Tit 3 | TmfSC | STEP | Eleltennasamo ta nhan ellaho mota, eleliehekhok na gobernadores kanhan apkelveskai’e, eteniangko mota ellanangkok qaselha altaqmelo m’a.

Titus 3

Apkellanemmakpelha etnangkok apkellelto nak meliaskeiam

1 Eleltennasamo ta nhan ellaho mota, eleliehekhok na gobernadores kanhan apkelveskai’e, eteniangko mota ellanangkok qaselha altaqmelo m’a. 2 Ellana ta nhan lheiap melentepkasama apkelvesai’a po’ok ma’a, eteniangkok na metka akmaska, etnangkok na apkeliamolhma kanhan nalhep’avek apvalho’ok napaqtavek aplhamakho enenlhet’avok.

3 Ennengko’o lhta nhan malha nengelelto metka enqatko’ok la’a, mangeleliehekho nhan ma’a, malha lhta nhan neltaiangko netlheneiam la’a, hengenmaikama lhta nhan lhamakho aktemakha aletsepma ennenio’ok anak, nkelleklemave lhta nhan engelvalho’ok nellanengko la qaselha ngkollatsekama. Neten anke lhta mongeliamolhma, neliasepkeskama nhan, neltaqnongvekhe lhta emmo’ok engankave nenieseksa m’a, kanhan hengeltaknongkongke lhta nhan enenlhet. 4 Koka nkaqhok Eniapom Neten apto hengelvonkeskama tep hengelvetaskeskangke lhta pankek aptema apiamolhma apanke, apkellamelaiam na aplhamakho enenlhet’avok lhmankek ham, 5 niekhe lhta ennengko’o mongellaneiangko qaselha altaqmelo, nkaqhok koka eniosak’ak hengellanei’o m’a Eniapom Neten, hengelvongkeskamo nhan tep, hengellalhnaskeskamo nhan engelvalho’ok, malha nhan hengeltemeskeskamo nhan malha la kolhva nempalleiam, hengellaiangko alhnankok neniennaktema aniem’o Espíritu Santo. 6 Hai’, apiangkenke lhta Eniapom Neten Espíritu Santo aklanei’o akiekangveiakmo tekhenlhet’ok ennengko’o aniem’o nhan Jesucristo apto hengelvonkeskama tep, 7 hengeltemeskeskamo lhta nhan nengelpeivomo aniem’o aktaqmanma nke nak hengellanei’o. Kolhva nnankek alel·halhnekama engelvalho’ok angetlhevangkok hata aliennaktema ennenio’ok nkotnengvaianlha nnelha m’a.

8 Hai’, have niapak ankek astemakha na mota asketlhekmoskamo lheiap, eltakhengveskakha ta mota m’a napaqtavek aplhamakho Jesucristo apkennemolhema kakpota eteniangko mota ellanangkok qaselha altaqmelo m’a. Hai’, ntasek ma’a hengetlhekmoskama nak, avankek nkolpasmok aplhamakho enenlhet’avok.

9 Melvanenvomangkek lheiap apkellatemommap anak aktaikama nkek apketlhenaikama apkelieihengka’a aptepekamok neptamna’ak ma’a, mevhanengvom ankek na apkeliamenammap apketlheianma apkellatemommap aktemakha henganemakha Moises anak, koka akhemo m’a, mankotaqmelkesek nenganiemhaikama m’a.

10 Ka apvet’o la lheiap lhema enenlhet apkelhpankeskama apieseksek anak Jesucristo apkennemolhema ham, ennaves hata lhema nlho ka la hanet aptaiekho. Koka mankomak’o la eniailhok ma’a, meipetkangvakha nkek ma’a 11 ngkanek have niapak ankek aptevasemmakpo panke aniem’o ngkollatsekama apkelanai’a.

Pablo apkaikamok lhema apaivoma Tito

12 Angvapaksek hatelha Artemas nlho ka la nhan Tiquico apnakha nak lheiap ham, epekheso toka nhan lheiap eniakhak ma’a Nicopolis kakpota angelvetalhkak ma’a, ko’o nhan asmak’ak aniakhak ma’a kakpota alhek apvalhok pieiam ma’a. 13 Ntasek na epasmok lheiap hengetlhekmoskama ley anak Zenas kanhan alhelhma Apolos, ellamok hata nhan qaselha alaimommalhkelha la m’a kakpota ellempekhok mokhom apketlhengama, mankolaimalhkek hata nhan qaselha m’a.

14 Lhamakho Jesucristo apkennemolhema la’a ntasek eltaqmelkeskesek apkellangiemhaikama po’ok, eliangvomhok na ellanangkok qaselha altaqmelo, elpasmok na po’ok alaimommalhka nak qaselha apanko’ok.

Aklheianma apvalhok Pablo

15 Nketlhenkek na apvalho’ok lheiap hengke’e asketlhelhma’ak anak, etsakhes hata nhan lheiap aklheianma engvalho’ok nentemo lheme mongeliaskeiam ham. Askeltavek na Eniapom Neten eltaqmelkeskesek apkellaniemhaikama aplhamakho ketlhengkap ham.