aplheianma Eniapom Neten ellangkok hata. 9 Lhnak nanek aptemak apkanemo apeneskamo apaivoma Abraham eniangkok hata:

«Avatamok hata mo’ok aknem kakpota nkotak atka aptava lheiap Sara», lhna aptemak ma’a.

10 Lhnak nanek na ntemak Rebeca alvetai’o lhnak apkanet atkak ma’a, apkeliapom koka m’a Isaak nelieihengka. 11 – 12 – 13 Amanie lhnak nanek apkenmahai’a epalemmak m’a, mamma mokhom apkellanekamok qaselha ngkolatsekama, nlho ka la aktaqmanma, koka Eniapom Neten apkeltennaskangkek nak nanek Rebeca apselhiek eniasennama ta metno apketkok. Ka ntemak na aktalhesammalhka Vakkahak Eniapom Neten apaivoma:

«Avanhe skamelaiam Jacob aselhtek Esaú», lhna aptemak Eniapom Neten.

Apvankek Eniapom Neten apmak’akha la eliekiaqsek enenlhet, nkaqhok meliamolhma la’a nlho ka la apiamolhma kakpota emakmesama apmak’akha la enmeksek apkellanei’oho.

14 Nkotlhenek kelha apvalho’ok ketlhengkap mankoietemo aptakha Eniapom Neten ma’a, have koka niekhe m’a, 15 ngkanek lhnak nanek aptemak apkanemo Eniapom Neten Moises:

«Apiosek alanhok enenlhet asmak’akha la aliekieksek, asietnai’o nhan napa’at enenlhet asmak’akha la aliekieksek», lhna aptemak.

16 Apietnai’o pankek napa’at Eniapom Neten apmak’akha la etneskesek enenlhet, have aniem’o enenlhet apmak’akha la etne panke, have nhan aniem’o aptaqmelkasemmakpo la’a napaqtek ma’a. 17 Lhnak nanek aptemak apkanemo Eniapom Neten apveske Egipto:

«Astemeskaskek ko lheiap apveske kakpota aienientak akientalhnema takhaplhet lheiap, kakpota nkotkama ania’a akietnema asmopvana lhmankek ham», lhnak nane aptemak.

18 Hai’, have niapak ankek ma’a, apvankek Eniapom Neten apmak’akha la etnehek, apkelietnavek napaqta’a moklhem’a enenlhet, po’ok enenlhet koka apkeliennakteskaskek apvalho’ok.

19 Hatelha ngkotnek atlheianma apvalho’ok ketlhengkap: “Mankollapvankek enenlhet enmankok apmak’o la eliennakteskesek apvalho’ok Eniapom Neten, ka ngkanek na mankolatsama kelha Eniapom Neten ellangkok akientalhnema aniem’o aliennaktema apvalho’ok ma’a. Hatelha ngkotnek atlheianma apvalho’ok ketlhengkap ma’a”.

20 – 21 ¡Mankoieto nkotnangkok atlheianma apvalho’ok ketlhengkap ma’a! Ngkanek Eniapom Neten apvankek elana apmak’akha la elana, hengellan’a lhta nhan ennengko’o, mongapvankek na annaveskamok ma’a. Malha akto nak ietangvalhva nak apkelanai’a, mankapvankek enavaksek apto apkellanai’a, apvanke elanak lhema ietangvalhva neten aptaqmanma aplhenammap, po’ok na metka aplhenammap aptaqmanma, koka lhema apiaqhapeskama nialpa apkelleniemai’a m’a.

22 Malha niekhe la apmahai’a elvetaskesek aploma Eniapom Neten kanhan apmopvana, apvaskapma apkellailhema metka akpekhai’a ietangvalhva alietemo la apnaqtevasemmap. 23 Kanhan apmak’ak elvetaskesek akiavai’a nkek apkellamelaiam ietangvalhva apkelpeneskama lhta apkellanai’a lhennenga kakpota eniapiosek elanhoho. 24 Koka ietangvalhva nak ennengko’o niekhe m’a nengelelto judios kakpota nhan metnangko nak judios nenlhamakho nengelelto hengellavekama Eniapom Neten. 25 Ka aktemo nak na aktalhesammalhka’ vakkahak Oseas:

«Apkellelto mankotno askennemolhema, atnek hata askennemolhema, apkellelto metka allamelaiam, allamelemmak hata ko’o m’a» ntemak ma’a.

26 Ka ntemak na aktalhesammalhka mo’ok:

«Akieto nak ma’a, lhna nnema aktemo have askennemolhema ketlhengkap, koka akieto nak ma’a hata nhan etlhenakpok apketkak Eniapom Neten apto menietsepma» ^{▼▼Oseas 1:10}.

27 Aplheianmek nak nanek na Isaias apkeltemakha apkennemolhema Israel, lhna aptemak:

«Aplhanie panke aptavana’ak neptamen Israel malha niekhe lhepop aktek anak neiava alvata aknangkongvaiam, koka aselhtek hata ngkolhek alvongkaso tep. 28 Kolhvavek hata Eniapom Neten etnek apsavhomo aptemakha apaivoma aplheianma lhmankek ham» ^{▼▼Isaias 10:22-23}.

29 Lhnak nanek na aptemak mokhom Isaias:

«Lhta melaiakmo la moklhem’a engketkak Apveske aknema apmopvana, ansavhalhko lhta nenlhamakho ka aktemo lhnak nanek Sodoma kakpota nhan Gomorra» ^{▼▼Isaias 1:9}.

Nema hengeltemeskeskama negelpeivomo aniem’o mongeliaskeiam

30 ¿Ko la antemeskesek nenlheianma, he? Apkellelto nak metnangko nak judios meteniaiangkok etnangkok apkelpeivomo, nkaqhok koka Eniapom Neten apkeltemeskeskangke lhta apanke apkelpeivomo aniem’o meliaskeiam ma’a. 31 Koka Israelitas apteniaiangke lhta mota etnangkok apkelpeivomo aniem’o ley Moises, ma lhtoka nkonmopvanka’ak ma’a, 32 ngkanek vanlha koka apvanka’ak etnangkok apkelpeivomo aniem’o meliaskeiam, have aniem’o henganemakha nak Moises. Ma lhtoka nkonmahai’ak enmok takha hengetlhekmoskama nak, nkeliaseiangke lhta lhma metaimong malha akietnema la amai alpelapongkeskamo kakpota elvomok niekhe apnakha Eniapom Neten. 33 Lhnak nane ntemak aktalhesammalhka Vakkahak Eniapom Neten apaivoma hengke’e:

«Aspekkanmek ko lhema metaimong ^{▼▼Cristo koka metaimong anak.} akieto iokhalhma Sion, aplhaniek hata nkolpelapongkesek ma’a, koka meliaskakmo la m’a, mankoliennenkesek hata m’a», lhna ntemak aktalhesammalhka m’a.